Malako 6
6
1Yesu aumaki meho, ko aoya en’onyang’onandamene; ko bakili’anande bamokila. 2Ko eneki bina bona Sabata oyelaka, aomatsa lilak’ato ena sunagoga; ko bike bon’ato banomookaka baofefa, Mbo boto’one aata baoyi’ane meya? ko bomwu bone bonofam’ende boka nai? ko bikambwa bine bina mpefa bineyakambame l’akas’anande biyali’oya? 3One afayali nde charpentier, bon’ona Malia, ko botoolo bona Yakobo, la Yose, la Yuda, la Simona? Ko bambangela banande bafayali nde mendo enek’iso? Ko baolemwa lacin’enande. 4Koko Yesu amalokwela, ate, Bosumoli afinde lokumo, yengoko en’onyang’onandamene ko l’eneyali bais’ola banandamene ko l’omboi’onandamene. 5Ko ende atakambisa ekambwa ena nkolo meho, yengoko ntadya ena bakas’anande eneyali boto’omok’omoko onokaki nkangi, ko amaikya. 6Ko aofefa lacina enetaat’iyo imeedyo.
Ko aoselasela bili l’ili en’enyanga, ayalake bato.
7Ko aelela ba-jo l’afe eneyal’ende, ko aomatsa 8yatoma bafe’afe; ko amafa lifoka eneyali bafoi bana nsefo. Ko amasumola batatolake toma ton’okita, yengoko bonganza kei—efana mampa, efana ntombe, efana francs en’okoli; 9balote nko tombwaku kei, ko batatolake bekoto befe. 10Ko amasumola, ate, En’okala bon’etaketaka bonotua ino en’otumba, boyala nko meho yengoko eneng’in’ouma en’okal’oho. 11Nk’en’oka bato’amoi bafakosangel’ino ko bafakolof’ino, eneng’in’ouma meho botitola mpucifuci iniyali en’ase ban’akak’anino yoka ndembi eneyal’iyo. 12Ko iyo baocoa, ko baolak’ato lacina baumbele baoyi’owe’aniyo. 13Ko baofodya bademona bike, ko baohinya bike bon’ato banawaki nkangi la bauta, ko bamaikya.
14Koko Elode, lifoka lina roi, aoka baoyi’ane, lacin’oka lina lina Yesu likumyamaki bike; ko aila, ate, Yoane Bini amoletwa enek’anawaki, koko ncina eneyakambame bikambwa bine bina mpefa eneyal’ende nd’eho. 15Bamoi, Mbo and’Eliya; ko bakina, And’osumoli yok’omoi ona basumoli. 16Koko eneki Elode ookaka, aila, ate, One nko Yoane onoki’m’okesak’ote, amoletwa enek’anawaki. 17Lacin’oka Elode mene atomaki’ale ko aundaki Yoane, ko aotungyaki en’otumba bon’enyolo, lacin’ena Elodia booli’ona bakune’onande Filipo, lacina Elode aosongaki yoka booli’onande. 18Lacina Yoane asumolaki Elode, ate, Nk’otamba booli’ona bakune’one, osondola boeka. 19Lacin’eho, Elodia aokaki Yoane bowe, ko alangaki aoyake; koko atinya, 20lacina Elode aangaki Yoane, aeyaki’oka ayaaki boto’ona mbongi l’ona solosolo. Aotombanyaki bolotsi, ko eneki’nd’ookaka baoyi’anande akandakandaki bike, ko aolofaki l’ekiko. 21Ko eneki esike enakolana oyelaka, nko bina bonoki Elode ofumbak’elambedya yoka mbofodya en’eotwelo enande, aelelaki bingambe binande, ko la capitaines ko la bato ban’oso bona Ngalilaya en’elambedya eho. 22Ko bon’ona Elodia bon’oyoto aotua, ko aina boina, ko aatela Elode l’iy’anakisak’ase l’ende ekiko; ko lifoka lina roi aosumola boyoto’oho on’onome, ate, Onjufole iyema in’etaketaka inalang’e, ko nongokofa. 23Ko amoteela lisangya, ate, Iyema in’etaketaka inanjufol’e, nongokofa, kang’iho iyali etenyi ena lifoka linami. 24Ko aofola, ko aufola nyango enande, ate, Iyema iningi’m’oufola ika nai? Nyango ate, Bote’ona Yoane Bini. 25Isasanga aotua la mbango eneyali lifoka lina roi, ko amolomba, ate, Lalanga ompe bote bona Yoane Bini ena lokongo isasanga. 26Koko lifoka lina roi aoka lokeseli mene; ohonde lacin’ena lisangya ko lacin’eniyo banakisak’ase l’ende ena mesa, atalanga lifim’ende yoi liho; 27ko isasanga lifoka lina roi aotoma soldat ona boloi bon’atombanyi, ayi l’ote’onande. 28Ko soldat aocoa, ko aokesa bote bona Yoane en’otumba bon’enyolo, ko aoya l’ote’onande ena lokongo, ko aofa boyoto’oho bon’onome, ko ende aofa nyango enande. 29Eneki bakili bana Yoane ookaka yoi liho, baoya, ko baambola boduo’onande, ko baomonya ena nketa.
