Luka 12
12
Bileho biYesu
1Bato bama titana kanga koto jinɛnɛ, na bambambaka bou. Yesu abanga boleha bacingami bande bo, Toma nganjamani na lipetu liBaPalusi, oko na bokosea bobu. 2Isa mokina mojɔ modi mokundamake, môkundoama; isa modi mobombamake, môboloa. 3Oko boa ngando jisusu jibalaka no a modidi jitɔndɔmɔ a bohu; jia jibalaka no na popoli a ndako tei, jitɔndɔmɔ a diko dibitondo. 4Mbi natɔndɔkɔ no bina ’mbi bo, T’obangeni oko baya bawaka mokuku, na bakawa mokuku batabwana bokɔ mokina mojɔ motongo. 5Mbi ko nadi boneja no yona obwani na nu a bobanga; okina adi, na yo akawa, adi na ngulu a bodumba no a Gehena; mohangani yo. Ee, mbi natɔndɔkɔ no bo, Mobangani yo. 6Bobuno bodɛkɛ batano, te makota mabae? endele ko, Njambe atababosaka nongo mweka. 7Na ajebaka etango eswe jimelo minu. Oko boa yɛni bobanga; na no na dɛkɛ, ino onɔini dɛkɛ banɛnɛ na bobuno. 8Mbi natɔndɔkɔ no bo, Moto na moto yona ojimaka mbi a boso bobato, Mwana ’Moto âmojimabi yo a boso bobabwɛnji baNjambe. 9Moto ko akalona mbi a boso bobato, alonamabi yo mɛnɛ a boso bobabwɛnji baNjambe. 10Moto akalɔngɔ Mwana ’Moto, mojɔ momina mobwani bokinama; yona osambojaka Mwembo Mosɛnɔke ko na ebaeli ebe, atakinama nongo. 11Bakagbula no a boso bomakita masinagoge na bakumu na basuku, pɛ bodani na mokakwano a mojɔ mobikenge bibosɔmbeja na bobala. 12Mojɔ bo Mwembo Mosɛnɔke modi bojebeja no bikenge bia bîbwana na nu a bobala a ehole emina.
MondÉ› Moegegele
13Okina moto yona odaka a tei elikita libato abala na Yesu bo, Mokoja, bala na mwangwa ’mbi bo akabe na mbi likwa. 14Iyo amosɔmbeja bo, Obakei mbi juji na mokabi onu nda? 15Abala koko na bato bo, Toma nganjamani; toma lonani bimboli bisusu, cina bo mohelo momoto mocingiti na lituna lileka lopeli yo. 16Abala na bu mondɛ mu; Okina konji adaka na gbie jia jibotaka leka lonɛnɛ. 17Oko boa, yo alɛ a molema monde bo, Ekɔ mbi ndeni? Esika etakaka na mbi a bodeja leka lombi. 18Na abala bo, Nadi bokɔ oko mojɔ mu; nâbuka ndako jidejaka na mbi leka; nâyoa jitongo jinɛnɛnɛ bo nadejae ndongo jimbi na leka lombi losusu oko ena. 19Nâsa ko nabale na mwembo mombi bo, Mwembo mombi, odejai leka lonɛnɛ mɛnɛ edɛye. Lobwani na bianga binɛnɛ; peta hema; yaka, mwaka, sasepeja. 20Njambe ko abala na nde bo, Wɛ egegele! odi bosɔmbeja mwembo mowɛ oko na bulu bu; na leka lu losusu losɛlingoi wɛ lôdika na nda? 21Edi oko boa na moto yona ohɛjɛkɛ likonja a mojɔ monde mɛnɛ pɛ, na adi na bokwali a miso maNjambe.
Bileho biYesu ai Bato Bande
22Yesu abala na bacingami bande bo, A mojɔ momina, mbi natɔndɔkɔ no bo, T’odaeni oko na mokakwano a mojɔ momohelo monu, a mojɔ moboyaka, na mokuku, na bisenja bibolwa. 23Na mohelo, na dia, mohelo modi mojɔ moboso. Na mokuku na bisenja, mokuku modi mojɔ moboso. 24Anjani gɔgɔ; te banake gbie; te bajuake leka a gbie; bapeliti magasini, isa edejai. Njambe ko ababɔkɔkɔ; esingaiti no, baya banɔi mbulu na yumu bou mɛnɛ. 25Okina onu adi bokaeja boyai bonde ebɔ emɔci na mokakwano? 26Oko boa, isa otahɔnɔkɔni bokɔ mokina mojɔ mokɛkɛlɛkɛ boa, okakwanakani a mojɔ mongando jitongo cina eye? 27Anjani manga maesika; te makɔke elomu; te mayoake bisenja; endele ko, madi na bohohu bopele. Mbi natɔndɔkɔ no bo elwali eSɔlɔmɔ a ekumu ende esusu eibwana na elwali edanga dimɔci diesika. 28Oko boa, isa Njambe alwajaka njienjie jia jidi a gbie busa bu, na jitumbama a mosa puma, esingaiti no, mo bato baejimeli ekɛkɛlɛkɛ! 29Pɛ bosabasabani a mojɔ moboyaka na bomwaka. Pɛ bodani na mokakwano. 30Bapakano bangondo esusu badukaka oko leka lomina. Sangwa’nu ko ajebaka bo obwanini bosɔ leka lomina. 31Ino ko, peta dukani Bokumu boNjambe, ôsa ko osɛni leka lu losusu pongono. 32Yɛni bobanga, bwela bokɛkɛ, mojɔ bo mokano mopele moSangwa’nu modi bo apɛ no Bokumu 33Ingɛjɛni leka lonu; kɔni matɔngi malikonja a mojɔ monu maya matagwa; sɛlingoani likonja liyumu oho Diko lia litasia nongo, mojɔ bo mobi atabatama oho, na mosokoto pɛ bobeja. 34Mojɔ bo molema mowɛ mosambi oko a esika edi likonja liwɛ liyumu.
