Luka 2
2
Bobotama boYesu
1Kaisala Auguseto abakea mobeko bo basɔne kombe jibato bamakota masusu a mikanda. 2Ibu boda bosɔnɔ boboso mɛnɛ, na Kuilinu adaka kumu oSilia a ehole emina. 3Bato basusu bakɛ, moto na moto a ngando ende mɛnɛ, bo basɔne kombe jibu. 4Yosepa pongono adonga a ngando kombe Nasaleta a likota liGalile, na akɛ Bɛtɛlɛmɛ, ngando eDawidi, a likota liYuda, 5bo basɔne kombe ende, na kombe eMalia, mwali oma yo panda, yona odaka na demi; mojɔ bo Yosepa adaka moto ombota na denga diDawidi. 6Ehole eMalia ebobota emea yana adaka bo oho. 7Abota mwana’nde oboso, mwana-momi. Amodinga na bisenja, na amosambea a yulu edia dibingbende, cina bo ndako epasaje eidaka na pokiso a mojɔ mobu.
8Bakina banjeli babata balikota limina badaka a esika a bobanea mela mabu mabata na bulu. 9Obwɛnji oKumu adoa ai bo; ekumu eKumu ehoja esika edaka bo, na baluluma na bɔ. 10Obwɛnji ko abala na bu bo, Yɛni bobanga! Mojɔ bo mbi nadoi na mwako mopele ai no, mua môda mojɔ mosepi enɛnɛ ai bato basusu. 11Moheleja abotami ai no busa bu a ngando eDawidi, Kumu Masiya. 12Ômombeteani na mojɔ mu; ônɛni mwana mokɛkɛlɛkɛ adingi na bisenja bimwana, na asambi a yulu edia dibingbɛndɛ. 13Babwɛnji baDiko bamana bombelele a ehole emina, mandundu mɛnɛ, na badaka bacingi na obwɛnji yona otongo; basakoa Njambe bo,
14Ekumu ai Njambe oho Diko;
Bowi a ngondo a tei ebato bapalaka Yo.
15Ama sɔmbɔ babwɛnji oho Diko, banjeli ba’mi bala oko bo, Yɛni so bokɛe a Bɛtɛlɛmɛ, bokanje mojɔ mobali Kumu na sn. 16Bakɛ mbango, na batana Malia na Yosepa, na mwana asambi a yulu. 17Yana amonɛ bo, batɔndɔ bwɛnji bosɔ bo a mojɔ momwana. 18Bato basusu baya baka mojɔ mobala banjeli, bakamoa oko bokamoa. 19Malia ko abomba ngando ji jisusu na ajilɛ a tei emolema monde. 20Banjeli badonga ena, bakakumejae na bakasakoe Njambe a mojɔ mongando jisusu jika bo na jinɛ bo, o ama bo ka boso.
BakÉ› na Yesu a Tenipelo
21A busa bobolena ganda, oko a busa bobomwambe, bamobakea kombe Yesu, kombe epa obwɛnji oko nango alwakini demi.
22Yana asia masu mabu maekia mabekeaka mobeko moMose, bakɛ na nde a Yelusalema bo bamopejae ai Kumu, 23(Mojɔ bo mosɔnɔmɔ a Mibeko miKumu bo, Bana basusu basɔmi bâhɛngɛmɛ ai Kumu,) 24na a bopeja bidoa babae isa bana basungu babae, epeeli ebekeama a Mibeko miKumu. 25Okina momi adaka a Yelusalema, kombe ende Simeona; yo adaka moto obodongo, moto olisuma ai Njambe. Ambaka bogɔmbeja boYisalaele na tɛndɛ, na Mwembo Mosɛnɔke modaka ai yo. 26Mwembo Mosɛnɔke moma mojebeja bo atagwa, oko adi yo pɛ bopeta nɛ Masiya oKumu. 27Mwembo momolindea bo akwee a tempelo, na yana akwea baboti na mwana Yesu 28bo bakɔe ai yo mua mobekeaka Mibeko, yo amosɔ a mɔmɔ mande, asakoa Njambe bo,
29Kumu, kina mobuli owɛ ayane na bowi edɛye o akina wɛ sako;
30MojÉ” bo miso mambi mani boheleja bowÉ›,
31Bua bosɛlingoi wɛ a mojɔ mobato basusu,
32Bohu a bohoja makota,
Na ekumu a mojÉ” moYisalaele bato bawÉ›.
