Malako 12
12
1Koko Yesu aomatsa litenda l’iyo la basai. Ate, Boto afusaki lisala lina bekoli bena vina, ko aosambanya liho l’okako, ko aocima lifoku lacin’en’eamelo ena bemamo, ko aofak’otumba yok’eliko ena ntale, ko aocikela batombanyi lisala liho, ko aocoa bonyang’okina. 2Koko en’esike Koko Yesu aomatsa litenda l’iyo la basai. Ate, Boto afusaki lisala lina bekoli bena vina, ko aosambanya liho l’okako, ko aocima lifoku lacin’en’eamelo ena bemamo, ko aofak’otumba en’emamo, aotoma boombo eneyali batombanyi, lacina baofe liondo lina bemamo bena lisala. 3Koko iyo bamounda, bamofoma lofomi mene, ko bamoutodya bototoloto 4Ko lakina aotoma boombo bomoi eneyal’iyo; ko baofusel’ende baufe, ko bamooka mpota en’ote, ko bamilela bokotua bona nsoi mene. 5Ko lakina aotoma boombo’omoi, ko bamoyaka tutu; la bamoi bika nk’osamb’oho: baofom’amoi, ko baoyak’amoi. 6Ayaaki l’omoi, nko bon’onande ona mpame ona nganji mene; amotoma nk’ende eneya l’iyo ena mbusa, enem’end’oila, ate, Bangofika bon’onami. 7Koko batombanyi’aho baotendelana, iy’ate, One nk’osangoli; boyaka, toyake, ko lisango lingoyala nko liniso. 8Ko bamounda, ko bamoyaka, ko bamooka nko mboka ena mbiolo ena lisala lina bekoli bena vina. 9Mene lisala lina bekoli bena vina angil’oya? Angoya, ko angehya batombanyi’aho, ko angof’ato’amoi lisala liho. 10Ino botaanda nde yoi line en’ekanda bena Yakomba:
Lufe linaliki bafaki okilaka
Limoyalama lin’oso mene lina likoka;
11Ekambwa ene eoya nk’eneyali Yawe,
Ko eyali ekambwa ena mpefa en’aiso’aniso.
12Ko iyo baofon’etelo oyounda, koko baanga bato; lacin’oka baofokol’oka Yesu aokolanya ekolanya ene lacin’eniyo. Ko bamocika, ko baocoa.
13Ko baotoma eneyali Yesu bamoi ban’afalusi la Ba-Elode, lacina baong’ende longo l’aoyi’anandamene. 14Ko enek’iy’oyaka, bamosumola, iy’ate, Bolaki, iso teya e oyali solosolo, ko ofakanela boto la likai, lacina ofalende mbiolo en’oto: mbo, enafut’iso mpuci ena Kaisala, yoi liho likoli, yombo lifakoli? 15Yombo tongofuta, yombo tofafute? Koko Yesu aofokola itungya ina betem’eniyo, ko amasumola, ate, Ino bommek’emi lanai? bonjele franc, njene. 16Baoya l’eho, ko amaufola, ate, On’ise efoya ene ko l’etengelo ene oka nai? Iy’ate, Nko Kaisala. 17Ko Yesu amasumola, ate, Bofaka Kaisala toma tona Kaisala, ko bofaka Yakomba toma tona Yakomba. Ko baofefa l’ende nko mpefa.
18Ko Ba-Sadoke, nk’iy’anil’oka efan’eetwelo en’ewedi, baoy’eneyal’ende, ko bamufola, iy’ate, 19Bolaki, Mose atotengelaki, ate, Yombo botoolo’on’oto aowa, ko booli aciki ena mbusa enande koko afan’ana, bakune atambake booli’oko, lacina aotele botoolo bana. 20Mpame iyaaki nsambo, botoolo l’akune. Ona ngolo aosong’ooli, ko aowa kum’atot’ona; 21ko on’afe aotamba booli’oko, ko aowa kum’ende nkoho atot’ona; ko l’on’asaso nk’osamb’oho; 22ko iyo nsambo baotamb’ooli’oko, ko batacik’ana. Ko ena mbusa mene boyoto nkoho aowa. 23En’eetwelo enengi bato oetwa en’ewedi, boyoto’oko angoyala booli’ona nai? lacin’oka iyo nsambo baotambaki booli. 24Ko Yesu amakutwela, ate, Ncina ena liunga linino, efa nde enefanongany’ino bitengelo bina Yakomba ko la mpamba ena Yakomba? 25Lacin’oka enetwa bato en’ewedi bafasonge baali ko bafatome bana ena liala, ohonde bayali yoka bikima biniyali ena loola. 26Koko ena likambo lin’eetwelo eniy’anawaki: ino botaanda nde en’okanda bona Mose, en’osimo bon’itete, bokotua bonoki Yakomba otendaka l’ende, ate, Emi nko Yakomba ena Abalayama, la Yakomba ena Isaka, la Yakomba ena Yakobo? 27Ende afayali Yakomba ena banawaki, ohonde Yakomba eniy’anayaike. Ino bounga nko mbunga mene.
