San Marcos 15
15
1Meelh ti claafnalhu pa yivo'yeyc'oya pa t'onasheshva'ne japi vatcasinôc lhanvacles, vatpeya'shelh japi vanqu'eyjatsjanesh pava lhfanishlhavach shi' japi nitaôclasaesh ti lhcaanvaclesesh ca nôcfa' ts'ivee ja Jesús pa nicha'jey ja Pilato. 2Jô lhech Pilato niyôsesh ja Jesús pa yit'esh:
—¿A'lhech alhcaanvacleesh napi judíos?
Pa yit'esh ja Jesús:
—Yiey can ônashesh avaatsha.
3Pa lhechesh pa niclantajchishamch'e java yinôôlhjônchatajesh ts'ivee ca lhclishaya japi lhech vatcasinôc lhanvacles. 4Pa vapecla shta ja Pilato ti niyôs ja Jesús:
—¿Pa na aculhch'e napuque? A'va, nava matas nafaclesh pa ajunash'in lhapesh.
5Ja Jesús ninteesh t'ôyish'e ca nicuulh; cavôque pa yistanjatesh pava ca naychavalhemey ja Pilato.
Pa Jesús chitculhjanesh ca nivaf
(Mt 27.15-31; Lc 23.13-25; Jn 18.38—19.16)
6Meelh lhôn lhapesh ti chivatc'usinatesh'in pa pascua, pa tayôjijanesh'in ja Pilato ca chinuqueesh pa ve'lha nivacle ti vanôôcfataj, jô'lhaa ti vatjutsa' ti niyôsesh japi nivacle japi yit'esh ca nitanuqueesh. 7Lhech t'aplhuqu'e lhôn ti vanôôcfa ja ve'lha nivacle, lhey Barabás, shi' papi tanefenelh, jô lhech nivacle vôncaclônjanajesh. 8Pa lhechesh pa nôjeychisham japi nivacle ja Pilato pa yiyôjeesha ca nuqueeshem ja ve'lha lhatcumet'esh, lhayaash ti yameyjop pa t'aplhuin ti lhech lhfanishesh'in. 9Pa lhechesh pa niyôsesham ja Pilato japi nivacle pa yit'esh:
—¿Lhteetshelh ajalh ca chinuqueeshelh'am na Lhanvacle napi judíos?
10Lhayaash ti yitô'ya ti yijuctsenesh atesha japi lhech vatcasinôc lhanvacles, lhechin tôlh'ejop ti vanôôcfa. 11Lhan'e japi vatcasinôc lhanvacles pa yimatsenshaan ti yiyôjeesha japi nivacle ca nilhechiyan jôcl'esh ja Barabás, ca nit'aalhsha ja Pilato ca nitanuqueesh lhavaatsha. 12Pa tasinôy shita ja Pilato pa yit'esh:
—¿Ta ca yifanisheesh nôque nivacle nan aqueyshelh judíos Lhanvacle?
13Pa yachajeshjulh ti yicuulh ts'ivee pa tôneshvatsham'in japi nivacle pa yit'esh:
—¡Aclônesh'e lhpa cruz!
14Pa yit'esh ja Pilato ti yicuulh:
—¿She ajalh pa lhivalhelha jayu nôque?
Pa lhechesh pa yijô' pa yisitsenesh pa yit'eshts'ivee:
—¡Aclônesh'e lhpa cruz!
15Ja Pilato yit'esh ca nishamitjat japi acloj nivacle japi yitsôyinjop, jaspa tayôjijanesh ja Barabás ca chinuqueesh. Pa lhan'e ja Jesús pa tayôjijanesh ca chinc'ôn'in, mônlheesh shta ti yijutey japi lhcavos pa lhech ti yiclônesh'e lhpa cruz.
16Japi c'afoquelhay yichajey ts'ivee ja Jesús yiey ja lhc'o'vat japi lhcaanvacles, ja lhey Pretorio. Pa lhechesh pa tônejop lhacôm'a japi lhcavos. 17Pa lhechesh pa yuyjach'e lhja t'uyjatshiy yuc tsômivay, yisnatshem shta java c'utjanis pa yic'ôcliyanesh ts'ivee. 18Pa lhechesh pa yit'eshvatsham'in ti yicju'taj:
—¡Istaa ca chinacju', judíos Lhanvacle!
