Luka 11

Mojɔ Mobo’nga

1Yesu adaka a bonga a ekina esika. Yana asieja yo bo’nga, mocingami onde omɔci abala na nde bo, Kumu, bokoja so bonga o akoja Yoane bacingami bande. 2Iyo abala na bu bo, Yana angaka no, balani bo,

Sesa, yɛ kombe ewɛ esumame;

Yɛ Bokumu bowɛ bodoe.

3Bopa so milɛmbɛ busa na busa.

4Bokina so jibe jisu,

Mojɔ bo so bokinaka moto na moto yona okɔi bobe ai so.

Bambeja so a njea ebomeka.

5Abala na bu koko bo, Okina onu akada na mina’nde, adi bokɛ ai yo na bulu tei, adi bobala na nde bo, Moninga, bekejani milɛmbɛ misato. 6Mojɔ bo okina mina’mbi amei a esika embi a mɔngɔ monde, na mbi napeliti eka a bomonea yo. 7Yona odi a ndako tei adi bomosɔmbeja bo, Yɛ bonɔngeja mbi! Nakandi modipe. Iso na bana bambi bosami. Ebɔngiti bo mbi nakine gbagba embi bo napɛ wɛ milɛmbɛ. 8Mbi ko natɔndɔko no bo, Isa aditi bongɔ bo amopɛ milɛmbɛ mojɔ bo adi mina’nde, adi bongɔ ko na âpa moto omina leka losusu lua lotakaka na nde, akada na lingbangba, pɛ sɔni.

9Mbi natɔndɔkɔ no bo, Ingakani nongo osɛni. Dukakani nongo obolojaeni. Bimboakani na modipe môdipoama ai no. 10Mojɔ bo moto na moto yona ongaka asɔkɔ. Yona odukaka abolojaka. Modipe modipoamaka ai yona obimboaka. 11Okina onu akada sange’moto, na mwana’nde akamo’nga molɛmbɛ, adi bomopa litai? Akamo’nga swi, adi bomopa njɔ? 12Akamo’nga litɔ, adi bomopa koolo?

13Oko boa, ino bato, nongo adi no bato babe, ojebakani bopa bana banu bipeeli bipele; esingaiti Sangwa’nu oho Diko! Iyo apaka Mwembo Mosɛnɔke ai bato baya bamongaka.

Mojɔ Momiembo Mibe

14Yesu ameja mwembo mobe moengomba. Yana amana mwembo mobe, moto oengomba abala, na bato basusu bakamoa. 15Bakina babu ko babala bo, Iyo amejaka miembo mibe oko na kpaci eBalasebuba, kumu omiembo mibe. 16Bakina batongo bamodi-ngea, na bapala bo abanejae ekina embete eDiko. 17Iyo ko ajeba bilɛli bibu, na abala na bu bo, Boswiana bokada a tei ebokumu, bokumu bomina bodi bobeha. Boswiana bokada a ekina ndako, ndako emina edi bobeha. 18Oko hoa, isa Satana aswianaka na yo mɛnɛ, bokumu bonde bodi boyeyoa na ye? 19Isa mbi nadumbaka miembo mibe na kpaci eBalasebuba, bana banu bamidumbaka na kpaci enda? Oko boa bana banu bâsambeja no. 20Isa mbi ko nadumbaka miembo mibe na mosapi moNjambe, Bokumu boNjambe bodoi ai no. 21Moto mopipo akalwa molilo monde mobila a bobanea ndako ende, esika ende êda na bowi. 22Okina otongo ko yona omonɔi na bopipo, adi bona na nde na âmogbokeja, âkatoa mohlo monde mobila mojimaka yo, na âkaba leka londe. 23Moto yona oditi a dɔngɔ dimbi, o ayɛli mbi. Yona odi pɛ bondoa na mbi ananganejaka. 24Mwembo mobe mokamana ai moto, mokalebaleba a mokonda mokakanake a boduka bowi, pɛ ko boboloja bowi. Oko boa modi bobala bo, Mbi nâsɔmbɔ a ndako ekini mbi. 25Mokahula, modi bonɛ ndako embɔke na ekoleamake. 26Oko boa, mwembo momina mokɛkɛ nduki emiembo mitongo sambo mia mimonɔi na bobe, na mi misusu midi bokwea a boda ena. Na moda momoto omina mongɔngɔ, na moda monde moboso, moda monde mongɔngɔ modi bonɔ na bobe.

27Yana abala yo bikenge bimina, okina mwali yona odaka a tei ehkita libato abekoa bo, Bojongoa a sɔpɔ yena ebota wɛ, na mabɛi manunga wɛ! 28Yesu ko abala bo, Badi na bojongoa soti oko baya ba’kaka na basumaka Ebaeli eNjambe.

