Yoane 19

Embita yemisaki-saki

1Neryo Pilato mwimya Yesu, mwamuswirya emikoba. 2Na basoda mobaluka emisaki-saki mo mbita, mobahirayo oko mutwe wuwe, mobamwambalya olukimba lwomunyama; 3mobamuhikako, bakabuga bati, We yoyo, Omwami wabaYuda neryo mobamuswirya ebikundi. 4Pilato mwahuluka kandi, mwabuga nabo, ati, Lebaya, ngabaletera ye, muminye ko ndetamubana ko kibi ekyangamwitisya. 5Neryo Yesu mwa huluka, inianambite embita yemisaki-saki nolukimba lwomu nyama. Pilato mwabwirabo, ati, Mulebaye, omundu yoyu. 6Neryo omugulu abahereri bakulu nabalima babere bamulo lako, mobabugira igumaguma, bati, Umubambe oko muti, umubambe oko muti; Pilato mwabuga nabo ati, mumwimaye imwebene, mumubambe oko muti: kusangwa ingye sindita mubana kwekibi ekyerimwitira. 7AbaYuda mobamusubirya bati, Itwe tuwite erihano, busana nerihano eryo atolere iniakwa, kusangwe mwayiyira mo Mugala woMungu. 8Pilato omugulu owa ekinywe eki, mubaha kwilaba aho; 9mwingira kandi omwibugiro, mwabulya Yesu, ati, Walwahi kwehi? Nikwa Yesu mwatamusubirya. 10Pilato mwamubulya, ati, Ukanyibya bukutu kwehi? siwasi ko ndi na maka erikubohola, kandi ko ndi na maka werikubamba oko muti kwehi? 11Yesu mwa musubirya, ati, Siwangabya na maka busana nage na hake, utaryahabawago akalwa endata: kikaleka oyo wanyihotela ukuwe iniabya nebibi kwilaba.

Eritswera Yesu

12Eritsuka oko ndambi eyo Pilato mwasonda erimubohola: nikwa baYuda mobabugira igumaguma, bati, Wamabohola mundu oyu, isukiri mwira waKaisari: oburi mundu ukayiyira mo mwami akagana Kaisari. 13Pilato abere abiowa ebinywa ebi, mwaleta Yesu ye yihya, mwikala oko kitumbi kyeritswera ahakahulawa mo Kibuga kyaMabwe, nikwa omo KiEbrania, ni Gabata. 14Nikwa kyabya kiro kyErikokotya ryErilabwako: ryabya ngendambi yeritungi. Neryo mwabuga nabaYuda, Mulebaye, Omwami wenyu! 15Nabo mobabugira iguma guma, bati, Umulusayeho, umulusayeho, umubambe oko muti! Pilato mwabuga nabo, ati, Nyibambe Omwami wenyu oko muti kwehi? Abahereri bakulu mobasubirya bati, Situwite omwami ni na Kaisari. 16Kwa muhabo atya abambawe oko muti.

Musasalaba wa Kalvari

17Neryo mobimya Yesu: naye mwahuluka, inianayihekere omusalaba, mwahika ahakahulawa aherihanga, ahakahulawa omo KiEbrania Golgota: 18ho bamubamba oko muti nabandi babiri haguma naye, oko lundi luhande omuguma noko lundi ogundi na Yesu aho katikati. 19Pilato mwasaka erimi nyisya eri mwahiraryo oko musalaba. Hasakawa hati, YESU WANAZARETI, OMWAMI WA BAYUDA. 20Neryo abangi boko baYuda mobabya bakalebya amasako ayo, kusangwa aho Yesu abambawa oko muti habya hakuhi nomuyi: kyasakawa omo kiEbrania, nomo kiRoma, nomo kiGiriki. 21Abahereri bakulu babaYuda mobabwira Pilato, bati, Susake, Omwami wabaYuda; nikwa, uti, abuga ati, Indi Mwami wabaYuda. 22Pilato mwasubiryabo, ati, Ekyo nabirisaka, inabirisaka.

