San Lucas 6

1Ve'lha pa nalhu ti chit'ichayshi pa yitsavalhsham pa Jesús pa vatcôvjiyanjavat, japi t'eyjatsjanjas yisooji pa trigo pa nitôsjelha pa lhechesh pa tuj.*xt* 2Pa lhechesh pa yit'esha pap'elh fariseos: #6.1 Dt 23.25.

—¿Ta t'e lhayaash ti lhech afanisheshelh na nalhu ti chit'ichayshi ti nichinvashanjoom?

3Pa yicuulh pa Jesús pa yit'esh:

—¿Naaclôvalhelhshi nataney ja vatqu'isjayanach ja yi'shi' ca David ca lhfanishlhavach ti yiyipcunelhsha'ne papi tanaôycheelh? 4Ti yich'ôcji ca David ja lhajpôyich ja Dios pa tuj pava yucuvec pava chiyantaj'e t'ajuyish ja Dios, pa yijutey shta papi tanaôycheelh. Pava lhech yucuvec tsi'shatajop ca nituj papi vatcasinôc.*xu* #6.3-4 1 S 21.1-6.,#6.4 Lv 24.9.

5Pa yit'esha shta:

—Na Nivacle Lhô'sesh lhanvacleesh shta na nalhu ti chit'ichayshi.

Pa nivacle t'unch'e' pa t'ituuc

(Mt 12.9-14; Mr 3.1-6)

6Paelh nalhu ti chit'ichayshi yich'ôcji pa Jesús pa vatvanqu'eyjatsjanjavat pa lhech vanqu'eyjatsjan'e. Lhech yie' pa ve'lha nivacle t'unch'e pa t'ituuc lhfayishey; 7lhan'e papi vanqu'eyjatsjanesh pava lhfanishlhavach yovalheshey pa Jesús pa lhfanishesh pa nalhu ti chit'ichayshi pan yilhjen jayu, pa vooyjop pa ca lhfanisheesh ca nitôlhjateyjop. 8Taj ti yitô'yish pava yaychavalhey ts'ivee pa yit'esha pa nivacle pan t'unch'e' pa t'ituuc:

—Aneetsham ca avatsavatshi lhcachi'vat.

Pa netshaam pa nivacle pa lhech vatsavat'e. 9Pa lhechesh pa yit'esha pa Jesús pap'elh:

—C'aniyôselh cum: ¿She t'e pa isjop ca chinteeshjop na nalhu ti chit'ichayshi, ca chinasnatesh pa is, ja't'ajesha ca lhecha pa niysa'? ¿Ca chinjuteem pa lhamônlhajayash, ja't'ajesha ca chinanjôclesh?

10Pa lhechesh pa yiclôvalhch'e pa Jesús papi t'afaych'e lhavôôj, pa yit'esha pa nivacle:

—Atsôôtjat na atuuc.

Pa lhech lhfanishesh pa nivacle pa t'ituuc, pa lhechesh pa vatsjanesh. 11Pa uj ti yisuyiyan ts'ivee pap'elh, pa taniyôsesh ts'ivee: ¿Ta t'e ca casfanisheesh pa ca shtasnatshem na Jesús?

Vooyshi pa Jesús papi doce t'eyjatsjanjas

(Mt 10.1-4; Mr 3.13-19)

12Lhech t'aplhuqu'e pava lhech nalhus ti yichey pa Jesús lhpa utiyuc ti t'aalh. Pa jônshajaclayesh ti t'a'lhey pa Dios. 13C'oya ti nich'a nalhu pa tôney japi t'eyjatsjanjas, pa vooyshilhatam japi doce. Japi lhech lhanqueyesh apóstoles. 14Lhech japu lhech lhalhech'e: Ja Simón, lhanquey shta Pedro, shi' ja lhch'inish Andrés, ja Jacobo shi' ja Juan, ja Felipe shi' ja Bartolomé, 15ja Mateo shi' ja Tomás, ja Jacobo, lhaôs pa Alfeo, ja Simón, lhey shta Zelote, 16ja Judas, lhch'inish ja Jacobo, shi' ja Judas Iscariote, jan namey ti nifac jayu pa Jesús.

Pa Jesús yeyjatsjan papi acloj nivacle

(Mt 4.23-25)

17Pa tôlhelh'apee pa Jesús japi t'eyjatsjanjas lhpa utiyuc, pa yie' ts'ivee pa lhcaavjucshiva'ne pava uticuy. Pa acloj shta papi nivacle tôlhey ts'ivee java yitsates ja lhey Judea shi' ja Jerusalén. Pap'elh tôlhey pa lhjôvcha shalheema pa Tiro shi' pa Sidón. Lhech papi lhech nachey pa Jesús ti tach'ana, pa jaspa yilhjenesha'ne jayu pava lhayyashac. 18Chiyilhjenesh shta papi chiyclôyitesh pava tsich'es. 19Lhacôm'a papi nivacle yeetajesh ca nit'ajaya pa Jesús, lhayaash ti yilhjenesha'ne lhacôm'a pa t'unaj.

