Luka 2
2
Eributwa ryaYesu
1Oko biro ebyo mohabya eritegeka rikalwa ku Kaisari Augusto riti, abe kihugo kyosi basakawe. 2Erisaka eri ryabya ryeri mbere oko mugulu Kurenio abya murongani weSuria. 3Abosi mobayasakwa, oburi mundu oko muyi wuwe. 4Yosefu nibya mwahetukira eYudea, akalwa eGalilaya, omuyi wa Nazareti, iniakaya oko muyi wa Dawidi owakahulawa mo Betelehemu kusangwa abya wenyumba nekitunga kya Dawidi, 5erisakwa haguma na Maria, oyo asimulaya, inina mukule. 6Nomugulu babyayo, endambi yiwe yeributa moyahika. 7Mwabuta omwana wobulume akambere mwamuswika olukimba ololu mekeke, mwamuhira omo kiringa kyesyonde, kusangwa sihabya omwanya busana nabo omo kirimba.
Abalisya
8Omo kihugo ekyo habya abalisya omoli, ibakategaya ekihyo omo kiro. 9Nomulaika woMukama mwabutukira So, nolu kengerwa lwoMukama molwakangabania mokubo ehosi, mobu baha kutsibu. 10Nomulaika mwabwirabo ati, Simubahe; kusangwa lebaya, ngabaletera engulu yowene yobutseme bunene obukasyasira bandu bosi; 11kusangwa munabwire oMulamya amabibutwa busana nenyu oko muyi wa Dawidi, ni Kristo Mukama. 12Neki kikandisyabya ekiminyikalo busana nenyu: mukandieya lumekeke ilunaswikire esyongimba esyobumekeke ilunagotsere omo kiringa ekikarira mwesyonde. 13Neryo neryo mohabya haguma nomulaika esyondeko syemilondo yelubula ibakapipa Mungu bati, 14Olukengerwa oko Mungu endata kutsibu, nobuholo omo kihugo omukati-kati kabandu abakamutsemesaya!
15Abalaika babere babilwa kubo eriya elubula, abalisya mobabwirana bati, Tugende lino eBetelehemu tuyalebaye ekyabereyo, ekyo Mukama abirituminyisya. 16Neryo moba genda luba, mobeya Maria na Yosefu, nolumekeke ilunagotsere omo kiringa kikarira mwesyonde. 17Babere babilola kubyo mobaminyisya ebyo baryabwirawa busana nomwana; 18nabosi abowabyo mobasweka busana nebyo abalisya babwirabo. 19Nikwa Maria mwabika emyatsi eyi yosi, iniakaganirayayo omo mutima wuwe. 20Kandi abalisya mobasubula, ibakapipa nerisikya Mungu busana nebyosi bowa nebyo balolako, ngoko babwirawa.
21Nenyuma webiro munani, omugulu abanibawa, mwa hulwa mo Yesu, erina eryo omulaika amuluka obukule isibwe bwahekwa.
Simeoni
22Nomugulu endambi yerieribwa ryabo yamabihika nge kihano kyaMusa, mobamutwala eYerusalema erimuha oko Mukama 23(ngoko kisakire omo bihano byoMukama, biti, Ogo bulume oyuriatsuka eributwa asyabya mubuyirire wo Mukana) 24nerihera obuhere ngebyo bikabugawa omo kihano kyoMukama, kiti, ehitungulu hibiri, kutse ehyana kyehilikuku hibiri. 25Nikwa eYerusalema habya omundu, oyu kahulawa mo Simeoni, omundu oyo abya mutunganene nomu genge, iniakalinda erisibikibwa ryaIsraeli, neKirimu Kibuyirire mokyamubyako. 26NeKirimu Kibuyirire ikyabirimuminyisya kwatendisyahola atealola uku Kristo woMukama. 27Neriso ndolwa neKirimu mwahika omo hekalu; nomugulu ababuti baleta omwana Yesu, eriyira busana naye nge mitsye yebihano, 28neryo mwamwimya omo maboko wuwe mwapipa Mungu mwabuga ati,
29Mukama, lino ukahongokaya omugombe wawe omobuholo, nge kinywa kyawe;
30Kusangwa ameso wage abirilola okwilamya ryawe
31Eryo wabirikokotya embere syabandu bosi,
32Oluseke busana neribisulirwa oko Bihanda
Na busana nolukengerwa lwa bandu bawe Israeli.
33Yosefu na nyinya wuwe mobasweka oko myatsi yabugawa busana naye; 34na Simeoni mwatsumulabo mwabuga na Maria nyinya wuwe ati, Lebaya, omwana oyu abirihirwa okwigwa nerihangana ryabangi beIsraeli, na busana nekimi nyikalo ekikaponawa 35(nomuyari asyatsimita omutima wawe nibya), amaringikania womo mitima mingi abisulawe.
Ana
36Kandi mohabya omuminyereri wobukali ye Ana, omwali wa Fanueli, owekihanda kya Aseri; abya mukekulu wa kera, iniabiriikala niba wuwe emituta irinda eritsuka oko bumbesa buwe, 37mwabya mukwakali wemituta amakumi munani nini. Isiarilwa omo hekalu, erimukukamira neritsira nerisaba omo kiro nomo mwisi. 38Nerihikaho oko ndambi eyo mwaha ewasingya oko Mungu, nerimwahula oko bosi ababya bakalinda eritongolibwa ryeYerusalema. 39Neryo babere babibuyirira ebyosi nge bihano byoMukama, mobasuba eGalilaya, oko omuyi wabo, Nazareti. 40Neryo omwana mwakula mwabya namaka, musulibwa na menge; nolukogo lwoMungu molwabya ukwiye.
Yesu omo hekalu
41Nikwa abamubuta mobaya eYerusalema oburi mututa okwirya rye Pasaka. 42Neryo abere abibuga emituta ikumi nibiri mobahetuka nge mutsye wekiro kikulu; 43neryo ekiro kikulu ekyo kyabere kyahwa, babere banemosubula, omulwana Yesu mwasigala enyuma eYerusalema. Abamubuta mobata minya ekyo, 44nikwa ibanemoganirya bati ane omo mulondo mobagenda olugendo lwekiro kiguma, mobamusonda-sonda omukati-kati kekitungi kyabo na balikyabo; 45nomugulu bamubula, mobasuba eYerusalema, bakamusonda. 46Nenyuma webiro bisatu mobamweya omo hekalu, inianikere omukati-kati ka bakangirirya, erihulikirirabo neribulyabo eryeribulya; 47nabosi bamowa mobasweka busana na menge wuwe neri subirya riwe. 48Nomugulu bamulolako mobasweka; na nyinya wuwe mwabuga naye ati, Mugala, busana naki wabiri tuyira utya kwehi? Talebaya, tata wawe nage twabirikusonda sonda nengitsi. 49Naye mwabuga nabo ati, Muryanyisonderaki kwehi? Simwabya mwasi ko nyitolere eribya omo myatsi ya Tata wage kwehi? 50Nabo mobataminya ekya buga nabo. 51Neryo mwandagala haguma nabo mwahika eNazareti, mowabo; kandi enyinya wuwe mwabika emyatsi eyi yosi omo mutima wuwe. 52Neryo Yesu mwakanya amenge nerikula, nerisimwa noMungu na bandu.
Currently Selected:
Luka 2: NTN62
Highlight
Share
Copy
Want to have your highlights saved across all your devices? Sign up or sign in
Le Nouveau Testament et les Psaumes en Ndandi © British and Foreign Bible Society, 1962.
