San Lucas 9
9
1Pa Jesús tayelhva'ne japi doce t'eyjatsjanjas pa yijutey ts'ivee pa t'unaj jaspa yichenfach'ee jayu pava tsich'es, shi' papi tayyashaysha'ne ca nivatsjanemsha'ne jayu. 2Pa yiyôjaa ca nanfaclemch'e pa Dios lhanvacleyash ca nivatsjantajemsha'ne shta papi tayyashaysha'ne. 3Pa yit'esh:
—Ya aj ca acha'jelh pa'na, ya aj na shta pa avcôjat, shi' lhpa vonsa, shi' lhpa yucuve, shi' pava pesôc. Ya aj ca acha'jelh pava napu' uyjatshiyiselh, ve'lhaa ts'ivee pava t'uyelhch'e.*xn* 4Ca amtajelhey pa jpôyich ca chitôntajelh'ach'e pa uyelheyshi, pa lhech veelh'ejop amjelhey ca anôcjayutajelh shta. 5Ca amtajelhey paelh jpôyich ca nichintôntajeelh'ach'e pa ayishlhaaelh, pa asichateshelh nava afoclelh pa cotsjaat, cavôque lhtôychatelha ti tameneshlhavach jayu pa cat'eelhtajeesh.*xñ* #9.3-5 Lc 10.4-11. #9.5 Hch 13.51.
6Pa yicheyvatich'e lhacôm'a pava yitsates pa nifaclem ts'ivee pa vatqu'ilhjenjayash pa vatsjanemsha'ne papi tayyashaysha'ne yiey pava yie' ts'ivee.
Pa Herodes nintô'ya pa Jesús
(Mt 14.1-12; Mr 6.14-29)
7Pa lhcaanvacle Herodes chinfacleem lhacôm'a pava lhfanishlhavach pa Jesús; pa yistan'in pa ca naychavalhesh'e, lhayaash ti caaj papi yit'esh ti netshaam ca Juan tôlhey capi vafsha'ne. 8Pap'elh yit'esha ca lhecha pa Elías ca nam; pap'elh yit'esha ca lhecha papi p'alha chiytôyjata pava ti vaclan ti netshamch'e.*xo* 9Taj ti yit'esh pa Herodes:
—Ya lhech jayiyôjijanesh ti chiyt'ovô'sey ja lhshatech ca Juan. ¿She t'e pa lhech ti jaypeeycheyesha nava matas?
Pa yeetajesh pa Herodes ca nivan. #9.7-8 Mt 16.14; Mr 8.28; Lc 9.19.
Pa Jesús yicunjansha'ne papi cinco mil
10Meelh ti tapecl'in japi t'eyjatsjanjas pa nifaclemch'e pa Jesús pa lhfanishesh pa lhcumjayash. Pa lhechesh pa yichelhey ja nintanash'e shalheema ja yitsaat Betsaida. 11Meelh ti tpeeycheyesh cavôque papi acloj nivacle pa yicheyvatich'e tatsha yiey ja nintanash'e; pa vaneecjuelh pa Jesús pa lhechesh pa nifaclemch'e pa lhjunash pa Dios lhanvacleyash, pa yilhjensha'ne shta papi tayyashaysha'ne.
12Meelh ti nuut pa lhechesh pa yama japi doce t'eyjatsjanjas pa Jesús pa yit'esh:
—Istaa ca ayjat cum napi nivacle jaspa napecl'in ca nt'ichay pa nivooy shta pa ca nituj yiey java yitsates shalhaa, lhayaash ti nôquee ampa ca naaan.
13Pa yit'esha pa Jesús:
—Vooy avaatsheelh ajutelhey pa lhôc.
Pa yit'esh ts'ivee:
—Caajtaj nava ve'lhanôjesh yucuvec shi' nava napu' sajech, isjop t'e ca jôquelhemey pav'elh ca jaycasha'yelhe'ma lhacôm'a napi nivacle.
14Taj ti caaj papi cinco mil nivacle. Pa lhechesh pa yit'esha pa Jesús japi t'eyjatsjanjas:
—Istaa ca ayôjeelha ca nôvqu'esha'ne papi cincuenta, cincuentaesh ts'ivee lhacôm'a nap'elh.
