Matai 25
25
Yesu fwanikisa kwiza ya yandi mu kingana ya bandumba kumi
1Buna kimfumu ya zulu tavanda mpilamosi bandumba kumi ya bakaka minda ya bau, ye kwendaka kutakana na toko ya makwela.
2Tanu vandaka nzoba ye tanu vandaka na ngangu.
3Bau ya nzoba bakaka minda ya bau, kansi bakaka mafuta ve.
4Bau ya ngangu bakaka mafuta mu mumbwa ya bau sikamosi na mvinda ya bau.
5Bu toko ya makwela vingilaka, bau yonso lekaka ye lalaka tulu.
6Kansi mu katikati ya mpimpa mbokolo vandaka: Tala, toko ya makwela! Basika ye kutana na yandi!
7Buna bandumba yonso telemaka ye yidikaka minda ya bau.
8Bau ya nzoba tubaka kwa bau ya ngangu: Pesa beto ndambu ya mafuta ya beno, kadi ya beto ikele kuzima.
9Bau ya ngangu vutulaka, kutuba: Yo lunga ve kwa beto ye beno. Kwenda kwa bateki ya yau, ye disumbila.
10Bu bau kwendaka kusumba, toko ya makwela kwizaka, ye bau ya vanda kuyidikwa kotaka na yandi mu fete ya makwela, ye kielo kangaka.
11Bandumba yankaka kwizaka ye tubaka: Mfumu, mfumu, kangudila beto.
12Kansi yandi vutulaka ye tubaka: Kieleka, mono tuba kwa beno: Mono zaba beno ve. Mat. 7:23; Luk. 13:25
13Sambu na yai, beno tomatala, kadi beno zaba ve lumbu keti lokula yina. Mat. 24:42, 44; Mal. 13:33, 35; Luk. 21:36; 1 Kol. 16:13; 1 Pet. 5:8; Nzai. 16:15
Muntu pesaka batalanta kwa basadi ya yandi
14Yo ikele mpilamosi muntu ya kwendaka ku ntoto yankaka, yandi bingaka bampika ya yandi, ye pesaka bau mbongo ya yandi. Luk. 19:11
15Yandi pesaka mbongo talanta tanu kwa mosi, ye zole kwa yankaka, ye mosi kwa yankaka, kwa muntu na muntu bonso yandi lenda; buna yandi kwendaka ku nsi yankaka.
16Yandi ya bakaka talanta tanu, kwendaka nswalu ye sumbaka ye tekaka na yau, ye bakaka talanta tanu yankaka ndandu.
17Mpilayai mpe yandi ya bakaka zole, bakaka zole yankaka ndandu.
18Kansi yandi ya bakaka mosi, kwendaka ye timaka mu ntoto ye swekaka mbongo ya mfumu ya yandi.
19Ntangu mingi nanima, mfumu ya bampika yina kwizaka, ye tangaka ntalu ya bau.
20Yandi ya bakaka talanta tanu, kwizaka na talanta tanu yankaka, kutuba: Mfumu, nge pesaka mono talanta tanu; tala, talanta tanu yankaka ya mono imene kubaka ndandu.
21Mfumu ya yandi tubaka kwa yandi: Mbote, nge mpika ya mbote ye ya kwikama; nge imene kuvanda kwikama na bima ndambu, mono tatula nge va zulu ya bima mingi. Kota mu kiese ya mfumu ya nge. Mat. 24:47; Luk. 22:29
22Yandi mpe ya bakaka talanta zole kwizaka, ye tubaka: Mfumu, nge pesaka mono talanta zole, tala, talanta zole yankaka ya mono imene kubaka ndandu.
23Mfumu ya yandi tubaka kwa yandi: Mbote, nge mpika ya mbote ye ya kwikama; nge imene kuvanda kwikama va bima ndambu, mono tatula nge va zulu ya bima mingi: Kota mu kiese ya Mfumu ya nge.
24Yandi mpe ya bakaka talanta mosi kwizaka, ye tubaka: Mfumu, mono zabaka nge ikele muntu ya makasi, nge ikele kuyonzika ya nge kunaka ve, ye kutikisa ya nge mwangisaka ve.
25Mono vandaka na boma ye kwendaka ye swekaka mbongo talanta ya nge mu ntoto. Tala, ya nge yo yai.
26Mfumu ya yandi vutulaka, ye tubaka kwa yandi: Nge mpika ya mbi ye ya bumolo, nge zabaka na mono yonzika ya mono kunaka ve, kutikisa ya mono mwangisaka ve.
