Luka 4

Bomeka boYesu

1Yesu aluma na Mwembo Mosɛnɔke na ahula Yoladene. Mwembo momolindea a lisobe, na Satana amomeka oho masu domi-inɛi. 2Aiyaka nongo eka a masu mamina, na aka nja a suka eehole emina. 3Satana abala na nde bo, Isa wɛ odi Mwana oNjambe, bala na litaidi bo libongoe molɛmbɛ.

4Yesu amosɔmbeja bo, Mosɔnɔmɔ bo,

Moto t’ahelake na molɛmbɛ pɛ.

5Satana akɛ na nde diko, amoneja makumu masusu mangondo a ehole emɔci. 6Abala na nde bo, Mbi nadi bopa wɛ kpaci emina esusu, na ekumu emakumu ma masusu; mojɔ bo madi oko ai mbi bo napɛ moto ojimaka mbi. 7Oko boa, okatita na magbunda a boso bombi, mojɔ mosusu môda oko ai wɛ.

8Yesu amosɔmbeja bo, Mosɔnɔmɔ bo,

Toma sakoa Kumu Njambe owɛ; toma kɔmɛ oko yo pɛ.

9Satana akɛ na nde a Yelusalema, amobakea diko dimonjongele motempelo, na abala na nde bo, Isa wɛ odi Mwana oNjambe, sadumba oho nase. 10Mojɔ bo, mosɔnɔmɔ bo,

Âpa babwɛnji bande mobeko bo babanee wɛ.

11Mosɔnɔmɔ koko bo,

Bâbanda wɛ na mɔmɔ mabu,

Bo ebota ewɛ esaka lakimea a litai.

12Yesu amosɔmbeja bo, Ebaeli edi bo,

T’odingee oko Kumu, Njambe owɛ.

13Yana amaja yo bomeka bosusu, Satana amokina bo ambe ekina ehole etongo.

Yesu a Nasaleta

14Yesu adoa koko a Galile na ngulu eMwembo, na esakoli ende enangana a makota ma masusu. 15Akojaka bato a sinagoge jibu, na bato basusu bamokumejaka.

16Amea a Nasaleta, oko a ngando ema yo kandoa, na akwea a sinagoge a busa boSabata, mojɔ bo ekɔmɛli ende edaka boa. Angɔ bo alange mokanda, 17na bamopa mokanda momotɔndɔi Yisaya. Adipoa yo mokanda, anɛ esika yena edi na mosɔnɔ bo,

18Mwembo moKumu modi ai mbi,

Gina bo ahɛngɛ mbi a botɔndɔ bato babokwali Mwako Mopele;

Alomini bo najebejae masungu mojɔ mobocingoa,

Bo natɔndɔe bato baya bagwa miso mojɔ mosengo emiso;

Alomini bo nabuke minyɔlɔ mibato baya bagboki,

19Na a botɔndɔ mojɔ moyanga emonganji moKumu.

20Adipa mokanda, amosɔmbeja ai mokoja, na akada. Ibo basusu baya badaka a sinagoge bamonja ngbe. 21Iyo abanga bobatɔndɔ bo, Mosɔnɔ moki no mongami busa bu. 22Ibo basusu bamosakoa, na bakamoa a mojɔ mobikenge bimonganji bibala yo. Babala bo, Iyo, te mwana ’Yosepa? 23Yesu abala na bu bo, Nadingaka bo odini bobala na mbi oko mondɛ mu, bo, Monganga, sesengoa wɛ mɛnɛ. Kɔ jɔno a likota liwɛ mɛnɛ, ngando jikaka so bo okɔi oho Kapalanauma. 24Abala na bu koko bo, Soti mɛnɛ, te basɔke nongo motɔndɔi a ngando ende mɛnɛ. 25Mbi natɔndɔkɔ no na soti bo, bali-babogwa badaka banɛnɛ a Yisalaele a masu maEha, yana adipama Diko bianga bisato na songe basamano, a ehole edaka linjale linɛnɛ a ngondo esusu. 26Elia ko ailomama ai okma obu. Alomama oko ai okina mwali-obogwa oSalepeta pɛ, a likota liSidona. 27Bato bamaba badaka koko banɛnɛ a Yisalaele a masu mamotɔndɔi Ehse. Pɛpɛ nongo omɔci obu ohela ko; yona ohela, oko Namana pɛ, moto oSilia. 28Yana aka ho bikenge bimina, bato basusu baya badaka a sinagoge bakɛnjɔ oko bokɛnjɔ. 29Bangɔ, bamobengana a ngando, na bakɛ na nde a diko dimono bo bamodumbe nase, mojɔ bo ngando ebu edaka a mono momina. 30Iyo ko anɔ a tei ebu, na ayana.

Yesu a Kapalanauma

31Yesu akɛ a ekina ngando eGalile, kombe Kapalanauma. Yana akojaka yo bato a busa boSabata, 32bakamoa a mojɔ mobokoja bonde, cina bo ebaeli ende edaka na kpaci. 33Okina momi adaka a sinagoge yona odaka na mwembo mobe, na yo abekoa bo, 34Wɛ, Yesu oNasaleta, mojɔ modukaka wɛ na su nda? Odoi jɔno a bowa so? Mbi najebaka wɛ. Odi Yona Mosɛnɔke oNjambe. 35Yesu alemoa na nde, na abala bo, Wɛ, da bogo; imana ai moto omina! Mwembo mobe modumba moto omina gbu a ndanda ebato, na momana ai yo pɛ bomobeneja nongo. 36Bato basusu babanga, bɔ mɛnɛ, na babalana bo, Gina eekenge emina edi bo? Iyo abekeaka miembo mibe na kpaci na ndangasa bo mimane, na mimanakadea. 37Na esako ende enangana a ngando jisusu jilikota limina.

38Amana Yesu a sinagoge, akɛ a ndako eSimona. Bokio boSimona adaka asambi na mɔlɔ, na ba’nga Yesu a mojɔ monde. 39Iyo ama a dɔngɔ dinde, alemoa na yogo, na esia oko bosia. Na mwali angɔ bokpa na abakɔmɛ.

40Basusu baya badaka na bato babego tungu na tungu, badoa na bu ai Yesu a ehole edipaka busa. Iyo abakea mɔmɔ mande ai bo, moto na moto, na abaheleja basusu. 41Miembo mibe pongono mimana ai bato banɛnɛ na migboma bo, Wɛ odi Mwana oNjambe. Iyoko alemoa na miembo; aijima bo mibale, cina bo mijebaka bo adi Masiya.

42Yana ahoa busa, amana na akɛ a ekina esika a lisobe. Bato banɛnɛ ko babanga bomoduka, na bamea oko ai yo. Bapala bo bamo-dipe njea bo atabakina. 43Iyo ko abala na bu bo, Ebɔngi bo natɔndɔe Mwako Mopele moBokumu boNjambe a ngando jitongo pongono. Mbi nalomami oko a mojɔ momina. 44Oko boa akɛ atɔndɔe Miako Mipele a sinagoge jiGalile.

Currently Selected:

Luka 4: NTNG61

Highlight

Copy