Yoane 3

1Boto’omoi ona Bafalusi ayaaki la lina lika Nikodemo, engambe ena Ba-Yuda. 2Ende aoya eneyali Yesu l’oco, ko amosumola, ate, Labi, iso tey’oka e oyali bolaki onoya eneyali Yakomba; lacin’oka efan’oto’omoi onokambisa bikambwa bine binakamb’e, yengoko Yakomba ayali l’ende. 3Yesu amokutwela, ate, Solosolo, solosolo, lakosumol’e, yombo boto afotwa lakina, afinya yena lifoka lina Yakomba. 4Nikodemo amufola, ate, Enatunda boto botundu, akolana yotwa bosamb’oya? Ainya nde mbutwa lakina ena lototo lona nyango enande, ko aotwa? 5Yesu aamba, ate, Solosolo, solosolo, lakosumol’e, yomb’oto afotwa l’asi ko l’olimo, afatuisa ena lifoka lina Yakomba. 6Onotwa en’onufo nk’onufo, ko onotwa eneyali Bolimo nk’olimo 7Tafefake eneki’m’okosumolak’oka ekoli lacina ootwa lakina. 8Lofongo lokumba en’ili bonalanga loho, ko ooka lofoso lona loho; ohonde ofeya eneki loho oyaka, ko ofeya enacoa loho. Nk’osamb’oho la boto l’oto onotwa la Bolimo. 9Nikodemo amufola, ate, Baoyi’ane bailamisa bosamb’oya? 10Yesu amokutwela, ate, E, bolaki’ona Yisalaele, ko ofeye baoyi’ane? 11Solosolo, solosolo, lakosumola, toyatende nko baoyi baney’iso, ko teyanya baoyi banak’is’oenaka; ko ino bofatambe yoi liniso. 12Yombo lakosuraola baoyi bana loko, ko bofimedya, nko lakosumol’ino baoyi bana loola bongimedya bosamb’oya? 13Efan’oto onilelaki ena loola, yengoko ende onokitaki ena loola, nko Bon’on’oto onoyali ena loola. 14Nk’eyok’onoki Mose oiledyaka njua ena sengelenge, nk’osamb’oho Bon’on’oto angiledyama, 15lacin’eho boto l’oto onomimedya aate liiko lonelofakale.

16Lacina Yakomba aokaki benyanga behetu nganji mene, afaki Bon’onande ona likinda ona mpame, lacin’eho boto l’oto onimedy’ende afehaki: angata nko liiko lonelofakale. 17Lacina Yakomba atatoma Bon’onande ena loko lacin’eho akoiya baise benyanga likambo: aotomaki lacina baise benyanga baike nko l’ende. 18Onimedy’ende afakoiyama likambo; ohonde onofimedya amosila likoiyama likambo, lacina enetimedy’ende ena lina lina Bon’ona Yakomba ona likinda. 19Ekwelo ena likambo eh’ene: eka fololo emoya ena loko; koko bato batalanga fololo, balangaki nko liucu, lacin’oka bikambwa biniyo biyaaki bowe. 20Boto l’oto onokamb’owe akila fololo, ko afaye ena fololo, lacina bikambwa binande bitongoyenya. 21Ohonde onokambeela solosolo, aoyeela ena fololo, lacina bikambwa binande bieyan’oka bimokambama eneyali Yakomba.

22Ena mbusa en’aoyi’ane Yesu l’akili’anande baoya en’onyanga bona Yudea; ko aokisase meho l’iyo, ko ain’ato en’asi. 23Koko Yoane ayin’ato ena Ainona, mbolimboli la Salima, lacina basi bayaaki bike meho; ko bato baoya eneyal’ende, ko bainama. 24Lacin’oka en’esik’eho Yoane atafusame en’onyolo. 25Koko ntango eata en’atenyi’a bakili bana Yoane la boto’omoi ona Yuda ena likambo lina esongelo. 26Ko baoya eneyali Yoane, ko baila, iy’ate, Labi, ende onoyaaki l’e en’ili bona Yoladane, ko onok’otendaka yoi lacin’enande, lenda ayine bato, ko bato bahatu baoya eneyal’ende. 27Yoane aamba, ate, Boto afatambisa iyema, yengoko iho yofam’ende nk’ena loola. 28Inoamene bey’oka, emi njilaki fololo, emite, Ei mpayali Masiya, ohonde motomama en’oso’onande. 29Onata booli nko nsongi: efili ena nsongi onemali ko onomolofamela, ayali l’ekiko lacin’ena efodya ena nsongi. Enyang’e nami eh’ene, emokolana. 30Akoli eneyal’ende asokwa, koko emi nsonjame.

31Ende onoya ena loola aleki bahatu ndeka mene; ohonde onoyali ona loko ayali nk’ona loko, ko atenda nko baoyi bana loko; ende onoya ena loola aleki bahatu nko ndeka. 32Ayatende baoyi banaki’nd’oenaka, ko l’aoyi banaki’nd’ookaka, koko efan’oto onotamba yoi linande. 33Ende onotamba yoi linande, amenyany’oka Yakomba ande solosolo. 34Lacin’oka ende onoki Yakomba otomaka, atenda nko baoyi bana Yakomba, lacina Yakomba afofe Bolimo la nkodya. 35Bafango aoka Bona nganji, ko amofa baoyi bahatu ena likasa linande. 36Onimedya Bona, aata liiko lonelofakale; ohonde onofimedya Bona, afayene liiko, koko nkele ena Yakomba engoyala eneyal’ende nko njalama.

Currently Selected:

Yoane 3: BBY62

Highlight

Copy