15Pa nequ'ishamem pa yich'esha'ne lhacôm'a. 16Pa lhechesh pa t'acum'e pa Jesús pava ve'lhanôjesh yucuvec shi' pava napu' sajech. Pa yovalhesheychisham pa vôôs pa t'aalh pa yijutem pa t'ishameesh, pa yic'astemsha'ne pa yijutey japi t'eyjatsjanjas ca nitiseshch'e papi nivacle. 17Pa tuj lhacôm'a pa yapeesha'ne. Pa lhechesh pa nayjatva'ne pava lhqu'iyas pa doce pava sisenlhiy tapoojqu'esha'ne.
Yinôôclhanita pa Pedro pa Jesús ti Cristo
(Mt 16.13-19; Mr 8.27-29)
18Ve'lha pa nalhu tac'uyelhey pa Jesús japi t'eyjatsjanjas yiey pa nintanash'e pa t'aalh. Pa lhechesh pa niyôssham japi t'eyjatsjanjas pa yit'esh:
—¿She t'e papi tsilheclôjesh papi nivacle?
19Japi lhech yicuulh pa yit'esh:
—Caaj japi nalheclôjesh ca alhecha ca Juan, Vatnayjayash lhavo'; jap'elh yit'esha ca alhecha pa Elías; vooy jap'elh nalheclôjtajesh ca alhecha papi vatjutsa chiytôyjata pava ti vaclan ca chinenjatchisham.#9.19 Mt 14.1-2; Mr 6.14-15; Lc 9.7-8.
20Pa lhechesh pa niyôsesh:
—¿She papi lhaslheclôôjelh avaatsheelh?
Yicuulh ja Pedro pa yit'esh:
—A'lhech avaatsha a Cristo lhtô'lha pa Dios.#9.20 Jn 6.68-69.
Pa Jesús yasinôqui pa lhavafi
(Mt 16.20-28; Mr 8.30—9.1)
21Pa yit'esh pa Jesús ti yiyôjaa japi lhech:
—Ya aj ca anfacle'lhem jum papu cavôque. 22Pa yit'esh shta:
—Na Nivacle Lhô'sesh uj ti chiyclôyit jayu jum. Yicônitshi jayu japi nitaôvclasaesh lhanvaclesesh, shi' japi vatcasinôc lhanvacles, shi' japi vanqu'eyjatsjanesh pava lhfanishlhavach. Jô'tajesh ti yiclôn jayu shta. Taj ti ca namtajey pava pu'jana nalhus pa netshaam jayu shta.
23Pa lhechesh pa yit'esh:
—Papu ca niteetajesh ca nitsôfistajeshch'e, pa istaa ca nantôvaclu'lhavne, pa natcum'e pava tavijatayem nava nalhus nan yijunash ti jaycum'e lha cruz ca nanjoojyich'esha'ne.*xr* 24Lhayaash papi ca nôôytajesh pa lhamônlhajayash, pa lhech ti yac'oyesh jayu; lhan'e vitsha papu ca nitôôlhtajeshyi ca nac'oytajesh pa lhamônlhajayash pan nilhjen jayu.*xs* 25Cha'lhatesh'apee papi nivacle ca nuyjat'ôcji pa lhsôc'ôclit lhacôm'a nava yie' na cotsjaat, vooy lhavaatsha vatvômjat jayu. 26Papu ca nivapentajyish shi' cava yasinôc, yivaatsha shta, ya Nivacle Lhô'sesh, javapenesh jayu vitsha ca janamtaj nan lhjunash pa lhcaanvacle, ca jatôôlhtajshamjop ja lhatjumtseyash ja Tata ca jatanôychitajelh japi isis ángeles. 27Yijô' ti jayeetshelh'a, ti caaj napi yi'nee ch'apaey'in pa ca lhavafia ti p'alha ti yivaney ja Dios lhanvacleyash. #9.23 Mt 10.38; Lc 14.27; Jn 12.24.,#8.24 Mt 10.39; Lc 17.33; Jn 12,25.
Tanu'jam pa t'aisiyash pa Jesús
(Mt 17.1-8; Mr 9.2-8)
28Nôjeshch'e cava pu'janayama nalhus pa yich'apee pa Jesús lhpa utiyuc, tanaôycheelh ja Pedro, ja Jacobo shi' ja Juan pa t'aalh.*xt* 29Lhech'e ti t'aalh pa Jesús pa tanujamc'oya pa t'aisiyash, vooy pa lhtaco venalhjunash, pava t'uyjatshiyis uj ti climsha'ne, jô'tajesh ti nôcshi'sha'ne. 30Pa lhechesh pa nam papi napu' nivacle pa tasinôyelh'in pa lhech. Papi lhech pa Moisés shi' pa Elías. 31Uj ti tif'apee ts'ivee pa lhqu'isjuyaj. Pa lhechesh pa yasinôquivatam pa lhavafjayash pa Jesús yiey pa Jerusalén. 32Taj ti vooy ja Pedro shi' jap'elh tanaôycheelh uj ti nimôjayutajch'esha'ne, taj ti vaniyitjulh pa lhanjôti ti yi'van pa lhqu'isjuyaj pa Jesús shi' pap'elh napu' yielhvatcop. 33Meelh ti tayjop pa Jesús papi lhech napu' nivacle, pa yit'esha ja Pedro: #9.28-35 2 P 1.17-18.
