San Marcos 11
11
1Meelh ti yujeey ts'ivee ja Jerusalén, shalheema ja Betfagé shi' ja Betania, tajulhshi lhja utiyuc yiey ja Olivochat, lhech'e ti yichen ja Jesús japi napu' t'eyjatsjanjas, 2pa yit'esh ti yiyôjaa:
—Alhunelhey ja yitsaat yie' jan lhatjuyeelhshi jayu. Meelh ca u'jatajelhsham ja yitsaat, pa lhech lhavanelh'e jayu pa ve'lha cuvôyutaj lhaôs ti vanôôcfa, yie' jum lhavôôj ja lhashi. Jô lhech jôjjeclay nichinôv'apee pa cat'elheesh. Ca amtajelhey pa anuqueeshelh pa anchajeelhnee. 3Meelh ca niteetajesh papu: —¿Ta afanishelh'avach? pa at'eshelh:
—Tayôjijanesh ja Lhcaanvacle, ca amtajelhey pa anchajeelh tatsha.
4Pa yich'in japuquee, pa yi'van ts'ivee ja cuvôyutaj ja vanôôcfeesh'e lhavôôj ja lhashi, yie' ja nôyish t'ajuysham ja yitsaat. 5Caaj papi yivanesh, papi lhech yit'esh:
—¿Ta t'e afanisheshelh jayu na cuvôyutaj lhaôs ti lhnuqueeshelh?
6Pa yicuulh ts'ivee pa nifaclemch'e pan t'ônashem ja Jesús; pa jaspa ninshiyanem. 7Pa lhechesh pa yitojoneshey ts'ivee ja cuvôyutaj lhaôs ja Jesús, pa yan'apee japuquee ja cuvôyutaj java t'uyjatshiyis pa yiapee ja Jesús. 8Acloj japi nivacle yich'aneshch'ec'oya java t'uyjatshiyis. Jap'elh nôcôsch'e java aacjuy lht'oy pa yanch'ec'oya ja nôyish. 9Pa vooy japi vanôyin shi' japi nijooylhach'e ja Jesús, japi lhech yisitsenesh jum ti yit'eshvatsham'in:
—¡Tanshamiiy! ¡Chiisiyan nan nameshjooy pa lhey pa Lhcaanvacle!*xn* 10¡Chiisiyan na lhanvacleyash pa catsitata David nan namjooy! ¡Tanshamiiy jan yi'chishamnee! #11.9 Sal 118.25-26.
11Yamjam ja Jesús ja Jerusalén, pa yich'ôcji shta ja vatishjanjavat, pa yiclôvalhch'een lhacôm'a. Pa vooy ti tulh'in pa yiche'lhey japi doce t'eyjatsjanjas ja Betania.
Pa Jesús yipôfiyu lhpa higoyuc nintaay
(Mt 21.18-19)
12Meelh ti nalhu pa tay'e ts'ivee shta ja Betania, pa lhech t'aplhuqu'e ti yiyipcun ja Jesús. 13Pa tojey ti yivaney lhja higoyuc, aclojqu'e java lhsashay. Pa yi'tajey ca nivan pava ca lhayya. Meelh ti yamjatey pa anlhapa ca ve'lhaa ca lhaa, eem ti jôjjeclay nit'aplhua' ca nitaay. 14Pa yit'esh ja Jesús ti yiyôjaa lhja higoyuc:
—Nôqueesh tanca chintuj pa cat'elheesh pava ay.
Cavôque yipe'yeesh japi t'eyjatsjanjas ti lhech yit'esh.
Pa Jesús yisclan'ôcji pa vatishjanjavat
(Mt 21.12-17; Lc 19.45-48; Jn 2.13-22)
15Jô lhechesh ti yamey shta ja Jerusalén, pa lhayishlhaôcji ja vatishjanjavat ja Jesús, pa yisaasfach'ee lhacôm'a japi lhavcashanjas shi' japi tcashaytaj'in. Yic'umajeshch'esha'ne java vatc'oovtesjop pava pesoc, shi' java lhc'oovtes japi tcashayesh'in java ofotas. 16Pa ninteesh jum ca nan'ateesh jayu ca ninachesh'ôcji ja vatishjajavat pa'na ca nichaaj. 17Pa lhechesh pa vanqu'eyjatsjan pa yit'esh:
—Yit'esh avenna cava chiyi'sesh'e: ‘Na yijpôyich lheya t'alhjavat'eesh lhacôm'a napi yie' na cotsjaat’; lhan'e avaatsheelh pa lhjônelhch'e lhpa lhôvjôque' papi vancaclônjanjas.*xñ* *xo* #11.17 Is 56.7.,#11.17 Jer 7.11.
