Matayo 26

1Eneki Yesu okadyaka litenda baoyi’ane bahatu, aosumola bakili’anande, ate, 2Ino bey’oka ena mbusa ena bin’efe elambedya en’Etelo eoya, ko Bon’on’oto angolekyama lacina ayakame en’ekulusu. 3Nkanga ina toome la bingambe bina bato baosusana en’otumba bona nkanga iyome mene onotangama Kayafa; 4ko baang’eango lacina baunde Yesu la longo, ko baoyake. 5Ko iy’ate, Ef’en’esike en’elambedya, bato batotom’etomoko.

6Eneki Yesu oyalaka ena Betania, en’otumba bona Simona on’ise’okenge, 7eneyakis’end’ase oyola toma, boyoto’omoi onoyaaki la likoko lina alabasitolo lin’auta bana mpimbo banaseki’otuya, aoy’eneyal’ende, ko aoutela baut’aho en’ote’onande. 8Eneki bakili oenaka yoi liho baolemwa, Mbo baut’ane baeha lanai? 9Baut’ane basokotekyama l’otuya bike, ko francs yofama eneyali bato beinda. 10Koko Yesu aofokola yoi liho liniyo, ko amasumola, ate, Bonyom’oyoto’one lacina nai? amonkambel’emi ekambwa en’olotsi; 11lacina bato beinda bayali l’ino bisike bihitu, koko bofambat’emi l’ino bisike bihitu. 12Eneki’nd’outelaka baut’ane ena yonge linami, autelaki baho lacin’en’eku njelo enami. 13Solosolo, lakosumol’ino, bili l’ili beneng’iy’osekodya bosimo’one bon’olotsi ena loko lohalotu, bangosumol’ato yoi line nkoho linaliki boyoto’one oilaka, yoka liofwa linande.

14Nkwaho omoi ona jo l’afe onotangama Yudasa ona Keliota, aocoa eneyali nkanga ina toome, 15amaufola, ate, Ino bongomp’emi toma toka nai, njoleky’ende eneyal’ino? Bamokoedya mpata ntuk’isaso; 16nkwaho aofon’etelo oyoleky’ende eneyal’iyo.

17En’ina bon’oso bona mampa enefana nyango, bakili baoy’eneyali Yesu, bamoufola, iy’ate, Olanga tokokoedya lacina ole elambedya en’Etelo meya? 18Ate, Bocoaka en’onyanga eneyali boto botutuma, bosumole, Noka, Bolaki ate, esike enami eolama; emi l’akili’anami tongola elambedya en’Etelo enek’e. 19Ko bakili bailaki yok’onoki Yesu oatomaka, ko baokodya elambedya en’Etelo. 20Ko eneki likolo oyelaka, aokisase ena mesa, ende l’akili jo l’afe. 21Nk’enem’iy’ola toma aila, ate, Solosolo, lakosumol’ino, omoi’onino angonjangela. 22Ko iyo baoka lokeseli mene, ko baomatsa oyufol’ende omok’omoko, iy’ate, Nkolo, onyi emi? 23Ende amakutwela, ate, Ende onilaki likasa linande l’emi ena salani, ende angonjangela. 24Bon’on’oto angocoa yok’onoki yoi otengamaka lacin’enande; koko bino eneyali boto’oho onangela Bon’on’oto! Bolotsi eneyali boto’oho yombo ende atotwa. 25Yudasa onomoangelaka aotenda, ate, Labi, onyi emi? Amosumola, ate, Nk’oko bonatend’e. 26Enem’iy’ola toma, Yesu aotamba mampa, aosak’osako, ko aokes’eho, ko aofa bakili, ate, Botamba, bolaka; ene yonge linami. 27Koko aotamb’ekala, aokanga Yakomba lokango, ko amafa, ate, Inatu bomela; 28ene bakil’anami bana lisangya lina litoto banutelama lacin’en’ato bike lacin’en’etungwelo en’aoyi’owe. 29Koko lakommol’ino, emi mpamelaki lakina basi’ane ban’emamo bena vina, yengoko bin’oho bonongi’m’omela baho ban’atoto, emi l’ino, ena lifoka lin’afango’onami.

