San Marcos 12

1Pa lhechesh pa tasinôyc'oya ja Jesús japi lhech, yit'eshemc'oya pava yovalhemeyjop atesha pa yit'esh:

—Ve'lha pa nivacle yit'iyjatch'e pava ôtjayetacuy lhanus pa nashclôfjop, tiish shta lhpa tinjôque t'ajuya pava ôtjayetas t'ic', yisnatshem shta pa tojquisham jpôyich papi yiclôvalh.

“Pa yipiôyaneshch'e papi ôtjayetacuy lhavos, lhan'e lhavaatsha yichey paelh yitsaat.*xr* 2Meelh ti yameyjop pa t'aplhu' ti yôquench'e pa ôtjayetachat, pa yichen pa ve'lha hcavo. Yicheney papi ôtjayetachat lhavos ca nichaaj pavan yivenchatesh. 3Lhan'e papi lhech pa yiclônsham'in pa yichen atesha, ampa ca nichajchiyinesh. 4Pa yichen shta paelhcha lhcavo; jô'tajesh pa lhech shita ti yiclônsham'in ts'ivee, yôôtjatesh'in pava utes, nich'alha yichen ti yivo'matansha'ne. 5Pa yichen shta paelhcha lhcavo, pa lhech yiclôn ts'ivee. Pa nôque yie' pap'elh acloj papi yichentajey'in shta; papi lhech caaj papi yivo'matansha'ne shi' papi chiyclônsha'ne. #12.1 Is 5.1-2.

6“Pa ve'lha pa mônlhee, lhech pa nitsopeesh lhaôs; pa lhech nijôôlha ti yicheney shta papi lhech, lhayaash ti yilheclôjtajesh ca nitanfunchay jayu.' 7Meelh ti yi'van papi ôtjayetachat lhavos pa yit'esh lhôn ts'ivee: ‘Atalhunelh ca shtaclôn, lhayaash ti lhech nôque tcôyôjanesh jayu navôque, pa jaspa shtanvat'aesh jayu ca shtantcôyôôjtajesh casvaatsha. 8Pa lhechesh pa t'acum'evatam ts'ivee pa yiclôn. Vooy ti vaf pa t'acum'ôcji ts'ivee ti yu'fach'ec'oya pa ôtjayetachat.

9¿Ta t'e lhfanishlhavach jayu pa lhcaanvacle, yitsôt'ajesh pa ôtjayetachat? Pa lhech nachey jayu papi ôtjayetachat lhavos ca niclônsha'ne jayu, pa nijuta pap'elh pa lhavôtjayetachat.

10“¿Naaclôvalhelhshi ajalh cavôque ya'clishay ti vani'sesh'e:

‘Lhja utej, lha yapun papi jpôyjey lhavos,

yalhpan'e ti chiyan'e lhpa t'afcatoesh pa jpôyich.

11Cavôque tô'lha pa Dios ti lhfanishesh,

Cavôque shtavanchayesh,

uj ti lhasnôyjes ninvôôtôyc'oya?#12.10-11 Sal 118.22-23.

12Pa tanlhatajem ca nôcfa ts'ivee, taj ti ts'ufiyeshem japi nivacle, lhayaash ti yitôyc'oya japi lhech ti lhech ts'ivee chiyit'eshem ca chiyovalheyjop atesha, pa istaa ti tayjop'in ts'ivee.

Pa lhjunash ti chiycufay'ôcji pa chitsôt'ajesh

(Mt 22.15-22; Lc 20.20-26)

13Pa lhechesh pa yicheney japi fariseos shi' japi lhcavos ja Herodes, ca lhecha lhôn ts'ivee ca ninôôlhjônchatesh pa ca lhclisha ja Jesús. 14Japi lhech yichey ja Jesús pa yit'esha:

—Vanqu'eyjatsjan, tsitô'yelh'a ti yajatesh ti lhteesh pa yijô' ti Dios lhnôyish. ¿Tajulhey t'e ca chinjutey ja lhcaanvacle César pava pesoc? ¿Ja't'ajesha ca ama?

15Ja Jesús yi'van tatsha pa lhjôtsôclônjayashesh pa lhaychavalhjayash pa yit'esha:

—¿Ta lhayaash ti lhanc'alhtantajelhyiy? Anchajeelhyiy lhpa tinshanja ca ja'van.

16Pa nicha'jey lhja tinshanja, vooy jô lhech pa niyôsesh:

—¿She t'e papi lhtaco nôque, shi' na lhey ti chiyi'sesh'e?

Japi lhech yicuulh pa yit'esh:

—Vooy ja lhcaanvacle César.

