Malako 3
3
1Koko atuaki lakina ena sunagoga; ko boto’omoi ayaaki meho onoyaaki la likasa lineyonyelala. 2Ko bamotakamela, yombo angikya boto’oho en’in’ona Sabata, lacina baat’etelo lifot’ende likambo. 3Ko aosumola boto onoyaaki la likasa lineyonyelala, ate, Emala ena ntoto. 4Ko amaufola, ate, La njila en’olotsi en’in’ona Sabata, la njila en’owe; la mbikya la njaka: ekambwa enekoli la boeka bona Sabata eya? Koko iyo baoyala nko mwi. 5Amalenda la nkele, lacin’oka aokaki lokeseli lacin’ena bocilingitano bon’etem’eniyo, ko aosumola boto’oho, ate, Nanola likasa line. Ende aonanola liho, ko likasa linande yoika, ko yoyalama yok’onoki limoi oyalaka. 6Koko Bafalusi baofola, ko isasanga iyo la Ba-Elode baocoa ena lokuko, ko bamoangel’eango, bokotua bonong’iy’oyak’ende.
7Koko Yesu aumaki, ende l’akili’anande, ko baocoa ena lose; ko bik’ike bon’ato bana Ngalilaya bamokila nko meho; koko bik’ike bon’ato bana Yudea, 8l’ana Yelusalema, l’ana Edome, l’an’ili bona Yoladane, ko l’amoi bana Tula la Sidona, enek’iy’ookaka bikambwa biniki’nd’okambaka, baoy’eneyal’ende. 9Ko aosumola bakili’anande baonde mbolimboli la boatu bon’osali, lacina bato batokama ekami eneyal’ende. 10Ende aikyaki bato bike; ko la ncin’eho iyatu banayaaki la nkangi baokama eneyal’ende lacina baosuke. 11Ko bafoi bana nsefo enek’iy’oenak’ende baokwa en’oso’onande, ko baololua, iy’ate, E oyali Bon’ona Yakomba. 12Koko amafekya la locili mene, bateeyanyake l’ato.
13Ko ailela ena lingonji, ko aelela eneyal’ende banaki’nd’olangaka, ko baocoa eneyal’ende. 14Ko aosona jo l’afe, lacina bayale l’ende, ko lacina atome bacu osekodya bosimo, 15ko baate locili lacina bafodya bademona. 16Bane jo l’afe nko Simona, onoki’nd’ofaka lina lika Petelo; 17ko Yakobo bon’ona Zebedayo, la Yoane onotwaki l’ende; amaf’iy’afe lina lika Boanelenge, nko Ban’ana Likungola; 18ko la Andelo, la Filipo, la Balutolomayo, la Matayo, la Toma, la Yakobo bon’ona Alafayo, la Tadayo, la Simona Zelote, 19la Yudasa ona Keliota onoangelaki.
Ko baoya en’otumba. 20Ko bik’ike bon’ato baosolongana lakina, ko lacin’eho, bataata nko l’elelo ena toma. 21Eneki bifili binande ookaka, baoya oyounda, lacin’oka baila, iy’ate, Aolowa. 22Ko batengi’aho ban’ekanda banayaki ena Yelusalema baila, iy’ate, Ayali la Balazebuba, ko ayafodya bademona nko la locili lona lifoka lina bademona. 23Koko amaelela eneyal’ende, ko amasumola l’asai, ate, Satana afodyisa Satana bosamb’oya? 24Ko yombo lifoka yokambwana liho mene, lifoka liho lifalingalinga likwa; 25ko yombo bomboi bokambwana boho mene, bomboi’oho bofalingalinga lisila. 26Yombo Satana aokan’ita l’endamene, endamene amoyokambola, ko afalingalinga likwa: aosila nkwaho. 27Efan’oto onoyokela en’otumba bon’oto’ona locili oyehya toma tonande, yengoko akakela boto’ona locili en’oso; amokakela, ko ena mbusa aehya toma tonande. 28Solosolo lakosumol’ino, bato bangikyama en’aoyi’owe bahatu, ko l’ena besao benasaiy’iyo; 29ohonde onongosaiya Bolimo’on’olotsi afatungwaki ena yoi liho bisike bihitu: ayali nk’en’ekoiyelo ena likambo bisike bihitu. 30Atendaki baoyi’ane lacin’enek’iy’oilaka, iy’ate, Ayali la lifoi lina nsefo.
31Ko nyango enande l’akune’anande baoya; baemala en’anza, ko bamotomela yoi, bameelela. 32Ko bik’ike bon’ato bamosambanya, nko nkisase, ko bamosumola, iy’ate, Lenda, nyango ene l’akune’ane bayali en’anza, bayakofon’e. 33Ende amakutwela, ate, Onoyali boyango’onami oka nai? ko bakune’anami baka nai? 34Ko eneki’nd’olendaka baho banosambanyaki, aila, ate, Lenda, boyango’onami l’akune’anami bah’ane. 35Boto l’oto onongila baoyi banalanga Yakomba, ende ayali bakune’onami, la mbangela enami, l’oyango’onami.
Currently Selected:
Malako 3: BBY62
Highlight
Share
Copy
Want to have your highlights saved across all your devices? Sign up or sign in
Bokanda Bona Yakomba Bon’ototo © Alliance Biblique de la R. D. Congo, 1962
