San Lucas 8
8
Papi ôcjeclôy yefenesh pa Jesús
1Pa lhechesh pa t'ôtaych'e pa Jesús pava acloj yitsates, pa nifaclem pa lhjunash pa Dios lhanvacleyash. Tanaôycheelh papi doce t'eyjatsjanjas. 2Tanaôycheelh shta papi napu' ôcjeclôy, papi lhech yilhjenesha'ne pava tsich'es shi' pava lhayyashac. Ve'lha lhpa lhech María lhey shta Magdalena; chiyilhjenesh lhapesh pava napu'yama tsich'es. 3Shi' shta lhpa Juana, lhpa lhch'acfa pa Chuza, lhcavoesh pa Herodes, shi' shta lhpa Susana nôquee pap'elh acloj, papu lhech yefenesh pava yi'van.#8.2-3 Mt 27.55-56; Mr 15.40-41; Lc 23.49.
Pa chiyovalheyjop atesha pa vatcôvjiyanjayash lhavo'
(Mt 13.1-9; Mr 4.1-9)
4Acloj papi tôlhey'in ts'ivee pava yitsates jaspa yi'van pa Jesús. Meelh ti tc'a'vane papi lhech acloj pa yasinôquiem pa yovalhemeyjop atesha. Pa yit'esh:
5“Ve'lha pa vatcôvjiyanjayash lhavo' yichesh pava lhcôvjiyanchey pa yisichatch'e ti yicôvjiyan. Meelh ti yisichatch'e pa caaj pava lhtôsjey natshisha'ne pa nôyish pa chit'ôsche'in, pa nam pava ajôclôs pa tujqu'e'. 6Vooy pav'elh pa nat'esha'ne pa utechat; meelh ti tôôlhtajch'e pa vafch'e tatsha, lhayaash ti nitac'op'ashi. 7vooy pav'elh lhtôsjey natshisha'ne pa nivachechat, pa tôlheelhvatjuulh pava nivachey pa yiclôn pava chiycôvjiyantaj. 8Vooy pav'elh lhtôsjey nat'esha'ne pa is'e cotsjaat pa tôôlh pa vacalh jum; ve'lha lhtôsej pa cien pava tô'lha lhtôsjey.
Meelh ti yit'esh cavôque pa yisitsenesh pa Jesús pa yit'esh:
—Ca nicaajtajelh'am pava acfeyelh, pa ach'anelhch'e cavôque.
Ca chinôfiis pa lhjunash pava chiyovalheyjop atesha
(Mt 13.10-17; Mr 4.10-12)
9Pa lhechesh pa niyôsesh ts'ivee japi t'eyjatsjanjas cavôque yovalheyjop atesha. 10Pa yit'esha pa Jesús
“Vooy avaatsheelh yit'eshelh'a ja Dios ca chinatôyjatelhc'oya jum pava tastayesha ja lhjunash ja lhanvacleyash; vooy pap'elh yit'eshem pa ti chiyovalhemeyjop atesha, jaspa nivan atesha, taj ti tanca nitô'ya, jaspa nipe'ya atesha, taj ti tanca nitôych'e.#8.10 Is 6.9-10
Pa Jesús yashinitjat ti chiyovalheyjop atesha pa vatcôvjiyanjayash lhavo'
(Mt 13.18-23; Mr 4.13-20)
11“Nôque yich'e' cavôque yovalheyjop atesha: Nava vatcôvjiyanchey chiyovalheyjop cava Dios lhasinôc; 12pava ti natshisha'ne pa nôyish chiyovalheyjop papu ti chinfactajemch'e cava Dios lhasinôc, pa nam tatsha pa tsich'e' pa yayjatshi pava lhcachic pavan chinfactajem jaspa yicacuqu'e, pa jaspa tanca chinalhjen. 13Pava lhtôsjey natshisha'ne pa utechat chiyovalheyjop shta papi yivanjop'inlhataj cava Dios lhasinôc, niiy'eesh jô ca nit'unesh'in, lhayaash ti naaclojach'e pava lhc'osey. Taj ti naacloja pava nalhus ti nincacuesh, pa nam pa lhancôntayashesh pa vô'mesh. 14Pava natshisha'ne pa nivachechat chiyovalheyjop papi tach'anch'e atesha, pa yuyey pa lhnôyish pa ujesh ti yaychavalhaan nava yie' na cotsjaat. Yen jum shta ca acôjjeshiin nava chincu'tajesh. Lhech cavôque ti yip'oemey cava Dios lhasinôc pa nintaay. 15Vooy pava lhtôsjey nat'esha'ne pa is'e cotsjaat chiyovalheyjop papi tach'anch'e jum yiey pa lhcachi' pa nequ'ishamesh shta pava chinfacleem, pa yivo'yeshch'e pava lhfanishlhavach pa taay jum.
