San Marcos 16

1Meelh ti nôjeshch'e ca nalhu ti chit'ichay pa tcashayey ca vatshachivo lhja María Magdalena, shi' lhôj'elh María, lhamimi ja Jacobo, shi' lhja Salomé, tcashayeyjop ca nip'aclaneshch'e ca Jesús. 2Meelh ti yameyc'oya ti nich'a nalhu, palha vacha' na jumcuclaay, ti yamey ts'ivee ja lhanvalheech ja Jesús. 3Pa yit'esh ts'ivee ti yich'e' ja nôyish;

—¿She t'e papu ca nayjat'ejoom lhja uj utej yishi' ja lhashi ja lhanvalheech?

4Meelh ti yovalhey pa yivan ts'ivee lhpa uj utej ti p'alha ti tay'e lhpan chip'otajesheyshi. 5Meelh ti yuych'e ts'ivee ja nivalhech, pa yalhalha ti yi'van ja ve'lha nich'ayech ti yi'sha'ne, pitej lhja t'uyjatshiy clim, tavayey lhfayish ts'ivee pa yiesha'ne; pa nijovaytajem ts'ivee. 6Jô lhech yit'esh ti yiyôjaa:

—Ya aj ca anjova'yelh'in. Lhavôtajelhey t'ejum ja Jesús, Nazaret lhavo', jan chiyclônesh'e lhja cruz. Taj ti apis ti netshaam jô lhech, ampa ca nôque nôv'e'. A'va ca anovalhelhey na chiyantaj'e. 7Taj ti istaa ca mapeclelh nôqueesh, pa anfacle'lhem japi t'eyjatsjanjas shi' ja Pedro, pa at'eshelha ti tôtômjalhelhey'ac'oya ja Galilea; pa lhech avanelh'e, jan t'ônashelh'a canumlhu.#16.7 Mt 26.32; Mr 14.28.

8Tôlh'e ts'ivee ja nivalhech ti vacumajvatich'e, lhayaash ti nijovayvatsham'in jum, ts'anananvatsham'in shta. Jô'tajesh ti ampapu ca nanfacleem pa'na, lhayaash ti nijovayshi ts'ivee.

Pa Jesús tanôclitem lhpa María Magdalena

(Jn 20.11-18)

9Meelh ti nich'a nalhu ti yameyc'oya, lhechesh ti nich'a netshaam ja Jesús, vatjutsaesh ti tanôclitem lhja María Magdalena, lhja yisa'semfach'ee lhapesh pava napu'yama tsich'es. 10Lhjô lhech yichey nôqueesh ti nifaclemch'e japi tanaôycheelh lhapesh ja Jesús, japi lhechin yitacshinch'e, jô'tajesh ti yôyanch'e ts'ivee ja Jesús. 11Japi lhech tpeeycheytajesh ti mônlha shita ja Jesús, nifactajem lhja María Magdalena ti yi'van shita, taj ti yicacuesh ts'ivee japi lhech.

Pa Jesús tanôclitem papi napu' t'eyjatsjanjas

(Lc 24.13-35)

12Pa ve'lheesh tanôclitem shta japi napu' t'eyjatsjanjas ti yichey ts'ivee paelh yitsaat, taj ti tanu'jamc'oya pa nich'a lhjunash. 13Japi lhech yayjatesheytaj jap'elhcha pa nifactajemch'e ts'ivee java nich'a yaya'esh, taj ti mônlheesh ti tcacujanesh.

Pa Jesús yiyôjiesha papi t'eyjatsjanjas ca nivanqu'eyjatsjanesh cava lhasinôc

(Mt 28.16-20; Lc 24.36-49; Jn 20.19-23)

14Pa yôjesh'esha'ne ti vatvanjiyinesh japi once t'eyjatsjanjas ti yich'e' lhavôôj ja lhtsaccunjavat, pa lhech t'aplhuqu'e ti yiyôjeeshaan pa lhcacujayash ts'ivee shi' pa t'unjaniyash pava lhcachic, lhayaash ti ninuesha ts'ivee japi lhech nifactajem'in ti apis ti netshaam shita. 15Yit'esh ti yiyôjaa:

“Otaayshelhch'e lhacôm'a na cotsjaat ca avanqu'eyjatsjaneshelh cava isis ya'clishay, atifshelh'e lhacôm'a napi yiey na cotsjaat.*xj* 16Papu ca ninatcacujantaja ca ninaytaj shta, lhecha pa chinalhjen jayu, lhan'e vitsha papu ca natcacujantaj pa lhech jayu pa tancômclôyesh pa itôj. 17Cavôcôyi chiyjutey jayu papi ninatcacujansha'ne jaspa ninôôclheesha jayu ts'ivee ca nitsetôntajop jayu shita ca nisaastajfach'ee pava tsich'es, jô'tajesh ti nitasinôyesh pava nich'ac ya'clishay. 18T'acumesh'e jayu pava lhpôcôtôy pava tosis, ca niyô'tajshi shta ts'ivee pa vatfetaas ninc'amônlhay, taj ti tanca nivômjat ts'ivee; ca nôclôjtaj'apee pava lhpôcôtôy papi aôytesvatsham'in pa nivatsjanchatsha'ne jayu. #16.15 Hch 1.8.

Pa Jesús vapecsham pa vôôs

(Lc 24.50-53)

19Tifeshch'e atesha cavôque ti yit'esh'in, pa yalhatajesh ti ch'ayash ti nitshaam ja Lhcaanvacle Jesús, ti yicheychisham pa vôôs pa yie'sha'ne pa lhfayishey pa Dios.*xk* 20Lhan'e japi t'eyjatsjanjas pa t'ôta'yesh cava isis ya'clishay ti vanqu'eyjatsjanesh ts'ivee, taj ti nintonch'esha'ne ja Jesús yits'ayanshem cava lhclishay, pava nitsich'eeesh papu ca nitô'yish ca navclanjat. Amén #16.19 Hch 1.9-11.

Currently Selected:

San Marcos 16: NIVA

Highlight

Copy