19Yiclônesh'een lhshatech pa lhac'ujop sise, yiclôqui ca nanvacleyan jum lhôn ti t'a'lha. 20Meelh ti nicôtsit'esh ts'ivee pa lhfanishesh ti yiclôqui ts'ivee ti niclanemshi shta lhja vat'uyjatshiy yuc, pa vooy java yitsôt'ajesh t'uyjatshiyis pa yuyjach'e shta. Pa lhechesh pa yichaajfach'ec'oya lhpa cruz ca niclônesh'e.
Pa Jesús chineshchisham lhpa cruz
(Mt 27.32-44; Lc 23.26-43; Jn 19.17-27)
21Pa lhechesh pa vacutesh ts'ivee ja ve'lha nivacle lhey Simón, Cirene lhavo', lhô'sesh ja Alejandro shi' ja Rufo. Jô lhech nivacle nich'a tayshi ja tavashay, lhech jô lhech chiyimaj'e lhpa cruz ti tilhô'jem cum ja Jesús.#15.21 Ro 16.13.
22Pa yamjatey ts'ivee lhja utiyuc lhey Golgata, côque lhey: Vatshacheshi. 23Pa lhechesh pa yiyôjayantajshi pa ôtjayetas t'i' yicshenjatajeshem pa mirra, taj ti ninyô'ji ja Jesús. 24Vooy ti yivaclhitesh ts'ivee ti yiclônesh'e lhja cruz; pa yicheneshjop java vatqu'isjayanjas ti tanaatsjulhesh ts'ivee java t'uyjatshiyis.#15.24 Sal 22.18.
25Lhapa tojqu'etsham na jumcuclaay (nan yie' las nueve) ti vacalhesh ti yiclônesh'e lhja cruz. 26Vani'sesh'e shta lhja cruz pan tamenesh ti chiyclôn, nôque yich'e': “Na Lhanvacle napi judíos”. 27Lhtinclônchefasesh ja Jesús japi napu' nivacle vancaclônjanjas, ve'lha ja tavayey lhfayish, vooy jaelh tavayey lhch'amiyish.*xb* 28Pa nôque lhjunash ti yôfisch'e ti yit'esh cava vani'sesh'e ya'clishay: “Lhavaatsha chiyjônch'e papi vôncaclônjanjas.” #15.27 Is 53.12.
29Japi nivacle naashjop'in jan yiesh'echisham lhja cruz ja Jesús. Japi lhech yit'esh coyoyoy java lhshatjes pa yit'esh ts'ivee:
—¡Mu! Ta ca yijôa pa ca ajunasha, lhteesh avenna ca avômjatsha'ne na uj vatishjanjavat ca pu'janaa nalhus ca avaclhit shta.*xc* *xd* 30Anilhjen avaatsha nôqueesh, at'esh ca anayjatesh lha cruz ca anacha cotsjaat shita. #15.29 Sal 22.7; 109.25.,#15.29 Mr 14.58; Jn 2.19.
31Lhech lha t'ônasha japi vatcasinôc lhanvacles shi' japi vanqu'eyjatsjanesh pava lhfanishlhavach ti yit'eshvatsham'in:
—Yiyoych'een pap'elh ti yefen ninilhjen ca'na nôqueesh. 32Nôque yit'eshlhavne: Cristo, Israelh Lhanvacle, ninach ca a'na cotsjaat, clet'ey ca shtavanesh pa lhjunash, ca jaspa tanca shtacacutajesh.
Jô'tajesh japi chineshelhchishamch'e vatjuulh java cruz ti yijuvanesh'in ts'ivee.
Pa lhavafi pa Jesús
(Mt 27.45-56; Lc 23.44-49; Jn 19.28-30)
33Meelh ti yujee lhnalhcachivat, pa lhechesh ti vaclan pa tulhitaj, nash'apee lhacôm'a na lhech'e cotsjaat, yamja ti tanjuyshicham na jumcuclaay. 34Pa meelh ti tanjuyshicham na jumcuclaay pa tônesh'in ja Jesús ti yit'esh:
“Eloi, Eloi, ¿lama sabactani? (côque yich'e: “Yi Dios, yi Dios, ¿ta lhayaash ti lhtayyijop?”)#15.34 Sal 22.1.
