Loma 3
3
Kuluta ya baYuda
1Buna muYuda luta bantu yankaka na nki ? Keti ndandu ya nzengolo ikele nki ?
2Na mambu mingi ya mpila mu mpila; ntete bau peswaka mambu ya Nzambi sambu na kukeba yau. 5 Mose 4:7
3Kadi, nki kana bankaka ikele kukonda lukwikilu ? Konda ya lukwikilu ya bau kitula kwikama ya Nzambi kwiza mpamba ? 4 Mose 23:19; Lom. 9:6; 2 Tim. 2:13; Eb. 4:2
4Ikele mpilayai ve! Bika Nzambi vanda ya kwikama, kansi muntu na muntu nkwa luvunu, bonso ikele kusonama: Na nge lenda kunungiswa mu mambu ya nge, ye nunga bu nge fundiswa. Nk. 51:4; 62:9; 116:11
5Kansi kana konda ya lunungu ya beto ikele kusonga lunungu ya Nzambi, buna beto tatuba nki ? Nzambi konda lunungu bu yandi tula beto makasi ? Mono tuba mu kimuntu. Lom. 6:19; Ngal. 3:15
6Ikele mpilayai ve! Kadi mpilayina Nzambi tafundisa nsi mpila nki ? 1 Mose 18:25; Yobi 8:3; 34:17
7Kansi kana mambu ya kieleka ya Nzambi kula kwa nkembo ya yandi mu luvunu ya mono, buna sambu na nki mono fundiswa bonso nkwa masumu ?
8Nki beto tuba ve, bankaka ikele kutuba luvunu sambu na beto ye bonso bankaka tuba na beto ikele kutuba: Bika beto sala mbi na mambu ya mbote lenda kwiza. Mbedoso ya bau ikele ya lunungu.
Bau yonso imene kusala masumu
9Buna nki ? Beto luta bau ? Ve, ta fioti ve, beto imene kuzenga mambu na baYuda ye baElene, na bau yonso ikele nansi na masumu, Lom. 11:32; Ngal. 3:12
10bonso yo ikele kusonama: Nkwa lunungu ikele ve, tamosi ve. Nk. 14:2; 53:2
11Mosi ikele ve ya ngangu, mosi ikele ve ya sosa Nzambi.
12Bau yonso imene kuvila nzila, bau yonso imene kwiza mpamba, mosi ikele ve ya sala mbote, tamosi ve.
13Laka ya bau ikele ndiamu ya kanguka, bau kusaka mu tudimi ya bau; nsa ya banioka ikele nansi na bikoba ya bau. Nk. 5:9; 140:3
14Munoko ya bau fuluka na mafingu ye ndudi. Nk. 10:7
15Makulu ya bau ikele nswalu kutiamuna menga. Bing. 1:16; Yes. 59:7
16Mpasulu ye mpasi ikele mu nzila ya bau.
17Ye bau zaba nzila ya yenge ve.
18Vumi ya Nzambi ikele nantwala na meso ya bau ve. Nk. 36:4
19Kansi beto zaba, mambu yonso ya nsiku ikele kutuba, yo ikele kutuba kwa bau ya ikele nansi nsiku, na munoko yonso lenda kukanga ye nsi yamvimba lenda kubaka mfundusu ya Nzambi;
20kadi muntu mosi tanungiswa ve mu bisalu ya nsiku nantwala na yandi; kadi mu nsiku ikele kubasika nzailu ya masumu. Nk. 143:2; Ngal. 2:16; Lom. 7:17
Lunungu ya Nzambi monika mu Klisto
21Kansi ntangu yai mu konda ya nsiku, lunungu ya Nzambi ikele kumonika, nsiku ye bambikudi ikele kutuba kitemo na yo. 1 Mose 15:6; Yes. 53:11; Yel. 23:6; Lom. 1:17; Yoa. 5:46
22Yo ikele lunungu ya Nzambi mu lukwikilu ya Yesu Klisto kwa bau yonso ya kwikila, kadi diswaswana ikele ve; Lom. 10:12; Ngal. 3:28; Kolo. 3:11
23kadi yonso imene kusala masumu, ye konda nkembo ya Nzambi, Lom. 11:32; Ngal. 3:22
24bau nungiswa ya matabisi mu nlemvo ya yandi mu nkudulu ya ikele mu Klisto Yesu. Ngal. 2:16; Ef. 1:7; 2:8; Kolo. 1:14; 1 Tim. 2:5; Tit. 3:5, 7; 1 Pet. 1:18
25Ikele yandi ya Nzambi pesaka kuvanda nkailu ya vidiswa mu lukwikilu mu menga ya yandi, kusonga lunungu ya yandi, bu yandi vidisaka masumu ya bau salaka ntete, mu mvibudulu ya Nzambi; 2 Kol. 5:19; Kolo. 1:19; 1 Yoa. 1:9; 2:2; 4:10
26Nzambi salaka yai na kusonga lunungu ya yandi mu ntangu yai, na yandi kibeni lenda kununga ye kunungisa konsonani ya ikele na lukwikilu mu Yesu.
Beto ikele kunungaka mu lukwikilu
27Mpilayai, kuyana ikele wapi ? Yo imene kukatulwa. Mu nsiku mutindu nki ? Mu nsiku ya bisalu ? Ve, kansi mu nsiku ya lukwikilu.
28Sambu na yai, beto tanga na muntu ikele kunungiswa mu lukwikilu konda bisalu ya nsiku. Bis. 13:39; Ngal. 2:16
29Keti Nzambi ikele Nzambi ya baYuda kaka ? Yandi ikele Nzambi ya bapaien mpe ve ? E, ya bapaien mpe.
30Kansi Nzambi ikele mosi kaka, yandi tanungisa bau ya nzengolo, sambu na bau kwikila, yandi tanungisa bau ya konda nzengolo sambu na bau kwikila. Ngal. 3:8
31Buna beto sala nsiku kwiza mpamba mu lukwikilu ? Mpilayai ve, kansi beto ikele kusikidika nsiku.
Currently Selected:
Loma 3: NTK50
Highlight
Share
Copy
Want to have your highlights saved across all your devices? Sign up or sign in
Nouveau Testament en Kikwango © BAliiance Biblique de la RD Congo, 1950.
