San Lucas 4

1Pa Jesús ujaam pa Espíritu Santo, tapecleylhach'e ja tovôc Jordán, pa yicha'jey shta pa Espíritu pa cotsjaat ti ampapu ca nôv'e'. 2Lhech yie' ti cuarenta pava nalhus pa namey pa tsich'e' pa lhey Satanás pa yic'alhtantaja. Lhech t'aplhuqu'e' ti ninatsaccun pa jaalhpa yiyipcun. 3Pa lhechesh pa yit'esha pa tsich'e':

—Ca a Dios Lhaôstaja pa ayôjaa lha utej ca yucuveaesh jayu.

4Pa Jesús yit'esha ti yicuulh:

—Yit'esh nava Vani'sesh'e: ‘Nive'lhaaey pa vatôc ca nimônlhanit jayu pa nivacle, vooy shta lhacôm'a cava Dios Lhasinôc’.#4.4 Dt 8.3.

5Pa lhechesh pa yitojôn'apee pa tsich'e' lhpa ve'lha yaashchisham utiyuc, lhech'e ti nôclitem lhacôm'a pa lhavtsateyish yiey na cotsjaat. 6Pa yit'esha pa tsich'e':

—Jajut'ay jayu lhacôm'a navôque vat'unaj. Pa c'ashjatesh jayu avaatsha nava yiey nôque cotsjaat. Lhayaash ti yits'ôtes navôque, lhe'naa ti tsicufayjayuesh ca tisesh papu. 7Ca u'tajsha'ne acjatsuy ca aalhtajyi, pa natsôt'ajesh jayu lhacôm'a.

8Pa yicuulh pa Jesús pa yit'esh:

—Ayyijop, Satanás, lhayaash nava Vani'sesh'e ti yit'esh: ‘Acjatsuyshicham ca a'lhey pa Dios Anvacle, ave'lhan ca acu'mem'in’.#4.8 Dt 6.13.

9Pa lhechesh pa yicha'jey pa tsich'e' pa Jesús ja Jerusalén, pa yicha'jey lhôtôj ja vatishjanjavat pa yit'esha:

—Ca a Dios Lhaôstaja, pa avatcôtjata cotsjaat; 10lhayaash ti yit'esh nava Vani'sesh'e:

“Pa Dios yichen'ay jayu papi ángeles

pa vanujumatsen'ash jayu.#4.10 Sal 91.11.

11Pa natcumesh'ajulh jayu pava lhpôcôtôy

pa jaspa tanca nivoomtan nava afoc nava utes.#4.11 Sal 91.12.

12Pa yicuulh pa Jesús pa yit'esh:

—Yit'esh shta nava Vani'sesh'e: ‘Ya aj ca ac'alhtaneshem ja Anvacle Dios.’#4.12 Dt 6.16.

13Pa nôque lhjunash ti ninvanjop pa Satanás pa caelhchaa ca lhfanisheesh ti yic'alhtantaja pa Jesús. Pa lhechesh pa tayjop.

Pa Jesús tôlhesh'e pa lhcumjayash pa Galilea

(Mt 4.12-17; Mr 1.14-15)

14Pa Jesús ti vapecleylhach'e ja Galilea pa uj ti yamqu'een pa t'unaj pa Espíritu Santo. Pa chayshemlhach'e lhacôm'a papi yiey ja lhavôjqu'e ja cotsjaat. 15Yeyjatsjan'ôcji java lhavanqu'eyjatsjanjavtes japi judíos, pa uj ti yôclôjesh lhacôm'a.

Pa Jesús yie' pa Nazaret

(Mt 13.53-58; Mr 6.1-6)

16Yamey pa Jesús ja Nazaret, yiey pan yitônt'aj'e lhôn lhapesh. Pa nalhu ti chit'ichayshi pa yich'ôcji pa vatvanqu'eyjatsjanjavat, lhayaash ti yifayjanesh ti lhech lhfanishlhavach, pa neeshchisham java Vani'sesh'e pa yiclôvalhshi. 17Chiyjutey pa lhqu'isjayanach chiyiclôpjalhch'e pa chiytôyjata pava ti vaclan Isaías. C'oya ti nucujam, pa yi'van jan yie' ja chiyi'sesh'e:

18“Ja lh'Espíritu ja Lhcaanvacle yi'yitapee,

tsiisnatsha'ne jaspa qu'eyjatsjanesh nanva isis

ya'clishay papi ts'aclaaysha'ne.

