Bisalu Ya Bantumwa 2
2
Mpeve Yanlongo kwiza va bantumwa
1Bu kilumbu ya Pentekoti imene kulunga, bau yonso kutakanaka mu sikamosi.
2Nswalu ndinga katukaka na zulu bonso mupepe ya ngolo ya ntinu. Yo fulusaka nzo yamvimba ya bau vandaka.
3Tudimi mpilamosi ya tiya monikaka kwa bau, ye kabanaka ye vandaka va bau yonso mosi mosi. Mat. 3:11; Mal. 1:7; Luk. 3:16; Bis. 1:5
4Bau yonso fuluswaka na Mpeve Yanlongo, bau yantikaka kutuba mu tudimi yankaka, bonso Mpeve pesaka bau ndinga kutuba.
5Mu Yelusalemi vandaka baYuda ya ikele bantu ya lemvuka Nzambi, ya katuka na makanda yonso nansi ya zulu.
6Bu bau kuwaka ndinga yai, kibuka kutakanaka, bau yitukaka sambu na muntu na muntu kuwaka bau tuba mu ndinga ya yandi kibeni.
7Bau banzaka ngolo ye yitukaka ye tubaka: Tala, bantu yai yonso ya ikele kutuba ikele bantu ya Ngalili ve ?
8Buna mpila nki beto muntu na muntu ikele kuwa mu ndinga ya beto butwaka ?
9Bisi Patia ye Media ye Elami ye bantu ya vanda mu Mesopotamia ye mu Yuda ye mu Kapadokia ye mu Ponto ye mu Asia.
10Mu Filingia ye mu Pamfilia ye mu Ngipiti ye mu ndambu ya Libia mfinama Kilene, ye banzenza ya katuka na Loma ye baYuda ye bantu ya kitukwa baYuda.
11Bantu ya Kelete ye ya Alabia, beto kuwa bau tuba mu tudimi ya beto kibeni bisalu ya nene ya Nzambi.
12Bau yonso banzaka ngolo ye yitukaka ye tubanaka: Mambu yai ikele nki ?
13Bankaka sekaka ye tubaka: Bayai ikele kufuluka na vinia yampa.
Petelo tubaka kwa bantu
14Petelo telemaka sikamosi na bau kumi ye mosi, ye bokaka mu ndinga ya ngolo ye tubaka kwa bau: Beno babakala ya Yuda ye beno yonso ya vanda mu Yelusalemi, bika beno zaba mambu yai ye kuwa mambu ya mono tuba.
15Bayai ikele kulauka ve bonso beno banza, kadi yo ikele lokula uvwa mu suka.
16Kansi yai ikele mambu ya tubwaka mu mbikudi Yoeli:
17Nzambi tubaka: Yo tavanda mpilayai mu bilumbu ya nsuka. Mono tatiamuna Mpeve ya mono va nsuni yonso, bana ya beno ya babakala ye bankento tabikula, batoko ya beno tamona mona-meso ye bambuta ya beno talota ndozi. Zak. 12:10
18Va basielo ya mono ya babakala ye ya bankento mono tatula Mpeve ya mono mu bilumbu yina, ye bau tabikula.
19Mono tasonga nyitukulu mu zulu, ye bidimbu va nsi va ntoto, menga ye tiya ye matuti ya midinga.
20Ntangu takituka mpimpa ye ngonda takituka menga, buna kilumbu ya Mfumu takwiza, kilumbu yina ya nene ye ya nkembo.
21Yo tavanda, konsonani ya binga mu nkumbu ya Mfumu tavuluswa.
22Beno babakala ya Isaeli, kuwa mambu yai: Yesu ya Nazaleti, muntu ya Nzambi songaka kitemo kwa beno mu bisalu ya ngolo ye nyitukulu ye bidimbu, ya Nzambi salaka mu yandi nakati na beno bonso beno kibeni zaba. Bis. 10:38
23Yandi yekulwaka sambu na lukanu ya Nzambi ya lenda kupindula ve, ye ya yandi zabaka ntete, ye beno komaka yandi va kulunsi ye kufwaka yandi na maboko ya bantu ya konda nsiku.
24Bu Nzambi imene kukatula nsongo ya lufwa, yandi fulukisaka yandi, sambu na lufwa lenda ve kanga yandi. Bis. 3:15; 4:10; 5:30; 10:39; 13:30
25Kadi Davidi tubaka sambu na yandi: Mono monaka Mfumu ntangu yonso nantwala na meso ya mono, yandi ikele va diboko kibakala ya mono, ye mono tanikuka ve. Nk. 16:8
26Sambu na yai, ntima ya mono vandaka na kiese, ye ludimi ya mono yangalalaka, nsuni ya mono mpe tavanda mu vuvu.
