Luka 3

Blomu eYoane Mobatisi

1Ebaeli eNjambe edoa ai Yoane, mwana oSekalaya a esika, yana adaka Kaisala Tibelia kumu biango domi-na-bitano. Pontio Pilato adaka gouverneur oYuda a ehole emina; Elode adaka kumu oGalile; mwangwa’nde Pilipo adaka kumu oItulia na Tulakomte; 2Lusania adaka kumu oAhilene; Ana na Kayapa badaka basuku banganga. 3Yoane akɛ adale a bisika bisusu a dɔngɔ diYoladene, a botɔndɔ mwako mobatisimo cina ebobekoja bomilema, bo bato basɛ boyɛ bojibe. 4Mojɔ momina mosɔnɔmɔ boa a mokanda momotɔndɔi Yisaya bo,

Kɔpi emoto yona obekoaka a lisobe bo,

Sɛlingoani mokɛngɛ moKumu;

Tangbojani njea jinde.

5Mibukubɔngɔ misusu miluma;

Meno minɛnɛnɛ na mikɛkɛlɛkɛ mîda yeyi;

Makulu masusu mâtangboa;

Njea jia jidi na bibubɔndɔ jitambuma,

6Bato basusu bânɛ boheleja boNjambe.

7Bato bakɛ ai Yoane banɛnɛ mɛnɛ bo ababatise. Iyo ko abala na bu bo, Ino bana banjɔ! Olehi no nda bo ocieni likundu lia likɛkɛ adoe? 8Anejani bikɔmɛli a bongameja dosa linu. Yɛni bobala bo, Abalayama adi tata osu. Mbi natɔndɔkɔ no bo Njambe abwani botomba matai ma bo angɔjɔe bana ai Abalayama. 9Epondo esambi edɛye a cina jimele. Mole mobotiti mbuma jipele môkwɛlɛmɛ, na môdumbama a mosa. 10Bimumu bibato bamohɔjɔ bo, Êkɔ so ndeni? 11Iyo abasɔmbeja bo, Isa moto adi na simisi jibae abwani bopa emɔci ai moto yona odi ngasa. Yona odi na mia abwani bokɔ koko boa. 12Baputeja batako badoa ai yo pongono bo #3.12 dindeja bokeaababatise. Ibo bamohɔjɔ bo, Mokoja, êkɔ so ndeni? 13Iyo abasɔmbeja bo, T’onɔjɔeni oko bobuno botako yena ebwani. 14Basoda bamohɔjɔ koko bo, Iso ko bôkɔ boni? Iyo abasɔmbeja bo, T’odaeni oko na sanga ai bato bo bapute no likonja. T’odumbeni oko moto na bokosea. Jimani oko bo likonja lisɔkɔ no libwani.

15Bato badaka na njingo a mojɔ moYoane. Ibo basusu badaka na bolɛ a milema mibu isa yo adi Masiya. 16Yoane ko abasɔmbeja, abala na bu basusu bo, Mbi nabatisaka no oko a madiba. Okina otongo ko akɛkɛ adoe yona onɔi mbi na ngulu. Mbi nitabɔngɔ bo nacingoe licinga lisapata jinde. Iyo adi bobatisa no a Mwembo Mosɛnɔke na a mosa. 17Adi na ehɛihɛi a ebɔ ende a bosɛnoja moboku monde kanga bopɛɛ mɛnɛ. Abolea ndongo a edejai ende; âtumba ko poso oko a mosa mua mobwaniti bodimea.

18Yoane atɔndɔ bato Mwako Mopele boa, na abaleha na hileho binɛnɛ. 19Kumu Elode ko abakea mojɔ mu mobe a ngando jisusu jibe jima yo kɔ,—asa Yoane a blɔkɔ. 20Mojɔ bo Yoane alemoa na Elode a mojɔ moElodia, mwali omwananango, na ngando jisusu jibe jima yo kɔ.

Batisimo eYesu

21Yana abatisama bato basusu, Yesu abatisama pongono. Yana angaka yo, Diko didipoama oko bodipoama, 22na Mwembo Mosɛnɔke motita ai yo o ekɔmɛli esungu. Kɔpi emana koko oho Diko bo, Wɛ odi Mwana’mbi ongɛnjɔ. Nadi na sepi enɛnɛ a mojɔ mowɛ.

Batata baYesu

23Yana abanga Yesu elomu ende, adaka na bianga domi-isato na dea. Bato bamonjaka o mwana oYosepa, 24mwana oEli, mwana oMatata, mwana oLewi, mwana oMeleki, mwana oYanai, mwana oYosepa, 25mwana oMatatia, mwana oAmosa, mwana oNauma, mwana ’Eseli, mwana oNaga, 26mwana oMata, mwana oMatatia, mwana oSimi, mwana ’Yoseke, mwana ’Yoda, 27mwana ’Yoana, mwana oLesa, mwana oSelubabela, mwana oSalatiele, mwana oNeli, 28mwana oMɛliki, mwana ’Adi, mwana oKosama, mwana ’Elamadama, mwana ’Ele, mwana ’Yesu, 29mwana ’Eliasele, mwana ’Yolima, mwana oMatata, mwana oLewi, 30mwana oSimeona, mwana ’Yuda, mwana ’Yosepa, mwana ’Yonama, mwana ’Eliakima, 31mwana oMelea, mwana oMena, mwana oMatata, mwana oNatana, mwana oDawidi, 32mwana ’Yisai, mwana ’Obede, mwana oBoasa, mwana oSalamona, mwana oNasona, 33mwana ’Aminadaba, mwana ’Aluni, mwana ’Eselona, mwana oPalɛsɛ, mwana ’Yuda, 34mwana ’Yakobo, mwana ’Isaka, mwana ’Abalayama, mwana oTela, mwana oNakola, 35mwana oSeluga, mwana oLeu mwana oPalega, mwana ’Ɛbɛlɛ, mwana oSela, 36mwana oKainana, mwana ’Alapasada, mwana oSema, mwana oNoa, mwana oLameka, 37mwana oMatusala, mwana ’Enoka, mwana ’Yaleda, mwana oMalalele, mwana oKainana, 38mwana ’Enosa, mwana oSete, mwana ’Adama, mwana oNjambe.

Currently Selected:

Luka 3: NTNG61

Highlight

Copy