27Buna mbote kana nge tulaka mbongo ya mono mu nzo ya mbongo, ye bu mono vutukaka, mono zolaka kubaka ya mono ye ndandu.
28Sambu na yai, beno baka talanta ya yandi, ye pesa yo kwa yandi ya ikele na talanta kumi.
29Kadi konsonani ya ikele na yo, tapeswa, ye yandi tavanda na mingi; kansi yandi ya ikele na yo ve, bau tabaka mpe ya ikele na yandi. Mat. 13:12; Mal. 4:25; Luk. 8:18
30Kansi losa mpika ya konda mfunu mu tombe ya nganda. Kuna tavanda kudila ye nkwetoso ya meno.
Mfundusu ya makanda bu yandi kwiza
31Bu Mwana ya muntu takwiza mu nkembo ya yandi, ye banjo yonso sikamosi na yandi, buna yandi tavanda va kiti ya nkembo ya yandi. Zak. 14:5; Mat. 16:27; 1 Tes. 4:16; 2 Tes. 1:7; Yud. 14
32Makanda yonso takutakana nantwala na yandi, ye yandi takabisa bau mpilamosi mvungi kabisa mameme ye bankombo. Lom. 14:10; 2 Kol. 5:10; Yeh. 34:17, 20
33Yandi tatula mameme va diboko kibakala ya yandi, kansi bankombo va diboko kinkento.
34Buna Ntinu tatuba kwa bau va diboko kibakala: Kwiza beno bankwa lusakumunu ya Tata ya mono, baka difwa ya kimfumu ya yidikilwaka beno tuka lufulu ya nsi.
35Kadi mono vandaka na nzala, ye beno pesaka mono ya kudia; mono vandaka na kiwini, ye beno pesaka mono ya kunwa; mono vandaka nzenza ye beno bakaka mono; Yes. 58:7; Yeh. 18:7
36mono kondaka lele ye beno vwatisaka mono; mono vandaka na maladi ye beno kwizaka kutala mono; mono vandaka mu boloko ye beno kwizaka kwa mono. Yak. 1:27
37Buna balunungu tavutula ye tuba kwa yandi: Mfumu, ntangu nki beto monaka nge na nzala ye pesaka nge ya kudia, keti na kiwini ye pesaka nge ya kunwa ?
38Kilumbu nki beto monaka nge nzenza ye bakaka nge, keti ya konda lele ye vwatisaka nge ?
39Kilumbu nki beto monaka nge na maladi keti mu boloko, ye beto kwizaka kwa nge ?
40Ntinu tavutula ye tuba kwa bau: Kieleka, mono tuba kwa beno: Mpilamosi beno salaka yo kwa mosi ya bampangi ya mono yai ya luta fioti, beno salaka yo kwa mono. Bing. 19:17; Eb. 6:10
41Buna yandi tatuba kwa bau va diboko kinkento ya yandi: Katuka na mono, beno ya ikele na ndola, ye kwenda mu tiya ya mvu ya mvu, ya yidikwa sambu na diable ye banjo ya yandi. Nk. 6:8; Mat. 7:23; Luk. 13:27
42Kadi mono vandaka na nzala ye beno pesaka mono ya kudia ve; mono vandaka na kiwini ye beno pesaka mono ya kunwa ve;
43mono vandaka nzenza ye beno bakaka mono ve; mono kondaka lele ye beno vwatisaka mono ve; mono vandaka na maladi ye mu boloko, ye beno kwizaka ve kutala mono.
44Buna bau mpe tavutula kutuba: Mfumu, ntangu nki beto monaka nge na nzala keti na kiwini keti nzenza keti ya konda lele keti na maladi keti mu boloko, ye beto sadilaka nge ve ?
45Buna yandi tavutula ye tuba kwa bau: Kieleka mono tuba kwa beno: Mpilamosi beno salaka yo ve kwa mosi ya bayai ya luta fioti, beno salaka yo kwa mono ve.
46Bayai takwenda ku mpasi ya mvu ya mvu, kansi balunungu ku moyo ya mvu ya mvu. Dan. 12:2; Yoa. 5:29
Currently Selected:
Matai 25: NTK50
Highlight
Share
Copy
Want to have your highlights saved across all your devices? Sign up or sign in
Nouveau Testament en Kikwango © BAliiance Biblique de la RD Congo, 1950.
