Markɛ̀n 7

Ankà-yé léyi ɛcüìcüì-bɔ̀ tán nɔn

(Nyɛ́n nyan Matie 15:1-9 wrú lɔ mɛ̀n)

1Ɔwɔ-nyànmàn-sùva-wá-bɔ̀ mán ɛnyànmàn-gbànvri-ankà-yé-bɔ̀ dú Zherüzalɛmɛ̀n nvà bɔrɛkru Zhezü tɛ̀sɛ̀n. 2Yɔ kán ɔmu le n'ɛsɛ̀nkɛn-bɔ̀ jan ke sɩ́ juru ankɔrɛ̀ kɩ ke zî ɛci ke si hán ɔmu le Ɔwɔ nyànmàn wá tán nɔn.

3Ɔwɔ-nyànmàn-sùva-wá-bɔ̀ mán Zhüifɛ̀n-bɔ̀ ndɔ hɔ̀n kɛ hán ɛcüìcüì-bɔ̀ nyànmàn kɔrɛ̀zì-ci: yɔ juru ankɔrɛ̀ anvrɛnvrɛn yakɛ yɔ zî ɛci, 4kɩ ɛnvra léyi yɔ dú dúgbetrɛ yɔ và nɔn, yɔ jrɔ ɛnshi yakɛ yɔ hán eci. Yɔ ẅɛn ɛnyànmàn gbànvri bobrebe ankà yɔ hɛ́n kɩ yɔ juru kpokpo, ɛnsi, anbɛ̀gɛ̀ mán sofa.

5Ɔwɔ-nyànmàn-sùva-wá-bɔ̀ mán ɛnyànmàn-gbànvri-ankà-yé-bɔ̀ ke yrɛ Zhezü le: “Ecitan kruhú kɛ v'ɛsɛ̀nkɛn-bɔ̀ tɛ́n ke sɩ́ ẅɛn ɛcüìcüì-bɔ̀ nyànmàn ankà kɛ hɛ́n hán, ke sɩ́ juru ankɔrɛ̀ kɩ ke zî ɛciɛ?”

6Zhezü mrɛ́n yɔ ɔmùan le: “Ezàhi ankà léyi dɔ́ ny'ɛwú nɔn dú annànwɔrɛ! Nyɛ́n dú anmùan-anhyrɛ̀-bɔ̀, hán ɔmu le Ezàhi merɛ́n nɔn:

‘Ɔwɔ kɛ dɔ̀ le, fɛcüè ndɔ lɔ kɛ mrɛ́n mɛ̀n ɔmuanwrú wú,

tɛ́n n'ɛnbɔrɛ dú esù she m'ɛtɛ̀sɛ̀n.

7Fɛcüè ndɔ lɔ kɛ sɛ́n mɛ̀n ankɔra,

ɔmuhi yɔ bɩ́ ɔwrɔnẅì nyànmàn yɔ srɔ m'ɛnyànmàn nɔn.’ ”

8Zhezü kɛ dɔ̀ le: “Nye teze Ɔwɔ nyànmàn, kɩ nye bɩ́ anwrɔnẅì nyànmàn léyi ɛcüìcüì-bɔ̀ tán nɔn.”

9Zɛtɛn Zhezü kɛ dɔ̀ le: “Nye nyri kɔ́n Ɔwɔ nyànmàn nye ze kɩ nyɛ ẅɛn nyɛ́n dùku ny'ɛnyànmàn kɔrɛ̀zì nyɛ hɛ́n! 10Mohizì ndɔ́ annànwɔrɛ mɛ̀n le: ‘Ɛ̀ wá ezi mán ɔmuan’, kɩ nɛ̀n vru nɛ́n dɔ̀ le: ‘Ɔwrɔn léyi kɛ dɔ́ nɛ́n zi mán nɛ́n muan ankà gbàngbàn nɔn ke ji le ye wri nɛ̀n.’ 11Nyɛ tɛ́n, nye yé le, ke dú kɛ ɔwrɔn kɛ dɔ́ nɛ́n zi mán nɛ́n muan le: ‘Eci léyi mɛ le bɩ mɛ̀n wá mɛ́n ɛkɔrɛ̀ nɔn dú Korban’ (Hɩ mɛ̀n kɛ dɔ̀ le ‘Ɔwɔ cice-ci’), kɩ 12nɛ́n sɩ́ vru ji nɛ̀n wá nɛ́n zi mán nɛ́n muan ɛkɔrɛ̀a, hɩ lɔ kɩ nye shri tán nɛ̀n. 13Ɔmu lɔ de nyɛ jrɛ́ Ɔwɔ mùan-ankà-dɔ̀ vɔ̀nshɛ, ny'ankà-yé gbàngbàn dɔ̀ tàn ny'edomɛ̀n mɛ̀n. Kɩ nyɛ hán ɛci bobrebe ndɔ hɔ̀n kɛ cá ny'ɛci-hán-ci gbàngbàn hɔ̀n lɔ.”

