Malako 12
12
MondÉ› moBasali Babe
1Yesu abanga bobatɔndɔ koko mindɛ bo, Okina moto ana gbie #12.1 evine mole mombuma jivino.evine. Aehika na mongba. Alonga mombɔndɔ a mojɔ moeboka. Apika ndako. Akina gbie a mɔmɔ mabasali, na akɛ mɔngɔ mobohali. 2Yana akpeta mbuma, yo aloma mokɔmɛli ai basali bo asɛ libondo limbuma jigbie. 3Ibo ko bapea mokɔmɛli, bamotua, na bamoyaneja boa ngasa. 4Abalomea koko okina mokɔmɛli otongo. Babeneja mokɔmɛli omina a molo, na bamosamboja. 5Aloma koko okina otongo, na bamowa oko bowa. Aloma koko batongo banɛnɛ. Batua bakina babu, na bawa batongo. 6Iyo adika na omɔci pɛ, oko mwana’nde mɛnɛ ongɛnjɔ. Suka mɛnɛ, abamolomea yo. Abala bo, Badi bosuma mwana’mbi. 7Basali ko babalana bo, Sangoli yona! Kɔni bomowoe, nongo bosangoe so bɛnɛ. 8Bamopea, bamowa, na bamodumba a sokolu egbie. 9Iyo moswa ogbie âkɔ bo? Adi bodoa, âwa basali bamina, na âpa gbie ai batongo. 10Ino olangakinini mojɔ mu a Misɔnɔ?
Litai lidumbi bayoi
Lidi edɛye litai limogbukusu.
11Njambe akɔi mojɔ mu,
Na modi mojÉ” mobokamoa a miso masu.
12Bakenga bomopea; badaka ko na bÉ” a mojÉ” mobato. Basipoa bo Yesu abala mondÉ› momina oko na bu. Oko boa bamokina na bayana.
Lihɔjɔ liBaPalusi
13Bamolomea bakina BaPalusi na baElode, bo bamogegeanejae na bibaeli binde. 14Ibo badoa, na babala na nde bo, Mokoja, iso bojebaka bo wɛ odi moto osoti. Otabangaka nongo moto, mojɔ bo ekumu ebato edi eka engasa a miso tnawɛ, na okojaka njea eNjambe na soti mɛnɛ. Ebɔngi bo bopute Kaisala tako isa ebɔngiti? 15Bobwani bopa isa botapa? Yesu ko anɛ poloso ebu, na abasɔmbeja bo, Odingeakani mbi mojɔ moye? Panini ekina flanka bo naenje. 16Badoa na Banka, na yo abahɔjɔ bo, Elimo ye na mosɔnɔ mu monda? Ibo basɔmbeja bo, Oko moKaisala. 17Na Yesu abala na bu bo, Kabani ai Kaisala libondo liKaisala, na libondo liNjambe oko ai Njambe. Oko boa abakamoja bou mɛnɛ.
Lihɔjɔ liBaSadoki
18Bakina Basadoki badoa ai yo pongono. Ibo bajimaka bo bongɔ a bogwa boditi. 19Bamobɔjɔ bo, Mokoja, Mose asɔnea so mobeko bo momi akagwa, na akakina mwali ngasa, pɛpɛ bana, mwananango adi bosɔ mwali bo abote na nde bana ai mwangwa’nde. 20Oko boa bananange jibato badaka sambo. Yona mosuku asɔ mwali, na agwa pɛ bobota nongo mwana. 21Yona mbakeli onde asɔ mwali onde, na yo agwa pongono, pɛ ko bobota nongo mwana; yona obasato koko boa. 22Ibo basusu sambo bamosɔ boa, na bagwa, pɛ ko bokina mwana. Suka mɛnɛ, mwali agwa pongono. 23Oko boa, bagwake baka’ngɔ, yo adi boda mwali onda? Mojɔ bo adaka mwali obu basusu sambo. 24Yesu abasɔmbeja bo, Ino otacingeakani Misɔnɔ na ngulu eNjambe. A mojɔ momina, odini na libunga. 25Mojɔ bo, bato bakangɔ a bogwa, batasɔ nongo bali, na batahanga bali ta meki; badi boda o babwɛnji baDiko. 26A mojɔ mobo’ngɔ bobagwake, olangakinini mojɔ molipumba a mokanda moMose? Njambe abala na nde bo,
Mbi nadi Njambe oAbalayama, Njambe oIsaka, Njambe oYakobo 27Iyo aditi Njambe obagwake; adi oko Njambe obaya badi mɔ. Ino odini na libunga linɛnɛ.