33Sango na nango bakamoa a bikenge bibala yo a mojÉ” monde.
34Simeona abapamboa, na abala na Maha nange ’mwana bo, Mwana yoyo ahɛngɛmɛ a bodumba na a bongɔjɔ bato banɛnɛ baYisalaele; ahɛngɛmɛ bo adae embete; bato ko bâmolona, mojɔ bo âmeja bilɛli bibato banɛnɛ a bohu. 35Na molema mowɛ mɛnɛ môbena na abɛnɛ.
36Okina mwali adaka koko ena, kombe ende Ana. Iyo adaka motɔndɔi; adaka mwana oPanwɛlɛ, moto olikota liAsele, na adaka mobange. Boso mɛnɛ, ama yo kandoa, adaka na muma’nde bianga sambo. 37Adika yo mwali-obogwa, adaka na bianga domi-bomwambe na binɛi. Iyo aikina nongo tempelo; asakoaka Njambe na ma’nga na bikia na bulu na moi. 38Iyo adoa pongono a ehole emina; asakoa Njambe, na abala na bato basusu baya bambaka bosikoa bo-Yelusalema a mojɔ moYesu.
39Ama bo sieja ngando jisusu jibekeaka Mibeko miKumu, Yosepa na Malia ba’mi yana oko a Nasaleta, ngando ebu bɛnɛ, a likota liGalile. 40Mwana akandoa na apinga; adaka na bowɛi bonɛnɛ, na monganji moNjambe modaka na nde.
Yesu AkÉ› a Yelusalema
41Baboti bande bakɛkɛ a Yelusalema yanga na yanga a mojɔ moKola-eBonɔ. 42Oko boa, yana adaka Yesu na bianga domi-na-bibae, bakɛ koko a Kola, o akɔkɔ bo bihole bisusu. 43Adaka bo a njea elihule ngɔngɔ jiKola, yɛngɛ Yesu adika oko a Yelusalema, baboti bande ko pɛ bojeba. 44Badingaka bo acingi na bu engbanga, na badala busa bosusu boa. Bamoduka a tei ebina’bu na mela mabu 45pɛ ko bomotana; oko boa basɔmbɔ nduki ende a Yelusalema. 46Yana anɔ masu masato, bamoboloja a tei etempelo. Adaka na mobondo a ndanda ebakoja; abahokeaka na abahɔjɔkɔ mahɔjɔ. 47Bato basusu baya bamoka, bakamoa a mojɔ mobowɛi na masɔmbeja mande. 48Yana amotana bo, bakamoa bou mɛnɛ; na ngwa’nde abala na nde bo, Mwana’mbi, okɔi na su boa mojɔ moye? Iso na sangwao bodukaki wɛ na mokakwano monɛnɛ. 49Iyo abala na bu bo, Odukakini mbi mojɔ moye? Ojebitini bo mbi nabwani boda a ndako eSangwa’mbi? 50Ibo ko baicingea mojɔ mobala yo na bu. 51Iyo ayana na bu a Nasaleta, na adaka na lisuma ai bo. Ngwa’nde ko abanea ngando ji jisusu a molema monde.
52Yesu akandoa, na ahɛ na bowɛi na monganji a miso maNjambe na a miso mabato.
Currently Selected:
Luka 2: NTNG61
Highlight
Share
Copy
Want to have your highlights saved across all your devices? Sign up or sign in
Alliance Biblique de la R. D. Congo
