San Marcos 13
13
1Meelh ti tayelh'ôcji ja Jesús japi t'eyjatsjanjas ja vatishjanjavat pa yit'esh ja ve'lha t'eyjatsjanach:
—¡Vanqu'eyjatsjan, a'va nava utes shi' na jpôycheclaay!
2Pa yicuulh ja Jesús pa yit'esh:
—¿Lhavanelh navôque jpôyjey lhanôc? Navôque utes tanca mônlhaa pava ca naôvtajvatap'e ca piclôsa jayu, lhacôm'a ti yofalhsha'ne jayu.
Pa chinôclit ca nujatajc'oya ca nôjtaj na nalhu
(Mt 24.3-28; Lc 21.7-24; 17.22-24)
3Pa lhechesh pa yich'apee lhja utiyuc pan yie' ja Olivochat, vanajulhjatshi jum ja vatishjanjavat ti yi'sha'ne. Pa lhech t'aplhuqu'e ti niyôs ts'ivee ti tsishaelh ja Pedro shi' ja Jacobo shi' ja Juan shi' ja Andrés pa yit'esh lhôn:
4—Anfacleelhyam cum, ¿ta t'elhesh jayu ca navclan cavôque? ¿Pa ta t'e lhjunash jayu ca nôôc, jaspa chintôôysha ca navclantaj lhacôm'a cavôque?
5Pa yicuulh ja Jesús pa yit'esh:
—Ovalh ninacôjôsjatelh papu, anujumatsenelhjulh. 6Lhayaash ti acloj jayu papi nam yit'eshlhavne jayu: ‘Yivaatsha ya Cristo’; papi lhech acloj jayu papi yicôjôsjat.
7“Ca aya'tajelhjulh papi vatclônsha'ne, ja't'ajesha papi vatjumtivatjulh ca nivatclônsha'ne, ya aj ca anjova'yelhshi, lhayaash ti lhech lha lhjunash tatsha jayu; taj ti nilhecha ca ninaôclheeshc'oya jayu ca nôjeshch'e jayu pava nalhus. 8Lhayaash ti vatjutsa' jayu ca nivatcôvfachi lhacôm'a java yitsates shi' lhacôm'a java vatcootsjativshay; na yie' jayu pa nayuuynayuych'e na cotsjaat, vaclan jayu shta pa yipcu' shi' pa vatayyasha lhanô'. Nôque lhjunash jayu yamjey ca nich'a nitôôlhtajesh'e pa aôytej jayu jum.
9“Vooy avaatsheelh avôntôyitelh'in ca lhech lhayaashtaja, lhayaash ti chinachajelhey jayu pa lhanvacleesh papi vatvanc'ôcfajayte lhavos. Pa lhechesh pa chinachajelh'ôcji jayu pava vatvanqu'eyjatsjanjavtes, pa lhech chinaneshelh'e ca chinaclônelhsham'in jum, chinanôtitelhsha'ne jayu. Jô'tajesh ti chinavatsevatjatelh'e t'ajuyish papi us lhcaanvacles, taj ti ya'lhech ti tôlhyi', jaspa ats'ôôclhanitelha. 10Lhayaash ti suyeshi jayu ca namey lhac'o' lhacôm'a napi yie' na cotsjaat cava Dios lhasinôc ca chinanfacleem. 11Ca lhech lhayaashtaja ca anôôcfatajelhsha'ne ca chinachaajtajelhey pa lhcaanvacle vatvanc'ôcfajayte lhavo' pa ya aj ca atanapunshelh pa ca at'eshelh jayu, lhayaash ti caaj jayu ja Espíritu Santo tasinôyelh'am jayu. Nôque lhjunash ti tanca alhecheelh ca aclishayaelh pava ca eetajeshelh.*xc* 12Pa lhech t'aplhu' jayu ca niclôn pa nivacle pa lhch'inish, shi' pa vatata yiclôn jayu pa lhaôs; papi vatacles tavacô'ya jayu papi lhnavot, jô'tajesh ti yiclônsha'ne jayu shta. 13Chinacônitshielh'apee jayu jum, lhayaash ti lhanc'ashamyishelh lhayaash ti nafiyshelh'anôcji papu ca namjatajeshch'e cavôque ca nôjtajeshch'e na nalhu, pa lhech ti chiyilhjen jayu.#13.9-11 Mt 10.17-20; Lc 12.11-12.,#13.13 Mt 10.22.