Tsitsicheney jaspa c'alhjenesha'ne

papi nint'un'in pava lhcachic.

Tsitsicheney jaspa janfacleem jayu

papi vanôcfasha'ne pa jaspa nitanuqueeshch'e,

jaspa novalhvatsham'in shta papi taclujuy;

tsitsicheney jaspa qu'efenesh jayu papi chiycômclôquiin;

19jaspa jasinôquiem jayu pava isis nalhus

tô'lha pa Lhcaanvacle.#4.18-19 Is 61.1-2.

20Pa lhechesh pa nachajva'ne pa Jesús pa vatqu'isjayanach pa yijutem pa lhavoesh pa vatvanqu'eyjatsjanjavat pa yi'sha'ne. Pa yovalheyvatam lhacôm'a papi yiôcji pa vatvanqu'eyjatsjanjavat. 21Pa lhechesh pa tasinôy pa yit'esh:

—Nôqueesh yôfisch'e nan t'ônashesh nava Vani'sesh'e pa lhavanelh nan chiychayjulh'in:

22Lhacôm'a ti ninteetsha pa ca sasach'e pa Jesús, pa yiqu'imjatesh pava isisch'e lhclishay ti yit'eshema. Pa taniyôsesh ts'ivee:

—¿Nilhecha t'e na lhaôs ja Jos'e?

23Pa yit'esh pa Jesús:

—Yijô' jum ti lhteetshelhyi jayu: ‘Vatcafetatsi lhavo', avatfetatsiyan’; lhteetshelhyi jayu shta: ‘Jaypeeycheashelh ti lhasnatesh'in pava matas yiey ja Capernaum, pa istaa ca asnatesh'e shta na natsôt'ajesh cotsjaat.’

24Pa lhechesh pa yit'esh'in:

—Yijô' cava jayeetshelh'a lha'ma papi lhchifastaj ti tcavoyjulh jayu pa chiytôyjata pava ti vaclan.*xj* 25Yijô' lhapesh papi acloj ôsch'acchey papin yie' na Israel jan t'aplhuqu'e' ti yi'shi' ja Elías chiytôyjata pava ti vaclan, c'oya ti pu'jana pana lhnincôpes ve'lhayama shta pava jive'clas nintaaj, pa uj ti yiyipcunsha'ne lhacôm'a papi lhchifas.*xk* 26Taj ja Dios nincheney ja Elías lhpa ca ve'lhaa papi ôsch'acchey papi yie' ja Israel, vooy ti yie' ja Sarepta, shalhee'ma ja yitsaat Sidón.*xl* 27Shi' shta pa lhjunash lhapesh na Israel acloj papi lhayyasheesh lhpa vatashtôtaj jan t'aplhuqu'e' ja Eliseo chiytôyjata pava ti vaclan, taj ti ampapu ca nalhjen papu lhech, vooy ja Naamán tô'lhey ja cotsjaat Siria.#4.24 Jn 4.44.,#4.25 1 R 17.1.,#4.26 1 R 17.8-16.,#4.27 2 R 5.1-14.

28Meelh ti yipe'yeesh lhacôm'a cavôque papi yiôcji pa vatvanqu'eyjatsjanjavat pa uj ti yaôytench'e. 29Pa netshamch'e, pa lhechesh pa yayjatshi pa Jesús ja yitsaat, pa yicha'jey lhôtôj lhja utiyuc yie' jan yisnatesh'e ja yitsaat, pa lhechesh pa yeetajesh ca nuqu'etsham. 30Taj pa Jesús yuyey ts'ivee lhcaavju vooy ti t'ônshi' pa yich.

