Bikɔmɛli 7
7
1Mosuku onganga abala bo, Mijɔ mi midi soti? 2Sɛtɛpano asɔmbeja bo, Baninga na basango, hokeani! Njambe oekumu asaboloja ai tata osu Abalayama yana adaka yo a Mesopotamia, oko apetakini kɛ a Alana. 3Abala na nde bo, Donga ya a esika yeye. Kina bato bawɛ mɛnɛ a bokɛ a ngondo etongo. Mbi mɛnɛ nadi boneja wɛ esika emina. 4Oko boa yo adonga a ngondo eKaladai, na akɛ adae a Alana. Yana agwa sangwa’nde, Njambe amodongeja a esika emina, bo adoe a ngondo ye edi no edɛye. 5Endele ko, aimopa nongo mokpɔtɔ a ngondo ye esu, pɛpɛ nongo esimbo emɔci. Yana adaka yo ngasa, pɛpɛ mwana, Njambe amokinea sako bo ngondo ye edae oko ai yo na bana bande. 6Njambe abala koko na nde bo bana bande badi boyeyoa a ekina ngondo etongo, bo badi boda a libuli oho, na bo badi boda na minɔngɔ bianga mikama minɛi. 7Njambe abala koko bo, Mbi nâsambeja bato baya bâbapika babuli. Ngɔngɔ jimina ko, badi bomana a bohu, na bâkɔmɛ mbi a esika ye. 8Njambe abakea na Abalayama mokongo mobolena-ganda. Oko boa, yana abota yo Isaka, Abalayama amolena ganda a busa bobomwambe. Isaka abota Yakobo, na Yakobo abota batata domi-na-babae.
9Batata bamina bangɛjɛ Yosepa a Ejipito, oko a mojɔ molikaka. 10Njambe ko adaka na nde, na amoheleja a minɔngɔ minde misusu. Amopa koko bowɛi, na amokɔ monganji a boso boPalo kumu oEjipito. Iyo abakea Yosepa gouverneur oEjipito, na amopa kpaci a ndako ende esusu. 11Linjale lidoa linɛnɛ a makota masusu maEjipito na Kanana, jɔɔlɔ enɛnɛ mɛnɛ. Batata basu baiboloja nongo leka loboyaka. 12Yakobo ko aka bo ndongo jidaka a Ejipito, na aloma batata basu oho,—ehole eboso yena. 13Yana asɔmbɔ bo koko oho, Yosepa ajebeja bananango bo yo adi mwangwa’bu. Oko boa mojɔ mombota eYosepa moboloa ai Palo. 14Yosepa aloma ndɔsɔ esangwa’nde Yakobo na denga dinde disusu, bato macinda masato na domi na bato batano. 15Oko boa Yakobo akɛ a Ejipito na agwa oho, na batata basu pongono. 16Babatomba na babapusea a Sekeme, oko a esɛmɔ ema somba Abalayama na likonja ai bana baAmola.
17Yana abatama ehole ebongameja sako ekina Njambe na Abalayama, bato basu bahɛ bou mɛnɛ a Ejipito. 18Okina otongo adaka kumu a ehole emina, yona oijeba mojɔ moYosepa. 19Kumu omina akɔ poloso na bato basu, anɔngeja batata basu, na adumba mobeko bo badumbe bana babu bakɛkɛlɛkɛ bo batahela. 20Mose ahotama a ehole emina, mwana obomwenga mɛnɛ a boso boNjambe. Bamobanea songe basato a ndako esangwa’nde. 21Yana amomeja bo sokolu, mwamwali oPalo amoboloja, na amobɔkɔ o mwana’nde mɛnɛ. 22Bakoja Mose mijɔ misusu mibowɛi boEjipito, na adaka moto monɛnɛ a mojɔ moebaeli ende na bilomu binde. 23Yana adaka yo na bianga domi-inɛi, akana bo akɛe a bonja bato bande mɛnɛ, bana baYisalaele. 24Iyo anɛ okina obu na monɔngɔ na amokakela. Awa moto oEjipito, na aheleja yona odaka na monɔngɔ. 25Iyo alɛ bo bato bande mɛnɛ badi bocingea bo Njambe adi bobaheleja na ebɔ ende. Ibo ko baicingea. 26Ahoa koko busa, atana bakina babu baya bawanaka, na akwea bosiili. Abala bo, Ino bami, ino bananange jibato, okɔkɔni mojɔ mu mobe cina eye? 27Moto ko yona oma banga mojɔ na motuteano monde, amolona na abala na nde bo, Obakei wɛ kumu na juji osu nda? 28Opalaka bowa mbi o awabi wɛ MoEjipito mɔkɔ? 29Mose acia oko bocia a mojɔ moekenge emina. Akɛ adae a likota liMidiana, na abota bana-bami babae oho.
30Yana asia bianga domi-inɛi, obwɛnji oDiko asaboloja ai yo a lipumba limole mua mongoa mosa, oho a lisobe liMono moSinai. 31Yana anɛ Mose mojɔ momina, akamoa bou. Abatama yo ko a bokokeleja mojɔ, Kumu abala na nde bo, 32Mbi nadi Njambe obatata bawɛ; Njambe oAbalayama, oIsaka, na oYakobo. Mose aluluma na bɔ, pɛ bohɔnɔ bonja. 33Kumu abala na nde bo, Ihwa sapata a bibota biwɛ, mojɔ bo esika edi wɛ edi mokpɔtɔ mosɛnɔke. 34Mbi nanɛkɛ soti monɔngɔ mobato bambi a Ejipito. Nakaka mibemo mibu, na natiti ya bo nabahelejae. Edɛye, doa, nâloma wɛ a Ejipito.
