San Lucas 5

1Ve'lha pa nalhu ti yie' lhavôôj pa Jesús ja lhjôvcha lhey Genezaret; acloj papi tac'uya ti vatcôt'at lhayaash ti yen ti yipe'ya cava Dios Lhasinôc. 2Pa Jesús yi'van pava napu' vatôvjatshiyis ti ampava ca nôvji' yie' lhavôôj pa tovôc. Tayshi pava lhojatshiyis papi sajech lhavos pa yicleesha'ne pava lhaschatiy. 3Pa vooy pa Jesús yitshaam lhpa ve'lha, lhpan yitsôt'ajesh pa Simón, pa yiyôjiesha ca nit'u'esham clee pa tovôc. Pa yishi'sha'ne pa Jesús lhpa lhôvjatshi pa lhech yie'jop ti yeyjatsjan papi nivacle.*xñ* 4C'oya ti yivaclhitesh ti tasinôy pa yiyôjaa ja Simón pa yit'esha: #5.1-3 Mt 13.1-2; Mr 3.9-10; 4.1.

—Môôjelhsham nava aschatiyelh na lhjôvcha ca uelhsham.

5Pa yicuulh ja Simón pa yit'esh:

—Vanqu'eyjatsjan, javo'tajelh ca jonshajaclay taj ninôscôjôôyshelh pa'na taj ti lhteesh avaatsha ca ju'jam lha yischaat.#5.5 Jn 21.3.

6Pa yisnatesh pan lhnônashesh, pa lhechesh pa acloj pava sajech ti yicô'jôyesh, pa yic'asesh'ôcji lhpa lhaschaat.*xp* 7Pa lhechesh pa t'alhey'in pap'elh lhavojofas yi'shi' lhôj'elh lhôvjatshi, jaspa yicheshey ti yefenesh. Pa namey pa yiponteshch'e pava napu' lhôvjatshiyis pa yicheshicham. 8Pa yi'van ja Simón Pedro cavôque, pa t'acjatsuy'e t'ajuyish pa Jesús pa yit'esh:#5.6 Jn 21.6.,#5.8 Job 7.19-20; Sal 39.13.

—¡Ayyijop, Lhcaanvacle, lhayaash yivaatsha ya nivacle ti sasch'e yivo'!

9Lhechesh pa nitôyiyjat ja Simón shi' papi lhavojofas pava sajech ti yalhatajesh ti vanôôlhjôn. 10Pa lhjunasheshjulh ja Jacobo shi' ja Juan, japi lhcles ja Zebedeo, japi lhech lhavojofas ja Simón. Pa yit'esha pa Jesús ja Simón:

—Ya aj ca anjovay'in; nôqueesh lhavooy jayu papi nivacle nan ajunash ti lhavooy java sajech.

11Pa yitojoney pa yim'ech'e pava lhôvjatshiyis, pa lhech yimônlhanit'e lhacôm'a, pa tanaôycheelh pa Jesús.

Pa Jesús yivatsjanchat pa tashtôtay

(Mt 8.1-4; Mr 1.40-45)

12P'alha ti yie' ja yitsaat pa Jesús, pa namey pa ve'lha nivacle tashtôtay. Pa yi'van pa Jesús pa tanjuyshicham pa yamja cotsjaat pa yit'esha ti t'a'lha:

—Lhcaanvacle, at'eshyiyaam ca ats'ilhjen.

13Pa lhechesh pa t'ajayesha pa lhpôcôt, pa yit'esh:

—Jech, jayeesh ca c'alhjen. Pa tatsha ti yivômjatesh pa lhashtôtaj. 14Pa yiyôjiesha pa Jesús ca ya aj na ca nanfacleem papu. Pa yit'esh:

—Vooy pa vatcasinô pa meey ca atônôclitshem, pa acufayesh ca tayôjijanesh ca Moisés, jaspa yitôy'ash jayu pap'elh ti lhavatsjan.#5.14 Lv 14.1-32.

15Pa lhne'yajesh pa Jesús ve'lheesh yinesh'apee pa lhfanishesh. Pa acloj papi nivacle ti nayjatva'ne ca jaspa nipe'yeesh, pa nivatsjanesha'ne pava lhayyashac. 16Pa yichey pa Jesús pa cotsjaat ampapu ca nôv'e' pa t'aalh.

Pa Jesús yilhjen pa ancooc

(Mt 9.1-8; Mr 2.1-12)

17Ve'lha pa nalhu ti vanqu'eyjatsjan pa Jesús. Lhech yielh'e papi fariseos shi' papi vanqu'eyjatsjanesh pava lhfanishlhavach. Papi lhech tôlhey ts'ivee pava yitsates velheelhch'e ja Galilea shi' ja Judea nôquee ja Jerusalén; chinôclit pa Dios t'unaj, lhayaash ti yilhjensha'ne papi aôytes'in. 18Pa lhechesh pa yamey papi ve'lha ts'ivee nivacle, pa nitilhôjeshey ts'ivee pa lhmôjôvat pa ancooc, yeetajesh ca nichaj'ôcji pa jpôyich ca nan'e t'ajuyish pa Jesús. 19Taj ti ninvan pa ca nuyesh'e, lhayaash ti acloj papi nivacle. Pa lhechesh pa vôlhesh'apee pa jpôyich pa yayjat'e pav'elh joquitas. Pa chiychenesheyshicham pa lhmôjôvat pa ancooc yiey ja lhcachivat'eshi papi nivacle pan t'ajuyish'e pa Jesús. 20C'oya ti yivanesham pa Jesús papi nivacle pa nilhcacujayasha, pa yit'esha pa ancooc:

—Yivelh, chiyvômjatch'eam nava asasch'e.