Ɛci hɔ̀n léyi kɛ wá ɔwrɔn ɛnbrá edomɛ̀n nɔn

(Nyɛ́n nyan Matie 15:10-20 wrú lɔ mɛ̀n)

14Zɛtɛn Zhezü vru bi fɛcüè kɩ nɛ dɔ́ yɔ le: “Nyɛ́n lɔ fɛn nyɛ́n die mɛ̀n nukùɛ, ô nyɛ́n yá ankà ndɔ lɔ: 15Kè sɩ̀ dù eci léyi ke dú ɛntrɛ ke bru ɔwrɔnẅì mɛ̀ntɛ̀ lɔ mɛ̀n nɔn de kɛ wá nɛ̀n ɛnbrá edomɛ̀n nɔn. Tɛ́n eci léyi ke dú nɛ̀n ɛnbɔrɛmɛ̀n kɛ srɔ nɔn de kɛ wá nɛ̀n ɛnbrá edomɛ̀n nɔn. [16Nyɛ́n die nukù anvrɛnvrɛn ke dú kɛ nyɛ́n ẅɛn nukù nyɛ yá ankà!]”

17Ɛnvra léyi Zhezü cɔhɔ́ fɛcüè tɛ̀sɛ̀n hɩ bru anwɔn mɛ̀n nɔn, n'ɛsɛ̀nkɛn-bɔ̀ ke yrɛ nɛ̀n nyandrɛn ndɔ lɔ n'ɛmɛ̀n ankà. 18Zhezü kɛ dɔ́ yɔ le: “Nyɛ́n mán nyɛ́n sɩ̀ dù ankà-yá-bɔ̀a? Nyɛ́n sɩ̀ nyrì ɔmu le eci léyi ke dú ɛntrɛ ke bru ɔwrɔnẅì mɛ̀n nɔn ke sɩ́ wá nɛ̀n ɛnbrá edomɛ̀n rɔ́, 19ɔmuhi eci lɔ ke sɩ́ bru nɛ̀n ɛnbɔrɛmɛ̀n, tɛ́n ke bru nɛ̀n ɛmɛ̀ntɛ̀ mɛ̀n kɩ kɛ srɔ ɛntrɛa?” Ankà-dɔ̀ ndɔ lɔ wú Zhezü kɛ dɔ̀ le, ɛci lɔ fɛn dú ɛci-zî-ci. 20Kɩ Zhezü vru kɛ dɔ̀ le: “Eci léyi ke dú ɔwrɔnẅì ɛnbɔrɛmɛ̀n kɛ srɔ ɛntrɛ nɔn de kɛ wá nɛ̀n ɛnbrá edomɛ̀n nɔn. 21Ɔmuhi ɛnbɔrɛmɛ̀n de, ankà-tro gbàngbàn hɔ̀n lɔ fɛn ke dù kɛ và kɛ wá tán, ye yerɛ ɛci, ye wri ɔwrɔn, 22ye bi ɛncɔnwrɔn-hi, ye bɩ́ ɔwrɔn ci, yɛ hán anbɔrɛci, yɛ frɛ́n anwrɔn, yɛ ẅɛn ɛwúvà gbàngbàn, yɛ kɔ́n ecüì-hi, yɛ dɔ́ anwrɔn ankà gbàngbàn ɛmɛẅi, ye di tùtre, yɛ ẅɛn ɔbrɔ̀sà. 23Ankà-tro gbàngbàn ndɔ hɔ̀n lɔ ke dú ɔwrɔnẅì ɛnbɔrɛmɛ̀n kɛ srɔ nɔn, de kɛ wá nɛ̀n ɛnbrá edomɛ̀n nɔn.”

Ɛmɛ̀n nyàntɛn mɛ̀n nyɔnwrɔn tɔ̀n ke bú Zhezü ankà kɛ tán ankàẅì

(Nyɛ́n nyan Matie 15:21-28 wrú lɔ mɛ̀n)

