San Lucas 10

Pa Jesús yichen'in papi setenta

1Pa lhechesh pa vooyshi pa Lhcaanvacle pap'elh setenta pa yinôyinjatey papi napu ts'ivee pava yitsates, lhayaash ti yit'esh ca namey vitsha. 2Pa yit'esha:

“Yijô', uj na vatcavcalhech, taj napi vatcumjayash lhavos naacloja. Istaa ca aalhshelha nan yitsôt'ajesh na vatcavcalhech jaspa nichensham pap'elh vatcumjat lhavos ca ninayjatva'ne.*xz* 3Meelh'in; a'va c'achenelhey ajunasheelhjulh java tashinshtas ti chiychensham pava cajovonjatas.*xa* 4Ya aj ca achaajelh pava avonsaclelh, shi' pava apesojiyiselh, shi' pava acfiyiselh. Ya aj ca acjueelh papi yi'shi' pa nôyish.*xb* 5Vooy ca uytajelh'ôcji pa jpôyich ajutsjatelh ca aneecjuelh pa at'eshelh: ‘Piiy nôque jpôyich.’ 6Ca piiytaja papi lhech yie', pa natcumeshelh'ajulh jayu pa vat'aacjujunjayash; vooy ca amtaja pa vapecl'am jayu pa acjujunjayashtaj. 7Amônlhaaelh'ôcji pa lhech jpôyich pa atsaccunelh pa ayôelhshi shta pava yi'van; lhayaash pa vatcumjat lhavo' isjop ca chinvancufanelh atesha. Ya aj ca meelhey ts'ivee pav'elh jpôyjey.*xc* 8Ca amtajelhey pa yitsaat pa ca naôvtaj'e papu ca natcuumtajelh'ajulh, pa atujelh pava ca natistajeshelh. 9Avatsjanchatelh papi tayyashaysha'ne papi lhech yie', pa at'eshelh: ‘Pa Dios lhanvacleyash ashalheelhe'ma.’ 10Taj ti ca amtajelhey pa yitsaat ca ninatcuumtajeelh'ajulh pa ayishlhaaelhch'e pa lhcaavju, pa at'eshelh: 11‘Jasichateshelh nava yifoc na lhcootsjat na avtsat'eelh, jaspa janôclitelh'am ti shalhatajelhc'oyaam ja Dios lhanvacleyash.’*xd* 12Jayeetshelh'am pa cat'eelhtajesh ca namtajey lhac'o' pava nalhus ujesh ti chiyclôyit jayu papi ninatcumelh'ajulh, yasheshc'oya jayu papi Sodoma lhavos.#10.2 Mt 9.37-38.,#10.3 Mt 10.16.,#10.4-11 Mt 10.7-14; Mr 6.8-11; Lc 9.3-5.,#10.7 1 C 9.14; 1 T 5.18.,#10.10-11 Hch 13.51.,#10.12 Gn 19.24-28; Mt 10.15; 11.24.

Pava yitsates ni'nanc'ashamem

(Mt 11.20-24)

13“¡Pa yijô', lhtats'aclay yitsaat Corazín! ¡Pa yijô', lhtats'aclay yitsaat Betsaida! Ca nivan lhapesh papi Tiro shi' papi Sidón lhavos cavôque lhasnôyjesch'esha'ne, pa nitatvaych'aclajtajesh pava lhfanishlhavach pa nitacshintajvatsham'in pa na'nitaj pava vonsac pa naôvtajshisha'ne pa shnomaj, vooy avaatsheelh lhavantajelh'in cavôque lhasnôyjesch'esha'ne.*xf* 14Taj ti vooy ca shtamtajey lhac'o' pava nalhus, pa t'aashelh'apee jayu pa anclôyitsjayashelh papi Tiro shi' papi Sidón lhavos. 15Vooy avaatsha Capernaum, ¿lheclôjesh avaatsha ti chinanenjateychisham ja vôôs? Chinanachajeyshicham jayu pa itôj ninmac pa cat'elheesh.#10.13 Is 23.1-8; Ez 26.1-28.26; Jl 3.4-8; Am 1.9-10; Zac 9.2-4.,#10.15 Is 14.13-15.

