Matai 24
24
Yesu tuba sambu na kubwa ya tempelo
1Yesu basikaka na tempelo ye kwendaka kutambula; banlonguki ya yandi kwizaka kwa yandi kusonga yandi bantungulu ya tempelo. Mal. 13:1; Luk. 21:5
2Yandi vutulaka ye tubaka kwa bau: Beno mona yai yonso ? Kieleka, mono tuba kwa beno: Awa ditadi mosi tabikwa ve va ditadi yankaka, yau yonso takubwa. 1 Nt. 9:7; Mika 3:12
3Kansi, bu yandi vandaka va mongo ya Olive, banlonguki kwizaka kwa yandi mu kinsona, kutuba: Tuba kwa beto, nki kilumbu mambu yai tasalwa, ye nki kidimbu ya kwiza ya nge, ye ya nsuka ya ntangu ?
4Yesu vutulaka ye tubaka kwa bau: Tomatala, na muntu kusa beno ve, Ef. 5:6; Kolo. 2:8; 2 Tes. 2:3
5Kadi mingi takwiza mu nkumbu ya mono, kutuba: Mono ikele Klisto, ye takusa bantu mingi.
6Beno takuwa bamvita ye nsangu ya bamvita. Tala, na beno tita ve, kadi mambu yai fwiti kwiza, kansi nsuka imene kwiza ntete ve.
7Kadi kikanda ya bantu tanwana na kikanda ya bantu, ye kimfumu na kimfumu, ye malema tavanda, ye ndikunu ya ntoto mu sika ye sika.
8Kansi mambu yai yonso ikele luyantiku ya mpasi yina.
9Buna bau tayekula beno kwa kumoniswa ya mpasi, ye takufwa beno, ye makanda yonso ya bantu tavanda na kimbeni kwa beno sambu na nkumbu ya mono. Mat. 10:17; Yoa. 15:19; 16:2
10Buna bantu mingi tasakuba, ye tayekulana, ye tavandana na kimbeni.
11Ye bambikudi mingi ya luvunu tatelema ye kusa bantu mingi.
12Sambu na kimpumbulu takwiza mingi, zola ya bantu mingi takwiza madidi.
13Kansi yandi ya vibidila ti na nsuka, tavuluswa.
14Nsamu yai ya mbote ya kimfumu tasamunwa mu nsi yonso ya ikele na bantu, sambu na kitemo kwa makanda yonso ya bantu, buna nsuka takwiza.
15Buna, bu beno mona mbungulu ya kufwa, ya mbikudi Danieli bikulaka, ikele kutelema na sika ya nlongo (konsonani ya tanga, bika yandi zaba), Dan. 9:27; 12:11; Luk. 17:31
16buna bau ya ikele mu Yuda, bika bau tinina ku miongo;
17yandi ya ikele va nludi, bika yandi kulumuka ve kubaka bima ya ikele mu nzo ya yandi;
18yandi ya ikele mu dilanga, bika yandi vutuka ve kubaka kazaku ya yandi.
19Kansi ntantu kwa bau ya ikele na divumu, ye bau ya yamwisa mu bilumbu yina.
20Lomba na kutina ya beno tavanda ve mu nsungi ya madidi, keti mu kilumbu ya luvundu.
21Kadi mpasi mingi tavanda, mutindu ya imene kuvanda ntete ve tuka na luyantiku ya nsi, ti ntangu yai, ye yo tavanda diaka ve.
22Kana bilumbu yina zengwa nkufi ve, nsuni mosi vuluswa ve, kansi sambu na basolwa, bilumbu yina zengwa nkufi.
23Buna kana muntu tuba kwa beno: Tala, Klisto ikele awa, keti kuna, kwikila yo ve. Luk. 17:23; 21:8
24Kadi baklisto ya luvunu ye bambikudi ya luvunu tatelema ye songa bidimbu ya nene, ye mambu ya nyitukulu, sambu na kukusa basolwa, kana yo lendwa. 2 Tes. 2:11
25Tala, mono imene kutuba yo kwa beno.
26Sambu na yai, kana bau tuba kwa beno: Tala, yandi ikele mu nsi ya mpamba, kwenda ve; tala, yandi ikele mu katikati ya nzo, kwikila yo ve.
27Kadi bonso nzazi basika na este ye monika ti na weste, mpilayai kwiza ya mwana ya muntu tavanda mpe, Luk. 17:24
28Konsosika ya mvumbi ikele, kuna bambemba takutakana.
