Malako 10
10
MoJÉ” moBolongana
1Yesu adonga a esika emina, akaa Yoladene na akɛ a ngando jiYuda a dɔngɔ dia. Bato banɛnɛ mɛnɛ batitana ai yo, na abakoja o akɔkɔ yo bihole bisusu. 2BaPalusi badoa ai yo, na bamohɔjɔ na ndingea isa momi abwani boyaneja mwali onde. 3Iyo abasɔmbeja bo, Mobeko modumbea Mose ai no modi bo? 4Ibo babala bo, Mose ajima bo moto akapa mwali onde mokanda mobobɔtɔnɔ, abwani bomoyaneja. 5Yesu abasɔmbeja bo, Mose asɔnea no mobeko momina cina ebopipo bomilema minu. 6A libangake ko, yana ayoa Njambe ngondo,
Abakɔ momi na mwali. 7A mojɔ momina, momi adi bokina sangwa ’nde na ngwa ’nde a bokatana na mwali onde, 8bo basusu babae badae oko munu momɔci.
Oko boa baditi koko babae, badi oko omɔci pɛ. 9Njambe akabakataneja, t’okine oko moto ababɔtejae.
10Adaka bo a ndako tei bacingami bande bamohɔjɔ koko a mojɔ momina. 11Iyo abala na bu bo, Moto akayaneja mwali onde na akasɔ otongo, angɛkɛ na nde bɔɔli. 12Na mwali akadonga ai muma ’nde bo akɛe ai momi otongo, mwali omina angɛkɛ bɔɔli.
Yesu Apamboa Bana Bakɛkɛlɛkɛ
13Bato badoa na bana bakɛkɛlɛkɛ ai yo bo ababakee mɔmɔ mande. Bacingami bande ko balemoa na bato baya batombaka bana. 14Yana anɛ Yesu mojɔ momina akɛnjɔ oko bokɛnjɔ, na abala na bu bo, Kinani bana bakɛkɛlɛkɛ badoe ai mbi; yɛni bobasia, mojɔ bo Bokumu boNjambe bodi oko ai bato baya badi o bana baba. 15Mbi natɔndɔkɔ no na soti bo moto amiti sɔ Bokumu boNjambe o eltɔmɛli emwana mokɛkɛlɛkɛ, atakwea nongo ena. 16Oko boa abatomba a mɔmɔ mande, ababakea mambu na abapamboa.
Konji Ahɔjɔ Yesu Lihɔjɔ
17Amana Yesu a bodala a njea, moto omɔci apota ai yo. Atita na magbunda a boso bonde na amohɔjɔ bo, Mokoja mopele, êkɔ mbi ndeni bo nasangoe bomɔ bua bodi na bosusu? 18Yesu abala na nde bo, Obeaka mbi mopele mojɔ moye? Pɛpɛ nongo omɔci odi mopele, oko Njambe pɛ. 19Ojebaka mibeko; T’ongɛe oko bɔɔli; t’owoe oko moto; t’obe oko; t’otate oko tati ebokosea; t’okosee oko mojɔ; toma da na lisuma ai sangwao na ngwao. 20Moto omina amosɔmbeja bo, Mokoja, mbi namisumaka misusu, donga oko a bwɛngɛ bombi. 21Yesu amonja na amopala. Abala na nde bo, Mojɔ motakaka na wɛ oko momɔci pɛ; kɛ angɛje leka lowɛ losusu. Pa likonja limina ai bato baya badi na bokwali, na ôda na likonja linɛnɛ liyumu oho Diko. Osa ko odoe a bocingama na mbi. 22Ama yo ka ekenge emina, ami yana oko na wa enɛnɛ, mojɔ bo adaka na makonja manɛnɛ.
23Yesu ahekoja miso a mɔngɔ masusu. Abala na bacingami bande bo, Baya badi na likonja linɛnɛ badi bokwea a Bokumu boNjambe oko na kpɔkɔsɔ. 24Bacingami bakamoa a mojɔ mobikenge bia binde. Iyo ko abala na bu koko bo, Bana, bato bakabakea milema mibu oko a likonja pɛ, badi bokwea a Bokumu boNjambe oko na kpɔkɔsɔ mɛnɛ. 25Kamela adi bonɔ a lipese litonga oko moto olikonja akweakini a Bokumu boNjambe. 26Ibo bakamoa bou mɛnɛ a mojɔ momina, na babalana bo, Ekada boa, odi bohela nda? 27Yesu abanja, na abala bo, Mojɔ mu modi bogbasoa na bato; motagbasoa ko na Njambe. Mojɔ bo Njambe abwani bokɔ ngando jisusu.
