Malako 5
5
1Koko baoyela en’ili bona Lose, en’onyanga bona Ba-Ngandala. 2Eneki’nd’otefwaka en’atu, isasanga boto onoyaaki la lifoi lina nsefo aoya ena nketa oyukana l’ende. 3Aataki litonga linande nk’en’edye ena nketa, ko efan’oto oninya litungyis’ende, efana nko l’enyolo bena locili mene; 4lacin’oka baokakelaki’ale la bifoke ko l’enyolo bekakela bike, koko akesaki benyolo pa, ko aolaki bifoke nko mbola, ko efan’oninyaki licicimody’ende tu. 5Koko bina l’ina, l’ane l’oco, ayaaki en’angonji l’ena nketa, ayalolua ko ayokot’endamene l’aufe. 6Koko eneki’nd’oenaka Yesu en’osana, aocoa la laango, ko amoosamela, 7ko aololua la lofoso lona lokolo, ate, Emi l’e, Bon’ona Yakomba Eneleki nko Ndeka, tond’oya? Lakoonda ena lina lina Yakomba tanjenyake bino! 8Lacin’oka Yesu aosumolaki, ate, E lifoi lina nsefo, fola eneyali boto’one. 9Ko amoufola, ate, Lina line lika nai? Amokutwela, ate, Lina linami lika Bik’ike, lacin’iso tond’ike. 10Ko amoonda mbonda mene ataumolake en’onyang’oho. 11Botonga bona nsombo bon’okolo mene boyaaki meho ena lingonji, iyale toma. 12Ko bademona bahatu bameelela mbila, Mbo ototome eneyali nsombo, tatua eneyal’iyo. 13Koko Yesu amafa etelo; ko enek’iy’ofolaka, bafoi bana nsefo baotua eneyali nsombo, ko botonga bokilimwa ena lingonji la mbango, ko bokwela lose; nsombo iyaaki yombo nkoto ife, ko yowa ena lose. 14Ko iy’analeyaki nsombo toma baolota, ko baosekodya yoi liho en’ongili ko l’en’onyang’oniyo bohotu. Ko baoya oyena yoi linilamaki. 15Ko baoy’eneyali Yesu, ko baena boto onoyaaki l’ademona bike, ayakisase, ayalote bisenda, ko lokanyi lonande lomonongana nk’olotsi; ko iyo baoka losomo. 16Ko iy’anenaki ekambwa enekambamaki bamasumola bokotua bonoki yoi oilamaka eneyali boto onoyaaki l’ademona bike, ko la yoi lina nsombo nkoho. 17Ko baomatsa yond’ende lacina aume en’onyang’oniyo. 18Ko enem’end’otalama en’atu, boto onoyaaki l’ademona amoonda lacina ayale nko l’ende. 19Koko Yesu atimedya yoi liho: amosumola, ate, Omboco’ola eneyali bato baneamene, asumole ekambwa ena nkolo mene eneki Nkolo okokambelak’e, ko l’isei iniki’nd’okookamelaka. 20Ko ende aocoa, aomatsa lisekodya ena Dekapoli ekambwa ena nkolo mene eneki Yesu okambelak’ende. Ko bato bahatu baofefa nko mpefa.
21Eneki Yesu olekaka lakina en’atu bili’ol’ei, bato bike baosolongana eneyal’ende; ayaaki nk’en’oseleka bona lose. 22Ko lenda, chef emoi ena sunagoga, lina linande lika Yailo, aoya; ko eneki’nd’oenaka Yesu, aokwa en’akak’anande, 23ko amoonda nko mbonda mene, ate, Bon’onami on’oyoto on’isisali aolama l’ewedi; lakoonda, yak’oyotadya bakas’ane eneyal’ende oyiky’ende, ko angika. 24Yesu aocoa l’ende. Ko bik’ike bon ato bamokila, ko baokama eneyal’ende.
25Ko boyoto’omoi onoyaaki la nkangi, bakil’anande baetaki mbula jo l’ife kali, 26ko aenaki bino mene la mpanji bike, ko akafaki toma tonande tohatotu, koko nkangi enande etasila: eosokwa nde nko nsokwa; 27eneki boyoto’oko ookaka lokumo lona Yesu, aambana la bik’ike bon’ato ena mbusa enande, ko aosuka bokoto’onande. 28Lacin’oka ailaki, ate, Yombo lasuka bekoto benande kei, tumbe nongika. 29Isasanga etelo en’akil’anande eosila, ko aeyaki ena yonge linande ate amolika ena nkangi enande. 30Ko isasanga Yesu aofokola en’otem’onande mpamba emofola eneyali ende, ko aohalingwa ena ntoto en’ato’aho bik’ike, ko aufola, ate, Ononsukaka bekoto’enami oka nai 31Koko bakili’anande bamosumola, iy’ate, Oena bato bik’ike bacindana l’e, ko oit’oufola nde ate, Ononsukaka? 32Koko ende aolengalenga oyena boto onilak’oho. 33Koko boyoto aoka losomo, ko ailima, lacin’oka aeyaki ekambwa enilamaki eneyal’ende, ko aoya, aokwa en’oso’onande, ko amosumola yoi lihalitu fololo. 34Ko Yesu amosumola, ate, Bona, imeedyo ine imokiikya; ombocoa la mwi, ikaka ena nkangi ene.
35Nk’enem’end’otenda, bato’amoi baoya en’otumba bona chef ena sunagoga, baila, iy’ate, Bon’one on’oyoto amowa; osengenya Bolaki lakina lacina nai? 36Koko eneki Yesu ookaka yoi linalik’iy’otendaka, aosumola chef ena sunagoga, ate, Taangake; yala nko l’imeedyo. 37Koko atimedya bato’amoi baokile, yengoko Petelo, la Yakobo, la Yoane onotwa l’ende, nk’iyo kei. 38Ko baoyela en’otumba bona chef ena sunagoga; ko aosungya etomoko mene meho, bato bike banayalele ko bayafome befwi. 39Eneki’nd’otuaka, amasumola, ate, Ino botom’etomoko, ko bolela, lacina nai? Bonome atawu: aotota nk’ilo. 40Ko iyo bamoseka nko tolo. Koko eneki’nd’afodyaka, iyatu, aotamb’afango la nyango en’onome, ko l’iy’anayaaki l’ende, ko aotua en’etenyi en’eci bonome. 41Ko aosuka bonome ena likasa, ko amosumola, ate, Talita kumi, yoi linaliyali yoka, Bonome on’oyoto, lakosumola, Etwa. 42Ko isasanga bonome on’oyoto aemala, ko aokenda. (Mbula inande yokwa jo life.) Ko baofefa nko mpefa mene. 43Ko amafekya la locili mene, yoi line liteyanake l’oto’omoko; ko amasumola bayofe toma tona ndaka.
Currently Selected:
Malako 5: BBY62
Highlight
Share
Copy
Want to have your highlights saved across all your devices? Sign up or sign in
Bokanda Bona Yakomba Bon’ototo © Alliance Biblique de la R. D. Congo, 1962