16“Papu ti tach'anelh'a pa tach'anyi shta, vooy papu nacônitshielh, pa tsicônitshi shta; papu tsicônitshi, pa yicônitshi shta jan tsichen.”#10.16 Mt 10.40; Mr 9.37; Lc 9.48; Jn 13.20.

Tapecl'in papi setenta

17Pa tapecl'in papi setenta pa uj ti nishamesh, pa yit'esh ts'ivee:

—Lhcaanvacle, nequ'ishemeshelhyam ca ey ti jetônelhjop pava tsich'es

18Pa yit'esh pa Jesús:

—Jech, taj ti javan ja Satanás ti nicôôtsha'ne tôlhey ja vôôs jan lhjunash ti yitsemajshicham ja tachinshi. 19Jajutelh'ay ja unajelh jaspa ôseelhsham'in pava tosis shi' pava alhulhpôsenjaya jaspa aashelh'apee pa unajelh papi naac'utsfaseelh, pa tanca natmenelh'ash pa'na.*xi* 20Taj ti ya ca anshameshelh ti nequ'ishemelh'am pava tsich'es, anshameshelh jô ti chiyi'sesh'e nava eyiselh yiey ja vôôs. #10.19 Sal 91.13.

Pa nishamesh pa Jesús

(Mt 11.25-27; 13.16-17)

21Lhech t'aplhuqu'e pa uj ti nishamesh pa Jesús tôlh'ejap pa Espíritu Santo, pa yit'esh:

“C'ôclôj, Tata, Alhcaanvacleesh na vôôs shi' na cotsjaat, lhayaash ti lhcapinatemey papi yitôôytajesh nava matas, vooy papi taôvclas ti lhnôclitem. Jech, Tata, nôque lhjunash ti lhentaj jum.

22“Nijutyiy ja Tata nava matas. Ampapu ca nitô'yish nôque Vataôs, ve'lha ja Lhtata yitô'yish; ampapu ca nitô'yish nôque Vatata, ve'lha na Lhaôs yitô'yish, shi' papi yitôyjata na Lhaôs.*xj* #10.22 Jn 3.35.,#10.22 Jn 10.15.

23Pa lhechesh pa yovalhsha'ne japi t'eyjatsjanjas pa yit'esha:

“Nishamesh nava vatôsjey ca nivantaj côque ti lhavanelh; 24lhayaash ti jayeetshelhaam ti acloj lhapesh papi chiytôyjata pava ti vaclan shi' pap'elh lhcaanvacles ti yeetajesh ca nivan cavôque matas ti lhavanelh, taj ti ninvan. Yeetajesh shta ca nipe'ya cavôque ti lhpe'yeelhch'e, taj ti ninpe'yach'e.

Chiyovalheyjop pa is Samaria lhavo'

25Pa lhechesh pa netshaam pa ve'lha vanqu'eyjatsjanesh pava lhfanishlhavach pa yichey pa Jesús pa yic'alhtantaja ti niyôs:

—Vanqu'eyjatsjan, ¿ta ca yifanishayivach ca jaspa ja'van pa yimônlhajayash ôyjôlhôyech?#10.25-28 Mt 22.35-40; Mr 12.28-34.

26Pa yicuulh pa Jesús pa yit'esh:

—¿She t'e ja vani'sesh'e vatyôjijat yi'shi' ja vatqu'isjayanach? ¿She pa lhclôvalhshi?

27Pa yicuulh pa vanqu'eyjatsjanesh pava lhfanishlhavach pa yit'esh:

—Istaa ca atanipjôclônsha pa acachi' shi' pa asôc'ôclit shi' pa unaj shi' shta pa aychavalhjayash ca en pa Anvacle Dios; en shta paelh avelh nan ajunash ti lhnen.*xm* #10.27 Dt 6.5.,#10.27 Lv 19.18.