14“Ca avanchaytajeshelh jayu lhôn pava vancasasinatsha'ne, cava lhech yit'esha lhapesh ja nivacle Daniel, chiytôyjata pava ti vaclan, ca nivatsavataj'e pa nichinteetajesh ca chinvatsavat'e (Papi yiclôvalhshi pa vatqu'isjayanach pa nivôntôych'e), pa lhechesh pa niclôtey pava uticuy papin yie' ja Judea.*xe* 15Papu ca nivooytajeshjulh ca naôvtaj'apee pa lhajpôyich lhôtôjey pa tanca nit'eclet'esha'ne pa lhajpôyich, pa tanca nuyesh'ôcji shta pa lhajpôyich pa ca nôqueyshi. 16Pa vooy papi apis ti yamey pa tavashay, pa ya aj ca napeclelhach'e lhpa t'uyjatshiy yiey pa lhajpôyich.*xf* 17¡Yiya'lhavachis papi nivacche yitumasha'ne shi' papi vancafitsjansha'ne ca nivooytajesh pa lhech nalhu! 18Jô'lhaa ti a'lhelh ca ya aj ca navooyshelhsham pa cloop pa aclôtsjayashelh jayu. 19Lhayaash ti pava lhech nalhus vaclan jayu pa uj vatacshinjayash, ninavclan pa cat'elheesh yie' nôque cotsjaat pan t'aplhuqu'e ti nich'a yivclamjat ja Dios ja nalhu. Yamja navôque nalhus ti nichinantôfa'clesh pa lhech lhjunash, jô'tajesh ti tan ca ninôôc t'ôyish'e pa lhech lhjunash.*xg* 20Jech, lhan'e ca nintiqu'inclinatasha'ne ja Dios pava lhech nalhus, pa tanca chinalhjentaj papu ca ve'lhaa. Taj ti teya ti caaj papi chivooyshi, papi lhech vooyshilhatam lhavaatsha ja Dios, pa jaspa ninunatsha'ne jô jayu pava lhech nalhus. #13.14 Dn 9.27; 11.31; 12.11.,#13.15-16 Lc 17.31.,#13.19 Dn 12.1; Ap 7.14.
21“Ca niteetajeshelh'a jayu papu: ‘A'va, nôque Cristo’, ja't'ajesha ca niteetajesh ‘A'va, naum Cristo’, pa ya aj ca ueshelha. 22Lhayaash ti caaj jayu papi tanôôlhjônchatesh jayu ca Cristocla, ja't'ajesha papi nivacle tanôôlhjônchatesha'ne jayu ca nivanqu'eyjatsjansha'ne ti nichinvancha'yesh pa cat'elheesh. Lhech papuque nôclit jayu pava ninvôôtôyesh, ve'lheeshey ti yitô'yish ts'ivee, taj niyijôa cavôque lhfanishesh, jaspa vancacôjôsjatesh jayu, yeneshch'een jayu papi isissha'ne chiyvooyshi ca nicôjôsjatesh. 23Jô'lhaa ti anujumatsenelh'avach jum; avan ca ajaalh lhapa jatatômjalheshelh'a nôqueesh ti janfaclelh'am.
