Malako 13
13
Bileho Bisuka
1Yana amanaka Yesu a tempelo, mocingami onde omɔci abala na nde bo, Mokoja, anja matai ma, na eyoeli endako ye enɛnɛnɛ! 2Yesu amosɔmbeja bo, Onɛkɛ eyoeli endako ye enɛnɛnɛ? Pɛpɛ nongo litai limɔci ya lidi bodika a diko dilitai litongo. Mâdumbama kanga masusu mɛnɛ.
3Adaka yo a Mono-moOlive mua moyɛyɛkɛ tempelo, Pɛtɛlo, na Yakobo, na Yoane, na Andalea, bamohɔjɔ yana adaka yo buki bo, 4Mojɔ momina modi bokwa a ehole eni? Embete ôda bo, a bojebeja so bo ngando ji jisusu jidi hulelu? 5Yesu abanga bobatɔndɔ bo, Toma nganjamani bo moto atalaboja no. 6Mojɔ bo bato banɛnɛ badi bodoa a kombe embi; bâbala bo, Mbi nadi Masiya; na bâlaboja bato banɛnɛ. 7Ino oka’kani bato bakabale a mojɔ mobila na bijoki bibila, t’odaeni oko na mokakwano; mojɔ lɔo ngando ji jisusu jibwani bodoa; suka ko te yena. 8Likota lî’na na likota. Bokumu bô’na na bokumu. Majonga mangondo mâda a bisika na bisika, na manjale pongono. Ngando jimina ko jîda oko bobanga bojɔɔlɔ.
9Toma nganjamani a mojɔ monu bɛnɛ. Badi bopeja no a mɔmɔ mabajuji. Badi botua no a sinagoge. Odini bo’ma a boso bobasuku babato, na a boso bobakumu a mojɔ mombi, bo otateni tati ai bo. 10Endele ko, Mwako Mopele môpeta tɔndɔmɔ a makota masusu. 11Bakapea no, na bakakɛ na nu a bisambi, t’odaeni oko na mokakwano a mojɔ mobikenge bibobala. Balani oko bikenge bia bipama ai no a ehole emina. Mojɔ bo Mwembo Mosɛnɔke modi bobala, te no bɛnɛ. 12Moto adi bokaba mwangwa’nde bo agwɛ. Sange’moto adi bokaba mwana’nde. Bana bâlona baboti babu, na bâbaweja. 13Bato basusu bâlona no a mojɔ mokombe embi. Moto ko yona ôda mombi-limake oko a suka mɛnɛ, yo âhela.
14Okanɛni eka yena emaneene na bosambolu epikami a esika yena ebɔngiti na eka emina, (kina yona olangaka acingee) baya bâda a Yuda a ehole emina badi bocia oko a meno. 15Moto akada a diko dindako, abwaniti botita a bokwea a ndako bo atombe leka. 16Moto yona odi a gbie abwaniti bohula a botomba kasaka ende. 17Bali ko baya badi na memi, na baya banungeaka, bôda na monɔngɔ a masu mamina. 18Ingakani bo ngando jimina jitada a ehole epio. 19Mojɔ bo, molɔbɔ momasu mamina maipaka da, nongo a bobanga bongondo eyoa Njambe, oko a busa bu; na motaya da boa. 20Eipeta da bo Njambe akueja masu mamina, ka pɛpɛ nongo moto odi bohela. Iyo ko amakueja a mojɔ mobahɛngɛmɛkɛ bahɔi yo. 21Moto akabala na nu a ehole emina bo, Anja! Masiya adi jɔno! isa, Anja! Adi bobo! Yojimeni oko. 22Mojɔ bo, BaMasiya babokosea na batɔndɔi babokosea badi bodoa. Bâkɔ bimbete na mindumba. Akɔki bo hɔnɔ, ka balabojae bahɛngɛmɛkɛ mɛnɛ. 23Toma dingani. Mbi nâjebejai no ngando ji jisusu, oko jipetakini doa.
24Molɔbɔ momina mokasia a masu mamina, modika busa môhinda oko bohinda. Songe âtaneja koko monjolo. 25Njɔtɔ badiko bâkwa nase, na ngulu jidiko jidongosana. 26A ehole emina, bânɛ Mwana ’Moto akadoe a tei ebiyembi, na kpaci na ekumu enɛnɛ. 27A ehole emina, yo âloma babwɛnji bande a bobolea bahɔmɔke bande bamɔngɔ masusu manɛi, oko a suka engondo, na a suka ebusa.
28Ikoani mojɔ na mondɛ #13.28 figuiermomole. Bitape bikambɛ, na bisanga biyene bikatɔ, ojebakani bo yanga esi. 29Oko boa koko, omaka nɛni ngando ji jisusu, osa ko ojebeni bo yo adi hulelu mɛnɛ, oko a monɔkɔ mondako. 30Mhi natɔndɔkɔ no na soti bo mijɔ mi misusu midi bongama oko elulu ye esiakini. 31Nongo Diko na nase jikadimoa, bibaeli bimbi bitakputoa. 32A mojɔ mobusa bomina ko, na ehole emina, pɛpɛ nongo moto ojebalta, te nongo babwɛnji-baDiko, isa Mwana; ojebaka oko Sango pɛ. 33Toma nganjamani; toma sɛnjɛlɛni, na ingakani; mojɔ bo otajebakani yana âdoa ehole emina. 34Mojɔ momina modi o moto yona okɛkɛ mokina mɔngɔ. Akinaka ndako ende a mɔmɔ mabakɔmɛli bande, moto na moto na elomu ende, na akinaka monɔkɔ na sinjili bo abanee ngando bopele. 35Sɛnjɛlɛni boa, mojɔ bo otajebakani ehole ehulaka moswa ’ndako, isa a ehole emɔkɔ, isa na bulu tei, isa a mojukakeli, isa ehole eehuma. 36Sɛnjɛlɛni, asaka hula bundumo na âtana no ohwɛlini. 37Mbi nabalaka na bato basusu oko ekenge ebali mbi na nu bo, Sɛnjɛlɛni.
Currently Selected:
Malako 13: NTNG61
Highlight
Share
Copy
Want to have your highlights saved across all your devices? Sign up or sign in
Alliance Biblique de la R. D. Congo