Esyongimba syaYesu

23Neryo abasoda, ababamba Yesu oko muti, mobaheka esyongimba siwe mobagabasyo mo magabo ani, oko buri musoda erigabo; nekanzu nibya: nekanzu eyo yabya butsira mulando, inilukire ehosi eritsuka endata. 24Kyaleka ibabwi rana, bati, Situtuleyo, nikwa tukange obukanga busana nayo, nga ikandibya yandi: erisaka ribererere, erikabuga, riti, Mobagaba esyongimba syage omukati-kati kabo, Mobakanga obukanga busana nekanzu yage.

Yoane na Maria

25Abasoda mobakola batya, nikwa habya himene hakuhi nomusalaba wa Yesu, nyinya, na mwali wabo nyinya, ye Maria muka Kleopa, na Maria Magdalene. 26Neryo omugulu Yesu alangira koyo wuwe, nomwiga oyo abya anzire inianimene hakuhi, mwabwira nyinya, ati, Mukali, lebaya mugala wawe! 27Neryo mwabwira omwiga oyo, ati, Lebaya, koyo wawe! Neritsuka oko ndambi eyo omwiga oyo mwamutwala ewuwe.

Erihola ryaYesu

28Enyuma waho Yesu, inianasi emyatsi yosi iyamabihwa, erisaka ribererere, mwabuga ati, Ngwire nyota. 29Neryo habya hahirirwe erirega ryoswire siki: neryo mobahira embu huma iyoswire nesiki mobahirayo oko hisopo, mobahirayo oko buno buwe. 30Neryo Yesu abere abiimya siki, mwabuga ati, Byamahwa: munamya omutwe wuwe, mwaha ekirimu kiwe kyo lugendo.

Eritumo omo kikuba kyaYesu

31Neryo abaYuda, kusangwa kyaba ekiro kyErikokotya, emibiri sibye oko musalaba omo kiro kyasabatu (kusangwa ekiro kyasabatu ekyo kyabya kikulu), mobabulya Pilato amagulu wabo abunangawe, balusibawe ho. 32Neryo basoda mobasa, mobabuna amagulu womundu werimbere, na wogundi oyo abambawa oko muti haguma naye: 33nikwa omugulu bahika oko Yesu, mobalebya iniamabihola, mobatabuna amagulu wuwe: 34nikwa muguma wokobasoda mwatsimita omolukanga luwe omwitumo, neryo-neryo omusasi namagetsi mo byalwamo. 35Noyo walangira yukatulago, neritulago riwe ni kwenene: kandi anasi kwakabuga kwenene, imwikirirya. 36Ku sangwa emyatsi eyi moyabya erisaka ribererere, riti, Erikuha riwe siryendisyabunwa. 37Nakandi erindi erisaka riti, Basya lola ukwoyo batsimita.

Erila Yesu

38Nenyuma wemyatsi eyi Yosefu wArimatea, abya omwiga wa Yesu, nikwa omo bubi-sobiso busana neriubaha baYuda, mwasaba Pilato ehamuli yeritwala omubiri wa Yesu: Pilato mwamuha hamuli, Neryo mwasa mwatwala omubiri wuwe. 39Neryo Nikodemo naye mwasa, oyo wamuhikako erimbere omo kiro, iniakaleta eritulungana ryamanemane na uvumba nge miheke ibiri. 40Neryo mobimya omubiri wa Yesu, moba sengago omo myenda haguma na manukato owakakumba ndeke ngemitsye yabaYuda omugulu werita. 41Nikwa aho bamu bamba habya eririma; nomwirima eryo habya eyisinda nyihya nyihya eyiteyatatabwa mo mundu. 42Naho hobahira Yesu, kusangwa kyabya kiro kyErikokotya kyabaYuda (kandi eyisinda eyo yabya hakuhi).

Currently Selected:

Yoane 19: NTN62

Highlight

Copy