27Kadi nge tabika mwela ya mono na nsi ya bafwa ve, ye nge tabika Nkwa Nlongo ya nge mona kubola ve. Bis. 13:35
28Nge imene kuzaisa mono nzila ya moyo, nge tafulusa mono na kiese na luse ya nge.
29Bampangi, mono lenda kutuba kwa beno na kutita ve, Davidi tata ya kikanda, kufwaka, ye zikwaka, ye ndiamu ya yandi ikele na beto kilumbu yai.
30Yandi vandaka mbikudi, ye yandi zabaka na Nzambi kudiaka ndefi, na mosi ya katuka na luketo ya yandi tavanda va kiti ya yandi. 2 Sam. 7:12; Nk. 89:3; 132:11
31Kadi yandi talaka mambu yai ntete, yandi tubaka sambu na mfulukulu ya Klisto, na yandi bikaka na nsi ya bafwa ve, ye nsuni ya yandi monaka kubola ve. Bis. 2:27
32Nzambi imene kufulukisa Yesu yai, ye beto yonso ikele bantemo ya yo.
33Buna sambu na yandi ikele kukembiswa na diboko ya kibakala ya Nzambi, ye yandi imene kubaka nsilulu ya Mpeve Yanlongo tuka Tata, yandi imene kufidisa yai ya beno ikele kutala ye kuwa.
34Kadi Davidi tombokaka ve ku zulu kansi yandi kibeni tubaka: Mfumu tubaka kwa Mfumu ya mono: Vanda na diboko kibakala ya mono. Nk. 110:1; Mat. 22:44; Mal. 12:36; Luk. 20:42; Ef. 1:20; Eb. 1:3, 13
35Ti mono tula bambeni ya nge kuvanda mfiduku ya makulu ya nge. 1 Kol. 15:25
36Sambu na yai, bika nzo yamvimba ya Isaeli zaba kieleka na Yesu ya bau komaka va kulunsi, Nzambi imene kusalaka yandi Mfumu ye Klisto. Fili. 2:9; Eb. 2:9
Bantu malunda tatu pindula ye kwikila
37Kansi bu bau kuwaka yai, ntima ya bau bulaka bau, bau tubaka kwa Petelo ye kwa bantumwa yankaka: Bampangi, beto tasala nki ? Eb. 4:12; Luk. 3:10, 12, 14
38Petelo tubaka kwa bau: Beno pindula mabanza ye botikwa muntu na muntu mu nkumbu ya Yesu Klisto, kwa mvidisilu ya masumu ya beno, ye beno tabaka matabisi ya Mpeve Yanlongo. Luk. 24:47
39Kadi nsilulu ikele kwa beno, ye kwa bana ya beno, ye kwa bau yonso ya ikele ntama, bau yonso ya Mfumu Nzambi ya beto tabinga kwa yandi. 1 Mose 17:7; Yes. 57:19; Yoeli 2:32; Ef. 2:13, 17
40Yandi songaka kitemo ye bombidilaka bau mu mambu mingi yankaka, ye tubaka: Divulusa tuka mbandu yai ya mbi. Fili. 2:15
41Buna bau ya bakaka mambu ya yandi botikwaka, bau ya kotaka sikamosi na bau kilumbu yina vandaka miela mafunda tatu.
42Bau vandaka ngolo mu malongi ya bantumwa, ye mu kintuadi, ye mu kubukuna ya mampa, ye mu lombilu.
Dibundu ya ntete
43Boma kubwaka va miela yonso, banyitukulu ye bidimbu mingi salwaka mu bantumwa mu Yelusalemi, bantu yonso vandaka na boma mingi. Mal. 4:41; Luk. 1:65; 7:16
44Bau yonso ya kwikilaka vandaka sikamosi, ye vandaka kitezo mosi na mambu yonso. Bis. 4:32
45Bau tekaka ntoto ya bau ye bima ya bau, ye kabaka yau kwa bau yonso, bonso vandaka nsatu ya muntu na muntu.
46Kilumbu na kilumbu bau vandaka ngolo mu kintuadi mu tempelo, bau bukunaka mampa mu nzo ya bau, bau bakaka madia ya bau na kiese ye ntima ya mpembe.
47Bau zitisaka Nzambi ye monaka nlemvo na meso ya bantu yonso. Kilumbu na kilumbu Mfumu tulaka sikamosi na bau bankaka ya vuluswaka. Bis. 5:14
Currently Selected:
Bisalu Ya Bantumwa 2: NTK50
Highlight
Share
Copy
Want to have your highlights saved across all your devices? Sign up or sign in
Nouveau Testament en Kikwango © BAliiance Biblique de la RD Congo, 1950.
