Luka 21

1Ko Yesu aenol’aiso, ko aena bato, nko batuki bana toma, bayafuse nganji iniyo en’emonyedyo ena nganji. 2Ko aena boyoto ona boweli nkoho, ona biinda mene, onila tokakota tofe meho. 3Ko aila, ate, Solosolo, lakosumol’ino, boweli’one ona biinda amolisa nganji eneleki nganji in’iyatu; 4lacin’oka bane bahatu bamolekya nganji nk’ena lituka liniyo bike; ohonde boyoto’one nk’ena biinda bonande, amolisa lituka linande lihalitu.

5Ko eneki bato’amoi otendaka lacin’ena botumba bona Yakomba, bokotua bonoki boho okombyamaka la bokombe bona baufe banaseki’okoka ko la nganji in’oeka, ende aila, ate, 6Noka, bikambwa bine binalend’ino, bina bengoya benefacikalaki lufe limoi ntalama ena liko lina lufe likina linalifafusamaki en’ase. 7Ko iyo bamufola, iy’ate, Bolaki, baoyi’ako bangilama en’esik’eya? ko ndembi lacina baoyi’ane baolama yenya eka nai? 8Ko ate, Bolendaka, botokungyama; lacina bato bike bangoya ena lina linami, ko bangila, Mbo emi nk’ende; ko, Esike emololama. Botakilake bato’aho. 9Ko eneng’in’ooka besimo ben’ita ko l’itomoko bin’okolo, botokake losomo: ekoli lacina baoyi’ane bailam’oso, koko esimbelo etay’isanga.

10Ko amalokwela, ate, Bonyanga bongokana l’onyanga, ko lifoka la lifoka; 11bililelo bina loko bingata, ko njoci ina njala l’ina nkangi ingoya en’ekala bemoi; bikambwa bina losomo la ndembi iney’okolo ingenya ena loola. 12Ohonde en’oso bon’aoyi’ane bahatu, bangokound’ino, ko bangokonyom’ino, ko bangokoleky’ino eneyali besolongano bena basunagoga ko l’en’etumba ben’enyolo, ko bangokotol’ino en’oso bona bafoka bana rois ko la gouverneurs lacin’ena lina linami. 13Baoyi’ane bangoyala eneyal’ino yoka ndembi. 14Lacin’eho, bokitsa betem’enino en’ase, lacina bofakandakanda en’oso bokotua bonong’in’okutola; 15emamene nongokof’ino bonyua ko la bomwu, ko baokyi’owe’anino bahatu bafinyaki likutola ko bafinyaki yatsa boho ntango. 16Ohonde bafango la banyango’anino, l’iy’anotwa l’ino, la bemboi, la bifili, bangokoleky’ino, ko bangoyaka bamoi’anino tu. 17Ko ino bongokama bowe l’ato bahatu lacin’ena lina linami. 18Ko bese bomoko bona lifo lin’ete’enino bofehyamaki tu. 19Bongata belimo’enino la mbitedya enino.

20Koko eneng’in’oena Yelusalema nko nsambana la beloi bena soldats, nkwaho bongey’oka eehedyo enande emololama. 21Nkwaho iy’anayali ena Yudea balotake en’angonji; ko banayali ena ntundulu enande baume meho; ko iyo banayali en’enyanga batatuake meho. 22Lacin’oka bin’ene beyali nko bina bena mbutodya ena nkele, lacin’eho baoyi bahatu banatengama bailame. 23Bino eneyal’iy’anayali la baemi, ko l’eneyali beale en’in’eho; lacin’oka bino mene bin’okolo bingenya ena loko, ko nkele eneyali bato’ane. 24Ko iyo bangokwa nko la lokula lon’ita, ko bangotolama basungu en’enyanga behetu; ko Befanda bangikamela Yelusalema, yengoko kuma bisike bina Befenda biokoka. 25Ko ndembi ingenya ina bina, l’ena ngondo, l’ena tooto; ko ena loko baoyi bana bino en’enyanga behetu; bato bangotatana lacin’en elilelo en’asi la bafukumo bana lose l’okwa. 26Bato bangotenya la losomo, ko la mbanga enalengedy’iyo baoyi’ane banayayi ena loko; lacina bikambwa bina loola bina locili bingolidyama. 27Nkwaho bangena Bon’on’oto aoya ena lilo la mpamba la bokoka mene. 28Koko enengi baoyi’ane omatsa yilama, bolenda ena liko, ko benol’ete’enino; lacina eikwelo enino eolama.

29Ko amasumola ekolanya, ate, Bolenda, bote bona liteli, la bete behetu: 30enamela beho tokasekase, inoamene bena, ko bey’oka esike ena biane emololama. 31Nk’osamb’oho, enen’ino baoyi’ane bayilame, bey’oka lifoka lina Yakomba yoolama. 32Solosolo, lakosumol’ino, eotwelo ene efumaki yengoko kuma baoyi bahatu bailama. 33Loola la loko banguma; koko bioyi’anami bafumaki tu.

34Boyolendak’inoamene, lacina betem’enino betoyehyama lacin’ena liota lina toma linalileki bike, la ndangwa l’aana, ko la bekaokando bena loko lone, ko bin’oho botokosaimodya; 35lacin’oka bin’oho bongokwela bato bahatu banatonga ena loko lohalotu, nko yok’efunwelo ena biinga. 36Koko botombanyaka ena bisike bihitu, ko boondaka beondo, lacin’eho bokolane l’elotelo en’aoyi’ane bahatu banangilama linga, ko boate emaelo en’oso bona Bon’on’oto.

37Ko bina l’ina aolak’ato en’otumba bona Yakomba l’ane; koko boco l’oco aofola, ko aocoa oyetama ena lingonji linalitangama Bilaya. 38Ko bato bahatu baoya eneyal’ende l’okulu mene en’otumba bona Yakomba lacina balofe baoyi’anande.

Currently Selected:

Luka 21: BBY62

Highlight

Copy