Luka 1
1
1Ngoko bangi babirilenga erihira haguma emyatsi eyakolawa omukati-kati ketu, 2ngoko twahabawa nabatsuka erimbere abalangiri na bakwenda bekinywa 3mokyabya kibuya busana nage inamabikwama ndeke emyatsi eyo yosi oko mugulu alaba, erikusakira ndekendeke ngoko ikwamene, uwe Teofilo mu buya, 4iwatoka eriminya kwenene emyatsi eyo wabiribwirwa.
Zakaria na Elizabeti
5Oko biro bya Herode, omwami weYudea, habya omuhereri oyu kahulawa mo Zakaria, wekihanda kya Abiya; iniawite omukali abya muguma goko bali ba Haruni, erina riwe ryabya Elizabeti. 6Nabosi babiri babya batunganene embere syo Mungu, ibakalendera omo bihano neritegeka ryoMukama butsira ekyo bangatsongerwako. 7Nikwa babya isibawite omwana, kusangwa Elizabeti abya mugumba, kandi babiri ibamabibya bakulu.
8Nikwa omugulu abya akakola emibiri yobuhereri embere syoMungu omugulu ekinanda kiwe kyabya kwe kituli, 9ngoko emitsye yobuhereri yabya, obukanga buwe mobwamuwirako eriingira omo hekalu yoMukama nerihisya uvumba. 10Ne ndeko yosi yabandu yabya ikasabira eyihya oko ndambi ya uvumba. 11Omulaika woMukama mwamubutukira iniaha ngene oko luhande lwamali lwaheriherera uvumba. 12Zakaria mwahahukya omutima omugulu amulolako, neriubaha morya mubyako. 13Nikwa omulaika mwamubwira ati, Sigubahe, Zakaria, kusangwa erisaba ryawe ryamogubwa, kandi omukali wawe Elizabeti asyakubutira omugala, wasyahula erina riwe mo Yoane. 14Wasyabya nobutseme neritsanga; na bangi basyatsema okwibutwa riwe; 15kusangwa asyabya mukulu embere woMukama, siendisyapulya ebinyu kutse ekyangaku ndisya kutsibu, asyusulibwa neKirimu Kibuyirire, erilwa omo nda ya koyo wuwe. 16Asyabindulira abangi boko bagala beIsraeli oko Mukama Mungu wabo, 17Asyagenda embere siwe omo kirimu nomo kagala kaElia, eribindulira emitima yabise oko bana, abatiowa oko menge wabatunganene, erisikya abandu ababiritegekanibwa busana noMukama. 18Zakaria mwabwira omulaika ati, Nasyaminyabyo nyiti kwehi? kusangwa ndi musyakulu, nomukali wage amalabya mituta mingi. 19No mulaika mwamubwira ati, Ingye ndi Gabrieli, oyu kahangana emuliro woMungu; natumawa eribuga nawe, nerikuletera engulu yowene eyi.
20Ulebaye, ukandibya mumu siwendiswa toka eribuga erihika ekiro emyatsi eyi yasyabererera, kusangwa suritikirirya ebinywa byage, ebikandisyabererera oko mugulu wabyo. 21Nabandu babya bakalindirira Zakaria, mobasweka busana nerilinda riwe omo hekalu.
22Neryo abere ahuluka, mwatatoka eribuga nabo, mobaminya bati abere omo bulime omo hekalu; neryo mwakoheryabo omo byala mwabya mumu. 23Nomugulu omubiri wuwe ahwa, mwasuba ewuwe.
24Enyuma webiro ebi omukali wuwe Elizabeti mwaheka obukule, mwayibisa emikera itano, ati, 25OMukama amangola atya omo biro anyisamalira, erilusya erinyisekererya omukati kati kabandu.
Eriminyerera eributwa ryaYesu
26Oko mukera wendatu omulaika Gabrieli mwatumwa no Mungu oko muyi wa Galilaya owakahulawa mo Nazareti, 27noko mukondo oyu wasimolibawa nomundu oyu kahulawa mo Yosefu, owenyumba ya Dawidi; nerina ryomukondo oyu ryabya Maria. 28Neryo mwabuga ati, Ngakukeraya, Uwe Musombolwa, oMukama ari nawe! 29Nikwa iye mwahahukya omutima oko kinywa ekyo, mwaganirya omo buringikania buwe ngerikerya eryo nga ni musindoki. 30Omulaika mwabuga naye ati, Sigubahe, Maria, kusangwa wabiribana olukogo ku Mungu. 31Neryo lebaya, wasyaheka obukule wasyabuta omugala, wasyamwahula mo Yesu. 32Asyabya mukulu, asyahulwa mo Mugala woWendata Kutsibu; oMukama Mungu asyamuha ekitumbi kya tata wuwe Dawidi, 33asyatabalira nyumba ya Yakobo kera na kera; nobwami buwe sibwendisyabya nenduli. 34Maria mwabwira omulaika ati, Eki kisyatokekana kiti ingye ndawite omulume kwehi? 35Nomulaika mwamusubirya mwamubwira ati, eKirimu Kibuyirire kyasyakuhikako, nakagala koWendata Kutsibu kasyakusukurirya; kikaleka omwana oyo wasyabuta iniasyahulwa mo mubuyirire, oMugala woMungu. 36Kandi lebaya, Elizabeti owekihanda kyenyu ahekire obukule bwomwana wobulume, omo bukekulu buwe; oyu ni mukera wendatu ukwoyo ukahulawa mo mugumba. 37Kusangwa oko Mungu sihari ekitetokekana. 38Maria mwamubwira ati, Lebaya indi mwanamuto omugombe woMukama; kinyibyeko ngekinywa kyawe. Nomulaika mwamusigania mwagenda.