28Ko botengi’omoi aoya, ko eneki’nd’ookaka ntango miyo, ko amey’oka Yesu amolakutwela la bomwu, aufola Yesu, ate, Boeka bon’oso mene boka nai? 29Yesu amokutwela, ate, Boeka bon’oso mene boh’one: Ba-Yisalaele bolofaka; Yawe Yakomba eniso ayali Yawe nk’ende kei; 30ko oka Yawe Yakomba ene nganji l’otem’one bohotu, ko l’olimo’one bohotu, ko la lokanyi lone lohalotu. 31Ko boeka bon’efe boh’one: Oka onoli l’e nganji, yoka bosambo bonayook’e eamene nganji. Efan’okin’oeka bonoleki bene. 32Botengi amosumola, ate, Solosolo, Bolaki, omotenda nk’olotsi enil’e oka Yakomba ayali nk’emoko, efan’okina, nsimbo nk’ende; 33koko nk’en’oka boto aoka Yakomba nganji l’otema bohotu, ko la lokanyi lohalotu, ko la locili lohalotu, ko aoka onoli l’ende nganji yoka bosamb’onayook’ende endamene nganji: bokotu’oho boleki mbeka ihatu ina ntumba ko la nganji ihatu. 34Eneki Yesu oenak’oka amokutola la bomwu, amolokwela, ate, E ofan’osana la lifoka lina Yakomba. Koko ena mbusa efan’oto kongoufolaki Yesu bufo tu, lacin’oka baangaki.
35Koko eneki Yesu olakaka en’otumba bona Yakomba, aotenda, ate, Batengi ban’ekanda bail’oka Masiya ayali bon’ona Dawidi bosamb’oya? 36Lacina Dawidi mene ailaki la Bolimo bon’olotsi, ate,
Yawe asumolaki Nkolo enami,
Kisase en’ili bona likasa linami y’ome
Yengoko enengi’m’oila baokyi’owe’ane limbolongo lina bakak’ane.
37Dawidi mene amolotanga Nkolo: ayali bon’onande bosamb’oya? Ko bik’ike bon’ato baolofa Yesu l’ekiko.
38Ko amasumola ena lilako linande, ate, Boongya lilota bokotua bon’atengi ban’ekanda, nk’iy’analanga baete la bekoto ben’etale, ko balanga baesame la beeso en’ekala bena mbakala; 39ko balanga nkici inay’oso mene ena sunagoga, ko la bikisel’ase bin’oso mene ena bilambedya; 40banakumola bayato ban’eweli betumba, ko bayaonde beondo ben’etale l’okotua bonofana cilili: ekoiyelo eneng’iy’okoiyama likambo engoleka nko ndeka.
41Koko Yesu aokisase mbolimboli l’emonyedyo ena nganji, ko aolenda bokotua bonoki bato oilaka nganji en’emonyedyo. Ko batuki bana toma baila francs bike meho; 42koko boweli’omoi onindaki toma aoya, ko aofusa tokakota tofe meho—toho tofe mbambana nk’etenyi ena likota kei. 43Koko eneki Yesu oelelaka bakili’anande amasumola, ate, Solosolo lakosumol’ino, boweli’one oninda toma amofusa nganji eneleki nganji iniy’atu banilaki nganji en’emonyedyo ena nganji; 44lacin’oka iyatu baofodya nk’ena lituka liniyo; ohonde ende aofodya ena biinda bonande bona toma nko toma tonatoki’nd’oataka tohatotu, nko lituka linande lihalitu.
Currently Selected:
Malako 12: BBY62
Highlight
Share
Copy
Want to have your highlights saved across all your devices? Sign up or sign in
Bokanda Bona Yakomba Bon’ototo © Alliance Biblique de la R. D. Congo, 1962