30Ko enek’iy’oembaka lembo, baocoa ena lingonji lina Bilaya.

31Nkwaho Yesu amasumola, ate, Inatu bongonjumbela l’oco’one; lacina yoi limotengama, Nongofoma botombanyi, ko mpate in’ondongo ingofanzolama. 32Koko enengi’m’oetwa en’ewedi, nongocoa en’oso’onino ena Ngalilaya. 33Koko Petelo amosumola, ate, Kang’iyatu bakumbela, emi mpakumbelaki tu. 34Yesu amosumola, ate, Solosolo, lakosumol’e, l’oco’one kuma nkoko ena mpame eteke, ongonjangan’emi beangana besaso. 35Petelo amolokwela, ate, Kanga mbwu l’e, mpakanganaki tu. Bakili bahatu bailaki yok’osamb’oho.

36Nkwaho Yesu aoya l’iyo en’edye enetangama Ngetesemane, ko aosumola bakili’anande, ate, Bokisase mendo, yengoko emi locoa oyonda mei. 37Ko aotamba Petelo ko l’an’ana Zebedayo bafe, ko aomatsa lioka lokeseli mene, nko bolito mene bona lokeseli. 38Amasumola, ate, Botem’onami booka lokeseli bike, yoka bewedi mene; ino bomboyala mendo, botombanyaka l’emi. 39Ko enem’end’olinda isisali, aokwa en’elongi enande mbosama, kum’ayaonde, ate, Bafango’onami, yombo yoi yilamisa, il’ekala ene eume eneyal’emi; ohonde efa yoi linalang’emi, nko yoi linalang’e. 40Ko aoya eneyali bakili, ko amasungya kuma baotot’ilo, ko aosumola Petelo, ate, Botakolana nde litombanya l’emi heure emoko? 41Botombanyaka, ko boondaka, botoyatua ena losinganya. Bolimo bofafedya, solosolo; koko yonge liyali nko boolu. 42Ko aocoa lakina bocoa bon’efe, aonda, ate, Bafango’onami, yombo ekal’ene efumis’eneyal’emi yengoko lamel’eho, eango ene eilame. 43Ko enem’end’oya, amasungya lakina kuma baeci, baiso’aniyo baonyonga l’ilo. 44Ko amacika, ko aocoa, ko aonda boonda bon’esaso, nko baoyi’aho lakina 45Nkwaho aoya eneyali bakili’anande, ko amasumola, ate, Bombotota isanga, ko bofomya lifomya; lenda, heure eolama, ko Bon’on’oto angolekyama en’akasa ban’ato ban’owe. 46Bemala, tocu. Lenda, ende ononjangela aolama.

47Nk’enem’end’otenda, lenda, Yudasa, onoyaaki ena boloi bona jo l’afe, aoya, ende l’ato bike la nkula l’enganza, baotomama la nkanga ina toome ko l’ingambe bin’ato. 48Ende onomoangelaka acikelak’iyo ndembi, ate, Boto onongi’m’oleya bolumba ayali nk’ende, bounde. 49Isasanga aoya eneyali Yesu, ate, Mbote, Bolaki! ko amoleya bolumba. 50Yesu amosumola, ate, Efili, Ila yoi linaliki oyaka oyila. Nkwaho baosuka Yesu l’akasa ko bamounda. 51Koko omoi’oniyo banayaaki la Yesu aonanola likasa linande, ko aosomola lokula lonande lon’ita, aooka boombo’ona nkanga iyome, ko aokesa litoi linande pa. 52Yesu amosumola, ate, Utodya lokula lone ena ntoto; lacin’iyatu banatamba lokula lon’ita, bangowa nko la lokula lon’ita. 53Okanela nde mpaondisa Bafango’onami isanga, ko afantomele isasanga beloi bena bikima bina loola beneleki jo la befe? 54Koko yombo yok’oho, tumbe bitengelo biilama bosamb’oya? nko biho bin’il’oka ekoli lacina baoyi’ane bailame? 55Nkwaho Yesu ailaki bato’aho bik’ike, ate, Boya nde oyombund’emi nko la nkula l’enganza, yok’ato banangunda boto’ona liya? Nkisaki’ase en’otumba bona Yakomba bina l’ina oyolaka bato, ko botambunda. 56Koko baoyi’ane bahatu bamilama lacina bitengelo biniki basumoli otengak’ale biilame. Nkwaho bakili bahatu baoumbelaki, ko balotaki.