35Kandani njingo a mongo manu. Yojani paki jinu. 36Dani na ekɔmɛli ebato baya banjaka kumu obu yona odi a libonje lilihango bo ahule. Akamea na akaboma modipe, badi bodipoa ai yo bokpa. 37Kumu aka’tana bakɔmɛli bande misu a lihule linde, bakɔmɛli bamina bâda na sepi. Mbi natɔndɔkɔ no na soti bo yo âlwa bisenja bielomu, âbadeja a mesa, na âdoa bo abapɛ mia. 38Akadoa na bulu tei, isa a kɔkɔ oboso, na aka’tana bakɔmɛli bande na mongangele, bâda na sepi. 39Pɛ bobosani mojɔ mu; Moswa ’ndako, akɔki yo jeba ehole ekanaka mobi bodoa, ka adaki na mongangele, na ajimiti bo moto aluse ndako ende. 40Ino toma dani na mosɛlingo pongono, mojɔ bo Mwana ’Moto âbutoa no bobutoa.
41Pɛtɛlo abala bo, Kumu, mondɛ mobali wɛ, obali a mojɔ mosu isa a mojɔ mobato basusu? 42Kumu abala bo, Kumu akapa okina mokɔmɛli onde oejimeli na bowɛi kpaci ai bato bande basusu, bo abakabe mia libondo libondo a ehole yena ebwani; 43na kumu onde akahula na akamotana a elomu emina, mokɔmɛli omina âda na sepi. 44Mbi natɔndɔkɔ no na soti bo adi bomopa kpaci a leka londe losusu. 45Mokɔmɛli omina ko akalɛ a molema monde bo, Kumu ombi atahula bwango; na akabanga botua bakɔmɛli batongo, na bami na bali pongono, na boyaka na bomwaka na bolangoa, 46kumu omokɔmɛli omina adi bodoa bokina busa yana adi yo pɛ bomonja, a ehole edi yo pɛ bojeba, âmotua bou mɛnɛ na amo’sa ta libondo libato baya bapehti ejimeli. 47Mokɔmɛli yona ojebaka bolulea bokumu onde, pɛ ko bosɛlingoa, pɛ bokɔ o apalaka kumu onde, adi botuama na bopipo mɛnɛ. 48Yona odi pɛ bojeba ko, na akakɔ mijɔ mia mibwani na nji, atatuama na bopipo. Bato bakapa moto leka lonɛnɛ, badingaka bo badi bosɔ leka lonɛnɛ ai yo; na bakamopa leka lonɛnɛ a mojɔ mobobanea, badi bobea leka lonɛnɛ ai yo.
49Mbi nadoi bo natumbe mosa a ngondo. Posa embi edi oko bo mongoe. 50Mbi ko nabwani bobatisama na ekina batisimo, na nadi na posa enɛnɛ bo esie. 51Ino odingakani bo mbi nadoi bo napɛ bowi a ngondo? Pɛpɛ, te nongo bowi, gbo oko bobɔtɔ; mbi mɛnɛ natɔndɔkɔ no. 52Bato batano bakada a ndako emɔci, bâbɔtɔnɔ; bato basato a elingi emɔci, na babae a elingi etongo, isa bato babae a elingi etnɔci, na basato a elingi etongo. 53Bobɔtɔnɔ bomina bôda bo sango âlona mwana ’nde momi, na mwana-momi âlona sangwa ’nde; nango âlona mwana ’nde mwali, na mwana-mwali âlona ngwa ’nde; mwali âlona bokio bonde mwali, na mwali omina âlona bokio bonde mwali.
54Yesu abala koko na emumu ebato bo, Okanɛni bo eyembi emani a dɔngɔ diwɛseta, obalakani bokpa bo mbua adi ta busa; na modi oko boa. 55Na okanɛni bo pwea ehulaka a dɔngɔ disudo, obalakani bo moi modi momana mopipo; na modi oko boa. 56Ino bakosei! Ocingeakani bimbete bibusa na bingondo, pɛ ko bocingea bimbete bimasu mama. 57Otasambejakani mijɔ a tei emilema minu mojɔ moye, a bojeba njea esoti? 58Isa moto adi na wɛ mojɔ, na okɛkɛ na nde a esambi, meka bosieja mojɔ monu oko a njea, asaka gbula wɛ a boso bojuji, na juji âpa wɛ a mɔmɔ makɔmisɛlɛ, na kɔmisɛlɛ âsa wɛ a blɔkɔ. 59Mbi natɔndɔkɔ wɛ bo, Omiti sieja nongo ewɛ esusu mɛnɛ, otamana nongo.
Currently Selected:
Luka 12: NTNG61
Highlight
Share
Copy
Want to have your highlights saved across all your devices? Sign up or sign in
Alliance Biblique de la R. D. Congo