Pa nivacle yi'shi' pa tsich'e'

(Mr 1.21-28)

31Pa lhechesh pa yichey pa Jesús ja yitsaat Capernaum, yiey ja cotsjaat Galilea. Lhech yiesh'e ti yeyjatsjan papi nivacle pa nalhu ti chit'ichayshi. 32Pa nitôyiesha papi yipe'yeesh pava yeyjatasjanesh, lhayaash ti tavijatayjulh pava yit'esh.#4.32 Mt 7.28-29.

33Yiey pa vatvanqu'eyjatsjanjavat pa ve'lha nivacle yi'shi' pa tsich'e', pa lhech yit'esh ti tônesh'in:

34—¡Atsan'ateelh; ¿she pa lhnatshelhyiy, Jesús, Nazaret lhavo'? ¿Lhnatshelhyiy ca astifelhch'een? Tsitôfacl'ash: a'lhech a'issha'ne avaatsha, lhtô'lha pa Dios.

35Yitsô'yeeyshi pa Jesús pa tsich'e' pa yit'esheyshi:

—¡Ya aj ca ats'i'seey, ayshi nôque nivacle lhôvji'!

Pa lhechesh pa yôôtjatesha cotsjaat pa nivacle pa tsich'e' yiey pa yie' pap'elh, pa lhechesh pa tayshi pa nivacle pa cano. 36Nitôyiyjatch'e lhacôm'a pa yit'eshvatsham'in:

—¿She t'e lhasinôc cavôque? Nôque nivacle yivijatanjulh pava tsich'es, ¡ti yayjatshi papi yi'shi'!

37Pa Jesús ampa ca nichintasinôyiesh'e yiey pava lhavjôych'e pava chiy'e'.

Pa Jesús yilhjen lhpa Simón Pedro lhcact'e

(Mt 8.14-15; Mr 1.29-31)

38Pa tay'ôcji pa Jesús pa vatvanqu'eyjatsjanjavat pa yuyeyshi pa lhajpôyich ja Simón. Lhan'e lhpa lhcact'e yijônsha'ne pa lhclôjut, pa chiyôji'ajop pa Jesús. 39Pa t'ajuy'apee pa Jesús pa yiyôjaa pa lhclôjut pa shan. China pa netshaam pa lhechesh pa t'acumem'in.

Pa Jesús yilhjensha'ne papi acloj aôytes'in

(Mt 8.16-17; Mr 1.32-34)

40Yuy na jumcuclaay ti tachajey'in lhacôm'a papi aôytes'in pa Jesús; pa yichaj'apee ts'ivee pa vatsjansha'ne. 41Acloj shta papi namey aôytes'in tayshi pava tsich'es, yit'esh ti tônvatsham'in:

—¡Avaatsha a Dios Lhaôs!

Pa lhechesh pa yitsô'yeeyshi pa Jesús pava tsich'es pa ninvashanem ca nitasinôych'e, lhayaash ti yitô'ya ti lhech pa Cristo.

Pa Jesús vanqu'eyjatsjan'e pa Galilea

(Mr 1.35-39)

42Pa nich'a nalhu ti tayshi pa Jesús pa yitsaat, pa ve'lha ti yichey pa nichinôv'e'. Taj ti vooysha'ne papi nivacle jaalhpa yamey'e pan yie'. Yeetajesh ca nintayajop'in, 43pa jaalhpa yit'esh pa Jesús:

—Suyeshiyam paelh yitsaat ca nifacl'e ca is ya'clish tô'lha ja Dios lhanvacleyash, lhayaash ti lhechin tsitsicheney.

44Nôque lhjunash pa Jesús ti vanqu'eyjatsjan'e pava vatvanqu'eyjatsjanjavtes yiey ja Galilea.

Pava sajech ti vanôôlhjôn

(Mt 4.18-22; Mr 1.16-20)

Currently Selected:

San Lucas 4: NIVA

Highlight

Copy