Pa vatshamitjayash shi' pa nivatshamitjayasha

(Mt 5.1-12)

20Pa lhechesh pa yovalhsha'ne pa Jesús japi t'eyjatsjanjas pa yit'esh:

“C'uselh'am'in avaatsheelh ti lhtats'aclayelhsh'ane, lhayaash ti yitsô't'ajelh'ash ja Dios lhanvacleyash.

21“C'uselh'am'in avaatsheelh ti lhapelh'in nôqueesh, lhayaash ti lhancaaysiyuelh'in jayu.

22“C'uselh'am'in jayu avaatsheelh ca chisuytajeelh'a, ca nasaastajelhfach'ee, ca napuntajelh papu shi' ca nachaytajelh'a lhayaash ti tôlhyiyijop.*xw* 23Ujaesh ca avatc'usinateshelh'in pa anamjatelhch'een pa ashamitjayashelh nôque nalhu, lhayaash ti caajelh'am jayu pa uj ats'ôt'elh yiey ja vôôs. Lhech lhjunash lhapesh papi lhnavot yicônitshi papi chiytôyjata pava ti vaclan.#6.22 1 P 4.14.,#6.23 2 Cr 36.16; Hch 7.52.

24“Acôstajelhshiin taj ti lhtats'aclayshelh, lhayaash ti p'alha ti c'uustajelh'am'in.

25“Nôqueesh lhtats'aclayshelh pa ape'jelh, lhayaash ti nayipcunelhsha'ne jayu.

“¡Lhtats'aclayshelh nôqueesh ti lht'aschayelh'in, lhayaash ti lhapeshelh'in jayu pa atacshinjayashelh!

26“Lhtats'aclayshelh ca chinasinôquitajshelh pa isch'e, lhayaash ti lhech lhanfanash papi lhnôvat papi p'alha niyijôa ca chintôyjata pava ti vaclan.

Tajulhey ca chinen papi nivatac'utsfasa

(Mt 5.38-48; 7.12)

27“Avaatsheelh pa ca aspeya'tajeshelh pa c'ayôjeeshelh'a jayu: Enelh papi naac'utsfasaelh, ataasclanelhsha'nec'oya papi ninancôtsitay'ashelh. 28Asclanjulh papi napôfiyuin, a'lhem shta papu ca niyataj'a. 29Ca nicaajtaj papu ca nipôcôjtajey lha acu', pa avayjatjulh lhaelh acu'; ca chinajôôctajesh lhpa uj uyjatshiy, pa an'ateesh shta ca najôôctajesh lhpa uyjatshiy. 30Ajutey shta pa'na ca nit'aalhtajesh'a; lha'ma pa ca natsôt'ajtajesh ca najôôctajesh, ya aj ca anô'yeshch'e. 31Asnatshelhem avaatsheelh pap'elh pava lhenelh pa jaspa nasnatshelh'am pavan afanishelh'avach.#6.31 Mt 7.12.

32“Ca entajelh avaatsheelh pant'ajôôj papi nenelh, ¿ta t'e yie' pa isch'e' lhasnatshelh? Lhayaash papi sasch'e lhavos yen papi yen vitsha. 33Ja't'ajesha ca asnatshelhem pa is papi yisnatshelh'am pa is, ¿ta t'e yie' pa isch'e' lhasnatshelh? Lhayaash ti papi sasch'e lhavos lhech lhjunash ti yisnatesh. 34Ca ajutajelhey atesha papu lhech ca aychavalhtajelhey ca nichaajtajelh'ac'oya pa'na, ¿ta t'e yie' pa isch'e' lhasnatshelh? Lhayaash papi sasch'e lhavos yijutey shta pap'elh sasch'e lhavos, pa yaychavalhey ca ninachajey. 35Taj ti enelh avaatsheelh papi niac'utsfaseelh, pa isa' ca asnatshelhem pa ajutelhey, pa ya aj ca ach'anshelhc'oyaan. Lhech jayu lhjunash pava ats'ôteselh avaatsheelh, pa lhcleselh'ash jayu jum ja Dios pa t'aashelhchisham jayu, lhayaash pa lhech ya'shesh ti issha'nec'oya papi nintaasclansha'ne shi' shta papi sasch'e lhavos. 36Istaa ca acavts'aclayjanjaseelh, lhayaash ti cavts'aclayjanaj ja Atataelh.

