San Marcos 14

1Napu' java nalhus tavaya pa pascua, ja t'aplhu' ti chivatc'usinatesh'in java yucuvec ti ninôveyshi pa yicap'ofiyanshi. Pa lhechesh ti tanaychavalhtajesh pa ca lhfanishaesh ca niclôn ja Jesús japi vatcasinôc lhanvacles shi' japi vanqu'eyjatsjanesh pava lhfanishlhavach.*xñ* 2Pa yit'esh ts'ivee:

—Taj ti ya aj ca shtavoyjatesham ja chivatc'usinatesh'in, lhech ca nisuyiyan napi nivacle. #14.1 Ex 12.1-27; Dt 16.1-8.

Lhpa ôcjeclô yip'aclanshi pa vatshachivo pa Jesús

(Mt 26.6-13; Jn 12.1-8)

3Meelh ti yie' ja Jesús ja Betania, yie' ja lhajpôyich ja Simón, jan tashtôtaytaj lhapesh. Yie' ts'ivee ja vatsaccunjavat, lhechesh pa nama ja Jesús lhja nivacche, lhjô lhech nicha'jesh ja vatshachivo tô'lha ti chiyisnatesh pava nardocuy, jô lhech ti t'un'e jum ti chitcashaya. Pa yôflitesh'apee lhja lhashiy pa yôtsiy'apee ja lhshatech ja Jesús.*xo* 4Pa caaj japi nivacle yisuyiyan'in ts'am pa yit'eshvatsham'in:

—¿Seec ca chinclôqui atesha ca vatshachivo? 5Lhan'e ti ninatcasha'yesh jô, yashtaj'apee pava trecientos denarios, pa lhechtaja ca chintiseshch'e napi ts'aclaaysha'ne.

Pa lhechesh pa yitsô'yeeshem'in ts'ivee lhja nivacche. #14.3 Lc 7.37-38.

6Taj ti yit'esh ja Jesús:

—An'ateelh; ¿ta lhayaash ti lhtsô'yeeshelhem'im? Yivo'yeshch'e na apee na lhfanishyish. 7Vooy tanca nitayelh'ajop'in jayu papi ts'aclaaysha'ne, pa atiselh'in avaatsheelh ca eetajeshelh. Lhan'e yivaatsha pa tanca yajateesh ca yielh'ajop'in jayu.*xp* 8Lhayaash ti t'e pa ca lhaya'shayish lha ôcjeclô, tôtômjalheshyic'oya pa yivafi jayu ti yôtsiyyitapee ca t'ajuya. 9Yijô' ti jayeetshelh'a: Yamey lhac'o' jayu na cotsjaat cava isis ya'clishay ca chinvanqu'eyjatsjanesh. Pa lhecheesh pa chinfacleshch'e jayu shita na lhfanishlhavach anôque nivacche, pa lhecheesh pa chiyaychavalheshch'e jayu côque. #14.7 Dt 15.11.

Pa Judas vanc'oyanjaney pa Jesús

(Mt 26.14-16; Lc 22.3-6)

10Pa lhechesh pa tanu' ja ve'lha Jesús t'eyjatsjanach, tô'lha japi doce t'eyjatsjanjas, jô lhech lhey Judas Iscariote. Lhech jô lhech yichey japi vatcasinôc lhanvacles, lhech ti yijuta jayu ja Jesús. 11Meelh ti yipe'yeesh japi lhech ja Judas pa nishamesh ts'ivee jum, pa nifaclem ts'ivee pava pesoc ca nishayanesh jayu. Lhan'e ja Judas pa yaychavalh'in pa cat'elheesh ca isa'jop ca nijuta japi lhech.

Pa lhtsaccunjayash pa Lhcaanvacle

(Mt 26.17-29; Lc 22.7-23; Jn 13.21-30; 1 Co 11.23-26)

12Meelh ti vaclan ja nalhu ti chivatc'usinatesh'in lhpa yucuve ti ninôveyshi pa yicap'ofiyanshi jan t'aplhu' ti pascuaesh, ti chituj pa tashinshtaj. Lhechesh lhôn ti yit'esh japi t'eyjatsjanjas:

—¿Ta t'e ca chinôvesh'eac'oya ca chinasnatesh'am pa vatôc t'ajuya pa Pascua?