35Oko boa Njambe aloma Mose bo adae kumu, na juji, na moheleja, oko na ngulu eebɔ eobwɛnji oDiko yona osaboloja ai yo a lipumba,—oko Mose oma bo lona boso yana abala ’bo bo, Obakei wɛ kumu na juji osu nda? 36Iyo abamaneja a Ejipito. Akɔ mindumba na bimbete bianga domi-inɛi a Ejipito, a Madiba Makpetu, na a lisobe. 37Mose omina adi oko yona obala na BaYisalaele bo, Njambe adi bongɔjɔ motɔndɔi ai no a tei ebaninga banu, o adi mbi. 38Iyo adaka koko a likita a lisobe, na adaka na obwɛnji oDiko yana abala yo na batata basu a Mono moSinai. Iyo asɔ koko bikenge bibomɔ a bopa so. 39Batata basu ko baipala bomosuma. Bamolona oko bolona, na milema mibu mihekoa a Ejipito. 40Babala na Alona bo, Lua banjambe a mojɔ mosu, bo badale a boso bosu. Mojɔ bo, yo Mose yona omaneja so a Ejipito—botajebaka nongo mojɔ mua mokwi na nde. 41Balua mwana-ngɔmbɔ a masu mamina, bawa masiko a bopeja elimo emina, na badaka na sepi a mojɔ moeka ekɔ bo na mɔmɔ mabu bɛnɛ. 42Njambe ko ababulɛ, na abakina bo basakoe njɔtɔ baDiko, o adi mosɔnɔ a mokanda mobatɔndɔi bo,
lno bato baYisalaele, owani tito a bopeja mbi masiko,
Bianga domi-inɛi a lisobe?
43Otombani oko Etondo ebosakoa eMɔlɔka,
Na njɔtɔ onjambe onu Lepana,
Na bilimo bilua no a mojɔ mobosakoa.
A mojɔ momina, mbi nâdongeja no oho a suka eBabilo.
44Batata basu badaka na Etondo etati a lisobe. Iyona obala na Mose amobekea bo ayoe Etondo oko na elimo ema yo nɛ. 45Yana acieja Njambe makota a boso bobatata basu, batomba Etondo emina, bakwea na Yosua a esika ebapakano, na eyeyoa na bu oko a ehole eDawidi. 46Njambe asepa na Dawidi. Iyo anga Njambe njea bo abolojae esika eboda a mojɔ moNjambe oYakobo. 47Edaka Sɔlɔmɔ ko yona oyoa ndako ende. 48Endele ko, Yona oBonɔ t’adake a ndako jiyoaka bato na mɔmɔ. Motɔndɔi abala bo,
49Busa bodi ngɛndɛ embi;
Ngondo edi egboto a bobakea bibota bimbi.
Kumu abalaka bo, Odini boyoa ndako embi na ye?
Esika eliheme limbi edi jɔ?
50Ebɔ embi mɛnɛ eikɔ leka lu losusu?
51Ino bato bamelo mipipo! Balena no ganda, bailena no ko a milema na a matoi. Ino oswianakani na Mwembo Mosɛnɔke bihole bisusu, o akɔ batata banu. 52Batata banu baikputoa bodingoja batɔndɔi basusu. Bawa batɔndɔi baya batɔndɔ eyou bo Yona Mosɛnɔke adi bodoa ngɔngɔ. Ino ko odini bakabi na bawoi bande, 53oko no baya basɔ Mibeko a mɔmɔ mababwɛnji baDiko, pɛ ko bomisuma.
54Yana aka bo bikenge bimina, bakɛnjɔ kɛnjɔ enɛnɛ a milema mibu, na bamokɔ bikɛɛlɛ bimino. 55Sɛtɛpano ko aluma na Mwembo Mosɛnɔke, akahoa miso diko, anɛ ekumu eNjamhe, na anɛ Yesu yona odaka ami mema a ebɔ ebami eNjambe. 56Na abala bo, Anjani! Mbi nanɛkɛ Diko bwase, na Mwana ’Moto adi ami a ebɔ ebami eNjambe. 57Ibo baditea matoi mabu, babekoa na bopipo, na bapota ai yo na mokano momɔci. 58Bamogbula a sokolu engando, na bamola matai. Banjɛnɛki bakina bisenja bibu a bibota bimwenga omɔci, kombe ende Saula. 59Yana alaka bo Sɛtɛpano matai, yo anga bo, Kumu Yesu, asɔ mwembo mombi. 60Atita na magbunda, na abekoa na bopipo bo, Kumu, pɛ bobakea lindo emojɔ mu ai bo. Ama yo bala boa, ami hwɛ oko bohwɛ. Na Saula ajima mojɔ mobogwa bondo.
Currently Selected:
Bikɔmɛli 7: NTNG61
Highlight
Share
Copy
Want to have your highlights saved across all your devices? Sign up or sign in
Alliance Biblique de la R. D. Congo