17Pa yicuulh ja Jesús pa yit'esh:

—Ajutelhem ja César pa ti yitsôt'ajesh ja César, vooy ja Dios ajutelhem nava yitsôt'ajesh ja Dios.

Japi lhech nitôyiyjatesh ti yicuulh ja Jesús.

Vatcôy'ôtsjayashesh pa lhneetshamjayash papi vafsha'ne

(Mt 22.23-33; Lc 20.27-40)

18Pa namey japi saduceos, japi lhech yit'esh ti ampa lhneetshamjayash papi vafsha'ne, japi lhech niyôsesh pa yit'esh:#12.18 Hch 23.8.

19—Vanqu'eyjatsjan, yi'sesh'ejoom ca Moisés ca nivaf lhôn pa nivacle ca vo'ya lhpa lhjaya ca mônlhaa ca ama shta papi lhcles, lhpa lhech isjop ca lhjayaeesh pa lhash'aa, jaspa nactsôyanem lhavaatsha pa lhchecla' pan vaf.*xu* 20Pa caaj lhôn papi napu'yama lhtatvelheyech. Pan c'utsajesh ti lhjaya'tajesh, taj ti nintactsôyelh ti vaf. 21Vooy lhpa ôsch'acche lhjayaesh shta pa ve'lha lhash'aa, taj ti nintactsôyelh shta, jaalhpa vaf atesha. Pa lhjayaesh shta paelh lhash'aa lhech lha lhjunashesh ti vaf shta. 22Pa lhech lhjunashesh lhacôm'a papi napu'yama lhtatvelheyech ti lhjayastajesh, taj ti nintactsôyelhsha'ne, jaalhpa vafsha'ne atesha. Pa yojesh'esha'ne ti vaf vitsha lhpa ôsch'acche. 23¿Pa ta t'e lhjunash jayu ca neetajchishamch'e lhôn? ¿She t'e papi yitsôt'ajshi jayu lhpa ôschacche, lhayaash ti tifesh'e papi napu'yama lhtatvelheyech ti lhjayasesh? #12.19 Dt 25.5.

24Pa yit'esh ja Jesús ti yicuulh:

—Tôôlhjaneshelh ts'ivee, lhtôôlhshelha t'ejum ti naantôfaacshelh cava Dios lhasinôc shi' ja Dios t'unaj. 25Eem ti meelh ca neetajchisham shita, pa tanca nitajayay t'ôyish'e, jô'tajesh ti tanca chinjayayan shta, nôôcpat'e ti lhjunashjulh japi ángeles yiey ja vôôs. 26Jô'lhaa shita ca chiyichesh'e ca vatneetshamjayash jayu shta, ¿naaclôvalhelhshi ajalh ca lhqu'isjayanach ja Moisés ti yiyôjaa ja Dios ja Moisés ti yiey lhca yichesh c'utjaniyuc? Ti yit'esh: ‘Yalhech lh'Diosyish ja Abraham, lh'Diosyish shta ja Isaac, lh'Diosyish shta ja Jacob.’*xv* 27Ja Dios ni lh'Diosaesh papi vafsha'ne, lh'Diosesh jôcl'esh japi mônlhasha'ne; cavôque nacôjôseshelh jum. #12.26 Ex 3.6.

Pa vatyôjijat ya'sheshc'oya pav'elh

(Mt 22.34-40)

28Pa tac'uya ja ve'lha vanqu'eyjatsjanesh pava lhfanishlhavach, jô lhech jôqueey yipe'yeesh ti tavayshelhvanôcji ja Jesús jap'elh java yit'esh'in. Yipe'yeesh shta ja Jesús ti yivo'yeshch'e jum pa yit'esh ti yicuulh japi yic'alhtantaja, jô lhech jôqueey niyôsesh pa yit'esh:

—¿Ta t'e yie' pa chiyashjatc'oya ti is lhacôm'a nava vatyôjijates?

29Pa yicuulh ja Jesús pa yit'esh:

—Ca vatyôjijat yash'apee cav'elh, nôque yich'e: ‘Ach'anshelhyiy, Israel, na Lhcaanvacle cas Diosesh, ve'lha ti Lhcaanvacleesh. 30Jô lhech Lhcaanvacle a'Diosshelh atanipjôclônshelha pa acachi' shi' pa asôc'ôclit shi' pa aychavalhjayash shi' shta pa unaj ca en.' Lhech cavôque ya'sheshc'oya cav'elh vatyôjijatesesh.*xw* 31Pa nôque yie' caelh tavaych'e t'ônashch'ejulh: ‘En paelh avelh nan ajunash ti lhnen.’ Ampa caelhchaa ca na'shesh ca vatyôjijat'eesh ve'lheey cavôque napu'.#12.29-30 Dt 6.4-5.,#12.31 Lv 19.18.

