Yoane 2

1En’ina bon’esaso, baofumb’elambedya ena nsongana ena Kana, ecimo emoi ena Ngalilaya; ko nyango ena Yesu ayaaki meho; 2ko baelela Yesu nkoho, ende l’akili’anande, en’elambedya eho. 3Eneki vina osilaka, nyango ena Yesu amosumola, ate, Bafana nko le vina. 4Ko Yesu amokutwela, ate, Boyoto, emi l’e tond’oya? Esike enami etayele. 5Nyango enande aosumola basali, ate, Yoi lin’etaketaka linalingi’nd’okosumol’ino, bila nko liho. 6Mpoke botoa inay’okolo ina baufe iyaaki meho, nko lacin’ena bokotua bona Ba-Yuda bon’esongwelo, ko mpoke la mpoke ekoli la litres ntuku inei. 7Yesu amasumola, ate, Bolodya basi ena mpoke nko to. Ko baolody’iho nko to. 8Ko amasumola, ate, Botokol’isanga, ko botoela iyome ina elambedya. 9Ko bamotoela. Ko eneki iyome in’elambedya omekaka basi banahalingwaka vina, ko ateya eneki vina eho oyaka (kanga basali banatokolaki basi baeyaki), iyome in’elambedya aelala nsongi ena booli, 10ko amolokwela, ate, Boto l’oto aambedy’ato en’oso nko vina en’olotsi, koko enengi bato omela bike, amaambedy’eho enefan’olotsi bik’ike; koko e omomonya vina en’olotsi yengoko esik’ene. 11Yesu akambaki ndembi ene, nko ndembi enande en’oso, ena Kana en’onyanga bona Ngalilaya, ko aenyanya mpamba enande, ko bakili’anande bamimedya.

12Ena mbusa en’aoyi’aho, aokita ena Kapalanauma, ende la nyango enande, l’akune ko l’akili’anande. Koko batayala meho beco bike.

13Koko elambedya en’Etelo ena Ba-Yuda eolama, ko Yesu aocoa ena Yelusalema. 14Ko aosungya en’otumba bona Yakomba iy’anatekyaki ngombo, la mpate, la bikoso, ko l’iy’anengisolaki francs baokisase nko meho. 15Aoloha mpimbo la besinga, ko amafodya iyatu en’otumba bona Yakomba, le mpate le ngombo nkoho; ko aofafanza francs iniyo banengisolaki, ko aokalimola mesa iniyo; 16ko aosumol’iy’anatekyaki bikoso, ate, Umola biho mendo: botilake botumba bon’afango’onami botumba bona baongwa. 17Ko bakili’anande baokanedy’oka yoi litengamaki’ale: Mposa mene en’otumb’one emonkadya. 18Koko Ba-Yuda baotenda l’ende, bamufola, Mbo ndembi enatotum’e eka nai? lacina okamba baoyi’ane. 19Yesu amautodya, ate, Bofakola botumb’one bona Yakomba, ko nongofaka boho lakina ena bekol’esaso. 20Lacin’eho, Ba-Yuda baila, iy’ate, Efakelo en’otumb’one eyaaki mbula ntuk’inei la mbula botoa, ko e ongut’ofaka boho en’in’esaso? 21Ohonde aotenda lacin’ena botumb’onande bon’oeka, nko yonge linandamene. 22Koko eneki’nd’oetwaka en’ewedi, bakili’anande baofwaki’oka atendaki yoi line, ko baimedya Bitengelo bina Yakomba, ko la yoi linaliki Yesu otendaka.

23Koko eneyal’ende ena Yelusalema en’elambedya en’Etelo, bike bon’ato bimedya ena lina linande, enek’iy’oenaka ndembi iniki’nd’okambaka. 24Ko Yesu atimedy’oka ail’otema eneyal’iyo lacin’oka aeyaki bato bahatu; 25ko atalela boto onomosumola bokotua bon’oto, lacin’oka endamene aeyaki betema ben’ato.

Currently Selected:

Yoane 2: BBY62

Highlight

Copy