13Pa lhechesh pa yichen japi napu' t'eyjatsjanjas pa yit'esha ti yiyôjaa:

—Meeelhsham na yitsaat, meelh ca amtajelhsham pa lhcuteshelh jayu pa ve'lha nivacle vat'acjuesh lhpa lhôjque. Lhech jô lhech avoelhch'e. 14Meelh ca amtajeshelhey ja jpôyich ca nuytaj'ôcji, pa aniyôseshelh jan yitsôt'ajesh ja jpôyich pa at'eshelh: ‘Yit'esh'ay ja Vanqueyjatsjan: ¿Ta yie' pa jpôyich jôveshelh'ôcji jayu napi yeyjatsjanjas ca jatujelh'e pa tashinshtaj, pascua t'ajuya?’ 15Pa lhech nivalce t'apayelhaam jayu pa uj jpôyich. Yiôcji tatsha pava vatc'oovtes vayuy'e ts'ivee; lhech pa lhech asclanelh'ôcji yic'oya.

16Pa yichvatich'e japi t'eyjatsjanjas. Meelh ti yamjam ja uj yitsaat pa vacutesh pa nivacle pan t'ônasha ja Jesús ti yiyôjeesha ts'ivee. Pa lhechesh pa tatômjalhech ts'ivee pa tashinshtaj, pascua t'ajuya.

17Vooy ti tulhey pa yamelhey ja Jesús japi doce t'eyjatsjanjas ja jpôyich jan chiyisclanem'ec'oya. 18Meelh ti yielh'e japi t'eyjatsjanjas ja vatsaccunjavat ti tsaccunelhch'e, pa yit'esha ja Jesús:

—Yijô' ti jayeetshelh'a, ve'lha jayu na tôlhelh'atsham nan jaytsaccunelh nôqueesh, tsifac jayu.#14.18 Sal 41.9.

19Pa lhechesh ti'ma pa yitacshinvatsham'in japuqueey, pa ve'lha ts'ivee ti yit'eshvatsham'in:

—¿Yalhech t'ejum?

Paelh yit'esh shita:

—¿Yalhech t'ejum?

20Pa yicuulh ja Jesús pa yit'esh:

—Ve'lha na lhech tôlhelh'atsham a'doceelh, nan javancufanshelh na titech. 21Jô lhôn yamey jayu na Nivacle Lhô'sesh pa lhavafi, lhayaash ti lhech t'ônashch'e cava vani'sesh'e; taj ti ¡shiyalhavach na nivacle nan nifac jayu na Nivacle Lhô'sesh! Na lhech tajulhtajemey ca ya aj ca nanvat'aj lhapesh.

22Meelh ti tsaccunch'e pa t'acum'e ja Jesús lhja yucuve pa t'a'lhey pa Dios, pa nôcôsshi pa yit'esh ti tiseshch'e japi t'eyjatsjajas:

—Acumelhjulh; ca atujelh nôque yisjan.

23Pa t'acum'e shta ja t'iyôjatshiy pa t'a'lhey shta pa Dios, pa vatlhiseshch'e pa yiyôjisha'ne lhacôm'a. 24Pa yit'esh shta:

—Cavôque yivoyey tô'lha na nich'a chiype'ya' cavan nitônemsha'ne papi acloj.*xr* *xs* 25Yijô' ti jayeetshelh'a, ti niyit'esh t'ôyish'e ca yiyô'ji lhpa lha' lhpa ôtjayetayuc; c'ayô'lhashi pa nich'a ôtjayetaj t'i' ca namtajeyjop ja nalhu yiey ja Dios lhanvacleyash. #14.24 Ex 24.8; Zac 9.11.,#14.24 Jer 31.31-34.

Pa Jesús nifac ti vantanesh jayu pa Pedro

(Mt 26.30-35; Lc 22.31-34; Jn 13.36-38)

26Meelh ti tifeshch'e pa t'aclaach pan yôclôjeshey pa Dios pa yichfach'ee ts'ivee, yicheyvatich'e lhja utiyuc yie' ja Olivochat. 27pa nôyishi ti yit'esha ja Jesús japi t'eyjatsjanjas:

—Nôque tulh t'astayelh'am'in jayu alhacôm'aelh; lhayaash ti lhech t'ônshch'e cava vani'sesh'e ti yit'esh: ‘Jaclônc'oya jayu pa lhavoesh pava tashinshtas, secl'esh ca nicatsôn'in.’*xt* 28Vooy ca janeetajchisham shta pa jatôtômjalhelhey'ac'oya jayu ja Galilea.#14.27 Zac 13.7,#14.28 Mt 28.16.