—Vanqu'eyjatsjan, ¡Istajeshnee jum! Anu'jelhyiyaam ca yisnatshelh pava pu'jana jpôyjey: ve'lha pa avaatsha, ve'lhataja shta ja Moisés, vooytaja shta paelh ja Elías.
Teya ti yistan'in pa ca niteesh ja Pedro. 34Pa yalhatajesh ti nameyshicham ts'ivee lhpa vôse' vanajulhjat'apee jum japi lhech pa nijovayshi lhpa vôse'. 35Pa lhechesh pa tavaysham pa vat'ôjôj lhpa vôse' pa yit'esh:
“Nôque Yaôs yenach, lhech nôque ach'anelha.”#9.35 Is 42.1; Mt 3.17; 12.18; Mr 1.11; Lc 3.22.
36Meelh ti nôjeshch'e pa vat'ôjôj pa yivan ts'ivee ti ve'lha pa Jesús. Japi lhech nits'iseeshey, tanca nanfacleem pap'elh pava yi'van.
Pa Jesús yivatsjanchat pa nich'ayech yi'shi' pa tsich'e'
(Mt 17.14-21; Mr 9.14-29)
37Vooy paelh nalhu ti t'eclet'ech'esha'ne lhpa utiyuc pa nam papi acloj nivacle jaspa yi'van pa Jesús. 38Pa lhechesh pa yisitsenesh ti tôn'in pa ve'lha nivacle pan yicshenshi pap'elh nivacle, pa yit'esh:
—Vanqu'eyjatsjan, istaa ca ovalhey na yaôs ve'lhayam; 39caaj pa tsich'e' ti t'acum'e pa yisitsiyan ti yafshiyan'in, lhayaash ti tanachantaj'in, pa lhechesh pa tôlhch'een lhashi cava lhsatuc, yajatesh ti uj ti yiclôyit. 40Apis ti jayôjitajsha napi eyjatsjanjas ca nisa'semfach'ee, taj ti nintôyish ts'ivee.
41Pa yicuulh pa Jesús pa yit'esh:
—¡Jay, ti acacujanjaselh na t'ôyiy ninavooyshelhch'e! ¿Ta t'e ca yaplhuach'e ca yamônlheelh'ajop? ¿Ta t'e ca yaplhuaeshch'e shta nasclôyelh'ash? Anchaajyi na aôs.
42Meelh ti nachjuulh pa nôctech pa t'acum'e pa tsich'e' pa yôôtjatesha cotsjaat pa tanachantaj'in shta. Vooy pa Jesús yichenfach'ee pa tsich'e', pa lhechesh pa yivatsjanchat pa nôctech pa yijutey shta pa lhtata. 43Pa lhacôm'a ti tamp'oyeshem lhayaash ti uj pa Dios.
Pa Jesús yachajeyc'oya ti nifac pa lhavafjayash
(Mt 17.22-23; Mr 9.32-33)
Meelh ti tamp'oyeshem lhacôm'a pava yisnatesh pa Jesús, pa yit'esha japi t'eyjatsjanjas:
44—Ach'anelhch'e jum cavôque pa ya aj ca antôvaclueshelhch'e shta; pa vooy yivaatsha, ya Nivacle Lhô'sesh, chitsijuta jayu papi nivacle.
45Vooy japi t'eyjatsjanjas nintô'yishc'oya pan yich'e' pava lhclishay, lhayaash ti nichinôôclhanitemch'e; taj ti nijovayeshem ca niyôsesh pan yich'e' côque.
¿She t'e papi ya'shesh pa lhjunash?