30Ko bikima baosolongana lakina eneyali Yesu, ko bamolokwela baoyi banak’iy’okambaka bahatu, ko l’aoyi bahatu banak’iy’olakaka. 31Ko amasumola, ate, Boyaka nk’ino kei en’okala bona sengelenge, ko bofomya isisali meho. (Ailaki’oho lacin’oka bato bike bayayi ko bayacu, ko bataata nko le elelo ena toma.) 32Ko baocoa la boatu, nk’iyo kei, en’okala bona sengelenge. 33Ko enem’iy’ocoa, bato bike bamaena, ko bike bamaeya; ko bato ban’engili beho behetu baocoa la mbango la mboka en’okili, ko baoyela meho en’oso’oniyo, ko baosolongana eneyal’ende. 34Eneki Yesu otefwaka, aena bik’ike bon’ato, ko amaokamela isei, lacin’iyo bayaaki yoka mpate inifan’otombanyi, ko aomatsa yalak’iyo baoyi bike. 35Eneki bina omatsaka yila, bakili anande baoy’eneyal’ende, baila, iy’ate, Edye ene nko sengelenge, ko bin’omila; 36oatongole, bacu ena biluku l’en’engili ben’oli, bayosombel’iyoamene toma tonatong’iy’ola. 37Ko amakutwela, ate, Inoamene baf’iyo toma lacina bale. Ko bamoufola, iy’ate, Tocoake toyosombe mampa la mpata bekam’efe lacina taf’iyo, bale? 38Amaufola, ate, Boyali la mampa inga? Bocoaka, boyengya. Ko enek’iy’oeyaka, bamosumola, Mampa itano la nse ife. 39Ko amatoma, basumole bato bahatu bakisase ena tolenge, beloi l’eloi. 40Ko baokisase en’endongo, bendongo bemoi bokam’o kama, bendong’emoi ntuk’itano ntuk’itano. 41Ko eneki’nd’otambaka mampa ih’itano ko la nse ih’ife, aolenda ena loola, ko aosak’osako, ko aokesa mampa, ko aofa bakili lacin’iyo balekedy’ato; ko aokafel’iyatu nse ih’ife. 42Ko iyatu baola, ko baokinda liota. 43Ko baambola bitate binocikalaka nko batungu jo l’afe to, ko la bitate bina nse nkoho. 44Ko iy’analaki mampa bayaaki mpame nkoto itano.
45Isasanga aosomya bakili’anande bayookele en’atu, ko baleke lose en’oso en’ili’ol’ei, nk’ena Betesaida, kum’endamene ayatongole bato. 46Ko eneki’nd’asesaka, aocoa ena lingonji oyoonda boondo. 47Ko eneki likolo oyelaka, boatu boyaaki ena ntoto ena lose, ko ende en’okili nk’ende kei. 48Ko amaena kuma bayaene bino ena likambo lina nduka, lacin’oka lofongo lomafekya; koko enakel’ina aoya eneyal’iyo, ayakende ena liko y’asi bana lose; ko asokolekany’iyo. 49Ko enek’iy’oenak’ende ayakende ena liko y’asi, baokanel’oka bamen’esiko, ko baololua la losomo; 50lacin’oka iyatu bameena, ko baoka losomo mene. Ko isasanga oatenda l’iyo, ate, Bitedyaka, one nk’emi, botaangake! 51Ko aotalama en’atu l’iyo, ko lofongo losila nkwaho; ko iyo baofefa en’etem’eniyo nko mpefa, ko baokandakanda, 52lacin’oka iyo batanonganya ekambwa enekambamaki la mampa, lacina eneki betem’eniyo ocilingitanaka.
53Enek’iy’olekaka en’ili’ol’ei, baoyela bonyanga bona Ngenesaleta, ko baosema meho. 54Ko enek’iy’otefwaka en’atu, isasanga bato bameeya; 55ko baoselasela la mbango en’onyang’oho bohotu, ko baomatsa litola bato banayaaki la nkangi ena ntange bili l’ili benek’iy’ookaka Yesu ayali. 56Ko bekala behetu beneki’nd’ocoaka, l’en’engili, l’en’enyanga, l’en’asala, baambya bato ban’aise nkangi en’eseleka bena mboka, ko bamoonda lacina basuke nk’oseleka kei bon’okoto’onande; ko iyatu banosukaki baikaki.
Currently Selected:
Malako 6: BBY62
Highlight
Share
Copy
Want to have your highlights saved across all your devices? Sign up or sign in
Bokanda Bona Yakomba Bon’ototo © Alliance Biblique de la R. D. Congo, 1962