29Pa yit'esh ja Pedro:

—Ca lhech lhayaashtaja ca nit'aastaytajem'in jayu lhacôm'a napuque, pa ya vooy tanca lhech yijunasha jayu.

30Pa yit'esh ja Jesús ti yicuulh:

—Yijô' ti jayeesh'a, nôque tulh, jôjjeclay tanca napueesh ca nit'eyshey pa votôjôj, pa pu'janaaesh jayu ti lhteetsha jayu ca niantôfa'clayish.

31Lhan'e ja Pedro pa lhetipa ti tasinôy'in pa yit'esh lhôn:

—Apasha ca chinasclôn'atapee ti tanca vantan'ash'in.

Lhech lha t'ônash'in jap'elh.

Pa Jesús t'aalh ti yiey pa vatcôvjiyanjavat Getsemaní

(Mt 26.36-46; Lc 22.39-46)

32Pa yamey ts'ivee ja vatcôvjiyanjavat lhey Getsemaní, lhechesh pa yit'esha ja Jesús japi t'eyjatsjanjas:

—Nôque amônlhaaelh'e ca veelh'ech'esha'ne, jôquey jayu naum ca jayaalh yivaatsha.

33Pa vooy ja Pedro shi' ja Jacobo shi' ja Juan yaôychi, yamey pan yiesh'e jayu ti t'aalh. Pa yalhatajesh ti nicha'vayey ti nijovayshi, pa nincont'aj shta. 34Pa yit'esh ja Jesús:

—Pa yisôc'ôclit yitacshin'in jum, yamja jayu pa yivafi. Nôque amônlhaaelh'e avaatsheelh, pa ovalhelh'atapee.

35Lhan'e ja Jesús tiqu'in'esh ti tac'uy, pa lhech yie' ti t'acjatsuyshicham pa t'a'lhey pa Dios pa yit'esh: Ca at'eshyiyaam ca ninaashyijop atesha nôque yijunash. 36Pa yit'esh shta

—Tata, ampa avenna t'ôyiy ca avijatan avaatsha; anashjatyijop atesha anôque vat'iyôjatshiy; taj ti tanca nitôlhyi pa ca yit'esh, a'vooy ca nitôlh'a avaatsha.

37Pa lhech tôlh'e ti vapecleylhach'e japi yivôm'e, pa yi'van ti yimôqu'esha'ne; pa yiyôjaa ja Pedro pa yit'esh:

—Simón, ¿lhamô'? ¿Ama ca amuc'acum ca ovalh'atapee? 38Ovalh'elh'atapee, a'lhech vitsha, secl'esh ca ninameelh'a pa ca nafaycutelh. Yijô' ti t'untaj'in pa vatsôc'ôclit lhshayc'u, vooy pa vat'asjan amesh.

39Pa vapecleylhach'e shta pan yiesh'e ti t'aalh, lhetlhataj pa t'ônash'in. 40Meelh ti tapecleylhach'e japi lhech, pa yicôjôsesham'in ti yimôqu'esha'ne shta, lhayaash ti tapoojqu'esha'ne lhtôsjey pa lhanjôti. Pa t'eesh'in pa ca niteesh ca nicuulh ts'ivee. 41Pa chinch'e pa vapecleylhach'e shta pa pu'janaesh ti'ma pa yit'esh ti yamey:

—Aneelhchishamch'e ti lhapa cajuqu'e ti lhamôelh. Nôqueesh pa nulhjôqu'eselh. Nôqueesh lhapa yameyjop na t'aplhu' ti chiyjutey jayu na Nivacle Lhô'sesh japi sasch'e lhavos. 42Aneelhchishamch'e ca shnôquelh'in, lhayaash ti lhapa shalhajulh na vanc'ôyanjanyiy.