Kwiza ya yandi ya zole
29Nswalu nanima na mpasi ya bilumbu yina, ntangu takituka ndombe, ye ngonda tapesa mwini ya yandi ve, ye bambwetete takubwa tuka zulu, ye ngolo ya zulu tanikuka. Bis. 2:20; Nzai. 6:12; Yes. 13:10; Yeh. 32:7; Yoeli 2:10, 31; 3:15; Mal. 13:24; Luk. 21:25
30Buna kidimbu ya Mwana ya muntu tamonika mu zulu, makanda yonso ya ntoto tadila, ye bau tamona Mwana ya muntu kwiza mu matuti ya zulu, na ngolo ye nkembo mingi. Dan. 7:10, 13; Mat. 25:31; Bis. 1:11; 1 Tes. 4:16; Nzai. 1:7
31Yandi tafidisa banjo ya yandi na ndinga ngolo ya mpungi. Bau takutikisa basolwa ya yandi tuka ndambu iya ya mupepe, ye tuka na nsuka mosi ya zulu ti na nsuka yankaka. Mat. 13:41; 1 Kol. 15:52; 1 Tes. 4:16
Kusongo kidimbu ya lumbu yina
32Longuka kingana ya nti ya figi; bu mavala ya yo ikele petepete, ye yo ikele kubasisa matiti, beno zaba nsungi ya mvula ikele mfinama. Mal. 13:28; Luk. 21:29
33Mpilayai beno mpe, bu beno mona mambu yai yonso, beno zaba yandi ikele mfinama na mielo.
34Kieleka mono tuba kwa beno: Mbandu yai tamana ve, ti mamba yai yonso tamana.
35Zulu ye ntoto tamana, kansi mambu ya mono tamana ve. Nk. 102:26; Yes. 40:8; Eb. 1:11
36Kansi lumbu yina ye lokula yina muntu zaba ve, keti banjo ya zulu ve, keti Mwana ve, kansi Tata kaka. Bis. 1:7
37Mpilamosi yo vandaka mu bilumbu ya Noa, mpilayai kwiza ya Mwana ya muntu tavanda mpe. Luk. 17:26; 1 Pet. 3:10
38Kadi bonso yo vandaka mu bilumbu yina, ntete nkuka kwizaka ve; bau vandaka kudia ye kunwa ye kukwela ye kukwedisa ti na kilumbu ya Noa kotaka mu nzaza. 1 Mose 6:2; 7:7
39Bau zabaka ve, ti nkuka kwizaka ye katulaka bau yonso, mpilayai kwiza ya Mwana ya muntu tavanda mpe.
40Buna babakala zole tavanda mu dilanga, mosi tabakwa, ye mosi tabikwa. Luk. 17:34
41Bankento zole tanikuna fufu va ditadi, mosi tabakwa ye mosi tabikwa.
Yesu longa tomatala
42Sambu na yai, tomatala, kadi beno zaba ve lumbu nki Mfumu ya beno takwiza. Mat. 25:13; Mal. 13:33, 35
43Kansi zaba yai, kaka mfumu ya nzo zabaka na nkengila nki mwivi ikele kwiza, yandi imene tomatala ye bika nzo ya yandi timwa ve. 1 Tes. 5:2; 2 Pet. 3:10; Nzai. 3:3
44Sambu na yai beno mpe diyidika, kadi Mwana ya muntu takwiza mu lokula ya beno banza ve.
45Buna nani ikele mpika ya kwikama ye ya ngangu, ya mfumu ya yandi tulaka va zulu ya bantu ya nzo ya yandi, sambu na kupesa bau madia mu ntangu ya lunga.
46Kiese ikele na mpika yina, ya mfumu ya yandi takuta yandi ikele kusala mpilayai, bu yandi kwiza.
47Kieleka mono tuba kwa beno: Yandi tatula yandi va zulu ya bima yonso ya yandi. Mat. 25:21, 23; Luk. 22:29
48Kansi kana mpika ya mbi tuba mu ntima ya yandi: Mfumu ya mono ikele kwiza ntangu yai ve;
49yandi tayantika kubula bampika yankaka ye kudia ye kunwa sikamosi na bau ya kolwa;
50mfumu ya mpika yina takwiza mu lumbu ya yandi ikele kuvingila ve, ye lokula ya yandi zaba ve;
51ye zenga yandi nakati ye pesa ndambu ya yandi sikamosi na bankwa luvunu. Kuna tavanda kudila ye nkwetoso ya meno. Mat. 8:12; 13:42; 25:30
Currently Selected:
Matai 24: NTK50
Highlight
Share
Copy
Want to have your highlights saved across all your devices? Sign up or sign in
Nouveau Testament en Kikwango © BAliiance Biblique de la RD Congo, 1950.
