Yoane 5

1Ena mbusa en’aoyi’aho, elambedya ena Ba-Yuda eataki, ko Yesu aocoa ena Yelusalema.

2Yembo liyali ena Yelusalema, nk’ena mbolimboli l’ofolo bona mpate, ko yatangama ena lofoso lona Ba-Ebele Betesenda; ko bikongamelo bitano biyali meho. 3Bik’ike bon’ato ban’aise nkangi baokalama meho: banody’aiso, la bitumbe, la banawisa bilama; (baolengedya elilelo en’asi. 4Lacina ekima akitaki bisike bimoi ena yembo ko alidyaki basi; koko boto onokitaki en’oso, eneki basi olilaka, ende aikaki ena nkangi en’etaketaka eneki’nd’ookaka.) 5Boto’omoi ayaaki meho onokaki nkangi enande mbula ntuk’isaso la mbula mwambi. 6Eneki Yesu oenak’ende aeci meho, ko amey’oka amokinda yok’oho elela mene, amufola, ate, Olanga nde oyika? 7Boto on’ise nkangi amokutwela, ate, Nkolo, enalil’asi, mpan’oto onompusodya en’asi; ohonde enay’emi, okina akita en’oso’onami. 8Yesu amosumola, ate, Etwa, ambola itunda ine, ko kenda en’akaka. 9Ko isasanga boto’oho aika, ko aambola itunda inande, ko aokenda.

Bin’oho boyaaki nko Sabata. 10Lacin’eho, Ba-Yuda baosumol’ende onikaki, iy’ate, Bin’one nko Sabata; ofakolana lacina otole itunda ine bon’in’one. 11Amakutwela, ate, Ende onombikyaka aonjilaka, ate, Ambol’itunda ine, ko coaka. 12Iyo bamufola, iy’ate, Boto’oho onokosumolaka, Ambol’itunda ine, ko coaka, ende nai? 13Koko ende onikyamaki ateya oniikyaki, lacin’oka Yesu aumaki lacin’ena bik’ike bon’ato bonoyaaki meho. 14Ena mbusa en’aoyi’ane, Yesu ameena en’otumba bona Yakomba, ko amosumola, ate, Lenda, omolika; tilake bowe lakina, lacina yoi limoi linalileki lokeseli litokokwela. 15Boto’oho aocoa, ko aosumola Ba-Yuda, ate Yesu kongombikyaki. 16La ncina ene, Ba-Yuda baonyoma Yesu, nko lacina eneki’nd’okambaka baoyi’ane en’ina bona Sabata. 17Koko Yesu amakutwela, ate, Bafango’onami ayakambe bikambwa yengoko esik’ene, ko emi njakambe. 18La ncina ene, Ba-Yuda baokusa lifon’etelo oyoyaka, lacin’oka atafulunganya boeka bona Sabata kei: atangaki Yakomba bafango’onandamene nkoho, ko yok’oho ayokolanyak’endamene la Yakomba nko kocu.

19Lacin’eho, Yesu amakutwela, ate,

Solosolo, solosolo, lakosumol’ino, Bona afakambisa ekambwa endamene: akambisa nk’ekambwa eho kei enen’ende Bafango akamba; lacina bikambwa bin’etaketaka binakamb’afango, Bona akamba nko biho. 20Lacina Bafango aoka Bona nganji, ko amotuma bikambwa bihitu binakamb’endamene. Koko angotuma bikambwa binileki bine, lacin’eho ino bofefe. 21Yoka bosamb’onetola Bafango bato banawaki, ko amaf’iyo liiko, nk’osamb’oho Bona amaf’iy’analang’Ende liiko nkoho. 22Lacina Bafango afatendel’oto likambo: amofa Bona lifoka lacina atende bakambo bahatu, 23lacin’eho bato bahatu bakumya Bona yok’osamb’onakumy’iyo Bafango. Onofakumya Bona, afakumya Bafango onotomaki. 24Solosolo, solosolo, lakosumol’ino, ende onolofamela yoi linami, ko aimedy’ende onontomaki, aata liiko lonelofakale, ko afayaki en’etendelo ena likambo: amosila yuma en’ewedi, ko amoyela ena liiko. 25Solosolo, solosolo, lakosumol’ino, esike engoya, emoyela nko l’isanga, enengi bato banawaki ooka efodya ena Bon’ona Yakomba, ko iy’anoka bangika nko mbika. 26Yoka bosamb’onoyali Bafango la liiko eneyal’endamene, nk’osamb’oho amofa Bona lacina aate liiko eneyal’endamene nkoho; 27ko amofa lifoka lacina atende bakambo, lacin’ende ayali Bon’on’oto. 28Botafefake la yoi line. Lacina esike engoya eneng’iyatu banayali ena nketa ooka efodya enande, 29ko bangofola: iy’anakambaki bolotsi bangetwa ena liiko, ko iy’anakambaki bowe bangetwa nk’en’ekwelo ena likambo.

30Emi kei mpakambisa yoi limoko. Yoka bosamb’onok’emi, latend’akambo, ko etendelo enami eakolana, lacin’oka mpafone lacina nkambe eango enamamene: lafona nk’eango enande onontomaki. 31Yomb’emi njali temoin en’aoyi’anamamene, yoi linami lifana solosolo; 32okina ayali onoyali yoka temoin enami, ko emi ley’oka yoi linatend’ende lacin’enami liyali nko solosolo. 33Ino botomaki eneyali Yoane, ko ende amoyala temoin lacin’ena solosolo 34Ohonde emi mpatambe boto yoka temoin enami; koko latenda baoyi’ane lacin’eho ino biike. 35Ende ayaaki mwinda enafeta ko l’ena kalikali; ko ino bolangaki lacina bonyangele fololo enande imbu. 36Ohonde emi njali la temoin enami eneleki eho ena Yoane: bikambwa biniki Bafango ompaka lacina nkadya biho, nko bikambwa biho binayakamb’emi, temoin enami nde biho, ko biil’oka Bafango antomaki. 37Koko Bafango onontomaki, endamene amoyalama temoin enami; ino botoka efodya enande tu, ko botena bokotua bonande; 38ko yoi linande lifayali ena ntundulu enino tu, lacina enefimedy’ino ende onoki’nd’otomaka. 39Ino boyasisole Bitengelo bina Yakomba, lacina bokanel’oka bongata liiko ena biho; koko bitengelo biho biyali nko temoin enami; 40ko bofalange boy’eneyal’emi lacina boate liiko. 41Mpatambe lokumo eneyali boto. 42Emi lakey’ino, bofana nganji ena Yakomba en’etem’enino. 43Emi moya ena lina lina Bafango’onami, ko bofantambe; yomb’okina aoya ena lina linandamene, bongotamb’ende. 44In’anakumyana, ko bofafone lokumo loneloya eneyali Ende onoyali Yakomba mene, ino binya yimedya bosamb’oya? 45Botakanelake’oka nongokoakol’ino baoyi eneyali Bafango: omoi ayali onokoakol’ino baoyi, nko Mose onok’in’oilak’etema la lolengedyo. 46Yomb’ino bimedyaki Mose, tumbe bomonjimedy’emi, lacin’oka atengaki lacin’enami. 47Ohonde enefimedy’ino bitengelo binande, bongimedya baoyi’anami bosamb’oya?

Currently Selected:

Yoane 5: BBY62

Highlight

Copy