Pa chiyovalheyjop lhpa itôtaj
(Mr 4.21-25)
16“Ampapu ca nitseclôlhey lhpa itôtaj ca nifich'esh, ca nesh'ôcji pa lhmôjôvat; vooy ca nineshchisham jaspa yi'van pa lhqu'isjuyaj papi yich'ôcji.*xk* 17Lhayaash ti ca nôv'e' t'e pa ca chinfiich jum ca nichinôclita, yamsha ca chiniistanjatesh ca nichintôya'a.#8.16 Mt 5.15; Lc 11.33.,#8.17 Mt 10.26; Lc 12.2.
18“A'va, ach'anelhey jum; lhayaash papi p'alha ti caajem pa chiyjuteem jayu shta paelh. Lhan'e vitsha papi caajtajem pa chiyayjatjop pa yi'tajjop.#8.18 Mt 25.29; Lc 19.26.
Lhpa lhamimi shi' papi lhch'injavot pa Jesús
(Mt 12.46-50; Mr 3.31-35)
19Pa lhechesh pa namey lhpa lhamimi shi' papi lhch'injavot pa Jesús pa yiey pa lhech, taj ti nishalheema ti yamtajey, lhayaash ti acloj pap'elh. 20Caaj papi yayjateshey pa Jesús pa yit'esh:
—Lha amimi shi' napi ach'injavot yi'fach'ee, taj ti yeetajesh ca navan.
21Taj ti yit'esh lhavaatsha:
—Papi yipe'ya cava lhasinôc ja Dios pa nequ'ishamesh, papi lhech mimiclesh pa ch'injavot'esh shta.
Pa Jesús yivômjatesh pa lhaviim shi' pava usch'e
(Mt 8.23-27; Mr 4.35-41)
22Ve'lha pa nalhu yitsheelhsham pa Jesús japi t'eyjatsjanjas lhpa lhôvjatshi, pa yit'esha:
—Shnôquey jayu pacham na lhjôvcha.
Pa yich'in. 23Meelh ti yicheshey pacham pa yimô' pa Jesús. Pa yalhatajesh ti tanu' pa lhaviim pa yijôjactsininshi pa yinôôt, lha pa yam'apee lhpa lhôvjatshi pava usch'e, pa lha yitajshicham. 24Pa lhechesh pa nijat'ôtsjan pa Jesús, pa yit'esh ts'ivee:
—¡Vanqu'eyjatsjan! ¡Vanqu'eyjatsjan! ¡Shnôcjicham jayu!
Pa lhechesh pa netshaam pa Jesús pa yiyôjisham pa lhaviim shi' pava usch'e; pa lhacôm'a ti vô'mesh pa cano. 25Pa lhechesh pa yit'esha japi t'eyjatsjanjas:
—¿Ta lhjunash pa niacacujayasheelh?
Pa nitôyiyjat japi lhech, pa taniyôseshch'e ts'ivee:
—¿She t'e nôque nivacle, yiyôjisham ja lhaviim shi' na yinôôt, pa nequ'ishamem?
