San Lucas 7
7
1Meelh ti tifeshch'e pa Jesús ti tasinô'yem papi nivacle, pa yichey pa Capernaum. 2Lhech yie' pa ve'lha lhcaanvacle, Roma lhavo', caaj pa lhcavo yen jum, taj ti aôytej'in lhavaatsha, yujatajey ca nivaf. 3Meelh ti tpeeycheyesh pa lhacaanvacle pa Jesús, pa yicheney papi napu' nitaôvclaseesh ti lhcaanvaclesesh japi judíos jaspa t'a'lhey ca nachey ca nifetetsiyan pa lhcavo. 4Papi lhech yamelhvatjulh pa Jesús pa ujesh ti t'a'lha pa yit'esha ts'ivee:
—Tajulhey ca efenesh jô lhech, lhcaanvacle, 5lhayaash ti tsenelh lhacôm'a jan yajô'jelh pa yisnatshelhyam ja vatvanqu'eyjatsjanjavat.
6Pa lhechesh pa tanaôycheelh pa Jesús. Meelh ti yujaa pa lhajpôyich, pa yichenjulh pa lhcaanvacle papi napu' lhc'utsfas pa yit'esha pa Jesús:
—Lhcaanvacle, istaa ca ya aj na ca anach'ôcji na yijpôyich, lhayaash ti ya am'ajulh; 7tanca yich'ajulh, lhayaash ti javapen'ajulh. Ayôjiey atesha, pa vatsjan jayu na yicavo. 8Taj ti yivaatsha ya'shichaam, yashyitapee jap'elh, vooy napi yicavos c'ash'apee. Ti jayôjia ja ve'lha, pa yich tatsha; ti jayôney jaelh, pa nachyiy tatsha; ti jayôjiejsha na yicavo pa ca nasnatesh, pa yisnatesh tatsha.
9Meelh ti yipe'yeesh pa Jesús cavôque pa yiqu'imjat, pa yovalhjulh papi tanaôycheelh pa yit'esh:
—Yijô', nôque uj nivatcacujayasha nich'a ti ja'van, lhayaash ti niyivanesh pa cat'elheesh japi Israel lhavos.
10Pa lhechesh pa vapecley tatsha pa lhajpôyich papi chiychen, pa lhechesh pa yi'van ti p'alha ti vatsjan pa lhcavo.
Pa Jesús yinenjatchisham pa lhaôs lhpa ôsch'acche
11C'oya ti yivaclhitesh côque, pa yichey pa Jesús ja yitsaat lhey Naín, tanaôycheelh japi t'eyjatsjanjas shi' pap'elh acloj. 12Meelh ti yu'jaa ja yitsaat, pa yivaneshjulh papi yifos pa ve'lha vaf, yeetajesh ca nitishc'oya. Pa lhech ve'lheem lhpa lhamimi, lhpa lhech ôsch'acche. Acloj pap'elh lhchifas vo'tajeshch'e. 13Meelh ti yi'van pa Lhcaanvacle pa tcavts'acla'yesh lhpa lhech, pa yit'esha:
—Ya aj ca ap'in.
14Pa yichey pa Jesús pa t'apaccuna lhpa yiclônilh t'ajuya papu ti vaf; pa vatsavat'esh papi yifostaj. Pa yit'esha pa Jesús pan vaf:
—Nich'ayech, c'ayôjaa: ¡Aneetsham!
15Pa lhechesh pa netshaam pa yi'sha'ne pa lhech vaftaj pa tasinôy'in; vooy pa Jesús yijutey lhpa lhamimi pa lhech. 16Meelh ti yi'van côque pa uj ti nijovayvatsham'in pa yôclôj ts'ivee pa Dios pa yit'esh:
—Na uj chiytôyjata pava ti vaclan ti nachjooy casvaatsheelh.
Yit'eshvatsham'in shta:
Nachey pa Dios napi yitsôt'ajesh jaspa yefenesh.
17Lhacôm'a japi yie'ja Judea shi' pava t'afaych'elhavôôj yitsates tpeeycheyesh pan yisnatesh pa Jesús.
