Matayo 25
25
1En’esik’eho lifoka lina loola lingokolana l’ayato jo banatasongana la mpame, banambolaki mwinda iniyo, ko baocoa oyukana la nsongi ena booli. 2Bamoi’atano bayaaki la bomwu, ko bamoi’atano baindaki bomwu. 3Banindaki bomwu baotola mwinda iniyo, koko batatol’auta; 4koko bana bomwu baotola bauta ena mpoke iniyo l’ena mwinda iniyo. 5Koko enetaya nsongi isanga, baiso’an’iyatu baonyonga l’ilo, ko baotota. 6Ko ena kelekele en’oco leele lookana, Lenda, nsongi aoya, bofola, boyukane l’ende. 7Nkwaho bayato’aho bahatu baemala, ko baongya mwinda iniyo. 8Ko iy’anindaki bomwu baila iy’an’omwu, iy’ate, Botofe bauta banino bamoi, lacina mwinda iniso yolama lilimala. 9Koko bana bomwu bamakutwela, Mbo yombo bafakokaki l’iso ko l’ino! Bocoaka eneyal’iy’anateky’auta, boyosombel’inoamene. 10Nk’enem’iy’ocu osomba, nsongi aoya; ko iy’anakolana baotua l’ende en’elambedya ena nsongana; ko lokombo lokomoama. 11Ena mbusa bayato’aho bamoi baoya, Mbo Nyangetuke, Nyangetuke, otokombwele. 12Koko amakutwela, ate, Solosolo, lakosumol’ino mpakey’ino. 13Lacin’eho, botombanyaka, lacin’ino bofeya bina ko la heure.
14Engoyala yoka bosamb’onoyali boto onocoa bokita en’onyang’omoi, aelelaki baombo’anande, ko amacikela toma tonande. 15Aocikel’omoi talento itano, ko omoi talento ife, ko omoi talento emoko: boto l’oto nko toma tonatokoli l’ende; ko aocoa bokit’onande. 16Ko ende onotambaki talento itano aocoa, aotekya baongwa l’iho, ko aokitanya imoi talento itano. 17Nk’osamb’oho ende onotambaki talento ife aokitanya imoi ife. 18Koko ende onotambaki talento emoko aocoa, aocima lifoku ena loko, ko aofisa talento ena nyangetuke enande. 19Eneki elela oetaka, nyangetuke ena baombo’aho aoya, ko aala botuya bona toma l’iyo. 20Ende onotambaki talento itano aoya, aoya l’imoi talento itano, ate, Nyangetuke, oncikelaki talento itano; lenda, lokitanyaka imoi talento itano nkoho. 21Nyangetuke enande amosumola, ate, Yok’oho bolotsi e boombo bon’olotsi l’ona solosolo; omokamb’olotsi l’isisali ina toma, nongokoil’e ena lifoka lina toma bike; tuaka en’enyanga ena nyangetuke ene. 22Koko ende onotambaki talento ife aoya, ate, Nyangetuke, oncikelaki talento ife; lenda, lokitanyaka imoi talento ife nkoho. 23Nyangetuke enande amosumola, ate, Yok’oho bolotsi, e boombo bon’olotsi l’ona solosolo; omokamb’olotsi l’isisali ina toma, nongokoil’e ena lifoka lina toma bike; tuaka en’enyanga ena nyangetuke ene. 24Koko ende onotambaki talento emoko aoya, ate, Nyangetuke, nkeyak’oka oyali boto’ona locili, ononukola enetafus’e, ko onosusanya en’edye enetafanzafanz’e; 25koko nkoangaki, ko ncoaki oyofisa talento ene ena loko; ndaka, toma toneamene. 26Ko nyangetuke enande amokutwela, ate, E boombo bon’owe l’ona mponya, oeyak’oka emi lanukola en’edye enetafus’emi, ko lasusanya enetafanzafanz’emi; 27tumbe oilaki toma tonami ena banque, lacin’eho en’eyelo enami ntambe toma tonamamene la mpudya. 28Lacin’eho, bokumole talento eho, ko bof’ende onoyali la talento jo. 29Bamoi bangofama eneyali boto l’oto onata, ko angata bike la mpudya; ohonde onofaate, bangokumol’ende nko baho banat’ende. 30Koko bofusa boombo oninda nkita en’ilima en’anza. Meho engata nko lilelo lina mposoli la nkenyanya en’aino.
31Enengi Bon’on’oto oya l’okonde’onande, ende la bikima binande bihitu, angokisase en’ieko ina bokonde’onande. 32Ko bato ban’enyanga behetu bangosusanyama en’oso’onande; ko angakambwanya, yoka bosamb’onakambwanya botombanyi mpate la nta; 33ko angila mpate en’ili bona likasa linande y’ome, koko nta en’ili bona likasa y’ooli. 34Koko lifoka lina roi angilel’iyo banayali en’ili bona likasa y’ome, ate, In’anasakelama bosako bon’afango’onami, boyaka boyosangole lifoka linalikodyamaki eneyal’ino nk’en’enunwelo ena loko; 35lacin’emi njokaki njala, ko bompaki toma; njokaki mposa, ko bompaki basi; njaaki bofenda, ko bontueyaki; 36njaaki bolumbulumbu, ko bondotsaki; mbwaki nkangi, ko bonkambyaki; njaaki en’otumba bon’enyolo, ko boyaki eneyal’emi. 37Koko bana mbongi bangokutwela, iy’ate, Nkolo, tokenak’e kum’oyoke njala ko tokofaki toma, ko oyoke mposa ko tokofaki basi, esik’eya? 38Tokenak’e bofenda ko tokotueyaki, ko bolumbulumbu ko tokolotsaki, esik’eya?
39Tokenak’e kum’oyawu nkangi ko l’en’otumba bon’enyolo ko toyaki eneyal’e, esik’eya? 40Lifoka lina roi angakutwela, ate, Solosolo, lakosumol’ino, yok’onok’in’oilelaka omoi’ona bakune’ane banami oninda lokumo, nk’osamb’oho bonjilelak’emi. 41Nkwaho angilela iy’anayali en’ili bona likasa y’ooli, ate, In’anamomama bomomo, buma eneyal’emi, bocoaka ena nkoi inifalimale tu inikodyama lacin’ena Satana ko la bikima binande. 42Lacin’emi njokaki njala, ko botampa toma; njokaki mposa, ko botampa basi; 43njaaki bofenda, ko botantueya; njaaki bolumbulumbu, ko botandotsa; mbwaki nkangi, ko njaaki en’otumba bon’enyolo, ko botanjengya. 44Nkwaho iyo bangamba, iy’ate, Nkolo, tokenak’e kum’oyawu njala la mposa, ko l’ofenda, ko l’olumbulumbu, ko la nkangi, ko l’en’otumba bon’enyolo, ko totakokambya, esik’eya? 45Ko ende angakutwela, ate, Solosolo, lakosumol mo, yok’ino botilel’omoi ona bato’ane, nk’oninda lokumo, nk’osamb’oho botanjilel’emi. 46Bane bangocoa ena nsisodya enefasile; koko bana mbongi bangocoa ena liiko lonelofasile.
Currently Selected:
Matayo 25: BBY62
Highlight
Share
Copy
Want to have your highlights saved across all your devices? Sign up or sign in
Bokanda Bona Yakomba Bon’ototo © Alliance Biblique de la R. D. Congo, 1962
