Loma 4
4
Abalahami nungiswaka mu lukwikilu, beto mpe tanungiswa mu lukwikilu kaka
1Buna beto tatuba nki sambu na Abalahami tata ya beto mu nsuni ?
2Kadi, kana Abalahami nungiswaka mu bisalu, yandi ikele na mambu na kuyana, kansi nantwala na Nzambi ve.
3Kadi masonukwa ikele kutuba nki ? Abalahami kwikilaka Nzambi, yo tangwa kwa yandi lunungu. 1 Mose 15:6; Ngal. 3:6
4Kansi kwa yandi ya sala, nsendo tangwa ve bonso ya nlemvo kansi bonso mfuka. Lom. 11:6
5Kansi kwa yandi ya sala ve, kansi ya kwikila yandi ya nungisa bankwa ya konda lunungu, lukwikilu ya yandi tangwa ku lunungu. Lom. 3:28
6Bonso Davidi sakumunaka muntu, ya Nzambi tangwa lunungu, kansi na bisalu ve, kutuba:
7Lusakumuna ikele ya bau, na kimpimbulu ya bau imene kuvidiswa, ye masumu ya bau imene kufukwa. Nk. 32:1
8Kiese ikele na muntu ya Mfumu tanga masumu kwa yandi ve.
9Buna kiese yai ikele kaka kwa bau ya nzengolo, keti kwa bau ya konda nzengolo mpe ? Kadi beto ikele kutuba: Lukwikilu ya Abalahami tangwa lunungu.
10Buna yo tangwaka kwa yandi mpila nki ? Bu yandi vandaka mu nzengolo keti ya konda nzengolo. Yo ikele mu nzengolo ve, kansi mu konda nzengolo.
11Yandi bakaka kidimbu ya nzengolo bonso kidimbu ya lunungu mu lukwikilu ya yandi vandaka na yo, bu yandi konda nzengolo. Yandi sala yai sambu na kuvanda tata ya bantu yonso ya kwikila, bu bau ikele mu konda nzengolo, na lunungu lenda kutangwa kwa bau; Ngal. 3:7
12yandi ikele tata ya nzengolo kwa bau ya nzengolo kaka ve, kansi kwa bau ya tambula mpe mu bitambi ya lukwikilu ya vandaka na Abalahami tata ya beto, bu yandi konda nzengolo.
13Kadi mu nsiku ve, nsilulu peswaka kwa Abalahami keti kwa nkuna ya yandi, na yandi tavanda mvingidi ya difwa ya nsi, kansi yo peswa mu lunungu ya lukwikilu.
14Kadi, kana bau ya ikele ya nsiku ikele bamvingidi ya difwa, buna lukwikilu imene kukituka mpamba, ye nsilulu imene kukituka mpamba mpe.
15Kadi nsiku ikele kubasisa makasi, kansi bu nsiku ikele ve, kufwa ya nsiku mpe ikele ve. Yoa. 15:22; Lom. 5:13; 7:8, 10; 1 Kol. 15:56
16Sambu na yai yo ikele ya lukwikilu, na yo lenda kuvanda sambu na nlemvo, na nsilulu lenda kuvanda kieleka kwa nkuna yonso; kwa bau ya ikele na nsiku kaka ve, kansi kwa bau mpe ya ikele na lukwikilu ya Abalahami, ya ikele tata ya beto yonso, Ngal. 3:9, 16, 18, 28
17bonso yo ikele kusonama: Mono tulaka nge tata ya makanda mingi ya bansi ya bantu; nantwala na Nzambi ya yandi kwikilaka, yandi kwikilaka Nzambi ya pesa bafwa moyo, ye yandi binga bima ya ikele ve bonso yo ikele. 1 Mose 17:4
18Bu Abalahami konda vuvu, yandi kwikilaka mu vuvu, na yandi kituka tata ya bansi mingi ya bantu, bonso yo tubwaka: Nkuna ya nge tavanda mpilayai. 1 Mose 15:4; Eb. 11:11
19Yandi kwiza lebakana ve mu lukwikilu, bu nitu ya yandi vandaka bonso kufwa, yandi vandaka mfinama mvu nkama mosi, ye divumu ya Sala vandaka bonso ya kufwa. 1 Mose 17:17
20Kansi mu nsilulu ya Nzambi yandi vandaka mtembe ve mu konda ya lukwikilu, kansi yandi kwizaka ngolo mu lukwikilu ye kembilaka Nzambi,
21yandi zabaka mbote na yina ya Nzambi silaka, Nzambi lenda kusala yo mpe. Nk. 115:3; Luk. 1:37
22Sambu na yai mpe, yo tangwa kwa yandi lunungu.
23Kansi yo sonikwa sambu na yandi kaka ve, na yo tangwaka kwa yandi. Lom. 15:4
24Kansi yo sonikwa sambu na beto mpe, ya tatangwa mpilayina mpe, beto ya kwikila mu yandi ya fulukisaka Yesu Mfumu ya beto, tuka bafwa.
25Yandi ya yekulwaka sambu na masumu ya beto, ye fulukiswaka kunungisa beto.
Currently Selected:
Loma 4: NTK50
Highlight
Share
Copy
Want to have your highlights saved across all your devices? Sign up or sign in
Nouveau Testament en Kikwango © BAliiance Biblique de la RD Congo, 1950.