Papi yichen pa Juan, Vatnayjayash lhavo'
(Mt 11.2-19)
18Tpeeycheyesh pa Juan cavôque, lhayaash ti nifaclem papi tanaôycheelh. Pa lhechesh pa tôney papi napu'. 19pa yicheney pa Jesús jaspa niyôs ti yijô' ti Cristo lhavaatsha ti nam, ja't'ajesha ca chinch'anc'oya paelh. 20Papi yichen pa Juan pa yamey pa Jesús pa yit'esh ts'ivee:
—Tsichenelh'ay ja Juan, Vatnayjayash lhavo', jaspa c'aniyôselh jayu ca yijô'taja ti a'lhech ti a Cristo ti lhnam, ja't'ajesha ca jaychanelhc'oya paelh.
21Yamey papi yicheney pa Juan lhech t'aplhuqu'e ti vacaatshey pa Jesús ti yifetatsiyansha'ne papi acloj aôytes'in, yilhjenesh shta papi yi'shi' pava tsich'es, yijutey shta pa nich'a lhtô'vat papi taclujuy. 22Pa lhechesh pa yicuulh pa Jesús pa yit'esh:
—Meelhey ja Juan pa anfacle'lhem nan lhjunash napi taclujuy ti yovalhvatsham'in, t'ôtaay shta napi ancojoy, vatsjansha'ne shta napi tashtôtaysha'ne, tpeeychey shta napi peeychelhôjis, napi vafsha'ne netshamch'e shta, napi ts'aclaaysha'ne chinfacleem shta na lhnilhjenjayash.*xd* *xe* 23¡Nishamesh napi ninatjuyijulh! #7.22 Is 35.5-6.,#7.22 Is 61.1.
24Meelh ti tôsch'e papi chiycheney pa Jesús, pa chayema papi acloj nivacle pa Juan pa yit'esh:
—“¿Ta t'e lhayaash ti lhôquelhey ja cotsjaat ti ampapu ca nôv'e'? ¿She pa lhteetajeshelh ca avanelh? ¿Ve'lha lhpa sise yiclôyan pa lhaviim? 25¿She t'e pa lhteetajeshelh ca avanelh? ¿Lhech natane pa nivacle yuych'e lhpa vat'uyjatshiy is? Nataôyshelh avaatsheelh ti yiey pava isis jpôyjey, pa lhech yie' papi yuych'e pava isis vat'uyjatshiyis, yie' pava lhajpôyjey papi lhcaanvacles. 26¿She ajalh pa lhteetajeshelh ca avanelh? ¿Ve'lha ja chiytôyjata pava ti vaclan? Jech, yijô' jô lhech ya'sheshc'oya pap'elh chiytôyjata pava ti vaclan. 27Jô lhech Juan nifac java Vani'sesh'e:
‘Janôyinjatc'oya na yicavo,
ca nasnatesh'am jayu pa anôyish.’#7.27 Mal 3.1.
28Janfaclelh'am ti ampapu ca tuc'aajulh ja Juan Vatnayjayash lhavo', ya'sheshc'oya pap'elh chiytôyjata pava ti vaclan; taj ti pa tiqu'in jum yi'shi' ja Dios lhanvacleyash, yash'apee jô lhech.
29“Meelh ti tpeeycheyesh cavôque lhacôm'a papi nivacle shi' papi yivoyanesh pava lhpesoc pa lhanvacle, papi lhech chiynajayanshi pa lhnayjayash pa Juan, pa chiytôyesha pa Dios ti yivo'yeshch'e; 30taj ti papi fariseos shi' papi vanqu'eyjatsjanesh pava lhfanishlhavach, papi lhech tanca chinajayanshi pa lhnayjayash pa Juan, lhayaash ti yiv'ojiyan pava yeetajeshem pa Dios.*xg* 31Pa yit'esh pa Lhcaanvacle: #7.29-30 Mt 21.32; Lc 3.12.
—¿“She t'e pa ca jajôney ca lhjunashajulh napi nivacle nôqueesh? ¿Naô t'e pa ca shtovalheyjop shta? 32Lhjunashjulh papi taôvclas tclôych'een pa clayôych'e, tônelh'in papi lhc'utsfas, pa yit'esh ts'ivee: ‘Jafuyuelhch'eam lha vat'ônjanche taj ti naaclô'yelhjop; jisheelhch'eam java vat'acjay ts'aclaych'esha'ne taj naapelh'in’. 33Lhayaash ti nam ja Juan, Vatnayjayash lhavo', nintuj lhpa yucuve pa ninyô'ji pa cumjôtaj, pa lhteetshelh avaatsheelh ti caaj pa tsich'e'. 34Pa lhechesh pa janam, ya Nivacle Lhô'sesh, pa jaytsaccun pa c'ayô' shta, pa lhteetshelh'yi lhôvcônaaj yôjanaj shta, lhc'utsfasesh papi yivoyanesh pava lhpesoc pa lhcaanvacle shi' papi sasch'e lhavos. 35Taj ti pa lhtôycheyash pa Dios yivanjiyinesh lhacôm'a pa lhfanishlhavach.
