Bikɔmɛli 5
5
Anania na Sapila
1Okina momi, kombe ende Anania, na mwali onde Sapila, bangɛjɛ gbie. 2Iyo ko abomba ekenge elikonja, oko na mojimo momwali onde. Adoa na ekenge etongo, na alisambea a bibota bibabwɛnji. 3Pɛtɛlo ko abala bo, Anania, Satana alumejai molema mowɛ bo okosee Mwembo Mosɛnɔke, na bo obombe ekenge elikonja ligbie mojɔ moye? 4Adaka wɛ pɛ bopeta ngɛjɛ gbie, edaka oko ai wɛ; na yana angɛjɛi wɛ gbie, likonja lidaki oko likonja liwɛ bo okɔe o apalaki wɛ. Oko boa, olɛi a molema mowɛ bo okɔe mojɔ momina cina eye? Wɛ okosei Njambe, te bato. 5Anania, ama yo ka bikenge bimina, ami kwa oko nase, ami gwa oko bogwa. Na bato basusu baya baka mojɔ momina baluluma na bɔ. 6Menga ko badoa, bamodinga, bamotomba na bamopusea.
7Yana anɔ isa heures jisato na dea, mwali onde adoa, pɛ nongo bojeba mojɔ momina. 8Na Pɛtɛlo abala na nde bo, Tɔndɔ mbi isa ongɛjɛini gbie na bobuno bu? Iyo asɔmbeja bo, Ee, oko bobuno bomina. 9Pɛtɛlo abala na nde bo, Ino odumbini ndungu bo omekeni Mwembo Mosɛnɔke mojɔ moye? Hokea! Bibota bibato baya bapusei muma’wɛ bidi ya a monɔkɔ mondako, na bâtomba wɛ pongono. 10Iyo akwa bokpa a bibota binde, na agwa oko bogwa. Yana akwea menga, bamotana oko mogo, bamotomba na bamopusea a dɔngɔ dimuma nde. 11Bato basusu baDenga, na bato basusu batongo baya baka mojɔ momina, badaka na bɔ bonɛnɛ mɛnɛ.
Elomu eBabwɛnji
12Babwɛnji bakɔkɔ bimbete na mindumba minɛnɛ a boso bobato. Batitanaka na molema momɔci a Eseba eSɔlɔmɔ. 13Bato batongo badaka na bɔ a bocingama na bu; bato bangando ko basepaka na bu bou mɛnɛ. 14Na etango ebato baya bajimea Kumu ehɛ oko bohɛ, banɛnɛ mɛnɛ, na bami na bali pongono. 15Bamejaka bato babego a macilinga, na babasambeaka a bisambe na matɔkɔ mabu, na njingo bo Pɛtɛlo akanɔ, esie ende ekunde bakina babu. 16Na bato banɛnɛ badonga a ngando jitongo jia jidaka mbuci, a bodoa a Yelusalema na babego, na bato baya badingoaka na miembo mibe; na bahela kanga basusu mɛnɛ.
17Mosuku onganga, na bato basusu baya badaka bacingi na nde (oko bato baejimeli eBaSadoki) badaka na likaka linɛnɛ a mojɔ momina. 18Bato bamina bangɔ, bapea babwɛnji, na babasa ta blɔkɔ engando. 19Obwɛnji ko oKumu adipoa midipe miblɔkɔ na bulu, abameja sokolu, na abala bo, 20Kɛni, imani mema oko oho a tempelo, tɔndɔni bato mwako mosusu moBomɔ. 21Ibo baka mojɔ momina, na bakwea a tempelo ehuma mɛnɛ, na babanga bokoja. Yana atitana mosuku onganga na bato bande, babolea likita libajuji, na basuku baYisalaele, na baloma ndɔsɔ ebabwɛnji a blɔkɔ. 22Bapolisi baya bakɛ baibatana a blɔkɔ; oko boa bahula oko na bwɛnji bomina. 23Babala bo, Iso botani ndako eblɔkɔ ebaki bopele mɛnɛ, na basinjili badaki ba’mi ta midipe; adipoi so ko modipe, botaniti nongo moto a tei. 24Yana aka mosuku otempelo, na basuku banganga mojɔ momina, badaka na bokamoa bonɛnɛ, pɛ bocingea nongo cina emina. 25Okina moto adoa a ehole emina, na abala na bu bo, Ikani! Bami basabi no ta blɔkɔ badi oko oho a tempelo, na bakojaka bato. 26Oko boa, kapitɛni akɛ na bapolisi na abapea, te na sanga ko, mojɔ bo badaka na bɔ, isa bato badi boba’la matai.
27Bahula na bu, na babameja a boso bolikita. Mosuku onganga abanga bobakokeleja. 28Abala bo, Iso boilemba no na mobeko mopipo mɛnɛ bo otakojani koko a kombe emina? Anjani edɛye ko; olumejaini Yelusalema na bokoja bonu, na opalakani bobakea lindo jimakia mamoto omina oko ai so. 29Pɛtɛlo na babwɛnji batongo basɔmbeja bo, Na Njambe, na bato, iso bodi bosuma gbo oko Njambe. 30Njambe obasangwa’su angɔjɔ Yesu yana amobakea no a mole na omowani. 31Njambe ko amokumeja a ebɔ ende ebami, Kumu na Moheleja, a mojɔ mobohekoja milema miYisalaele na boyɛ jibe jibu. 32Iso bodi banjɛnɛki bangando jimina, na Mwembo Mosɛnɔke pongono, mua mopaka Njambe ai baya bamosumaka.
33Yana aka bo bikenge bimina, bakɛnjɔ kɛnjɔ enɛnɛ, na badaka na posa bo babawoe. 34Okina MoPalusi ko angɔ a tei elikita, kombe ende Gamaliele. Iyo adaka mokoja oMibeko, na adaka na gala epele a tei ebato basusu, na apa monɔkɔ bo bamanejae babwɛnji mweka. 35Abala na likita bo, Ino bami baYisalaele, toma nganjamani na mojɔ mokanaka no bokɔ na bato ba. 36Mojɔ bo Teuda adoa, te nongo ehele, na ajimeja bato bo adi okina kumu. Na bato bacingama na nde isa mikama minɛi na dea. Bamowa yo mɛnɛ, na bato basusu baya bacingama na nde bacia na basamboa. 37Okina otongo koko, Yuda oGalile, angɔ ngɔngɔ jinde, oko a ehole elangaka bo etango ebato, na alɛngɛ bakma bato ai yo. Iyo agwa pongono, na bato basusu baya bacingama na nde banangana oko bonangana. 38A mojɔ momina, mbi nalehaka no bo otakɔni na bato ba nongo mojɔ; kinani badae. Cina bo, isa mojɔ mumu, isa elomu yeye edi oko mojɔ mobato pɛ, edi bodimoa. 39Isa ko modi mojɔ moNjambe, ino otahɔnɔkɔni bomogbokeja; toma nganjamani bo osaka ’nani na Njambe yo mɛnɛ. 40Bajima mojɔ mobala yo. Babea babwɛnji, babatueja, bababekea bo batabala koko a kombe eYesu, na babacingoa. 41Babwɛnji bamana a likita, na badaka na sepi mojɔ bo babwana bosɔ ekumu ebosamboa a mojɔ mokombe emina. 42Bakoja busa na busa a tempelo na a ndako, na batɔndɔ Mwako Mopele moYesu Masiya, pɛ nongo bokina.
Currently Selected:
Bikɔmɛli 5: NTNG61
Highlight
Share
Copy
Want to have your highlights saved across all your devices? Sign up or sign in
Alliance Biblique de la R. D. Congo