18Cavôque tpeeycheyesh japi vatcasinôc lhanvacles shi' japi vanqu'eyjatsjanesh pava lhfanishlhavach, pa yaychavalhjatey pa ca lhfanisheesh ca niclôn ja Jesús, lhayaash ti nijovayeshlhtapee, lhayaash ti yi'van ti acloj japi nivacle tamp'oyeshem pa t'ônash ti vanqu'eyjatsjan. 19Vooy ti tulh'in pa tayshi ja yitsaat ja Jesús.
Lhpa higoyuc nintaay pa vafshaam
(Mt 21.20-22)
20Meelh ti claafnalhu ti naashjop ts'ivee shta lhja higoyuc, pa yi'van ts'ivee ti vafshaam jum, yameshch'e pava lhfetatsiy. 21Ja Pedro yivoych'e lhcachi' lhja higoyuc pa yit'esh:
—Vanqu'eyjatsjan, a'va lhca higoyuc, lhpôfiyu can'ut, nôqueesh vafshaam jum.
22Pa yicuulh ja Jesús pa yit'esh:
—Ya aj ca acacueshelh ja Dios. 23Eem ti yijô' ti jayeetshelh'a: Papu ca niyôjaa lhôn an'um ana utiyuc ca niteetsha lhôn: ‘¡Utiyuc, ay'e na lhôv'e' ca ecletsham na lhjôvcha’, côque ti lhech yit'esh ti ninvatcacuesh jum ti yamjateyshi pa lhcachi' ca nôveemshi, pa lhech yieemshi jayu ca lhech t'ônashtaja.*xp* 24Lhan'e ca yit'eshelh'a, lhacôm'a pa ca aalhtajelhey, ya aj ca avatcacueshelh ca chinjutelh'ay, pa jaspa yieelhshiam jayu. 25Meelh ca aalhtajelh pa avômjatelhemch'e pa lhfanishtajelh'ash papu ca nacôvfachitajelh, pa nôque lhjunash jaspa yivômjatelhch'eam jayu vitsha pa ca ninavooytajeeshelhch'e ja Atataelh yiey ja vôôs.*xq* 26Jô pa ca niavômjatajeelhemch'e, pa tanca nivômjatelhch'eam vitsha pa ca ninavooytajeeshelhch'e ja Atataelh jan yiey ja vôôs. #11.23 Mt 17.20; 1 Co 13.2.,#11.25 Mt 6.14-15.
Pa t'unaj pa Jesús
(Mt 21.23-27; Lc 20.1-8)
27Pa vapecleylhach'e ts'ivee ja Jerusalén. Pa meelh ti t'ôtaych'e ja Jesús ja vatishjanjavat, pa lhechesh ti namey japi vatcasinôc lhanvacles shi' japi vanqu'eyajatsjanesh pava lhfanishlhavach shi' japi lhanvaclesesh nitaôvclaseesh. 28Pa niyôs pa yit'esh:
—¿She t'e papi yiyôjiesh'a ti lhech afanish'avach? ¿She t'e papi yijut'ay pa unaj ti lhech afanish'avach?
29Ja Jesús yicuulh vitsha pa yit'esh:
—C'aniyôseshelh jayu vitsha pa ve'lha ya'clish; ca ascuulhtajelh, pa jaspa c'acuulhshelh jayu vitsha, pa janfaclelh'am jan jatôôlhsha ja yunajjop ti lhech yifanishyivach. 30—¿She papi nichen ca Juan ti vancanajayan? ¿Lhech ja Dios, ja't'ajesha napi nivacle? Istaa ca asculheelh.
31Pa lhechesh pa yaychavalhvatsham'in pa yit'esh ts'ivee:
—Ca shtat'esh lhôn ti nichen pa Dios, pa niteetajeshjoo jayu ca shincuulh: ¿‘Ta t'e lhayaash ti niu'eshelha?’
32¿Ca shtat'esha lhôn ca nitô'lha napi nivacle ti nichen?
Cavôque pa nijovayesha ts'ivee, lhayaash ti nijovayeshjulh japi yi'jop nivacle, lhayaash ti yit'esha japi nivacle ca Juan ti yijô' ti uj ti chiytôyjata pava ti vaclan. 33Pa yit'esh ts'ivee ti yicuulh ja Jesús:
—Ni'nastôyeshelh.
Pa yicuulh vitsha ja Jesús pa yit'esh:
—Pa tan t'em vitsha ca nifaclelh'am jan jatôôlhsha na yunajesh ti lhech yifanishyivach.
Pa chiyovalheyjop atesha papi vatcumjayash lhavos niysisa
(Mt 21.33-46; Lc 20.9-19)
Currently Selected:
San Marcos 11: NIVA
Highlight
Share
Copy
Want to have your highlights saved across all your devices? Sign up or sign in
Nivacle Bible © Sociedades Bíblicas Unidas, 1994.