Lihɔjɔ liBasɔni
28Okina obasɔni ahokea mijɔ mibalanaka bo. Yana anɛ yo bo Yesu alonga na masɔmbeja mande, abatama na nde, na amohɔjɔ bo, Mobeko mua monɔi mibeko misusu mitongo modi bo? 29Yesu amosɔmbeja bo, Mobeko moboso modi oko mu;
Hokea Yisalaele! Kumu, Njambe osu, Kumu adi oko yo omɔci pɛ.
30na
Toma pala Kumu Njambe owÉ› na molema mowÉ› mosusu, na mwembo mowÉ› mosusu, na bolÉ› bowÉ› bosusu, na ngulu ewÉ› esusu.
31Mobeko momibae modi oko mu;
Toma pala motuteano mowɛ o asapalaka wɛ mɛnɛ.
Mobeko mua monɔi mibeko mimina moditi. 32Mosɔni abala na nde bo, Bopele mɛnɛ Mokoja. Olongi soti yana abali wɛ bo, Iyo adi oko omɔci, na pɛpɛ okina otongo odi, oko Iyo pɛ. 33Epaeli emolema mosusu, na bolɛ bosusu, na ngulu esusu, enɔi bipeeli na masiko masusu. 34Yana anɛ Yesu bo asɔmbeja na bowɛi, abala na nde bo, Wɛ oditi na Bokumu boNjambe bohali. Pɛpɛ nongo moto otongo ko okenga bomohɔjɔ mahɔjɔ a mojɔ mobɔ.
Lihɔjɔ liYesu
35Adaka Yesu akakojae a tempelo, abala bo, Basɔni babalaka bo Masiya adi Mwana oDawidi mojɔ moye? 36Mwembo Mosɛnɔke mobaleja Dawidi yo mɛnɛ, yana abala yo bo,
Kumu abali na Kumu ombi bo,
Da a ebÉ” embi ebami,
Oko a ehole ĂŞdumba mbi soki jiwÉ›
A cina jibibota biwÉ›.
37Isa Dawidi yo Inɛnɛ amobeaka Kumu, adi boda mwana’nde na ye?
38Bato baemumu enɛnɛ bamohokea na sepi. Yana akojaka yo, Yesu abala bo, Toma dingani a mojɔ mobasɔni. Ibo bapalaka bolwa bisenja biyai-biyai a bongɛ bisika na bisika. Bapalaka bo bato bababɛjɛe njɛbɛ a jando; 39Bapalaka bidie biboso a sinagoge, na bisika bia binɔi na bopele a malɔonje. 40Bayakaka ndako jibali-babogwa, na bakoseaka mojɔ oko na bingeeli biyai-biyai. Ibo bâsamba na bopipo mɛnɛ.
Epeeli eMwali-Obogwa
41Yesu adaka a edie a dɔngɔ diesei ebipeeli, na anjaka bato baya basaka likonja a esei ebipeeli. Bakina bato balikonja basa bipeeli binɛnɛnɛ. 42Okina mwali-obogwa ko adoa, moto obokwali. Iyo asa bikenge bilikonja bibojio bibae bia bibwani na likota limɔci pɛ. 43Yesu abea bacingami bande, abala na bu bo, Mbi natɔndɔkɔ no na soti bo epeeli epi mwali-obogwa yona obokwali, enɔi bipeeli bibu basusu baya basi bipeeli a esei. 44Mojɔ bo, ibo basi oko libondo likɛkɛlɛkɛ pɛ lilikonja libu linɛnɛ. Iyo ko, nongo adi yo na taka, asi likonja linde kanga lisusu mɛnɛ, oko likonja lisusu lia lidaka na nde a mojɔ moboyaka.
Currently Selected:
Malako 12: NTNG61
Highlight
Share
Copy
Want to have your highlights saved across all your devices? Sign up or sign in
Alliance Biblique de la R. D. Congo
