Malako 7
7
1Ko Bafalusi l’atengi’amoi ban’ekanda banayaki ena Yelusalema, baosolongana eneyal’ende. 2Ko baena bamoi ban’akili’anande bayale toma l’akasa bana mbindo, nk’akasa banatasongama. 3Lacina Bafalusi la Ba-Yuda bahatu bayakile baoyi banaki bankya olangaka; ko kali bafale toma kuma batasonga bakasa nko nsonga bike; 4ko enay’iyo ena limbongo, bafale toma kuma batok’asi. Ko baoyi’amoi bayali bike banak’iy’otambaka lacina bamonya: nko nsonga ena bikala, la mpoke, la basaswa bana efeko, la totunda. 5Ko Bafalusi l’atengi bamoufola, iy’ate, Bakili’ane bafamonya baoyi banaki bankya olangaka lacina nai? Bala toma l’akasa bana mbindo lacina nai? 6Ende amakutwela, ate, Yesaya atendaki baoyi lacin’enino nko cilili, ino besimo, yok’onoki’nd’otengaka,
Bato’ane bampik’emi la nkefu iniyo,
Koko betem’eniyo bend’osana l’emi.
7Koko bankumy’emi nko bototoloto,
Eneyalak’iyo balako banayali nko beeka ben’ato.
8Ino bomocika boeka bona Yakomba, ko boyaundamele nko beeka ben’ato. 9Ko amasumola, ate, Solosolo mene, ino bumbela boeka bona Yakomba lacin’eho bokile beeka beninoamene. 10Mose ailaki, ate, Kumya bafango’one la nyango ene; ko ende onosaiya bafango yombo nyango, akoli lacina awu. 11Koko ino bila, in’ate, Yomb’oto asumola bafango’onande yombo nyango enande, ate, Boho bonosokokolana lacina nkokambya l’oho boyali kolubana—nko nganji enemonyedyama Yakomba— 12bofofe etelo lakina oyokambya bafango’onande la nyango enande l’oho. 13Yok’oho ino behya yoi lina Yakomba lacin’ena baoyi banak’inoamene oekyaka beeka. Ko boyakambe baoyi’amoi bike ban’okotu’oho. 14Eneki’nd’oelelaka bik’ike Uon’ato eneyal’ende, amasumola, ate, Inatu bondofe, ko bononganyaka ncina: 15efana iyema iniyali ena mbiolo en’oto yehya boto yomb’iho yotua ena ntundulu enande: banehya boto nko baoyi’aho banafola eneyali boto. 16Yomb’oto ayali la batoi lacina aoke, aongya lilofa. 17Ko eneki’nd’ocikaka bato’aho bik’ike, ko aotua en’otumba, bakili’anande bamufola ncina en’ekolanya eho. 18Ko ende amalokwela, ate, Ino nkoho bofana nde nnonganya? Botafokola nde, toma tonatoyali ena mbiolo en’oto, enatua toho ena ntundulu en’oto tofehyis’ende; 19lacin’oka toho tofatua en’olimo’onande: totua nk’ena likunju, ko tofola nk’ena lifoku. La baoyi’aho aokodya toma tohatotu nko soto. 20Koko aila, ate, Baoyi banafola eneyali boto, banehya boto nd’aho. 21Baoyi banafola eneyali boto, banafola nk’en’otem’onande, nko nkanyi in’owe, la bakele, la basamba, la njaka en’ato, 22la baiya, la mposa bike en’osolo, la bewe, la totungya, la mposa in’owe ina yonge, la liso lina ekuku, la besao, la njofefa, la baoyi ban’ilemeleme: 23baoyi’ane ban’owe bahatu baofola nk’ena ntundulu, ko baehya boto.
24Ko Yesu aemwa meho, ko aocoa en’onyanga bona Tula la Sidona. Ko aotua en’otumba, ko atalang’oka boto’omoko aeye; ohonde atafisamisa. 25Lacina boyoto’omoi onoyaaki la bon’on’oyoto on’osali onoyaaki la lifoi lina nsefo, aoka bosimo’onande, ko aoya, ko aokwa en’akak’anande. 26Boyoto’oho ayaaki bise Elene, bise Sulia Foinike. Ko amoonda lacina afodya demona eneyali bon’onande bon’oyoto. 27Ko Yesu amosumola, ate, Akoli lacina bana bakinde en’oso: efaonge otamba mampa ena bana oyofusela mbwa. 28Ko amokutwela, ate, Solosolo, Nkolo; koko mbwa iniyali en’ase’a mesa iola mpumbwu ina bana. 29Ko amosumola, ate, Lacin’ena yoi liko, ombocoa; demona emofola eneyali bon’one on’oyoto. 30Ko eneki’nd’outwak’ola, aosungya bona aeci ena ntange, ko demona emofola eneyal’ende.
31Ko lakina, eneki’nd’oumaka en’onyanga bona Tula, aotianya bonyanga bona Sidona, ko l onyanga bona Dekapoli, ko aoya ena lose lona Ngalilaya. 32Ko bamoyela boto onitaki’atoi ko ayaaki la likokoma; ko bamoonda lacina atadya likasa linande eneyali ende. 33Ko Yesu amoumola eneyali bato bik’ike, amotola nk’ena lokuko, aila to tonande en’atoi’anande, ko auta nsoi, ko aosuka lolemi lonande. 34Koko enem’end’olenda ena loola, aotatana, ko amosumola, ate, Efata, nko Kombwaka. 35Ko isasanga batoi’anande baokombwa, ko lolemi lonande lotungwa, ko aotenda nko cilili mene. 36Ko amasumola, batasumolake boto’omoko; ohonde eneyafudy’ende yafekyaka, iyo baofudya likumya yoi liho nkumya mene. 37Ko baofefa nko mpefa bike mene, ko baila, iy’ate, Amokamba bikambwa bihitu nk’olotsi; aokya banitaki’atoi, ko aotenza bato ban’okukuluku.
Currently Selected:
Malako 7: BBY62
Highlight
Share
Copy
Want to have your highlights saved across all your devices? Sign up or sign in
Bokanda Bona Yakomba Bon’ototo © Alliance Biblique de la R. D. Congo, 1962