35Meelh ti yipe'yach'e cavôque japi vatsavatch'e lhavôôj pa yit'esh ts'ivee:
—Pa', ach'anelh'in, tôney ca Elías.
36Pa lhechesh pa vacumaj ja ve'lha nivacle, t'acum'e ja vôcjôcli yitc'anat jô pa yic'ôcjôjiin ca nivayshi, pa lhechesh pa yijucjujam lhja lhac'ujop sise pa yijutsheychisham ja Jesús ca nifinjayaneshch'een. Jô lhech nivacle yit'eshema ja Jesús: An'ateelh cum shtovalhcaelhc'oya ca Elías ca natajeyshicham viinsha ca nanclantajesh'e lha cruz.#15.36 Sal 69.21.
37Lhan'e ja Jesús pa ve'lheesh ti tafshiy shta pa vaf ti'ma. 38Pa lhech t'aplhuqu'e ti yic'assham lhcachivat ja sivôclôclhayeech, chip'oojvatjulh ja vatishjanjavat, tôlheshey lhôtôj pa yamja cotsjaat.*xg* 39Meelh ti yi'van ja c'afoquelhay lhanvacle pa lhjunash ti vaf ca Jesús, pa yit'esh: #15.38 Ex 26.31-33; 2 Cr 3.14.
—Yijô' côque nivacle ti Dios Lhaôs.
40Caaj shita japi nivacche toseyjop ti novalheshey'in; japi lhech nivacche lhech lhja María Magdalena, shi' lhôj'elh María, lhja lhamimi ja Jacobo ja taôvclajesh, shi' ja José, shi' lhja Salomé. 41Lhech japi lhech voqu'esha'ne lhapesh ja Jesús ti yiey ja Galilea, jô'tajesh ti t'acumem'in shita ts'ivee. Pa nôque yie' jap'elh voqu'eetsham ja Jesús ti yicheychisham ja Jerusalén.#15.40-41 Lc 8.22-3.
Chiyp'o'e pa Jesús
(Mt 27.57-61; Lc 23.50-56; Jn 19.38-42)
42Meelh ti palha nuut, yivo'yesham pa nalhu ti yisclanvatsham pava yijuyjata pa vatc'usiyash'in, jô lhech nalhu tavaya pa nalhu ti chit'ichay. 43Pa ve'lha ja lhcaanvacle, lhey José, Arimatea lhavo', jô lhech tô'lha japi tanch'anjayesh pa ya'clish, jô'tajesh ti vatjumtaa vitsha pa Dios lhanvacleyash. Lhech jô lhech vatfiyitey jum ja Pilato ti yicheshey ti t'a'lha ca Jesús lhavu'vat ca nijutey. 44Nitôyiyjat ja Pilato ti tpeeychayesh ti vaf tatsha ca Jesús, pa lhechesh pa t'a'lhey ca nachey jô lhech c'afoquelhay lhanvacle, pa niyôsesh ca yijôa ti vaf ca Jesús. 45Meelh ti nifaclem ja c'afoquelhay lhanvacle ti apis ti vaf ca Jesús, pa jaspa yivashanem ja Pilato ja José ca Jesús lhavu'vat. 46Jô lhech José tcashayeyjop pa uj sivôclôclhayeech clim, pa niclanesh'e shta lhja cruz ca Jesús pa yiclôpjalheshch'e pa sivôclôclhayeech clim. Pa lhechesh pa yanch'e' lhja lhanjôquec'oya papu ti vaf yishi' lhja utiyuc, pa tayôjijanesh shta ca chint'uey lhja uj utej ca chinp'oojey ja lhashiesh. 47Lhan'e lhja María Magdalena shi' lhja María, José lhamimi, yiclôvalhesh ja chiyan'e' ca Jesús.
Pa lhneetshamjayash pa Jesús
(Mt 28.1-10; Lc 24.1-12; Jn 20.1-10)
Currently Selected:
San Marcos 15: NIVA
Highlight
Share
Copy
Want to have your highlights saved across all your devices? Sign up or sign in
Nivacle Bible © Sociedades Bíblicas Unidas, 1994.