21Pa lhechesh pa yaychavalhvatsham'in papi vanqu'eyjatsjanesh pava lhfanishlhavach shi' papi fariseos: ‘¿She t'e nôque nivacle yasinôqui ti lhjuyjafaesh t'e apee pa Dios? Ampapu ca nitô'yish ca nivômjach'e pava sasch'e, ve'lha aven pa Dios yitô'yish.’

22Taj ti yitô'yish pa Jesús pava lhaychavalhjanôc, pa yit'esha:

—¿Ta lhayaash ti lhech aychavalhjaniyashelh? 23¿She t'e pa ninatvijataych'e ca chinteetsha nôque nivacle: ‘Chiyvômjatch'eam pava asasch'e’, ja't'ajesha ca chinteetsha: ‘Aneetsham ca mô’? 24Jaspa natô'yelha na Nivacle Lhô'sesh ti caajem pa t'unajjop napi yie' na cotsjaat ti yivômjatch'e pava lhsasch'esha'ne.

Pa yit'esha pa ancooc:

—Avaatsha c'ayôjaa, aneetsham ca acum'ôcji na amôjôvat pa mapecley pa ajpôyich.

25Tatsha ti netshaam pa yivanesh pap'elh ti t'acum'ôcji pa lhmôjôvat pa vapecley pa lhajpôyich pa yôclôjesh pa Dios. 26Pa nitôyiyjat lhacôm'a pa yôclôjesh pa Dios nijovayshi ti yit'esh:

—Nôqueesh shtavan nava lhasnôyjes.

Pa Jesús tôney pa Leví

(Mt 9.9-13; Mr 2.13-17)

27Pa yivaclhitesh cavôque pa yich pa Jesús. Pa yi'van pa ve'lha yivoyanesh pava lhpesoc pa lhanvacle pa lhech lhey Leví, yie' jan yie'in ti chiyjutey'in pava lhpesoc, pa yit'esha pa Jesús:

—Atatvoyich'e.

28Pa lhechesh pa netshaam pa tatcô'yesh lhacôm'a pavan yi'van, pa voqu'e pa Jesús.

29Pa yisnatshem pa uj vatc'usiyash'in pa Leví. Acloj papi yivoyanesh pava lhpesoc pa lhanvacle shi' pap'elh yielhch'e lhavôôj pa lhtsaccunjavat. 30Vooy papi fariseos shi' papi vanqu'eyjatsjanesh pava lhfanishlhavach yicônitshiesh pa Jesús japi t'eyjatsjanjas pa yit'esha:

—¿Ta t'e lhayaash ti lhatsaccunelh shi' ti t'iyô'elh napi yivoyanesh pava lhpesoc pa lhanvacle shi' napi sasch'e lhavos?#5.30 Lc 15.1-2.

31Pa yicuulh pa Jesús pa yit'esh:

—Nisuyeeshemshi papi ampa can jumtee pa vatcafetatsi lhavo', vooy papi aôytes'in suyshemshi. 32Ninamey papi yit'eshlhavne ca nivo'yeshch'e, vooy papi sasch'e lhavos jayôney jayu ca nitatvaych'aclajesh pa lhfanishlhavach.

Chiniyôsesh pa Jesús pa vat'ayipcuyash

(Mt 9.14-17; Mr 2.18-22)

33Pa lhechesh pa niyôsesh ts'ivee pa Jesús:

—¿Ta t'e lhayaash ti yajatesh ti vat'ayipcuyansha'ne pa cajueshch'e ti t'aalh japi tanaôycheelh ja Juan shi' japi fariseos, vooy napi eyjatsjanjas yajatesh ti tsaccunch'e shi' nava t'iyôjelh?

34Pa yicuulh pa Jesús pa yit'esh:

—¿Tajulhelhey'am jayu ti vat'ayipcuyansha'ne papi namey pa vatajayayash, ti jôjjeclay mônlhajop pa nich'a tjayaay? 35Taj ti caaj jayu pa nalhu ti ninôvjop jayu pan tjayaay, pa lhecheesh pa nit'ayipcuyansha'ne.

36Yit'eshjop shta paelh yovalheyjop:

—Ampapu ca nic'astajop pa t'iya lhpa nich'a t'uyjatshiy ca niney lhpa t'uyjatshiy lhac'utsja. Ca lhech lhôn lhfanisheesh papu yicôctiyan'in jayu pa nich'a t'uyjatshiy; neelhcha shta ca chiney lhôn pa nich'a sivôclôclhayeech t'iya lhpa t'uyjatshiy lhac'utsja ninôvjuulh jayu. 37Pa ampapu ca nanch'e' pa nich'a ôtjayetas t'i' nic'astajeshch'e lhpa ftech pa lhateshatajeesh. 38Lhe'naa ca chinanch'e' pa nich'a ôtjayetas t'i' lhpa nich'a ftech, ti lhech lhanfanash cavôque napu' pa niisclanchematsej. 39Tan ca nijutsjat ca niyô'ji papu pa apis ôtjayetas t'i' ca nanjooylhajat ca nancua pa nich'a ôtjayetas t'i', lhayaash ti yit'esh ti yajulhjatey pa apis.

Papi Jesús t'eyjatsjanjas nitôsjelha pa trigo pa nalhu ti chit'ichayshi

(Mt 12.1-8; Mr 2.23-28)

Currently Selected:

San Lucas 5: NIVA

Highlight

Copy