Malako 8
8
1En’ina beho, eneki esolonganelo en’ato ofulaka bik’ike lakina, ko bataata toma tona ndaka, Yesu aelela bakili’anande eneyal’ende, ko amasumola, ate, 2Lokamela bato’ane bik’ike isei, lacin’iyo bamoyala l’emi bin’esaso esik’ene, ko bafana toma tona ndaka; 3ko yombo njatom’iyo en’ela la njala tumbe bangotenya ena mboka, lacina bamoi’aniyo bamoya en’osana. 4Ko bakili’anande bamokutwela, iy’ate, Mendo ena sengelenge boto angata mampa iningokolana likinza bato’ane meya? 5Ko ende amaufola, ate, Boyali la mampa inga? Iy’ate, Nsambo. 6Ko aosumola bato’aho bik’ike bakisase ena loko. Ko aotamba mampa iho nsambo, ko eneki’nd’okangaka lokango, aokes’iho, ko aofa bakili’anande lacin’iyo balekedy’ato’aho bik’ike. 7Ko bayaaki la tosese tonatotaata bike; ko eneki’nd’okangaka lokango, aolekedya bato toho nkoho. 8Ko iyo balaki, ko baokinda liota, ko baambola bitate binicikalaki tofondo nsambo. 9Ko iyo banalaki bayaaki yombo nkoto inei; ko amatongola. 10Ko isasanga aotalama en’atu, ende l’akili’anande, ko aoya ena bonyanga bona Dalamanuta.
11Ko Bafalusi baoya meho, ko baomatsa yats’ende ntango, bayakembe ndembi ena loola eneyal’ende, baomek’ende. 12Ko ende aotata en’otem’onande, ko aila, ate, Eotwelo ene eofona ndembi lacina nai? Lakosumol’ino, solosolo, efana ndembi enengofama eotwelo ene. 13Ko amacika, ko aotalama lakina en’atu, ko aoleka en’ili bona lose.
14Ko bakili baolefela litola mampa: bayaaki la mampa nk’emoko kei en’atu. 15Ko amasumola, ate, Boongya lilota nyango ena mampa ena Bafalusi, la nyango ena mampa ena Elode. 16Ko iyo baufolana, ko baila, Mbo yoi line nk’enefan’iso mampa. 17Ko eneki Yesu ofokolaka yoi liniyo, amasumola, ate, Ino bufolana, enefan’ino mampa, lacina nai? ino botanonganya ko botafokole nde? betem’enino bemocilingitana nde bocilingitano? 18Boyali l’aiso, koko bofene nde? boyali l’atoi, koko bofoke nde? ko bofakanedya ndo? 19Eneki’m’okeselaka bato nkoto itano mampa itano, ino bambolaki bitate binicikalaki batungu banga? Iy’ate, Jo l’afe. 20Ko eneki’m’okeselaka bato nkoto inei mampa nsambo, bambolaki bitate binicikalaki tofondo tonga? Iy’ate, Nsambo. 21Koko amasumola, ate, Botanonganya nde?
22Ko aoya ena Betesaida; ko baoya eneyal’ende l’oto onodyak’aiso, ko bamoonda lacina aosuke. 23Ko aosuka boto onodyak’aiso la likasa, ko amotola ena mbiolo en’onyanga; ko eneki’nd’outaka nsoi en’aiso’anande, aotadya bakasa eneyal’ende, ko amufola yombo aen’iyema. 24Ko ende, eneki’nd’oenolak’aiso, aila, ate, Lena bato, koko lomaena yoka bete, bayakende. 25Koko aotadya bakasa lakina en’aiso’anande, ko eneki boto olendaka ta, aikyama, ko aena toma tohatotu nko fololo. 26Ko Yesu amotoma en’ol’onande, ko amosumola, ate, Tatuake en’ecimo ene, ko tasumolake boto en’ecimo ene.
27Ko Yesu la bakili’anande baocoa en’enyanga bena Kaisalia ena Filipo; ko enem’iy’ocoa ena mboka, aufola bakili’anande ate, Bato bantang’emi nai? 28Iyo baamba, iy’ate, Yoane Bini; ko bamoi, Mbo Eliya; ko bamoi, Mbo bosumoli’omoi. 29Koko amasumola, ate, Nd’inoamene, bontang’emi nai? Ko Petelo amokutwela, ate, E oyali Masiya. 30Ko amafekya, batasumolake boto’omoko yoi liho. 31Ko aomatsa yalak’iyo, ate akoli eneyali Bon’on’oto aene bino la baoyi bike, ko atembolame la bingambe ko la nkanga ina toome ko l’atengi ban’ekanda, ko ayakame, ko aetwa en’ewedi en’ina bon’esaso. 32Ko aotenda yoi liho nk’ena fololo. Ko Petelo amotola ena lokuko, ko aomatsa lifel’ende. 33Koko eneki’nd’ohelengwaka, ko aena bakili’anande, aofela Petelo, ate Eta ena mbusa enami, Satana; lacin’oka ofakanedya baoyi bana Yakomba: okanedya nko baoyi ban’ato. 34Ko eneki’nd’oelelaka bik’ike bon’ato ko l’akili’anande eneyal’ende, amasumola, ate, Yomb’oto alanga ankile, ayofimake endamene, ko aambolake ekulusu enande, ko ankile. 35Lacina boto onolanga amonya liiko lonande, angungya loho; ko boto l’oto onungya liiko lonande lacin’enami ko lacin’ena bosimo bon’olotsi, angomonya loho. 36Nko boto akitanya lituka lina loko lohalotu, ko ayoungy’endamene, nkita enat’ende eka nai? 37Ko boto akolana yenganya liiko lonande l’iyema ika nai? 38Lacina boto l’oto ononjok’emi la baoyi’anami nsoi en’eotwelo ene ena likele l’en’owe, Bon’on’oto angok’ende nsoi nkoho, enengi’nd’oya en’okonde bon’afango’onande, ende la bikima bina loola bin’oeka.
Currently Selected:
Malako 8: BBY62
Highlight
Share
Copy
Want to have your highlights saved across all your devices? Sign up or sign in
Bokanda Bona Yakomba Bon’ototo © Alliance Biblique de la R. D. Congo, 1962