Mojɔ Moembete

29Bato bahɛ bou mɛnɛ a ehole emina, na yo abanga bobala na bu bo, Elulu ye edi elulu ebe. Edukaka embete; eta’nɛ ko nongo embete, oko embete eJona pɛ. 30Jona adaka embete ai bato baNinewe. Mwana ’Moto ko âda koko embete a mojɔ moelulu ye. 31Kumumwali oSudo adi bongɔ na bato baelulu ye a Esambi, na abadumbabí. Mojɔ bo yo adonga a suka engondo, na adoa ai Sɔlɔmɔ bo ahokee bowɛi bonde. Okina ko yona onɔi Sɔlɔmɔ adi yaya. 32Bato baNinewe badi bongɔ na bato baelulu ye a Esambi, na babadumbabí. Mojɔ bo, ibo bahekoja milema mibu a mojɔ momwako motɔndɔ Jona. Okina ko yona onɔi Jona adi yaya.

33Moto akayoja paka, ataehomba a ekina esika, isa a cina eteni. Adi boebakea a mesa, bo baya bakweaka banɛe bohu. 34Paka emokuku edi diso diwɛ. Isa diso diwɛ didi dipele, mokuku mowɛ mosusu modi a bohu; isa didi dibe ko, mokuku mowɛ mosusu modi oko a modidi. 35Oko boa, toma nganjama bo bohu bua bodi a tei ewɛ bosaka da oko modidi. 36Isa mokuku mowɛ mosusu modi a bohu, pɛpɛ nongo ekenge a modidi, modi bohoa mosusu mɛnɛ, o ekɔmɛli epaka yena ehojaka wɛ na eyoi ende.

Mojɔ moBaPalusi

37Yana abalaka Yesu, okina MoPalusi amobea bo ayake a ndako ende. Oko boa yo akwea a ndako, na ada a mesa. 38MoPalusi akamoa yana anɛ yo bo aisasosa oko apetakini yaka. 39Kumu ko abala na nde bo, Ino BaPalusi osɛnojakani kɔpɔ na saani oko sokolu pɛ; olumini ko a tei oko na liba na bikɔmɛli bibe. 40Ino bigegele! yona okɔ sokolu aikɔ tei pongono? 41Enɔi na bopele bo osɛnojaeni ngando jia jidi a tei enu; oko boa bikɔmɛli binu bisusu bidi bobɔngɔ.

42Monɔngɔ ai no BaPalusi! Okabakani ai Njambe libondo lidomi limondumbamba, na sumba, na njua jisusu jibojio; otalɛkɛni ko nongo mweka a mojɔ mobodongo na epaeli eNjambe. Obwanini bokɔ ngando jiji, na pɛ bodimboa bokɔ ngando jia jitongo pongono. 43Monɔngɔ ai no BaPalusi! Ino opalakani oko bidie biboso a sinagoge, na njɛbɛ jibato a licilinga. 44Monɔngɔ ai no! Mojɔ bo odini oko bisɛmɔ bia bibombami; bato badalaka diko pɛ bojeba.

45Okina nganga oMibeko amosɔmbeja bo, Mokoja, abaliwɛ boa, okejaka so koko sɔni. 46Yesu abala na nde bo, Monɔngɔ ai no nganga baMibeko pongono! Mojɔ bo ino olwajakani bato mina minɛnɛnɛ; ino bɛnɛ ko otangɔjɔkɔni nongo mosapi momɔci a bokamoa mina mimina. 47Monɔngɔ ai no! Basangwa’nu bawa batɔndɔi; ino ko olongakani bisɛmɔ bibu. 48Oko boa ojimakani bikɔmɛli bibasangwa’nu, na obalongejakani. Ibo bawa batɔndɔi, ino ko olongakani bisɛmɔ bibu. 49Bowɛi boNjambe bobala a mojɔ momina bo, Mbi nâbalomea batɔndɔi na babwɛnji; bâwa bakina, na bâdingoja batongo. 50Oko boa, lindo jimakia mabatɔndɔi maya masopea oko a bobanga bongondo, jida a elulu ye, 51donga oko a makia maAbela, oko a makia maSekalaya yona ogwa a sibano elitumbu na tempelo. Ee, mbi natɔndɔkɔ no bo lindo jimina jidi oko a elulu ye. 52Monɔngɔ ai no nganga baMibeko! mojɔ bo okatoini sabe eejebeli; okweitini no bɛnɛ, na odipakani njea ai bato baya bakɔkɔ bo bakwee.

53Amana yo a esika emina, basɔni na BaPalusi badaka na nde oko soki, na babanga bomodingea na mahɔjɔ manɛnɛ. 54Badaka oko na nduki emijɔ, bo bamodumbe a mojɔ moekina ebaeli ende.

Currently Selected:

Luka 11: NTNG61

Highlight

Copy