32Pa yit'esh ja vanqu'eyjatsjanesh pava lhfanishlhavach ti yicuulh:

—Yijô' vanqu'eyjatsjan, ti navô'yeshch'e jum ca lhteesh. Yijô' ti ve'lha ja Dios, ampa caelhcha ca Diosaesh ca lhjunashajulh.*xy* 33Yijô' ca chintanipjôclônesh pa vatacachi shi' pa vataychavalhjayash, shi' pa vat'unaj ca chinen jum ja Dios; mônlheesh shta ca chinen pa vatvelh nivôôtjôneshch'e ti vanen papu, cavôque jôcl'esh ya'shesh ti is, a'lheesh pa vatcufayjat'eshjop ja Dios shi' pava chiylhônneemsham.#12.32 Dt 4.35.,#12.33 Os 6.6.

34Ja Jesús yipe'ya ti tcajôyshaych'esha'ne java yit'esh'in, pa yit'esh ti yiyôjaa:

—Avaatsha t'ujaa ja Dios lhanvacleyash.

Pa lhech t'aplhuqu'e pa ampapu ca nifiiyshem t'ôyish'e ca niniyôsesh.#12.28-34 Lc 10.25-28.

¿She t'e papi lhaôs pa Cristo?

(Mt 22.41-46; Lc 20.41-44)

35Meelh ti vanqu'eyjatsjan'ôcji shta ja Jesús ja vatishjanjavat, pa lhechesh pa tay'ôtsjanesh côque ya'clish pa yit'esh:

—¿Ta t'e lhayaash ti yit'esh japi vanqu'eyjatsjanesh pava lhfanishlhavach ca lhô'sesh ja Cristo ja David? 36Lhayaash ti lhavaatsha ja David ti tô'lhesha ja Espíritu Santo ti yit'esh cavôque ya'clishay:

Yit'esha ja Lhcaanvacle ja Yinvacle:

Vee'cum na yifayishey,

vooy ca janamjatajey afoc japi nacôfachi

pa lhech jan'eajop.*xb*

37Lhech lhavaatsha na apee ja David ti lhqueyesh Lhcaanvacle, ¿pa ta t'e lhayaash ti chiytatayanesh'in ja David? #12.36 Sal 110.1.

Acloj japi nivacle c'usemshi ti tach'ansha.

Pa Jesús yiyôytana papi vanqu'eyjatsjanesh pava lhfanishlhavach

(Mt 23.1-36; Lc 11.37-54; 20.45-47)

38Pa yit'esh ja Jesús ti yeyjatsjan japi nivacle:

“Anujumatsenelhjulh napi vanqu'eyjatsjanesh pava lhfanishlhavach, napi yen lhja pitej t'uyjatshiy, yen shta ca chinacju' ti chiyvan'e pa vatcasha'vat. 39Jô'tajesh ti yench'een java vatc'oovtes java tavaya japi vanqu'eyjatsjan ti yie' pa vatvanqu'eyjatsjanjavat. Meelh ti tsaccun pa yench'een shta pava ya'shesh ti isis vatc'oovtes. 40Japi lhech nijôclesh shta pava lhajpôyjey papi ôsch'acche pa yip'otajesh'e pavôque ti cajueshch'e ti t'aalh, ca tin'e niyijôa pa ca lhjunasha. Japi lhech lhfanishlhavach chiyequetsenesh jayu pa uj ti niysa' lhnivalhcheyash.”

Lhpa lhtinshanja lhpa ôsch'acche

(Lc 21.1-4)

41Pa yi'sha'ne ja Jesús yi'jop lhja cajón chiyuqu'een pava pesoc, yiclôvalhesh japi nivacle ti yuqu'een java lhpesoc lhja cajón; caaj shta japi acloj acôsshisha'ne yuqu'een java acloj pesoc. 42Pa nam shta lhja ôsch'acche ts'aclaay pa yuqu'e lhôn vitsha java napu' lhtinshanjay lhja cajón pava lhech niyijô'a ca natshaay. 43Pa lhechesh pa tôney ja Jesús japi t'eyjatsjanjas ti yit'esha:

—Yijô' ti jayeetshelh'a, anôque ôsch'acche ts'aclaay ya'shesh jum java yuqu'e lha cajón; 44lhayaash ti lhacôm'a napi yuqu'een java lhpesoc ya'shem ts'ivee, pa lhan'e vitsha anôque java yuqu'e na yijpôclônem claa nava yivantaj lhet lha lht'ajô'jemch'e.

Yit'esha pa Jesús pa vatishjanjavat ca chinvômjatsha'ne jayu

(Mt 24.1-2; Lc 21.5-6)

Currently Selected:

San Marcos 12: NIVA

Highlight

Copy