28Pɛtɛlo abanga bobala na nde bo, Hokea; iso bokina leka losusu a bocingama na wɛ. 29Yesu amosɔmbeja bo, Mbi natɔndɔkɔ no na soti bo, Moto na moto yona okina ndako, isa bananango, isa ngɛnɛ, isa sango, isa nango, isa mwali, isa bana, isa gbie, a mojɔ mombi, na a mojɔ moMwako Mopele, 30atadimboa bosɔ likabo lia linɔi; a ngondo yeye, oko ndako, na bananango, na ngɛnɛ, na banango, na bana, na gbie, ee na minɔngɔ pongono; na bomɔ bua bodi na bosusu a ngondo ebodoa. 31Banɛnɛ ko baya badi boso edɛye badabi oko ngɔngɔ, na banɛnɛ baya badi ngɔngɔ edɛye badabi oko boso.
MojÉ” moBogwa boYesu
32Adaka bo a njea a bokɛ a Yelusalema, Yesu adaka akadale a boso bobu. Bato baya badaka bacingi na nde ngɔngɔ badaka na mokakwano na bɔ. A mojɔ momina, yo ababea koko, oko Domi-na-babae, na abajebeja ngando jia jidi bokwa na nde. 33Abala bo, Hokeani; iso bokɛkɛ a Yelusalema, na Mwana ’Moto âkabama ai basuku banganga na ai basɔni. Ibo bâjima bo agwɛ, na bâmopa a mɔmɔ mabapakano 34baya bâmopɔmbeja, bâmotuea masɔi, bâmotua, na bâmowa. Iyo ko ângɔ koko a busa bomasato.
Bonga boYakobo na Yoane
35Yakobo na Yoane, bana baSebede, badoa ai Yesu. Babala na nde bo, Mokoja, iso boka’nga wɛ mokina mojɔ, bopaka bo okɔe mojɔ momina ai so. 36Iyo abahɔjɔ bo, Mojɔ mopalaka no bo nakɔe ai no modi bo? 37Ibo bamosɔmbeja bo, Jima bo so bodae, okina a ebɔ ewɛ ebami, na otongo a ebɔ ewɛ ebali a ekumu ewɛ. 38Yesu ko abala na bu bo, Otacingeakani mojɔ mongaka no. Ino obwanini bomwaka kɔpɔ emwakaka mbi? Obwanini bobatisama na batisimo embi? 39Ibo bamosɔmbeja bo, Bobwani. Yesu ko abala na bu bo, Ômwakani soti kɔpɔ emwakaka mbi, na ôbatisamani na batisimo embi. 40Endele ko, moditi mojɔ mombi a bopa edie a ebɔ embi ebami, isa a ebɔ embi ebali. Bihɛngɛmɛ oko ai bato baya bahɔmɔ a mojɔ momina. 41Yana aka bacingami batongo domi mojɔ mu, bakɛnjɔ na Yakobo na Yoane. 42Yesu ko ababea, abala na bu bo, Ino ojebakani bo bakumu bamakota basakumejaka a boso bobu, na basuku babu badi na kpaci ai bato. 43Ino ko oditini nongo boa. Yona opalaka adae mosuku onu, yɛ adae mokɔmɛli onu. 44Na isa okina onu apalaka boda boso bonu, yɛ adae mobuli obasusu. 45Mojɔ bo Mwana ’Moto yo mɛnɛ adoi, te bo bamokɔmɛe, oko bo akɔmɛe bato, na apɛ mohelo monde lisiko libato banɛnɛ.
Balatimai
46Bamea a Yeliko. Adonga yo a Yeliko na bacingami bande na bato batongo banɛnɛ, Balatimai, mwana ’Timai, moto omiso mago, adaka a dɔngɔ dinjea a bo’nga linga. 47Yana aka yo bo edi Yesu oNasaleta, abanga bobekoa bo, Yesu, Mwana ’Dawidi, ikeani wa! 48Bakina balemoa na nde bo adae bogo; yo ko ahɛjɛ hingi, na ahekoa na bopipo bo, Wɛ Mwana ’Dawidi, ikeani wa! 49Yesu ama oko bo’ma, na abala bo, Mobeani adoe. Babea moto omiso mago, bajɔ na nde bo, Titeja molema, angɔ, abeaka wɛ. 50Iyo adumba kasaka ende eyai, angɔ bokpa, na adoa ai Yesu. 51Yesu abala na nde lɔo, Opalaka bo nakɔe ndeni a mojɔ mowɛ? Moto omiso mago amosɔmbeja bo, Moswa’mbi, yɛ nasɛ njɛnɛ embi. 52Yesu abala na nde bo, Yana; ejimeli ewɛ ehelejai wɛ. Oko boa asɔ njɛnɛ ende lɔokpa, na acingama na Yesu a njea.
Currently Selected:
Malako 10: NTNG61
Highlight
Share
Copy
Want to have your highlights saved across all your devices? Sign up or sign in
Alliance Biblique de la R. D. Congo
