Luka 1
1
1Bato banɛnɛ batomba bosɔnɔ mikanda a mojɔ mongando jia jikwa a tei esu, 2o aka so na bato baya banɛ na miso, baya badaka a elomu eMwako Mopele oko a bobanga. 3Mbi nakokelejai ngando ji jisusu na bopele mɛnɛ, oko a bobanga. Oko boa, kumu Teopilo, mbi koko najimi bo nabwani bosɔnea wɛ mokanda a mojɔ mongando jimina. 4Oko boa odi bojeba bo ngando jika wɛ jidi ngando jisoti.
Sako eBobotama boYoane Mobatisi
5Okina nganga otempelo adaka a ehole eElode kumu oYuda, kombe ende Sekalaya. Adaka moto olibondo liAbia. Adaka na mwali olikota liAlona, kombe ende Elisabeta. 6Ibo basusu babae badaka bato babodongo a miso maNjambe. Basumaka mibeko na ngando jiNjambe jisusu na soti mɛnɛ. 7Baidaka ko na mwana, mojɔ bo Elisabeta adaka motete, na bo basusu babae bama kɔmɔ.
8Sekalaya adaka a elomu ende enganga bokina busa a boso boNjambe, mojɔ bo libondo linde linganga lidaka a elomu. 9Oko boa, yo ahɔmɔ bo akwee a tempelo a botumba kasa jilitindi, o akɔkɔ nganga basusu. 10Bato basusu, bato banɛnɛ mɛnɛ, badaka sokolu a bonga a ehole ebotumba. 11Obwɛnji oKumu asaboloja ai yo. Adaka ami a litumbu, a dɔngɔ diebɔ ebami. 12Sekalaya ayegebana, na abanga bou mɛnɛ yana amonɛ yo. 13Obwɛnji ko abala na nde bo, Sekalaya, yɛ bobanga! Mojɔ bo bonga bowɛ bo’kami. Mwali owɛ Elisabeta âbotea wɛ mwana-momi, na ômobakea kombe Yoane. 14Wɛ ôda na sepi na enanga, na bato banɛnɛ badi bosepa a mojɔ mobobotama bonde. 15Mojɔ bo, yo âda moto monɛnɛ a boso boKumu. Iyo atamwaka nongo vino, isa ekina emwakeli ebolangoa. Âluma na Mwembo Mosɛnɔke oko a bobotama bonde. 16Âhekoja bana banɛnɛ baYisalaele ai Kumu obu Njambe. 17Âdala a boso boNjambe na mwembo na ngulu eElia, a bohekoja milema mibasango ai bana, na hohekoja bato balipanga a howɛi bobato babodongo, bo asɛlingoe bato babɔngɔke a mojɔ moKumu. 18Sekalaya abala na obwɛnji bo, Êjeba mbi ko mojɔ mu na ye? Mbi nadi mosuku mɛnɛ, na mwali ombi akɔmɔbi pongono. 19Obwɛnji amosɔmbeja bo, Mbi nadi Gabaliele. Esika embi edi a boso boNjambe. Mbi nalomami a bobala na wɛ, bo natɔndɔe wɛ mwako mu mopele. 20Wɛ ko ôda emimi, na otabala nongo kɔpi, oko a busa bôkwa ngando jimina, cina bo ojimiti bikenge bibali mbi. Ehole ekamea ko, bikenge bimina bidi bongama. 21Bato bambaka Sekalaya, na badaka na bokamoa a mojɔ moehole eyai eyeyoaka yo a tei etempelo. 22Yana ko amana yo, aihɔnɔ bobala na hu. Abajebeja oko na bimbete, pɛ bobala nongo kɔpi, na basipoa bo anɛ mokina mojɔ a tei etempelo. 23Ama sia masu mande maelomu, ami yana oko a ngando ende.
24Ngɔngɔ jimina, mwali onde Elisabeta alwa demi, na adaka a ndako songe batano. 25Iyo abala bo, Kumu akɔi mbi monganji mu, yana anjaki yo mbi, bo adongejae sɔni embi a miso mabato.
Sako eBobotama boYesu
26Njambe aloma obwɛnji onde Gabaliele a Nasaleta, ngando eGalile, a songe obasamano, 27ai okina moseka yona oijebeana nongo na momi, kombe ende Malia. Okina momi amopanda, kombe ende Yosepa, moto ombota eDawidi. 28Obwɛnji akwea a esika edaka Malia. Amobɛjɛ njɛbɛ bo, Mbalea! wɛ yona osi monganji. Kumu adi na wɛ. 29Iyo agasima a mojɔ moekenge emina, na alɛ a molema monde a boduka cina enjɛbɛ emina. 30Obwɛnji ko abala na nde bo, Malia, yɛ bobanga! mojɔ bo Njambe akɔi wɛ monganji. 31Ika! wɛ ôlwa demi; ôbota mwana-momi, na ômobakea kombe Yesu. 32Iyo âda na ekumu enɛnɛ. Bâmobakea kombe Mwana oYona oBonɔ. Kumu Njambe âmopa mongbɛlɛngɔ mobokumu bo-Tata onde Dawidi. 33Iyo ada Kumu ombota eYakobo oko na bosusu mɛnɛ, na bokumu bonde botasia nongo. 34Malia abala na obwɛnji bo, Mojɔ momina môda boa na ye, adi mbi pɛ bojeba nongo momi? 35Obwɛnji amosɔmbeja bo, Mwembo Mosɛnɔke môdoa ai wɛ. Ndangasa eYona oBonɔ êhua wɛ, na yona ôbotama na wɛ âbeama mosɛnɔke, Mwana oNjambe. 36Anja pako ewɛ Elisabeta. Nongo akɔmɔbi yo, alwabi demi, oko mwana momi. Bamobea motete; edɛye ko songe bande basi basamano. 37Mojɔ bo Njambe abwani bokɔ ngando jisusu. 38Maha abala bo, Ika, mbi nadi mobuli oKumu; yɛ modae na mbi o ami wɛ bala. Obwɛnji amokina oko bokina boa.
