Yoane 6

1Ena mbusa en’aoyi’aho, Yesu aocoa en’ili bona lose lona Ngalilaya (nko lose lona Tibelia). 2Ko bik’ike mene bon’ato bamokila, lacin’enek’iy’oenaka ndembi iniki’nd’okambaka eneyali iy’anawaki nkangi. 3Ko Yesu aanda ena lingonji, ko aokisase meho, ende l’akili’anande. 4Ko elambedya ena Ba-Yuda, nk’ena Etelo, eolama. 5Koko eneki Yesu oenolaka baiso’anande aena bik’ike mene bon’ato baoya eneyal’ende, ko aufola Filipo, ate, Tongosomba mampa meya, lacina bato’ane bale? 6Aotenda yoka bosamb’one lacina aomeke, lacin’oka endamene aeyaki yoi linalingi’nd’oila. 7Filipo amokutwela, ate, Mampa ineyasombama la deniers bekam’efe ifakolana l’iyo, lacin’eho boto l’oto’oniyo atambe etate. 8Omoi on’akili, nko Andelo onotwa la Simona Petelo, amosumola, ate, 9Bonome ayali onoyali la mampa ina fici itano, ko la nse ife; koko iho isokokolana l’ato bik’ike yok’one bosamb’oya? 10Yesu ate, Bosumol’ato bakisase. Tolenge toyaaki bike en’edye eho; ko baokisase, laali lona mpame nk’eyoka nkoto itano 11Yesu aotamba mampa iho, ko eneki’nd’oambelaka Yakomba merci, aokafa eneyal’iyo banakisak’ase; nk’osamb’oho la nse, boto l’oto yombo bike, nk’eyok’onok’iy’olangaka. 12Ko enek’iy’okindaka liota, aosumola bakili, ate, Bosusanya bitate binocikalaka, efaonge lacina iyema yungyama. 13Enek’iy’okadyaka lila toma, baosusanya bitate binocikalaka bina mampa ih’itano la nse ih’ife, ko baolodya bitate biho ena batungu jo l’afe nko to. 14Eneki bato oenaka ndembi eneki’nd’okambaka, baila, Mbo solosolo, one ayali nko bosumoli’oho onoya ena loko.

15Koko eneki Yesu oeyak’oka bangoya oyuunda lacina bail’ende ena lifoka lina roi, autwa lakina ena lingonji ende kei.

16Eneki likolo oyelaka, bakili’anande baokita ena lose; 17baotalama en’atu, ko baoleka lose tacina bacu ena Kapalanauma. Bilima bokwa, koko Yesu ataye eneyal’iyo. 18Ko lose lolidyama, lacin’oka lofongo lona lokolo lokumba. 19Koko enek’iy’olukaka nkai kilometres yoka nsambo, baena Yesu kum’ayakende nko ntalama ena liko y’asi, ko aolama l’atu; ko iyo baanga nko mbanga; 20koko ende amasumola, ate, Em’one, botaangake. 21Nkwaho baolanga lacina baotambe en’atu; ko isasanga boatu boyela en’okili bonok’iy’ocoaka.

22En’ina bona loi, bato’aho bik’ike banemalaki en’oseleka bona lose baen’oka boatu boyaaki meho nk’omoko kei, nk’oho bonoki bakili’anande otalamaka, koko baen’oka Yesu atatalama en’atu l’akili’anande, ohonde bakili bacoaki nk’iyo kei; 23(ohonde biatu bimoi bioya ena Tibelia, nk’ena mbolimboli l’edye enek’iy’olaka mampa, eneki Nkolo oambelaka Yakomba merci); 24ko eneki bato’aho bik’ike oenak’oka Yesu l’akili’anande batayala meho lakina, iyoamene baotalama ena biatu biho, ko baoya ena Kapalanauma ofona Yesu. 25Ko enek’iy’osungyak’ende en’ili bona lose, bamufola, iy’ate, Labi, oyaki mendo esik’eya? 26Yesu amakutwela, ate, Solosolo, solosolo, lakosumol’ino, ino bompona, efa iacin’oka benaki ndembi: bompona lacina enek’in’olaka mampa ko bokindaki liota. 27Botakambake lacin’ena toma tonateeha: bokambaka lacin’eho boate toma tonatoyalama nko njalama nk’ena liiko lonelofakale; nko toho tatongi Bon’on’oto okof’ino; lacin’oka Bafango, nko Yakomba, amila ndembi enande eneyal’ende. 28Iyo bamufola, iy’ate, Yoi linaling’is’oila lika nai, lacina tokambe bikambwa bina Yakomba? 29Yesu amakutwela, ate, Ekambwa ena Yakomba nd’ene: Bimedy’ende onoki’nd’otomaka. 30Iyo bamufola, Mbo ndembi enakamb’e lacina tene ko tokimedya eka nai? Ekambwa enekamb’e eka nai? 31Bafango’aniso balaki mmana ena sengelenge; yok’onoki yoi otengamaka, Amafa mampa ena loola, lacina bale. 32Yesu amasumola, ate, Solosolo, solosolo, lakosumol’ino, Mosi. atakof’ino inampa eho ena loola: Bafango’onami ayakof’ino ma mpa ena solosolo ena loola. 33Lacina mampa ena Yakomba end’oho onokita ena loola, ko ayafa baise loko liiko. 34Iyo bamosumola, Mbo Nkolo, otofe mampa eho bina l’ina. 35Yesu amasumola, ate, Emi nde nde mampa ena liiko: onoya eneyal’emi afokaki njala tu, ko ononjimedya afokaki mposa tu. 36Koko, yok’onoki’m’okosumolaka, bomonjena, koko bofimedya tu. 37Bahatu banampa Bafango’onami bangoya eneyal’emi; ko ende onoya eneyal’emi, mpiitanya tu.