Pa Gadara lhavo' yi'shi' pava tsich'es
(Mt 8.28-34; Mr 5.1-20)
26Ts'aam ti yamey ja cotsjaat pa lhey Gadara, yieypacham ja lhjôvcha, yivooyshi ja Galilea. 27Meelh ti t'ôsfach'ee pa Jesús, pa tacu'ya pa ve'lha nivacle. Cajueshch'e ti caajem lhavaatsha pava tsich'es. Taj ninuych'e lhpa vat'uyjatshiy, nintôlh'ôcji shta pa jpôyich, vooy pava nivalhjey tôlhshaam. 28Meelh ti yi'van pa Jesús pa t'acjatsuy'e t'ajuyish pa lhech, pa tôn'in:
—¡Ya aj ca anamyi avaatsha alhech Jesús, Atataesh ja Dios yash'apee pap'elh! ¡Jayeesh'a ca ya aj ca ascômclôqui jô'!
29Yit'esh côque, lhayaash ti yiyôjaa pa Jesús pa tsich'e' ca nitayshi pa lhech. Aclojesh ti yitojon pa tsich'e' pa lhech; vooy pap'elh nivacle yôcfa'tajesh pava t'itjuy shi' pava lhafoc pava calenac, taj ti yecjetshishaneen, vooy pa tsich'e' yiclôtey pa cotsjaat ti ampapu ca nôv'e'. 30Pa Jesús niyôsesh pa lhech pa lhey:
—¿Ta ey?
Yicuulh pa lhech pa yit'esh:
—Yey Legión.
Yit'esh côque, lhayaash ti acloj pava tsich'es yi'shi' pa lhech. 31Pava lhech tsich'es t'aalhsha pa Jesús, jaspa tanca nichensham pa itôj ninmac pa cat'elheesh. 32Caaj pava acloj vojotas tac'ut'apee lhpa utiyuc, pava tsich'es vatants'aclansha pa Jesús ca nit'iyjatsham pava vojotas; pa yicu'lhesh pa Jesús. 33Pa lhechesh pa tayshi pa nivacle pava tsich'es, pa vooy pava vojotas vat'iyshamsha'ne. Lhan'e pava vojotas pa t'ecletshamsha'ne ja tovôc pa yiyôlhp'ojisha'ne.
34Lhan'e papi yiclovalhtaj pava vojotas, pa meelh ti yi'van cavôque pa nijovayvatsham'in, pa vacumajeyvatich'e pa yitsaat pa nifaclemch'e cavôque shi' papi yiey pa joot. 35Papi nivacle pa yicheyvatich'e pava lhech vaclan pa jaspa yi'van. Meelh ti yamey pan yie' pa Jesús, pa yi'van ts'ivee pa nivacle ti p'alha ti tayshi pava tsich'es, yi'sha'nejop pava lhafoc pa lhech. Nôqueesh t'uyjatshiyiy pa tcajôyshay shta; pa lhechesh pa nijovayvatsham'in. 36Papi yivanesh pa nifaclemch'e pan lhjunash ti chiyilhjenesh pa nivacle pava tsich'es. 37Pa nôqueesh vatants'aclana lhacôm'a papi Gadara lhavos pa Jesús ca nitay'e, lhayaash ti ujesh ti nijovayvatsham'in. Pa t'ôsshaam pa Jesús lhpa lhôvjatshi pa yichesh. 38Vooy pa nivacle ti nich'a tayshi pava tsich'es pa vatants'aclantajesha jum ca nitanôycheelh, taj ti tcôvoyem pa Jesús pa yit'esh:
39Mapecley pa ajpôyich, pa anfacleem lhacôm'a nava lhfanish'ash ja Dios.
Pa yich pa nivacle, pa lhechesh pa nifaclem lhacôm'a papi yi'shi' pa yitsaat pan lhfanisheshem pa Jesús.
Lhpa lhôse pa Jairo, shi' lhpa ôcjeclô ti t'ajaya lhpa t'uyjatshiy pa Jesús
(Mt 9.18-26; Mr 5.21-43)
40Meelh ti vapecley pacham ja lhjôycha pa Jesús, pa lhechesh pa t'acuumjulh tatsha papi lhech nivacle pa nishamesh; lhayaash ti lhacôm'a ti nichaypavatsham'in. 41Pa lhechesh pa nam pa ve'lha nivacle pa lhey Jairo, pa lhech lhanvacleesh pa vatvanqu'eyjatsjanjavat, pa t'acjatsuyshichamjop pava lhafoc pa Jesús pa vatants'aclana ca nôque'lhey pa lhajpôyich; 42lhayaash ti caaj lhpa ve'lheem lhôse, doce pava lhnincôpes, lhpa lhech yujatajey ca nivaf. Meelh ti yichey pa Jesús, pa lhechesh pa vat'uqu'e papi nivacle.