Ya aj ca ivalhelha papu

(Mt 7.1-5)

37“Ya aj ca anute'lhem papu jaspa tanca ninutelh'am ja Dios. Ya aj ca aculhjaneshelh papu, pa tanca natculhjanelh'ash ja Dios. Avômjatelhemch'e pap'elh, pa yivômjatelhch'eam jayu vitsha ja Dios. 38Atiselh pap'elh, pa natiselh jayu vitsha ja Dios. Pa yijutshelh'ay jayu ja Dios lhpa vonsa chiycôt'ateshch'e pava yich'e', tapooj pa namfach'ee pava yich'e'. Lhayaash pa lhjunash ti lhatcufaayshelh, pa chiyjôneshelhch'eam jayu ti chinatisshelh.

39Yit'esha pa Jesús pa yovalheyjop atesha:

“¿Tajulhey t'e ca nitojonesh pa tacluuc paelh tacluuc? ¿Tan t'e ca nach'evatam pa tinjoque?*xz* 40Ampa vat'eyjatsjanach ca nash'apee pa yeyjatsjan, vooy ca nivaclhitajesh pa lhneyjatsjanjayash pa lhjunashajulh jayu pa yeyjatsjan.#6.39 Mt 15.14.,#6.40 Mt 10.24-25; Jn 13.16; 15.20.

41“¿Ta lhayaash ti lhovalhey pa shtôcle ti yi'shi' lhtôsej pa avelh, pa naavatvanesh vitsha lhpa jpôychiyte ti yi'shi' lha atôsej? 42¿Pa ta t'e lhayaash ti lhteetsha pa avelh: ‘Na yivelh, janclanshiam jayu na shtôcle yi'shi' lha atôsej’, na avan t'e lhpa jpôychiyte ti yi'shi' lha atôsej? ¡Ajôts'ôclônjanaj! ajutsjat ca anclanshi lhpa jpôychiyte yi'shi' lha atôsej, pa lhechesh pa isa' ca novalh'in ca nanclantajshi pa shtôcle ti yi'shi' pa avelh lhpa lhtôsej.

Tantôfacliyesha lhpa aacjiyuc pava lhay

(Mt 7.17-20; 12.34-35)

43“Anlhapa aacjiyuc'a ca isa' ca nit'iyjata lhpa niysa' lhpa lha', nilhecha lhpa niysa' aacjiyuc ca nit'iyjata lhpa lha' pa is. 44Lhayaash ti lhacôm'a pava aacjuy tantôfacliyesha pava lhay; tanca chinanclanshi pava higos ca chintôlhesham lhpa clotach, nilhecha lhpa fitsôc'ôc ca nôvji' pava ôtjayetas.*xb* 45Pa issha'ne nivacle yisnatesh shta pa is, lhayaash ti tôlhshaam pa lhcachi' pa is; pa nivacle niysa'sha'ne pa yisnatesh shta pa niysa', lhayaash ti tôlhshaam pa lhcachi' pa niysa'. Pavan yit'esh'in pa lhashi tôlhshaam pa lhcachi' ti tapooj.#6.44 Mt 12.33.,#6.45 Mt 12.34.

Pava napu' lhtascuyesh

(Mt 7.24-27)

46“¿Ta lhayaash ti lhtsetôneshelh, ‘Lhcaanvacle, Lhcaanvacle’, taj ti tanca anc'ashamyishelh? 47Janfaclelh'am jayu nan lhjunash papu ca ninatajyi ca nach'antajyi, pa nequ'ishamesh pava jayeetshem: 48lhjunashjulh pa nivacle ti yisnatesh pa jpôyich, yijutsjat ti yapatonc'oya, pa yan'e'sha'ne lhpa utej pa lhtatsuqu'esh pa jpôyich. Meelh ti tanaychisham pa tovôc, pa factsejch'e pa yinôôt pa yamtaja pa jpôyich, taj ti tanca naacjut, lhayaash ti yiapee lhpa utej pa lhtatsuqu'esh. 49Taj ti papu tsipe'ya atesha, pa ninanc'ashamesh pava jayeetajesha, pa lhjunashjulh pa nivacle ti yisnatesh pa jpôyich pa yan'esha'ne atesha na cotsjaat, ampa ca lhtatsuqu'eesh. Meelh ti tanaychisham pa tovôc pa factsejch'e pa yinôôt, pa yama pa jpôyich, pa yaflit tatsha pa vôômja'ne.

Pa Jesús yilhjen pa lhcavo pa lhcaanvacle Roma lhavo'

(Mt 8.5-13)

Currently Selected:

San Lucas 6: NIVA

Highlight

Copy