Chiychaaj pa Jesús pa vanôôcfa

(Mt 26.47-53; Lc 22.47-53; Jn 18.2-11)

43Jôjjeclay mônlheesh ti tasinôy'in ti namac'oya ja Judas, jan tô'lha japi doce, tanaôycheelh japi acloj lhcavos japi vatcasinôc lhanvacles shi' japi vanqu'eyjatsjanesh pava lhfanishlhavach shi' japi nitaôvclaseesh ti lhcaanvaclesesh. Japi lhech yichaaj java clesatas shi' java lhac'uc. 44Yit'esh lhôn ja facjanaj ti yiyôjaa japi tanaôycheelh:

“Asclôvalhshelh viinsha, jô lhech ca jafintaj, pa lhecha jô lhech ôcfeeelh pa acha'jelh.”

45Meelh ti yujaa ja Judas ja Jesús pa yit'esh:

—¡Vanqu'eyajtasjan!

Pa lhayishlhee ti yifin.

46Pa lhechesh pa t'acum'evatam japi nivacle ti yôcfa'. 47Ve'lha ja Jesús t'eyjatsjanach nitsooji ja lhclesataj pa yifa'shey lhacfe' ja lhcavo ja uj lhcaanvacleesh japi vatcasinôc. 48Pa yit'esha ja Jesús ti yicuulh japi nivacle:

—¿Lhasjônelhch'e pa vôncaclônjanaj ti chivooy, lhanchajeelhyijop nava aclesatas shi' nava ac'uclelh ca ats'ôôcfeelh? 49Java nalhus ti jôvelh'atshiin avenna, lhasvanelh'in ti javanqu'eyjatsjan'ôcji ja vatishjanjavat pa niats'ôôcfeelh jô lhechesh. Eem tane ti jaspa yôfisch'e cava vani'sesh'e.#14.49 Lc 19.47; 21.37.

50Pa lhechesh pa yicla'lheesh japi t'eyjatsjanjas pa yiclôt'in ts'ivee.

51Ve'lha ja nich'ayech voqu'eetsham ja Jesús, jô lhech tsishashi lhôn pa lhclôvat ti tavuuyshi. Lhech jô lhech t'acumet'esh ts'ivee shta. 52Lhan'e jô lhech pa tatjôcleem lhavach yivô'mem pa lhclô'vat, pa tsi'shaan ti vacumajc'oya.

Pa Jesús vatsevat'e t'ajuyish papi lhcaanvacles

(Mt 26.57-68; Lc 22.54-55, 63-71; Jn 18.12-14, 19-24)

53Yicha'jey ts'ivee ja Jesús ja uj lhanvacleesh japi vatcasinôc. Lhech tayesh'eva'ne lhacôm'a japi vatcasinôc shi' japi nitaôvclasaesh lhcaanvaclesesh shi' japi vanqu'eyjatsjanesh pava lhfanishlhavach. 54Lhan'e ja Pedro pa t'aplheemch'een ja Jesús ti yijoqu'esha'ne, pa yamey ja lhajpôyich ja uj lhcaanvacle, yitsavalhey japi t'afayjop pa itôj pa yieelhjop.

55Pa vooy japi vatcasinôc lhanvacles shi' jap'elh lhcaanvacles tanch'anjayesh pa ya'clish. Japi lhech vo'tajemey pa ca natmeneshlhavach ja Jesús pa jaspa isa'emjop ca nitôyôjijanesh ca chinclôn; taj ti ampa ca nitôôysha ts'ivee pa ca natmeneshlhavach ja Jesús. 56Aclôj japi yinôôlhjônchatajesh ja Jesús pa ca lhfanishalhavach, taj ti ninvo'yeshvatjulh ts'ivee na t'ônasheshvatc'oya. 57Pa netshamch'e japi t'ajôôj jô, japi lhech yinôôlhjônchatajesh ja Jesús pa ca t'ônasha ca ninvoyeeshch'e pa yit'eshvatsham'in:

58—Jape'yeeshelh na lhech ca'na ti yit'esh: ‘Jayeesh ca javômjatsha'ne na vatishjanjavat na chiychenesh pa vatpôcôôt ti nich'a chiyisnatesh, pa yisnatajesh yivaatsha paelh camcleesh ti tanca chinchentajesh pa vatpôcôôt, pu'janataja pava nalhus ca yivaclhit.’#14.58 Jn 2.19.

59Taj ti jôjjeclay nit'ônashaeshch'evatjulh pava yeetajeshvatsham'in.