Pa lhjunash pa lhatpecjayashshicham pa Nivacle Lhô'sesh
(Mt 24.29-35, 42, 44; Lc 21.25-36)
24“Pa meelh ca namtajeyshi pava lhech nalhus ca nôjtajeshch'e pa uj vatacshinjayash, pa yie'jop jayu ca nimac na jumcuclaay shi' na jive'cla tanca pjumtseja t'ôyish'e,*xh* *xi* 25nava catiis nicôtch'esha'ne jayu, shi' pa t'unaj na vôôs nayuuynayuych'e jayu.*xj* *xk* 26Pa lhechesh pa chinvanjulh na Nivacle Lhô'sesh ca naôvtajshi lhpa vôse' ca ninatajeshicham pa uj t'unaj shi' pa lhasnôycheyash.*xl* 27Pa lhechesh pa nanchen japi lh'ángeles, nicheney ts'ivee nava yitshatjulh lhavimis ca nivoomey pant'ajôôj papi vooyshilhatam nitôlhesh'e lhtaas na cotsjaat pa namjeylhac'o' shta na vôôs. #13.24 Is 13.10; Jl 2.10,31; 3.15; Ap 6.12.,#13.24 Is 13.10; Ez 32.7; Jl 2.10; 3.15.,#13.25 Is 34.14; Ap 6.13.,#13.25 Jl 2.10.,#13.26 Dn 7.13; Ap 1.7.
28“Atôôlhshelha lhja higoyuc ca ovalhelheyjop nan lhjunash ti meelh ti tits'iysha'ne pava lht'oy pa isc'oya pava lhsashay ti tôlhshi', pa lhech pa natôyjatelha ti yujeey ca yincôp'eesh. 29Pa lhech ajunasheeshelh ca avantajelh lhacôm'a cavôque ca navclantaj, pa natôyjatelha jayu ti shalhac'oya jum na Nivacle Lhô'sesh. 30Yit'esh ja Jesús:
—Yijô' ti jayeetshelh'a ti nich'alhanitay napi yie' na cotsjaat ca navclantaj lhacôm'a cavôque jayeesh'in na. 31Nôjeshch'e jayu na vôôs shi' na cotsjaat, lhan'e nava yiclishay pa tan ca nivôôm.
32“Cavôque pa ca lhc'aplhutaja pa lhnalhu ca navclantaj, ampapu ca nitô'ya, vena ti nintô'ya japi ángeles yiey na vôôs, nintô'ya shta na Lhaôs. Ve'lha ja Lhtata ti yitô'ya pa t'aplhu' jayu.#13.32 Mt 24.36.
33“Avôntôyitelh'in jum, yajateesh ca a'lhelh, lhayaash ti ninatô'yelha pa ca t'aplhua ca navclantaj cavôque. 34Nan lhjunash pa nivacle ti tojey pa ti t'ajuyshi jayu; pa yiyôjiesha papi lhcavos pant'ajôôj pava yicumjatch'een ti yinujumatsenjayanesh. Pa vooy pa lhashi lhavo' pa yit'esha ca novalh'apee jum.*xn* 35Ovalhelh'atapee jum, lhayaash ti tanca anchava'yelhjulh jan yitsôtajesh na jpôyich ca natpectaj. Ama lhapesh ca nam ca nich'a nit'eysheytaj pa vôtôjôj, ja't'ajesha ca claafnalhutaja; 36secl'esh ca meelh lhôn ca yalhalhaa ca ninamtajelh'a, ca ya aj ca nicôjôseshelh'atsham'in ca amôelhch'esha'ne. 37Nava jayeetshelh'a nôqueesh, jayeetshema shta lhacôm'a nap'elh: Ovalhelh'atapee jum. #13.34 Lc 12.36-38.
Chitanachanesh pa Jesús ca chinclôn
(Mt 26.1-5; Lc 22.1-2; Jn 11.45-53)
Currently Selected:
San Marcos 13: NIVA
Highlight
Share
Copy
Want to have your highlights saved across all your devices? Sign up or sign in
Nivacle Bible © Sociedades Bíblicas Unidas, 1994.