Maria mwaya bana Elizabeti
39Oko biro ebyo Maria mwahangana mwagenda luba oko kihugo kyebitwa, oko muyi wa Yuda, 40mwingira omo nyumba ya Zakaria mwakerya Elizabeti. 41Nomugulu Elizabeti owa erikerya rya Maria, omwana mwayisumba omo nda yiwe; na Elizabeti musulibwa neKirimu Kibuyirire 42mwabuga nomulenge munene ati, Uri mutsumulwa omokati kati kabakali, olubuto lwenda yawe ni lutsumulwa! 43Busana naki ngahabawa erihikwako na nyinya woMukama wage kwehi? 44Kusangwa lebaya, omulenge weribukya ryawe ariabya ingira omo matwi wage, omwana mwakayisumba nobutseme omo nda yage. 45Omuyisa ari noyu wikiriraya ati omwatsi akandi syabererera owabwirawa noMukama. 46Maria mwabuga ati,
Omutima wage akapipa Mukama,
47Nekirimu kyage kikatsemera oMungu
Mulamya wage,
48Kusangwa abirilangira obukebuke bwamwanamuto mugombe wuwe,
Kusangwa lebaya, eritsuka lino esyondengo syosi syasyanyahula mo womuyisa;
49Kusangwa owamaka abiringolera emyatsi minene, Nerina riwe ribuyirire.
50Neriganyira riwe riri oko syondengo noko syondengo okobakamubaha.
51Abirikangya akagala omo kuboko kuwe,
Abiripanzapanza abakayipipa omo maringikania wemitima yabo,
52Abirikuhihya abamaka erilwa oko bitumbi byabo byobwami,
Abirihamya abakebake;
53Abiriugutya abari nenzala omo myatsi mibuya,
Na bebindu abirisubulyabo busa.
54Abiriwatikya omugombe wuwe Israeli,
Neribuka eriganyira riwe,
55Ngoko abuga na botata wetu,
Uku Abrahamu noko lubuto luwe kera na kera.
56Neryo Maria mwikala naye nga mikera isatu, neryo mwasuba omo nyumba yiwe.
57Nikwa omugulu weributa ryaElizabeti mwabererera, mwa buta omwana wobulume. 58Nabalikyabo nebekitunga kiwe mobowa ngoko Mukama abirimukanyirya eriganyira riwe, mobatsema haguma naye. 59Noko kiro kyomunani mobasa neribania omwana; ibakasonda erimwahula mo Zakaria ngerina rise wuwe, 60nikwa nyinya wuwe mwasubiryabo ati, Eyihi; asyahulwa mo Yoane. 61Nabo mobabuga naye bati, Sihari omo kitunga kyawe oyo kahulawa omo rina eri. 62Nabo mobakoherya ise wuwe, erimubulya ngakasonda erimwahula mondi. 63Naye mwasaba ekyerisakako, mwasaka ati, Erina riwe yo Yoane. Nabosi mobasweka. 64Neryo-neryo obuno buwe mobwakumbukala nolulimi luwe molwagobokala, mwa buga, mwapipa Mungu. 65Neriubaha moryahika oko bosi ababya bahimbire hakuhi naye. Nemyatsi eyi moyatulwa omo kihugo kyosi kyebitwa kya Yudea; 66nabosi bowabyo moba bikabyo omo mitima yabo, bati, Omwana oyu asyabyaki kwehi? Kusangwa ebyala byoMukama mobyabya naye. 67Na Zakaria ise wuwe musulibwa neKirimu Kibuyirire, mwaminyerera ati,
68Omuyisa abye oko Mukama Mungu waIsraeli,
Kusangwa abirisyabana abandu buwe, neritongolyabo,
69Abirituhanganirya erihembe eryerilamibwa busana netu
Omo nyumba yomugombe wuwe Dawidi,
70Ngoko abuga omo buno bwabaminyereri buwe babuyirireeritsuka kera,
71Tulamibawe oko syonzigu syetu, nomo byala byabosiabakatukwa obusu;
72Erikangya eriganyira olwalagawa abotata wetu,
Neriyibuka erilagana riwe ribuyirire,
73Erilahirya eryo alahiriraya tata wetu Abrahamu,
74Atuhe, itukatongolibawa omo byala byesyonzigu syetu,
Itwamukolera butsira obuba,
75Omo ribuyirire neritunganene embere siwe ebiro byosibyengebe yetu.
76Nawe, mwana, wasyahulwa mo muminyereri wowEndata Kutsibu;
Kusangwa wasyatangirira embere syoMukama erikokotya esyonzira siwe,
77Eriha eriminya yerilama oko bandu buwe
Eribuyira ebibi byabo,
78Busana nobolo bweriganyira ryoMungu wetu,
Omugulu omusakala werikya asyatuhulukira erilwa endata
79Erikolerya oko bikere omo mwirimya nomo kitutu kyoluholo,
Erisondola ebisandu byetu omo nzira yobuholo.
80Nomwana mwakula mwabya namaka omo kirimu, kandi mwabya omo mbwarara erihika oko kiro ahulukira abaIsraeli.
Currently Selected:
Luka 1: NTN62
Highlight
Share
Copy
Want to have your highlights saved across all your devices? Sign up or sign in
Le Nouveau Testament et les Psaumes en Ndandi © British and Foreign Bible Society, 1962.