38Lacin’emi moya ena loola, efa lacina njile eango enamamene: moya lacina njile eango enande onontomaki. 39Ko eango enande onontomaki nd’ene: lacina mpungya nko l’omoko ona baho banaki’nd’ompaka, koko lacina njaetole nk’ahatu en’ina bon’esimbelo. 40Koko eango ena Bafango’onami nd’ene: lacina boto l’oto onena Bona ko onomimedya, aate liiko lonelofakale, ko nongeetol’ende en’ina bona nsimbo.

41Nkwaho Ba-Yuda baoninganinga lacin’enande, eneki’nd’oilaka, ate, Emi nde nde mampa enekitaki ena loola. 42Baila, Mbo one afayali Yesu, bon’ona Yosefa? Teya bafango’onande la nyango enande. Iya, ait’otenda, ate, Nkitaki ena loola, bosamb’oya? 43Yesu amakutwela, ate, Botaninganingake eneyal’inoamene. 44Efan’oto oninya liya eneyal’emi, yengoko Bafango onontomaki amosuma, ko nongeetol’ende en’ina bona nsimbo. 45Yoi limotengama en’ekanda ben’asumoli, Iyatu bangolakama la Yakomba. Yok’oho boto l’oto onolofamela Bafango, ko onononganya l’ende, aoya eneyal’emi. 46Efa lacin’oka boto ayali onenaki Bafango, umola nk’ende onoya eneyali Yakomba, ende amena Bafango. 47Solosolo, solosolo, lakosumol’ino, Ononjimedya aata liiko lonelofakale. 48Emi nde nde mampa ena liiko. 49Bafango’anino balaki mmana ena sengelenge, ko bawaki: 50ene nko mampa eneyakite ena loola, lacin’eho boto ale mampa eho, ko afawu. 51Emi nde nde mampa eneyaike, enekitaki ena loola; nko boto ala mampa ene angika nko mbika locela; koko mampa enengi’m’ofa nko bonufo bonami, bonongi’m’ofa lacin’ena liiko lona bato bana loko bahatu.

52Lacin’eho, Ba-Yuda baatana ntango, iy’ate, Boto’one ainya litofa bonufo’onande lacina tole, bosamb’oya? 53Yesu amasumola, ate, Solosolo, solosolo, lakosumol’ino, Yomb’ino bofale bonufo bona Bon’on’oto, ko bofamele bakil’anande, bofana liiko eneyal’inoamene. 54Ende onola bonufo’onami ko amela bakil’anami, ende aata liiko lonelofakale; ko nongeetola en’ina bona nsimbo. 55Lacina bonufo’onami boyali toma tona ndaka tona solosolo, ko bakil’anami bayali emeelo ena solosolo. 56Ende onola bonufo’onami ko amel’akil’anami ayali eneyal’emi, ko l’emi eneyal’ende, nko njalama. 57Yoka bosamb’onoki Bafango onoyaike ontomak’emi, ko emi njaike lacin’ena Bafango, nk’osamb’oho boto onond’emi nko ndaka, ende angika lacin’enami. 58Ene nko mampa enekitaki ena loola; efa yok’onoki bafango’anino olaka mmana, ko bawaki; ende onola mampa ene angika nko locela. 59Atendaki baoyi’ane ena sunagoga, eneki’nd’olakaka ena Kapalanauma.

60Eneki bike bon’akili’anande ookaka baoyi’aho, baila, Mbo yoi line linde locili, oninya lilofa liho oka nai? 61Koko Yesu aofokola en’otem’onande bakili baoninganinga lacin’ena yoi liho, ko amasumola, ate, Yoi line yokopusumodya nde? 62Iya, nko bena Bon’on’oto ayilele en’edye eneki’nd’oyalak’oso? 63Onof’ato liiko nko Bolimo: bonufo bonde bototoloto; baoyi banaki’m’okosumolak’ino bayali bolimo ko bayali liiko. 64Koko bamoi’anino bayali banafimedya. Lacin’oka Yesu aeyaki ena limatsako baho banafimedya, ko l’ende onongoangela; 65koko aila, ate, Lacin’eho, mokosumol’ino, efan’oto oninya liya eneyal’emi, yengoko ende onofam’etelo l’afango’onami.

66Nkwaho bike bon’akili’anande bautwa la mbusa, ko batut’okenda l’ende laanda. 67Lacin’eho, Yesu aosumola ba-jo l’afe, ate, L’ino nkoho, bolanga bume? 68Simona Petelo amokutwela, ate, Nkolo, tocu eneyali nai? On’ise baoyi bana liiko lonelofakale nk’e; 69koko tomimedya ko tomey’oka e oyali On’oeka ona Yakomba solosolo 70Yesu aamba, ate, Ntakosona nde ino ba-jo l’afe? Ko omok’onino ayali nko satana. 71Ao tenda laein’ena Yudasa bon’ona Simona, bise Keliota, lacin’oka onangela Yesu nk’ende, ko ayaaki omoi’ona ba-jo l’afe.

Currently Selected:

Yoane 6: BBY62

Highlight

Copy