Malako 4
4
1Ko amatsaki lilak’ato lakina en’oseleka bona lose; ko bik’ike bon’ato baosusana eneyal’ende; ko la ncina eho aoyokela en’atu, ko aokisase nko meho ena lose, ko bato bahatu bayaaki en’okili en’oseleka bona lose. 2Ko amalaka baoyi bike nko l’asai; ko amasumola ena lilako linande, ate, 3Bolofaka; noka, bofusi aocoa oyofusa beona; 4ko enem’end’ofusaka, beona bemoi beokwa nk’ena mboka, ko mpulu ina liko yoya ko yotona beho. 5Ko bemoi beokwa en’edye ena baufe, ko betaata bekongo bike meho; isasanga beho beomela, lacina enetaata beho bekongo bena nginda; 6koko eneki bina oalaka, beho beonyelala, ko beofanga, lacina enetaata beho beluo. 7Ko bemoi beokwa ena ntoto ena beenge; ko beenge beomela, ko beoyaka beona la nkaka, ko betoota bemamo. 8Ko bemoi beokwa en’ekongo bena lilemwa, ko beota bemamo; beomela ko beofula, ko beota bemoi ntuk’isaso isaso, bemoi ntuk’otoa ntuk’otoa, ko bemoi bokam’okama. 9Ko amasumola, ate, Onoyali l’atoi lacina aoke, aongya lilofa.
10Ko eneki’nd’oyalaka nk’ende kei, iy’anosambanyaki l’akili jo l’afe bamoufola ncina ena basai baho. 11Ko amasumola, ate, Bofisafisa bona lifoka lina Yakomba bomokofam’ino; ohonde eneyal’iyo banayali en’anza baoyi bahatu bailama nko l’asai; 12lacina Balendeela nko ndenda, ko bafene; Balofamela nko ndofamela, ko bafanonganya ncina; Batongokengwa, ko batongoyikyama en’aoyi’owe’aniyo. 13Koko amalokwela, ate, Botanonganya nde lisai line? Bongononganya basai bahatu bosamb’oya? 14Bofusi aofusa yoi. 15Bane nk’iyo banayali ena mboka enafusama yoi; koko enem’iy’ookaka, Satana aoya isasanga oyakumol’iyo yoi linalifusi en’etem’eniyo. 16Nk’osamb’oho, banafusama en’edye ena baufe bah’ane: en’ok’iyo yoi, isasanga batamba liho l’ekiko; 17koko bafana boluo eneyal’iyoamene, ko bafalingalinga bike; koko ena mbusa, enaya bino la binyomelo lacin’ena yoi, isasanga baokumba. 18Ban’amoi baofusama ena ntoto ena beenge. Baho nk’iy’anoka yoi, 19ko bekandokando ben’akambo bana loko lone, la losinganya lona lituka, la mposa ina baoyi’akina, baotua, ko baehya yoi la nkaka, ko lifote bemamo. 20Koko ban’amoi banafusama en’ekongo bena lilemwa nk’iy’anoka yoi, ko batamba liho, ko baot’emamo, omoi yoka ntuk’isaso ntuk’isaso, omoi ntuk’otoa ntuk’otoa, ko omoi bokam’okama.
21Ko amalokwela, ate, Noka, boto aoya nde la moinda lacina amony’eho en’ase’a litungu? yombo en’ase’a ntange? Efa nde lacina amony’eho en’ilelo ena moinda? 22Efana yoi linalifisi linalifafiswaki linga; ko efana yoi lin’ofisafisa linalifenyaki fololo linga. 23Yomb’oto ayali l’atoi lacina aoke, aongya lilofa. 24Ko amasumola, ate, Boongya lisisola baoyi ban’ok’ino. Lelelo lonakody’ino longokodyama eneyal’ino lakina, ko bangokofuedy’ino loho. 25Bamoi bangofam’ende onata; koko bangokumol’ende onofaate nko baho banat’ende.
26Koko ailaki, ate, Lifoka lina Yakomba liyali yoka boto onofusa beona en’ekongo; 27kang’aetama, kang’aetwa, l’oco l’ane, beona beomela, ko beofula, kang’endamene afanonganya bokotua bonamela beho. 28Loko mene loot’emamo: En’oso nko lokase, ena mbusa nko bayeye, ko ena mbusa nko bemamo ena bayeye. 29Koko enatunda bemamo, isasanga aotoma bongwangwa meho, lacina esike en’enukwelo emoyela.
30Koko ailaki, ate, Tongokolanya lifoka lina Yakomba la nai? ekolanya enakolana la liho eka nai? 31Liyali yoka boona bona sinapi: enafusama boho ena loko, boho boyali nko iyonona inileki beona behetu beneyali ena loko l’isalisali; 32koko enafusam’oho, boho bomela, ko boleki ndunda ihatu l’okolo, ko bomela bitange bin’okolo; ko mpulu ina liko yoya oyotonga ena ncici ena sinapi eho.
33Ko amasumola yoi nko l’asai bike ban’okotu’oho, nko lilako linakolana l’iyo lacina baoke. 34Amalaka l’asai kei; koko aosakitwela bakili’anande baoyi bahatu, nk’ende l’iyo kei.
35Nko bin’oho, eneki likolo oyelaka, amasumola, ate, Toleke lose. 36Enek’iy’otongolaka bato’aho bik’ike, bamotola nk’en’atu bonoki’nd’oyalaka. Ko biatu bimoi biyaaki l’ende nkoho. 37Ko ngembe ena nkolo mene eokumba, ko bafukumo ban’akolo baofoma boatu, ko boho bomatsa lilola l’asi. 38Endamene ayaaki en’otungu bon’atu, ayetame en’iyonga; ko bameetola, bamosumola, iy’ate, Bolaki, toyawu: ofoke nde lokeseli? 39Koko enem’end’oetwa, aofekya lofongo, ko aosumola lose, ate, Ambya, yala mwi. Lofongo losilaki nkaho, ko lose loyala nko mwi mene. 40Ko amaufola, ate, Ino boanga lanai? Bofan’imeedyo lacina nai? 41Ko baoka losomo mene, ko baufolana, Mbo boto’one and’oya? Le lofongo le lose baimedya nk’ende.
Currently Selected:
Malako 4: BBY62
Highlight
Share
Copy
Want to have your highlights saved across all your devices? Sign up or sign in
Bokanda Bona Yakomba Bon’ototo © Alliance Biblique de la R. D. Congo, 1962