43Taj ti yicshenshi papi lhech lhpa ve'lha ôcjeclô tayyashay, doce pava lhnincôpes ti yicôjôsesh'in ti tavoyey, cha'lheesh ti tifeem papi vatcafetatsiy lhavos pava yi'van, taj nive'lhaa papu ca nalhjen. 44Tôlhey t'ôyiish pa Jesús pa t'ajaya pa yoj'esha'ne lhpa t'uyjatshiy, pa tatsha ti vô'mesh ti natsha'ne pava lhavoyey.
45Pa lhechesh pa tay'ôtsjanesh pa Jesús pa yit'esh:
—¿She papi tanajayyi?
Yit'eshvatam lhacôm'a ti ampapu, pa yit'eshelh pa Pedro papi tanaôycheelh:
—Vanqu'eyjatsjan, nacôt'at napi nivacle lhayaash ti natvatjulh'in, vooy na ti lhteesh: ¿She papi tanajayyi?
46Taj ti yit'esha pa Jesús
—Yijô' ti tanajayyi papu, lhayaash ti tsicha'vayeshyich'e ti tayyitshi pa yunaj.
47Meelh ti yipe'ya lhpa ôcjeclô ti chincha'vaych'e, pa lhechesh pa tanc'uya pa ts'ananan'in pa t'acjatsuyshichamjop pava lhafoc pa Jesús. Pa nifac pa yipe'ya lhacôm'a papi nivacle pan lhayaash ti t'ajaya, nifac shta ti vatsjan tatsha. 48Pa yit'esha pa Jesús:
—Yôse, navatsjanchat na niacacujayasha. Môôj na ac'usiyash'in.
49Jôjjeclay tasinôyelh pa Jesús lhpa ôcjeclô, pa nam papi lhcavos pa lhanvacleesh pa vatvanqu'eyjatsjanjavat nayjateshey pa Jairo pa yit'esh:
—Apis ti vaf lhca ôse, an'ate na vanqu'eyjatsjan.
50Meelh ti yipe'yach'e côque pa Jesús pa yit'esh:
—Ya aj ca anjovay'in; ca naascacu'taja pa nivatsjan jayu lhpa ôse.
51Meelh ti yamey pa lhajpôyich pa ninvashanem ca nôc'ôcji pap'elh, vooy ja Pedro, ja Jacobo, ja Juan shi' pa lhtata shi' lhpa lhamimi lhpa lhutsja yivashanem. 52Yipvatsham'in lhacôm'a pa tafshijop'in shta lhpa lhech. Pa yit'esh pa Jesús:
—Ya aj ca apelh'in; ninvaf lha lhutsja, yimô' atesha.
53Pa nicaaysiyuesh'in papu lhech, lhayaash ti yitôôysha ti vaf jô'. 54Pa lhechesh pa t'acum'e pa Jesús pa lhpôcôt pa yit'esh ti yisitsenesh:
—¡Lhutsja, aneetsham!
55Vapeclem pa lhamônlhajayash pa netshaam tatsha; tayôjijanesh pa Jesús ca chinjutey pa lhôc. 56Uj ti nitôyiyjat papi lhnavot; pa yiyôjiesha pa Jesús ca ya aj ca nanfaclemch'e papu.
Yichen'in pa Jesús papi doce t'eyjatsjanjas
(Mt 10.5-15; Mr 6.7-13)
Currently Selected:
San Lucas 8: NIVA
Highlight
Share
Copy
Want to have your highlights saved across all your devices? Sign up or sign in
Nivacle Bible © Sociedades Bíblicas Unidas, 1994.