Malia AkÉ› ai Blisabeta
39Malia angɔ a masu mamina, na akɛ pelepele a ekina ngando eYuda a tei emeno. 40Akwea a ndako eSekalaya, na abɛjɛ Ehsabeta njɛbɛ. 41Yana aka Elisabeta njɛbɛ eMaha, mwana akumana a tei esɔpɔ ende. Elisabeta aluma na Mwembo Mosɛnɔke 42na abekoa na bopipo bo, Bojongoa bowɛ bonɔi bua bobali basusu; bojongoa ai yona ôbotama na wɛ! 43Ekɔi mbi ndeni bo nange ’Kumu ombi adoe ai mbi? 44Ika! Aki mbi doi linjɛbɛ ewɛ, mwana akumani na sepi a sɔpɔ a ehole emina. 45Wɛ odi na bojongoa soti, wɛ yona ojima bo mijɔ mibala Kumu na wɛ midi bongama. 46Malia abala bo,
Molema mombi mokumejaka Kumu;
47Na mwembo mombi mosepaka na Njambe Moheleja omhi,
48MojÉ” bo anji bokwali bombi mobuli onde.
Ika; banga na busa bu, bato babilulu bisusu bâbala bo mbi nadi na bojongoa;
49Mojɔ bo Yona onɔi na ndangasa akɔi mbi ngando jinɛnɛnɛ,
Na kombe ende edi esɛnɔke.
50Monganji monde modi ai baya bamosumaka a bilulu bisusu.
51Iyo anejai ngulu eebÉ” ende,
Ananganejai baya badaka na egbo a milema.
52Adongejai bakumu a ngɛndɛ jibu,
Na akumejai bato bangasa. 53Agolejai bato banja na leka lopele,
Na ayaneja bato balikonja boangasa.
54Akɔmejai mokɔmɛli onde Yisalaele,
MojÉ” bo aibosa monganji monde,
55O akinea Yo batata basu sako,
Abalayama na bana bande oko na bosusu.
56Malia ayeyoa na nde songe basato, na ahula a ngando ende mɛnɛ.
Bobotama boYoane Mobatisi
57Ehole emea bo Elisabeta abote, na abota mwana-momi. 58Mituteano minde, na bato badenga dinde, baka bo Kumu amokɔ monganji monɛnɛ, na basepa na nde. 59Bakɛ a bolena mwana ganda a busa bobomwambe, na bapala bo bamobakee kombe esangwa ’nde Sekalaya. 60Ngwa ’nde ko ajɔ na bu bo, Te boa; kombe ende edi oko Yoane. 61Ibo babala na nde bo, Pɛpɛ nongo moto odenga diwɛ odi na kombe emina. 62Na bakɔ bimbete ai sangwa ’nde bo bajebe kombe epalaka yo a mojɔ momwana. 63Iyo abea litai libosɔnɔ, na asɔnɔ bo, Kombe ende edi Yoane; na bo basusu bakamoa. 64Yemi ende eloloa, na kɔpi ehula a monɔkɔ monde a ehole emina, na abanga bobala na bosakoa Njambe. 65Mituteano mibu misusu midaka na bɔ mɛnɛ, na mijɔ mimina minangana a ngondo esusu emeno miYuda. 66Bato basusu baya baka mijɔ mimina bamilɛ a milema mibu, na babala bo, Iyo mwana âda boni? Mojɔ bo ebɔ eKumu edaka na nde.
67Sangwa’nde Sekalaya aluma na Mwembo Mosɛnɔke, na abala o motɔndɔi bo,
68Bojongoa ai Kumu, Njambe oYisalaele,
MojÉ” bo adoi ai bato bande na abasikoi.
69Iyo abolojai Mohelejai monɛnɛ a mojɔ mosu A tei edenga dimokɔmɛli onde Dawidi,
70O ama yo bala ehele na minɔkɔ mibatɔndɔi bande basɛnɔke,
71A boheleja so a soki jisu
Na a mɔmɔ mabato baya balonaka so;
72Akɔi monganji modikeja yo ai basangwa’su,
Na alɛi mokongo monde mosɛnɔke,
73Na bɛli ebɛlɛ yo ai tata osu Abalayama
74Bo, bokahela a mɔmɔ masoki jisu,
75Bodi bomokɔmɛ masu ma’su masusu
76Wɛ mwana, ôbeama motɔndɔi oNjambe oBonɔ,
Mojɔ bo ôdala boso boKumu a bosɛlingoa njea jinde,
77Bo ojebejae bato bande mojÉ” moboheleja,
Oko na boyÉ› bojibe jibu,
78A mojɔ mowa enɛnɛ eNjambe osu
Yona ohojai so husa,
79Bo ahojae baya badi a modidi na a esie ebogwa,
Na a bodaleja mako masu a njea ebowi.
80Mwana akandoa, apinga a mwembo, na ayeyoa a esika oko a busa boboloa yo ai Yisalaele.
Currently Selected:
Luka 1: NTNG61
Highlight
Share
Copy
Want to have your highlights saved across all your devices? Sign up or sign in
Alliance Biblique de la R. D. Congo