Pa Jesús yiey pa lhajpôyich pa fariseo lhey Simón
36Ve'lha pa fariseo t'a'lhey pa Jesús jaspa tsaccunelh, pa yichey pa Jesús pa lhajpôyich pa yi'sha'nejop pa vatsaccunjavat. 37Pa lhechesh pa nam lhpa ve'lha ôcjeclô, lhchifache pa Simón. Meelh ti tpeeycheyesh ti mônlhee pa Jesús yiey pa lhajpôyich pa fariseo, pa yichey pa yicha'jesh pa vatshachivo acôjji jum. 38Pa yi'sha'nejop pava lhafoc pa Jesús pa yip'in, pa nitonjat'een pava lhafoc pava lht'ec. Pa lhechesh pa t'acum'e pava lhayees pa yicleeshemch'e pava lht'ec pava lhafoc pa yifin shta, pa yôtsiy'e pava lhafoc pa vatshachivo.*xh* 39Meelh ti yi'van pa fariseo anôque, pa yaychavalh'in pa lhcachi' pa yit'esh: “Ca yijô'taja ca lhetaja pa chiytôyjata pava ti vaclan, pa nitôfaclesh jayu tatsha lha lhech, lhayaash ti ojey lhavaatsha.” #7.37-38 Mt 26.7; Mr 14.3; Jn 12.3.
40Pa lhechesh pa yit'esha pa Jesús pa fariseo:
—Simón, caaj na janfacl'am jayu.
Pa yicuulh pa fariseo pa yit'esh:
—Anfacyam, Vanqu'eyjastsjan.
41Pa yit'esh pa Jesús:
—Napu' papi nivacle nam pa tpiôeshem atesha pava pesoc pa ve'lha nivacle. Ve'lha pa tpiôyesh quinientos pava pesoc lhanquey dinarios, vooy paelh cincuenta pa tpiôyesh. 42Taj ti sasemjop can shayanemch'e, lhayaash ti ampa lhpesoa. Pa lhechesh pa yivômjach'e pa nivacle pava vatpiôclem. Nôqueesh anfacyam, ¿she papu ya'shesh jayu ti yen pa lhpiô?
43Pa yicuulh pa Simón pa yit'esh:
—Jalheclôjesh pan yaash pava chiyvômjatemch'e.
Pa yit'esha pa Jesús:
—Yijô' ti navo'yeshch'e.
44Pa lhechesh pa yovalhsha'ne pa Jesús lhpa ôcjeclô, pa yit'esha pa Simón:
—¿Lhavan lha ôcjeclô? Janamey na ajpôyich, taj ti naanjutyiy pa yinôôt ca yicle'shesh nava yifoc, taj ti lha lhech ôcjeclô yicle'shesh nava lht'ec nava yifoc, pa yiclesheshch'e shta nava lhayees. 45Tanca afinsham yashi, taj ti lha lhech yajatesh ti yifin nava yifoc. 46Na ap'aclanesham na yishatech pa vatshateech t'ajuya acôjji jum; taj ti lha lhech yôtsiy'e nava yifoc na vatshachivo acôjji jum. 47Nôquen lhayaash jayeesh'a, acloj pava lhsasch'esha'ne chiyvômjatemch'e, pa lhe'naa ti nôclesh pa uj lhencheyash. Taj ti papi napu' pava chiyvômjatemch'e pa nôclesh ti tiqu'in pa lhencheyash.
48Pa lhechesh pa yit'esha lhpa ôcjeclô:
—Chiyvômjach'e pava asasch'esha'ne.
49Lhacôm'a pap'elh tsaccunelh tasinôych'evatam pa yit'esh:
—¿She t'e nôque nivacle, yivômjach'e pava sasch'esha'ne?
50Taj ti yit'esha pa Jesús lhpa ôcjeclô:
—Chinalhjen, lhayaash ti naascacu; mô ca ansham'in.
Currently Selected:
San Lucas 7: NIVA
Highlight
Share
Copy
Want to have your highlights saved across all your devices? Sign up or sign in
Nivacle Bible © Sociedades Bíblicas Unidas, 1994.
