Mariko 16
16
Erilubuka ryaYesu
1Esabatu yabere yahwa, Maria Magdalene, na Maria nyinya wa Yakobo, na Salome mobagula manukato, imo batoka muhakabya. 2Nomongyakya-ngyakya ekiro kyeritsuka yenga mobaya okwisinda eryuba ryabihuluka. 3Nabo ibalwe bakabulania bati, Nindi yukandikumbagalya eribwe busana netu eriri oko lukyo lweyisinda kwehi? 4Kandi babere basumba ameso, ibalangira eribwe iryabirikumbagariribwa enyuma; kusangwa ryabya inene kutsibu. 5Mobingira omwi sinda, mobalangira omulwana inianikere oko luhande lwamali, iniambite ekanzu ihenirye; mobasweka. 6Naye mwabuga nabo ati, Simusweke; mukasonda-sonda Yesu weNazareti, oyo wabambawa. Abirilubuka, siari hano; lebaya aho bamuhira. 7Nikwa mugende, mubwire abiga buwe na Petero muti akagenda embere wenyu eGalilaya; eyo yomwasyamulolerako, ngoko ababwira. 8Nabo mobahuluka mobatibita erilwa okwi sinda; kusangwa erititimana nerisweka byamabihika kubo; nabo mobatabwira mundu kindu, kusangwa ibubahire.
Yesu mwahulukira abiga
9Nikwa abere abilubuka Omongyakya-ngyakya oko kiro kyeritsuka yenga, mwatsuka eriminyikala ku Maria Magdalene, oyo alusaya kwesyombinga sirinda. 10Naye mwagenda mwa yabwira ababya haguma naye, ibakarira neritoya emisonia. 11Nabo omugulu bowa kwaneho kandi kwabirilolwako naye, mobatikirirya.
12Enyuma waho mwaminyikala iniasosire ogundi musindo, oko babiri bakubo abalendera, omo nzira yabo okoli. 13Mo basubula mobabwira abandi, nikwa nabo mobatikiriryabo.
14Enyuma waho mwaminyikala okwikumi na muguma ibanikere bakarya; mwahayirabo busana neritendikirirya ryabo nerikala ryomutima, kusangwa isibetikirirya abamulolako abi lubuka. 15Naye mwabuga nabo ati, Mugende omo kihugo kyosi mutule engulu oko bahangikawa abosi. 16Oyu kikiriraya iniabatisibwa asyalamibwa; nikwa oyu tikiriraya asyatswerwa lubi. 17Nebitikotiko ebi byasyabya oko bosi abakikiriraya: basyahiga esyombinga omo rina ryage; basyabuga omo mibuge mihyamihya; 18basyatsimba esyonzoka, kandi bamapulya ekindu ekikita, sikyendisitaboki; basyahira ebyala byabo oko bakoni; ibalama.
Yesu mwaya elubula
19Nikwa oMukama Yesu abere abibuga nabo, mwatwalwa elubula, mwikala oko byala byamali byoMungu. 20Nabo mobagenda neritulago ehosi, oMukama inianemokola haguma nabo nerisikya eKinywa ekyo busana nebitikotiko byabya bikwamirekyo. Bibye bitya.
Currently Selected:
Mariko 16: NTN62
Highlight
Share
Copy
Want to have your highlights saved across all your devices? Sign up or sign in
Le Nouveau Testament et les Psaumes en Ndandi © British and Foreign Bible Society, 1962.