(Mt 18.1-5; Mr 9.33-37)
46Pa lhechesh pa tavayeshvanôcji ts'ivee japi t'eyjatsjanjas pa taniyôstajesh ts'ivee papu nôv'e' ca na'shesh pa ca lhjunasha,*xv* 47taj pa Jesús ti yitô'yish pava yaychavalhtajey ts'ivee. Pa lhechesh pa t'acum'e pa ve'lha taôvclaj pa yivatsavatjatlhach'etsham 48pa yit'esh: #9.46 Lc 22.24.
—Papu ti yaychavalhey ca yey ti t'acuumjulh nôque taôvclaj, pa lhech lhavaatsha ti t'acuumyijulh; vooy papu t'acuumyijulh pa t'acuumjulh shta jan tsichenshicham. Papu ca ninunataja pa lhecha lhavaatsha ca na'shesh pa ca lhjunasha.#9.48 Mt 10.40; Lc 10.16; Jn 13.20.
Papu ca nishincônitshitaja, pa shtantsôt'ajesh jayu
(Mr 9.38-40)
49Pa lhechesh pa yit'esha pa Juan:
—Vanqu'eyjatsjan, javanelh ja ve'lha nivacle ti neytônjop ti yisaasfach'ee pava tsich'es; taj ti niyvashanelhem, lhayaash ti nishtatanaôycheelhsha'ne.
50Pa yit'esha pa Jesús:
—Istaa ca an'ateelh, lhayaash papi ca nishincônitshitaja pa shtantsôt'ajesh jayu.
Pa Jesús yishanat pa Jacobo shi' pa Juan
51Meelh ti yameyjop jan t'aplhu' ti vapecchisham jayu pa Jesús pa yichey ja Jerusalén. 52Pa lhech'e ti yinôyinjatajey japi t'eyjatsjanjas ja yitsaat yiey ja Samaria ca nivoomey pa ca nijo'e jayu; 53Taj japi Samaria lhavos ninvashanem pa ca nijo'e, lhayaash ti yi'van ti yichey ja Jerusalén. 54Meelh ti yi'van côque japi t'eyjatsjanjas ja Jacobo shi' ja Juan, pa yit'esha ts'ivee:
—Lhcaanvacle, ¿lhteesh ca janchenelheyshicham pa itôj tôlhey pa vôôs jaspa tif'e' jayu lhacôm'a, yiey pan lhjunash pa chiytôyjata pava ti vaclan lhey Elías?#9.54 2 R 1.9-16.
55Pa lhechesh pa yovalhey pa Jesús pa yishanat pa yit'esh:
—¿Tanca natôôyshelh pa ca natsôt'ajeshelh? 56Ya vooy ya Nivacle Lhô'sesh, ninachey ca yivômjat pa lhamônlhajayash papi nivacle, janachey ca c'alhjenesh.
Pa lhechesh pa yichey paelh yitsaat.
Papi yit'esh ti yofiis pa Jesús
(Mt 8.19-22)
57Meelh ti yichelhch'e pa nôyish pa yit'esha pa ve'lha nivacle pa Jesús:
Lhcaanvacle, javoach'esha'ne jayu pa ca ajuytajshiin.
58Pa yicuulh pa Jesús pa yit'esh:
—Pava yo'nisec caaj pava lhôvjôquey, pava ajôclôs caaj pava lhupis; vooy na Nivacle Lhô'sesh amem pa ca nit'ô'siyesh pa ca nijo'taj'e.
59Pa yiyôjaa pa Jesús paelh nivacle pa yit'esh:
—Atatvoyich'e.
Taj ti yicuulh pa yit'esh:
—Lhcaanvacle, avashanyam cum ca jajutsjat ca jôquey ca tata ca jatishc'oya.
60Yicuulh pa Jesús pa yit'esh:
—Tajulhey ca nitishc'oya papi vafsha'ne papi lhavafjafas; taj ti avaatsha atatvoyich'e tatsha pa anfacleem pap'elh ja Dios lhanvacleyash.
61Pa lhechesh pa yit'esh paelh:
—Lhacaanvacle, javoach'e jayu, taj ti avashanyam cum ca jajutsjat ca jôquey japi yiey ja yijpôyich ca janeecjuelhsha'na.#9.61 1 R 19.20.
62Taj ti yit'esha pa Jesús:
—Papi t'acum'e pa cuvoyu lhavjooc, ti yovalhey t'oyiish, pa sasjop, lhayaash ninatjuya ja Dios lhanvacleyash.
Currently Selected:
San Lucas 9: NIVA
Highlight
Share
Copy
Want to have your highlights saved across all your devices? Sign up or sign in
Nivacle Bible © Sociedades Bíblicas Unidas, 1994.
