Malako 15

Yesu a Boso boPilato

1Yana ahoa busa, basuku banganga babolea likita libasuku, na basɔni, na bajuji basusu, bo bakokelejae mojɔ. Bakanda Yesu mbɔci, bakɛ na nde, na bamomeja a boso boPilato. 2Pilato amohɔjɔ bo, Wɛ odi kumu oBaYuda? Yesu amosɔmbeja bo, O abali wɛ. 3Basuku banganga bameja mijɔ minde mitongo, na Pilato amohɔjɔ koko bo, 4Otasɔmbeja nongo ekenge? Oki mijɔ mi minɛnɛ mimejai bo a mojɔ mowɛ. 5Yesu ko aimosɔmbeja nongo ekenge, na Pilato akamoa a mojɔ momina.

6Pilato adaka na ekɔmɛli ebocingoa moto oblɔkɔ omɔci a ehole ekola emina, oko moto ojimaka bato. 7Okina moto adaka a blɔkɔ, kombe ende Balaba. Iyo adaka acingi na bakina batongo baya bawa bato a ehole edane. 8Oko boa, bato balikita babatama, na babanga bo’nga Pilato bo akɔe o amaka yo kɔ ai bo bihole bisusu. 9Pilato abasɔmbeja bo, Opalakani bo nacingoe kumu oBaYuda ai no? 10Gina bo Pilato asipoa bo basuku banganga bapea Yesu oko a mojɔ molikaka. 11Basuku banganga ko balɛjɛ bato balikita na bopipo bo ba’nge Pilato a bocingoa oko Balaba. 12Pilato abahɔjɔ koko bo, Mbi nakɔ bo na moto obeaka no kumu oBaYuda? 13Ibo babekoa bo, Mobakea a mole-mobokea! 14Pilato abahɔjɔ koko bo, Gina eye? Bobe bokɔi yo nda? Ibo ko babekoa na bopipo bo, Mobakea a mole-mobokea! 15Pilato apala bo agɔmbejae tnilema mibato balikita. Oko boa, acingoa Balaba ai bo. Atueja Yesu ko, na amopa a mɔmɔ mabu bo bamobakee a mole-mobokea.

Bogwa boYesu

16Basoda bagbula Yesu a tei elopango londako egouverneur, na babea basoda batongo bapɔlɔtɔ. 17Bamolwaja bisenja bikpetu; badinga likongo linjubɛ, na balibakea a molo monde. 18Babanga bomobɛjɛ bo, Mbalea! Kumu oBaYuda! 19Bamoboma a molo na mongendu, bamotuea masoi, na batita na magbunda bo bamo-sakoe. 20Asieja bo bomota mota boa bamohwa bisenja bikpetu, bamolwaja bisenja binde mɛnɛ, na bakɛ na nde bo bamobakee a mole-mobokea.

21Simona oKulene, sange eAlesandele na Lupu, adaka a njea elihule a esika, na akanɔe a ehole emina. Oko boa, bamopea bo asonge mole-mobokea moYesu. 22Bakɛ na Yesu a ekina esika yena edi na kombe Gɔlɔgɔta. (Gina ekombe emina edi Esika eEbebele.) 23Bamopa vino yena eputoana na mila a mojɔ mobomwaka. Iyo ko aipala bomwaka. 24Bamobakea a mole-mobokea. Baboma jonga a mojɔ mobisenja binde, a bojeba libondo limoto na moto, na bakaba bisenja binde a tei ebu. 25Babakea Yesu a mole-mobokea a ehole eneuf heures ehuma. 26Bosɔnɔ bodaka bobaki a bojebeja mojɔ mobodumba bonde bo, KUMU OBAYUDA. 27Bakaaleja na nde mibengo mibae pongono, okina a dɔngɔ diebɔ ebami, otongo a dɔngɔ diebɔ ebali. 28Oko boa Mosɔnɔ mongama bo,

Bamo’sa ta libondo libato babe.

29Bato baya badaka bakanɔe bamokotoa na bosɛtɔ. Babala bo, Wɛ yona obwani bobuka tempelo na boengɔjɔ koko na masu masato, 30saheleja wɛ mɛnɛ; tita a mole-mobokea. 31Basuku banganga na basɔni bamosɛkɛ, na babalana bo, Aheleja batongo; t’ahɔnɔke ko bo asahelejae yo mɛnɛ. 32Kina Masiya kumu oYisalaele atite a mole-mobokea edɛye bo bonɛe na bojime. Baya badaka a mele-mibokea tnitongo bamololea pongono.

33Modidi modoa a ngondo esusu a ehole emidi, na moyeyoa oko a trois heures. 34A ehole etrois heures, Yesu abekoa bo, Eloi, Eloi, lama sabakatani? (Gina emina edi, Njambe ombi, Njambe ombi, obulɛi mbi mojɔ moye?) 35Aka bo ekenge emina, bakina bato baya badaka hulelu babala bo, Hokeani; abeaka Eha! 36Oko boa, okina obu apota, agbɔmeja limbusu na vino egbɔ, alihangea a mongendu, amonusa, na abala bo, Kinani nakɔe. Bodi bonja isa Eha adi bodoa a bomotiteja. 37Yesu ko abekoa na bopipo, na molema monde motwea. 38A ehole emina, ehuako enɛnɛ etempelo elea a tei, diko oko a nase. 39Kapitɛni yona odaka ayɛli Yesu, yana anɛ yo bo agwa boa, abala bo, Moto yo adaka Mwana ’Njambe soti mɛnɛ. 40Bakina bali pongono badaka bohali mweka a bonja; Malia oMagadala, Maha nange eYakobo (yona ongɔngɔ), Yose, na Salome, badaka a tei ebu. 41Bali bamina bama cingama na nde yana adaka yo a Galile, na bamokɔmɛ. Bali batongo banɛnɛ baya badoa na nde a Yelusalema badaka koko a esika emina.

Bapitsea Yesu

42Yana adipa busa, (busa bomina bodaka busa boMosɛlingo a mojɔ moSabata) Yosepa, moto oAlimate adoa. 43Iyo adaka moto olikita libasuku, moto oesako epele mɛnɛ yona ombaka Bokumu boNjambe na tɛndɛ. Iyo akɛ ai Pilato, pɛpɛ nongo bobanga, na amonga mokuku moYesu. 44Pilato akamoa bo agwa bokpa boa, na abea kapitɛni bo amohɔjɔe isa agwa soti. 45Yana amojebeja kapitɛni bo Yesu adaka mogo, ajima bo Yosepa atombe mokuku monde. 46Yesu amobakoa a mole mobokea, na amodinga na esenja enɛnɛ epu ema yo somba. Amo’sa ta engbungulu ema bo tɔ a litai limono, na ahilingoja litai linɛnɛ a bodipa monɔkɔ moesɛtnɔ.

Currently Selected:

Malako 15: NTNG61

Highlight

Copy