60Pa lhechesh pa nitshaam ja uj lhanvacleesh papi vatcasinôc pan yi'shi lhcachivat jap'elh. Jô lhech yit'esh ti yiyôjaa ja Jesús:

—¿Pa na aculhch'e t'em napi nafacleshch'e pa ajunash ca'na?

61Lhan'e ja Jesús nincuulh. Pa yiyôjaa shta jô lhech vatcasinôc lhanvacle pa yit'esh:

—¿Yijô' ti alhech a Cristo, Atataesh pôque uj ti chiyôclôjey?

62Pa yit'esh ja Jesús ti yicuulh:

—Jech, ya lhech. Lhavanelh jayu na Nivacle Lhô'sesh ca naôvtajey lhfayish ja Dios jan uj ti t'un'in, jô'tajesh ti nacheyshicham jayu lhpa vôse' tô'lha na vôôs.#14.62 Dn 7.13.

63Pa lhechesh ti yic'asteshlhtapee lhpa t'uyjatshiy jô lhech lhanvacle japi vatcasinôc pa yit'esh:

—¿She t'e taj peelh ca suyeeshi ca nanfaclelhch'e pa lhjunash nôque? 64Shtape'yeeshvatam nalhch'e nôque ti yiclôqui pa Dios; ¿ta jôque lhteetshelh vitsha?

—Pa lhechesh pa vatculhesh ts'ivee lhacôm'a ti yit'esh: Chinclôn jayu nôque.#14.64 Lv 24.16.

65Cavôque pa yivanch'een pap'elhcha, pa lhechesh pa t'ach'iych'een lhtaco ts'ivee, pa nijooylhach'e ti yip'ooj'e lhtaco ja sivôclôlhayeech pa yit'ijôjqu'een lhtaco ts'ivee, pa yit'esh:

—¡Navooy ca esh'ôcji ajaalh napi nat'ijôj'in!

Jô'tajesh japi lhcavosesh japi lhcaanvacles ti yit'ijôjvatam ja Jesús.

Pa Pedro vantanesh ca ninantôfa'cleesh pa Jesús

(Mt 26.69-75; Lc 22.56-62; Jn 18.15-18, 25-29)

66Lhan'e ja Pedro shichaam pa yie', lhechesh ti lhech nach'e' lhja lhcavoque japi vatcasinôc lhanvacle. 67Yichey japi yi'jop pa itôj, pa meelh ti yishi' lhtô'vat ja Pedro pa yit'esha ti yiyô'jaa:

—Alhech avaatsha shta lhtanôycheelhsha'neen ja Jesús, Nazaret lhavo'.

68Lhan'e ja Pedro pa vantanesh pa yit'esh:

—Ninastôfa'clesh na apee na lhech, ey na ca nastôyc'oya cava lhteetajeshyi.

Pa lhechesh pa yichfach'ee ja Pedro. Pa t'eyshey ti'ma pa votôjôj. 69Pa nam shta lhjô lhech vatcavoque pa yit'esha japi lhech vatsavat'ech'e:

—Nôcôyi ana tanaôycheelhsha'neen shta jô lhech.

70Mônlheesh ti vantanesh ja Pedro. Pa chinch'e atesha pa niyôstaj shta japi yielhjop ja itôj pa yeetajesha:

—Yijô' t'emna jô ti a'lhech lhavoqu'esha'ne na Jesús; lhayaash ti a Galilea avo', nintaastay lhech ca asinônyash.

71Pa lhechesh lhôn pa vatpôfiyuin ja Pedro pa yit'eshlhavne:

—Ninastôfa'clesh napee na lhech nivacle lhtsiôstajeshelh'in.

72Meelh ti napuesh ti t'eyshey pa votôjôj. Pa lhechesh pa yivoych'e lhcachi' ti'ma ja Pedro pan yit'eshem ja Jesús ti yit'esh: ‘Jôjjeclay tanca napueesh ca nit'eyshey pa votôjôj ca p'alhaa jayu ca pu'janaaesh ca avaantanyish.’ Cavôque yaychavalhch'e ja Pedro pa yapjayan'in

Pa Jesús chiyan'e' t'ajuyish pa Pilato

(Mt 27.1-2, 11-14; Lc 23.1-5; Jn 18.28-38)

Currently Selected:

San Marcos 14: NIVA

Highlight

Copy