24Zɛtɛn Zhezü cɔhɔ́ nanvrɛn kɩ hɔ́n ɔkpɔsɔ wú léyi dú Tirɛ̀n anmàn tɛ̀sɛ̀n nɔn. Nɛ̀n bru ebɩ́ tɔ̀n mɛ̀n kɩ nɛ́n sɩ́ ji le anwrɔn kè nyrì le nɛ̀n dú ɛnu lɔ, tɛ́n nɛ̀n sɩ̀ ẅɛ̀n ɛbán-yri zriɛmɛ́n. 25Ɛnnyɔnwrɔn tɔ̀n léyi n'ɛnẅì, ɛnnyɔnwrɔn-ẅì dú ɛgbànkán mɛ̀n ɛnhɛ́n gbàngbàn tamɛ̀n nɔn, yá yɛ dɔ́ Zhezü ankà, nɛ̀n ji yi nɛ́n hɔ̀n kɩ nɛ̀n bore yi annan zìwú. 26Ɛnnyɔnwrɔn ndɔ lɔ dú ɛmɛ̀n nyàntɛn mɛ̀n, Fenisi, Siri anmàn nyɔnwrɔn. Nɛ sɛ́n Zhezü kɛ wrɔ́ ɛnhɛ́n gbàngbàn lɔ n'ɛnẅì domɛ̀n kɛ̀ sɔhɔ́. 27Tɛ́n Zhezü kɛ dɔ́ nɛ̀n le: “Teze ɛẅì hɔ̀n ke zî ɛci; ɔmuhi kè sɩ̀ zrɔ̀ tán le ye bɩ́ ɛẅì hɔ̀n ci-zî lɔ yɛ kɔ̀n cüe ɛnlɛ̀tù hɔ̀n nɔn.” 28Ɛnnyɔnwrɔn lɔ mrɛ́n nɛ̀n ɔmùan le: “Ankà-yé-wrɔn, ɔmu tɛ̀kɩ ɛnlɛ̀tù hɔ̀n mán, ke zî ɛci léyi ɛẅì hɔ̀n ke zî cüe tɛbrɛ̀ krùgbɛ̀n nɔn.” 29Zɛtɛn Zhezü kɛ dɔ́ nɛ̀n le: “Ankà-dɔ̀ ndɔ lɔ kruhú, è vru ɛmɛẅi ɛ̀ hɔ́n ɛbemɛ̀n; ɛnhɛ́n gbàngbàn cɔhɔ́ v'ɛnẅì lɔ edomɛ̀n.” 30Ɛnnyɔnwrɔn lɔ vru ɛmɛẅi hɔ́n ɛbemɛ̀n, nanvrɛn lɔ, nɛ̀n cɔ́ n'ɛnẅì dɛ́ sofa wúɛ: ɛnhɛ́n gbàngbàn cɔhɔ́ nɛ̀n edomɛ̀n.

Zhezü kɔrɛ̀ ɔmurɛ̀n-wrɔn tɔ̀n

31Zɛtɛn Zhezü cɔhɔ́ Tirɛ̀n kpɔsɔ wú, ci Sidɔn anmàn kɩ vru vá Galile nɛnbà-cɛ tɛ̀sɛ̀n anmàn ɛvà kpɔsɔ lɔ wú. 32Yɔ vá sɩ́ nɛ̀n ɔwrɔn tɔ̀n léyi nukù sɩ̀ hɩ ke sɩ́ dɔ́ ankà, kɩ yɔ sɛ́n nɛ̀n ô nɛ̀n di yi ɛkɔrɛ̀ ɛwú. 33Zhezü bɩ́ ɔmurɛ̀n-wrɔn lɔ kɩ yi mɛhi, yɔ cɔhɔ́ fɛcüè tɛ̀sɛ̀n esùshe; nɛ̀n bɩ́ n'antieẅì nɛ̀n wá ɔwrɔn lɔ nukùemɛ̀n, kɩ nɛ̀n bɩ́ nɛ́n dùku n'andà nɛ̀n tɛ́ yi ɔwɔɛ̀n. 34Zɛtɛn Zhezü sɩ́ anvɛ̀ ɛwú, wrɔn kɩ kɛ dɔ́ ɔwrɔn lɔ le: “Ɛfatà!” (Yi mɛ̀n kɛ dɔ̀ le “Vru v'edomɛ̀n!”) 35Ɛnvra zri lɔ, ɔwrɔn lɔ nukù vru, n'ɔwɔɛ̀n lɔ gbrɔ kɩ nɛ̀n bukru nɛ dɔ́ ankà anvrɛnvrɛn. 36Zhezü wá tán yɔ lɔ fɛn, yɔ bɩ́ dɔ́ ɔwrɔn zriɛmɛ́n ankà ndɔ lɔ; Tɛ́n yɔ tɛ́n yɔ sán dɔ̀. 37Kɩ anwrɔn dú anvɛmɛ̀n-frɛ́n vriemɛ̀n; kɩ yɔ dɔ̀ le: “Eci lɔ fɛn léyi nɛ hán nɔn zrɔ annanwɔrɛ mɛ̀n! Nɛ hán nukù-sɩ-bɔ̀ kɛ yá ankà kɩ ɔmùankɛ́n-bɔ̀ kɛ dɔ́ ankà!”

Currently Selected:

Markɛ̀n 7: ƐAA03

Highlight

Copy