57Koko iy’anundaki Yesu bamotola eneyali Kayafa, nkanga iyome mene, eneki batengi ban’ekanda la bingambe osolonganaka. 58Koko Petelo amokila en’osana; aotua en’etenyi emoi en’otumba bona nkanga iyome, ko aokisase la police lacina aene esimbelo ena likambo line. 59Nkanga ina toome la bingambe la likita lina balimo lihalitu baokemba bato banangakola Yesu likambo lina mpoci, lacina baoyake; 60koko batasungya iyako ina mpoci, kanga bafoci bike bayaki. Koko ena mbusa bafoci bafe baoya, 61iy’ate, Boto’one ailaki, ate, Emi lehyisa botumba bona Yakomba, ko lafakisa boho en’in’esaso. 62Ko nkanga iyome mene aemala, amolokwela, ate, Ofakutole nde tu? Yoi linakoakola bato’ane lika nai? 63Koko Yesu aoyala mwi. Ko nkanga iyome amolokwela, ate, Ena lina lina Yakomba eneyaike, lakotehy’e eteho, otosumole yomb’oyali Masiya, Bon’ona Yakomba. 64Yesu amosumola, ate, Nk’oko bonatend’e; koko lakosumola, ena mbusa bongena Bon’on’oto ayakisase en’ili bona likasa y’ome lina mpamba ena Yakomba, ko ayayi en’ailo bana loola. 65Nkwaho nkanga iyome aokambola bekoto’enande, ate, Amosaiya Yakomba! tokembe lakina baakoli lacina nai? ino bomoka besao benasaiy’ende Yakomba; 66nakanel’ino? Bamokutwela, Mbo akoli l’ewedi. 67Nkwaho bamoutela nsoi en’elongi, ko bamofoma; ko bamoi bamofoma nsoola, iy’ate, 68Otosumole, e Masiya, onokofomaka oka nai?

69Koko Petelo aokisase en’etenyi emoi en’anza; ko bosali’omoi bon’oyoto aoy’eneyal’ende, ate, E oyaaki la Yesu ona Ngalilaya. 70Ko aangana en’oso bon’iyatu, ate, Ei mpeya yoi linatend’e. 71Enem’end’ofola ena mbalasai, boyoto’omoi amena, ko aosumol’iy’anayaaki meho, ate, Ko boto’one ayaaki la Yesu ona Nazaleta. 72Ko aangana lakina la nteha, ate, Ei mpeya boto’oho. 73Efan olingolingo iy’anemali meho baoy’eneyali Petelo, iy’ate, Solosolo oyali omoi’oniyo; iso tokey’e l’efodya en’etendelo ene. 74Nkwaho Petelo aomatsa litenda la besao ko la nteha, ate, Mpeya boto’oho. Ko isasanga nkoko ena mpame eekaki. 75Ko Petelo aokanedya yoi linaliki Yesu osumolak’ende, ate, Nk’eneteke nkoko ena mpame, ongonjangana beangana besaso. Ko aofola, ko aolela lilelo mene lina mposoli, lina lokeseli mene.

Currently Selected:

Matayo 26: BBY62

Highlight

Copy