28Pa lhechesh pa yit'esh pa Jesús:

—Tajulhey ti is ti lhascuulh. Istaa ca asnatesh côque pa lhavan jayu pa amônlhajayash.*xñ* #10.28 Lv 18.5.

29Taj ti vooy pa vanqu'eyjatsjanesh pava lhfanishlhavach yaôytench'e ti yachajeshjulh pa Jesús pa yit'esh:

—¿She t'e papi yivelhesh?

30Lhechesh pa yit'esh pa Jesús:

—Ve'lha pa nivacle tôlhey ja Jerusalén yichtajey ja Jericó. Pa lhechesh pa t'eclech'e papi vôncaclônjanjas pa nijôclesh lhacôm'a pava lhcôqueclitôy; pa yit'ijôj'in ts'ivee pa yujatajey ca nivômjat pa yichvatich'e c'oya. 31Pa lhechesh pa yich'e' shta pa nôyish pa ve'lha vatcasinô; pa yivantaj pa naashjop atesha. 32Lhech lha lhjunash shta pa tôlhshaam pa Leví, yivantaj pa naashjop atesha shta. 33Taj ti ve'lha pa Samaria lhavo' yich'e' shta pa nôyish, pa yi'van pa tcavts'aclayesh. 34Pa lhechesh pa yichey pa lhech nivacle, yifetatsiyanesh pava lhanc'ônjatevshay pa lhape' shi' pa cumjôtaj pa yiclôpjalheshem'apee pava lhanc'ônjatevshay, pa lhechesh pa yan'apee pa lhclô', pa yichesh pa yamjey pa yi'shi' pa nôyish, pa lhech yimônlhanit'e pa vanujumatsenesh. 35Paelh nalhu ti yich pa t'acumeshi pava napuqu'e tinshanjay pa yijuteyjop pan nôôyjop jayu pa yit'esh: ‘Anujumatsenesh nôque nivacle, ca nintajulhtajasham nava jajut'ay, ca jatpectaj pa jajut'ay pav'elh.’ 36¿She japuque napuque pu'jana lhavelhesh nôque t'eshey ninvômjat papi vôncaclônjanjas?

37Pa yit'esh pava vanqu'eyjatsjanesh pava lhfanishlhavach:

—Vooy papin tcavts'aclayesh pa lhech.

Pa lhechesh pa yit'esh pa Jesús:

—Isjop ca lhech afanishaavach vitsha.

Pa Jesús yiey pa lhajpôyich lhpa Marta shi' lhpa María

38Pa yich'e' shta pa Jesús pa nôyish pa yamey pa yitsaat, pa lhech yie' lhpa ve'lha ôcjeclô pa lhey Marta pa yiyôjaa pa yôôychiey pa lhajpôyich. 39Vooy lhpa Marta caaj lhpa lhch'injô lhey María, lhpa lhech yi'sha'nejop pava lhafoc pa Jesús jaspa tach'ansha pavan yit'esh:*xo* 40Vooy lhpa Marta pitôjesh'in pava matas ti t'acumqu'een, pa tac'uya pa Jesús pa yiyôjaa pa yit'esh: #10.38-39 Jn 11.1.

—Lhcaanvacle, ¿na avan lha sunja ti nints'efenesh nava jaycumqu'een?

Ayôjeayam, ca nits'efenesh.

41Vooy pa Jesús yit'esh ti yachajeshjulh:

—Marta, Marta, uj ti apitôjesh'in pava lhatcumqu'een, 42ve'lha pa suyeshiam. Lha María ya'shesh ti yisclansha'ne nava yench'esha'ne, pa tanca chinjôclesh.

Pa Jesús shi' pa vat'alhjayash

(Mt 6.9-15; 7.7-11)

Currently Selected:

San Lucas 10: NIVA

Highlight

Copy