Yoane 18

Yuda akahotela Yesu

1Yesu amabibuga ebinywa ebi, mwasokira eyisirya wo musya waKiduroni haguma nabiga biwe, ahabya eririma, neryo mwingiramo na biga biwe. 2Neryo Yuda, oyo wamu hotela, abya asi ho: kusangwa Yesu ngendo nyingi iniakayayo haguma na biga biwe. 3Neryo Yuda amabihabwa omulondo wabasoda, nabalima bakalwa oko bahereri bakulu noko baFari sayo; mwasaho nesiseke nehisuku nebindu byamalwa. 4Neryo Yesu, inianasi emyatsi ikandimuhikako yosi, mwahuluka, mwa bulyabo, ati, Mukasondandi kwehi? 5Mobamusubirya, bati, Yesu wa Nazareti. Yesu mwabwirabo, ati, Ni ingye. Na Yuda, oyo wamuhotela, inianahangene haguma nabo. 6Abere abi bwirabo, ati, Ni ingye, mobasuba enyuma mobayihinda oko kitaka. 7Kandi mwabulyabo ati, Mukasondandi kwehi? Nabo bati, Yesu weNazareti. 8Yesu mwasubirya ati, Indiaba bwira kwali ini ngye; mwamabya mukanyisonda, muleke aba bagende: 9eKinywa ekyo abuga kibererere, ati, Ukwabo wamba sinditatalya nomuguma. 10Simoni Petero iniawite omuyari mwakulago mwabanda omugombe womuhereri mukulu, mwa twa okutu kuwe kwamaryo. Erina riomugombe oyo ryabya Malko. 11Neryo Yesu mwabuga na Petero, ati, Hira muyari wawe omo lubo: olutehi olo Tata abirimba, sindiendipulyalo kwehi?

Petero akagana Yesu

12Neryo omulondo oyo nomukulu wago, nabalima baba Yuda, mobatisimba Yesu mobamuboha, 13mobamutwala ku Ana erimbere; kusangwa abya isebyala waKayafa, oyo wabya muhereri wendata kobandi oko mututa oyo. 14Nikwa Kayafa abya oyo wahana abaYuda, ati, ritolere mundu muguma erihola busana nabandu. 15Simoni Petero nogundi mwiga mobakwama Yesu. Neryo ogundi mwiga oyo abya asibwe nomuhereri oyo wabya wendata kobandi, omwiga oyo mwingira haguma na Yesu omu kibuga kyomuhereri mukulu oyo; 16nikwa Petero mwimana ahihya oko luyi. Nogundi mwiga oyo, wabya asibwe nomuhereri oyo mukulu, mwaya yihya mwabuga nomwanamuto oyo wategaya oluyi, mwingirya Petero. 17Neryo mwanamuto oyo wategaya oluyi mwabuga na Petero, ati, Uri muguma goko biga bomundu oyu kwehi? Naye mwabuga, ati, Ingye eyihi. 18Neryo abagombe nabalima babya bimeneho, ibamabiakya omuliro wamakala; kusangwa habya embeho ibakota: na Petero abya haguma nabo, inianimene akota.

Yesu embere wa Atia

19Neryo omuhereri oyo mwabulya Yesu busana nabiga biwe, nerikangirirya riwe. 20Yesu mwamusubirya, ati, Monabuga omo kihugo neriminyikalya; monakangirirya omo manyumba werihindana, nomo hekalu, aho abaYuda bosi bakahindana; bubi-sobiso sinditabugaki. 21Ukanyibulaya busana naki kwehi? bulaya abanyowa, nganabugaki nabo: lebaya, aba banasi ebyo nabuga. 22Nomugulu amabibuga atya, muguma woko balima babya bimeneho mwaswirya Yesu ekikundi, ati, Uka subiraya muhereri mukulu utya kwehi? 23Yesu mwamusu birya, Namabya namabuga nabi, utulego busana nekibi ekyo: nikwa kyamabya kwowene ukanzwirirayaki kwehi? 24Neryo Ana mwamutuma inianabohire ku Kayafa omuhereri mukulu.

Engokolume ikabika

25Neryo Simoni Petero abya imene neriota. Mobamubulya bati, Nawe, uri muguma boko biga biwe kwehi? Naye mwa gana, mwabuga, ati, Singye. 26Muguma goko bagombe bomuhereri mukulu, abya wekitunga kyoyo Petero atwa kwo kutu, mwamubulya, ati, Mondakulolako omwirima haguma naye kwehi? 27Petero mwagana kandi: neryo-neryo engoko lume moyabika.

Yesu embere wePilato

28Neryo mobatwala Yesu erilwa ewaKayafa eriingira omwi bugiro: bwabya ngyakyangyakya; nabo mobatingira omwi bugiro, sibaswebya okwihalya, nikwa batoke erirya Erilabwako (ryePasaka). 29Neryo Pilato mwahulukira eyihya mweyabo, mwabuga ati, Omundu oyu mukamuhandikirirayaki kwehi? 30Mobamusubirya, bati, Omundu oyu atabya mukola nabi, nga sitwetamuleta uku we. 31Pilato mwabwirabo, ati, Mumu twale imwebene, mumutswere ngoko ebihano byenyu biri. AbaYuda bati, Itwe situwite hamuli eriita mundu nomuguma: 32eKinywa kyaYesu kibererere, ekyo abuga eriminyisya omu sindo woluholo asyahola.

33Neryo Pilato mwingira kandi omwibugiro, mwabirikira Yesu, mwamubulya, ati, Uri Mwami wabaYuda kwehi? 34Yesu mwasubirya ati. Ukabulaya eki ugowene kwehi, kutse nabandi bakubwira busana nage kwehi? 35Pilato mwasubirya, ati, Ingye indi muYuda kwehi? Ekihanda kyawe nabahereri bakulu mobakuhotela kwingye: wabirikolaki kwehi? 36Yesu mwasubirya, ati, Obwami bwage si bwe kihugo kino: kumbe obwami bwage bulwe bwe kihugo kino, nga bagombe bage nga bamalwa, isinangahabwa oko baYuda: nikwa lino obwami bwage sibweno. 37Neryo Pilato mwabuga naye ati, Nikwa lero uri mwami kwehi? Yesu mwasubirya, Uwe ukabuga ko ndi Mwami. Busana nekyo monabutwa, ekyo kyo kyandeta omo kihugo, inatula omwatsi wakwenene. Abosi bekwenene bakowa omulenge wage. 38Pilato mwamubulya, ati, Ekwenene niki kwehi?

Abere abibuga eki, mwasuba eyihya aha baYuda bari, mwa buga nabo, ati, Ingye sinditamubana ko kibi ekyangamwitisya. 39Nikwa inywe muwite omutsye, ko ngababoholera omuguma omukiro kyErilabwako: nikwa mukasonda inababoholera oMwami wabaYuda kwehi? 40Nabo mobaswabugira iguma guma, bati, Butsira omundu oyu, nikwa Baraba. Neryo Baraba abya munyeyi.

Currently Selected:

Yoane 18: NTN62

Highlight

Copy